Pfukelani kha mafhungo

Pfukelani kha zwi re ngomu

U Shumela Yehova Hu Sa Athu U Ḓa Misi Mivhi

U Shumela Yehova Hu Sa Athu U Ḓa Misi Mivhi

“U songo hangwa Muvhumbi wau.”—MUH. 12:1.

1, 2. (a) Ndi nyeletshedzo ifhio ye Salomo a hevhedzwa uri a i ṅwalele vhaswa? (b) Ndi ngani Vhakriste vha re miṅwahani ya vhu-50 u ya nṱha vhe na dzangalelo kha nyeletshedzo ya Salomo?

KHOSI SALOMO o hevhedzwa uri a vhudze vhaswa maipfi a tevhelaho: “U songo hangwa Muvhumbi wau misi Ú tshee muswa, hú sathu u ḓa misi mivhi.” “Misi mivhi” ndi ifhio? Salomo o shumisa luambo lwa vhurendi lu takadzaho u ṱalusa maḓuvha a khombo a ḓiswaho nga vhulala—thetheṅwa, u dedengela ha magona, u kulea maṋo, u sa vhona zwavhuḓi, u sa pfa zwavhuḓi, u vha na mmvi na u kotama. A hu na muthu ane a fanela u lindela uri a swike kha honoho vhuimo a sa athu u thoma u shumela Yehova.—Vhalani Muhuweleli 12:1-5.

2 Vhakriste vhanzhi vha re miṅwahani ya vhu-50 u ya nṱha vha kha ḓi vha na nungo nnzhi. Vha nga kha ḓi vha vhe na mmvi, fhedzi a vha athu u vha na thaidzo dza mutakalo dzo ṱaluswaho nga Salomo. Naa vhenevha Vhakriste vho no aluwaho vha nga vhuyelwa nga nyeletshedzo yo hevhedzwaho ye ya ṋewa vhaswa, ine ya ri: “U songo hangwa Muvhumbi wau”? Yeneyo nyeletshedzo i amba mini?

3. U humbula nga ha Musiki washu Muhulwane zwi katela mini?

 3 Naho ro no shumela Yehova lwa miṅwaha minzhi, zwi nga vha zwavhuḓi arali nga zwiṅwe zwifhinga ra nga imanyana nahone ra humbula nga ha nḓila ine Musiki washu a vha muhulwane ngayo. O sika zwithu zwi tshilaho nga nḓila i mangadzaho vhukuma. A hu na muthu ane a nga pfesesa nḓila yo serekanaho ye zwa sikwa ngayo. Zwithu zwinzhi zwo fhamba-fhambanaho zwe Yehova a zwi sika zwi ita uri ri takalele vhutshilo nga nḓila nnzhi. Musi ri tshi elekanya nga ha tsiko ya Yehova, ri vusulusa nḓila ine ra dzhiela nṱha ngayo lufuno, vhuṱali na maanḓa awe. (Ps. 143:5) Fhedzi u humbula nga ha Musiki washu Muhulwane zwi dovha zwa katela u humbula nga ha vhuḓifhinduleli vhune ra vha naho khae. Musi ri tshi elekanya nga ha zwenezwi, zwi ri ṱuṱuwedza uri ri sumbedze nḓila ine ra livhuha ngayo Musiki washu nga u mu shumela nga vhuḓalo nga hune zwa nga konadzea ngaho musi ri tshi kha ḓi tshila.—Muh. 12:13.

ZWIBULI ZWO KHETHEAHO MUSI MUTHU O NO ALUWA

4. Vhakriste vha re na tshenzhelo nnzhi vha nga ḓivhudzisa mbudziso ifhio, nahone ndi ngani?

4 Arali no no vha mualuwa a re na tshenzhelo, ni fanela u ḓivhudzisa mbudziso ya ndeme ine ya ri, ‘Ndi ḓo ita mini nga vhutshilo hanga zwino, samusi ndi tshi kha ḓi vha na maanḓa na nungo?’ Sa Mukriste a re na tshenzhelo, ni na zwibuli zwine vhaṅwe vha si vhe nazwo. Ni nga fhirisela zwe na zwi guda nga ha Yehova kha vhaswa. Ni nga khwaṱhisa vhaṅwe nga u vha anetshela tshenzhelo dze na vha nadzo musi ni tshi khou shumela Mudzimu. Khosi Davida o rabelela uri a wane zwibuli zwa u ita nga u ralo. O ṅwala uri: “Mudzimu, wo mpfunza u bva hanani hanga. . . . Zwino ndi tshi vhó kalaha, ndi tshi tshena mbvi, U sóngo ndaṱa, ndi vhuye ndi hanele vhaḓuhulu zwa tshanḓa tshau, na zwa maanḓa au, ndi vhudze mirafho ine ya ḓo ḓa.”—Ps. 71:17, 18.

5. Vhakriste vha vhaaluwa vha nga fhirisela hani kha vhaṅwe zwe vha zwi guda?

5 Ni nga kovhela hani vhaṅwe vhuṱali he na vhu wana miṅwahani yo fhiraho? Khamusi ni nga ramba vhashumeli vha Mudzimu vhane vha kha ḓi vha vhaswa hayani haṋu u itela u vha na vhukonani vhu ṱuṱuwedzaho. Kana ni nga vha humbela uri vha ye na inwi vhuḓinḓani ha Vhukriste nahone vha vhone dakalo ḽine na vha naḽo tshumeloni ya Yehova. Elihu wa tshifhingani tsha kale o ri: “Hu ambe maḓuvha; vhunzhi ha miṅwaha nga vhu ḓivhadze vhuṱali.” (Yobo 32:7) Muapostola Paulo o ṱuṱuwedza vhafumakadzi vha Vhakriste uri vha ṱuṱuwedze vhaṅwe nga zwine vha zwi amba na nga tsumbo yavho. O ṅwala uri: “Vhafumakadzi vhahulwane . . . vha gudise zwivhuya.”—Tito 2:3.

HUMBULANI NḒILA INE NA NGA THUSA NGAYO VHAṄWE

6. Ndi ngani Vhakriste vha re na tshenzhelo nnzhi vha songo fanela u dzhiela fhasi vhukoni havho?

6 Arali ni Mukriste a re na tshenzhelo, hu na zwithu zwinzhi zwine na nga thusa vhaṅwe ngazwo. Humbulani nga ha zwine na zwi pfesesa zwino, zwe na vha ni sa zwi pfesesi miṅwahani ya 30 kana ya 40 yo fhiraho. Ni nga shumisa maitele a Bivhili vhutshiloni haṋu nga vhutsila. A zwi timatimisi uri ni na vhukoni ha u swikelela mbilu dza vhaṅwe nga ngoho ya Bivhili. Arali ni muhulwane wa tshivhidzo, ni kona u thusa vhahashu vhane vha khakha. (Vhagal. 6:1) Khamusi no guda u ita mishumo ya tshivhidzo, mihasho ya maguvhangano kana u fhaṱa Holo dza Muvhuso. Ni nga vha ni tshi ḓivha nḓila dza u ṱuṱuwedza madokotela u shumisa dziṅwe nḓila dza ngalafho dzine dza iledza u shumiswa ha malofha. Naho ni tshi kha ḓi tou bva u guda ngoho, ni na tshenzhelo ya ndeme vhutshiloni. Sa tsumbo, arali no alusa vhana, ni ḓo vha no wana vhuṱali vhu shumaho. Vhakriste vha re vhaaluwa vha na vhukoni vhuhulwane ha u ṱuṱuwedza vhathu vha Yehova nga u funza, u ranga phanḓa na u khwaṱhisa vhahashu vha tshinnani na vha tshisadzini.—Vhalani Yobo 12:12.

7. Vhakriste vho no aluwaho vha nga gudisa hani vhaswa nga nḓila i bvelelaho?

 7 Ni nga shumisa hani vhukoni haṋu nga vhuḓalo? Khamusi ni nga sumbedza vhaswa nḓila ya u thoma na u fara pfunzo dza Bivhili. Arali ni wahashu wa tshisadzini, ni nga eletshedza vhomme vhaswa nḓila ya u linganyisela zwithu zwa muya musi vha tshi khou alusa vhana vhaṱuku. Arali ni wahashu wa tshinnani, ni nga funza vhahashu vha tshinnani vhaswa u ṋekedza nyambo nga u fhisea na u huwelela mafhungo maḓifha nga nḓila i bvelelaho. Ni nga vha sumbedza nḓila ine na ṱuṱuwedza ngayo nga lwa muya vhahashu vha tshinnani na vha tshisadzini vha re vhalala musi ni tshi vha dalela. Naho ni si tshee na maanḓa e na vha ni nao mathomoni, ni na zwibuli zwavhuḓi zwa u gudisa vhaswa. Ipfi ḽa Mudzimu ḽi ri: “Nungo ndi tshiala tsha vhatuka; vhahulwane, vhugala ndi mmvi.”—Mir. 20:29.

U SHUMA HUNE HA VHA NA ṰHOḒEA KHULWANE

8. Muapostola Paulo o ita mini musi o no aluwa?

8 Muapostola Paulo o shumisa nungo dzawe dzoṱhe u shumela Mudzimu musi o no aluwa. Musi a tshi vhofhololwa dzhele ya ngei Roma nga 61 C.E., o vha o no konḓelela mushumo wa vhurumiwa u lemelaho lwa miṅwaha minzhi nahone a nga kha ḓi vha o dzula henefho Roma u itela u huwelela. (2 Vhakor. 11:23-27) A zwi timatimisi uri vhahashu vha re ḓoroboni yeneyo khulwane vho dzhiela nṱha thikhedzo yawe i bvelaho phanḓa. Fhedzi Paulo o vhona uri hu na ṱhoḓea khulwane seli ha malwanzhe. E na Timotheo na Tito, o bvela phanḓa na mushumo wawe wa vhurumiwa, a ya Efesa, nga murahu a fhirela Keresa, nahone khamusi o ya na Makedonia. (1 Tim. 1:3; Tito 1:5) A ri ḓivhi arali o dalela na ḽa Spain, fhedzi o vha a tshi ṱoḓa u ita nga u ralo.—Vharoma 15:24, 28.

9. Petro a nga vha o pfuluwa lini u itela u shuma fhethu hu re na ṱhoḓea khulwane? (Sedzani tshifanyiso tsha u thoma.)

9 Muapostola Petro a nga vha o vha e na miṅwaha i fhiraho 50 musi a tshi pfulutshela fhethu hu re na ṱhoḓea khulwane. Ndi ngani zwenezwo zwi tshi nga vha zwi ngoho? Arali o vha e thanga nthihi na Yesu kana khamusi e muhulwanenyana, o vha a tshi ḓo vha e na miṅwaha i ṱoḓaho u vha 50 musi a tshi ṱangana na vhaṅwe vhaapostola ngei Yerusalema nga ṅwaha wa 49 C.E. (Mish. 15:7) Nga murahu ha wonoyo muṱangano, Petro o ya a dzula Babele, nahone a zwi timatimisi uri o vha o ya u funza vhadzulapo vhanzhi vha Vhayuda vha henefho fhethu. (Vhagal. 2:9) O vha a tshi dzula henefho musi a tshi ṅwala vhurifhi hawe ha u thoma ho hevhedzwaho nga 62 C.E. (1 Pet. 5:13) U dzula shangoni ḽi sili zwi nga vha khaedu, fhedzi Petro ho ngo tendela mafhungo a uri u khou aluwa, a tshi mu ita uri a si takalele u shumela Yehova nga vhuḓalo.

10, 11. Anetshelani tshenzhelo ya muṅwe wahashu we a pfulutshela fhethu hu re na ṱhoḓea khulwane musi o no vha mualuwa.

10 Ṋamusi, Vhakriste vhanzhi vha re miṅwahani ya vhu-50 na u fhira, vha wana uri zwiimo zwavho zwo shanduka na uri vha nga kona u shumela Yehova nga dziṅwe nḓila. Vhaṅwe vho pfulutshela hune ha vha na ṱhoḓea khulwane. Sa tsumbo, Robert o ṅwala uri: “Nṋe na mufumakadzi wanga ro vha ri miṅwahani ya vhu-50 musi ri tshi ṱhogomela zwibuli zwine ra vha nazwo. Murwa washu muthihi fhedzi o vha a si tsha dzula hayani, ro vha ri si tshe na vhabebi vha re vhalala vha ṱoḓaho u ṱhogomelwa, nahone ro vha ro wana ifa ḽiṱuku. Ndo vhona uri arali ra rengisa nnḓu yashu, ri ḓo kona u badela tshikolodo tshashu tsha nnḓu tsho salaho nahone ra kona u ḓiṱhogomela u swikela ndi tshi wana tshelede yanga ya phesheni. Ro pfa uri ngei Bolivia tshivhalo tsha vhathu vhane vha ṱanganedza pfunzo dza Bivhili tshi nṱha nahone mitengo ya zwithu shangoni ḽeneḽo i fhasi. Nga zwenezwo, ra mbo ḓi pfulutshela henengei. U ḓowela haya hashu huswa zwo vha zwi songo leluwa. Zwithu zwoṱhe zwo vha zwo fhambana na zwe ra vha ro zwi ḓowela ngei Amerika Devhula. Fhedzi vhuḓidini hashu ho lambedzwa vhukuma.”

 11 Robert o dovha a ri: “Zwino ri dzula ro farakanea nga mishumo ya tshivhidzo. Vhaṅwe vha vhathu vhe ra guda navho Bivhili vho lovhedzwa. Muṅwe muṱa we ra vha ri tshi guda nawo Bivhili wo vha u tshi shaya vhukuma, u tshi dzula kusini ku re khilomithara dzi si gathi u bva hune ra dzula hone. Fhedzi vhege iṅwe na iṅwe, wonoyo muṱa u fara lwendo lulapfu lwa u ya ḓoroboni u itela u vha hone miṱanganoni. Ro takala vhukuma musi ri tshi u vhona u tshi ita mvelaphanḓa na musi tanzhe ḽa vhaṱhannga ḽi tshi dzhenela vhuvulanḓila!”

ṰHOḒEA TSIMUNI DZA NYAMBO DZISILI

12, 13. Anetshelani tshenzhelo ya Mukriste we a thoma u shumela Yehova nga dziṅwe nḓila musi o no bva phesheni.

12 Zwigwada na zwivhidzo zwa luambo lusili zwi nga vhuyelwa vhukuma nga tsumbo dza vhahashu vha tshinnani na vha tshisadzini vho no aluwaho. Zwiṅwe hafhu, zwi nga takadza vhukuma u shuma kha dzenedzo tsimu. Sa tsumbo, Brian o ṅwala uri: “Nṋe na mufumakadzi wanga ro vha ri songo tsha takala vhutshiloni musi ndi tshi swikisa miṅwaha ya 65 ine na bva ngayo phesheni kha ḽa Britain. Vhana vhashu vho vha vho no ṱuwa hayani, nahone ro vha ri sa koni u wana vhathu vha re na dzangalelo vhane ra nga guda navho Bivhili. Nga zwenezwo, nda ṱangana na muṱhannga wa Mutshaina we a vha a tshi khou ita ṱhoḓisiso yunivesithi ya henefho. A tenda u ḓa miṱanganoni nahone nda thoma u guda nae Bivhili. Nga murahu ha vhege dzi si gathi, a thoma u ḓa na mugudiswa ngae miṱanganoni. Nga murahu ha vhege mbili, a ḓa na wa vhuraru na wa vhuṋa.

13 “Musi muṱoḓisisi wa Mutshaina wa vhuṱanu a tshi humbela pfunzo ya Bivhili, ndo humbula uri, ‘u vha hanga na miṅwaha ya 65 a zwi ambi uri ndi fanela u litsha tshumelo ya Yehova.’ Ngauralo, nda vhudzisa mufumakadzi wanga ane nda mu fhira nga miṅwaha mivhili, arali a tshi nga takalela u guda Lutshaina. Ra lu guda nga rekhodo dzo rekhodwaho. Zwo itea miṅwahani ya fumi yo fhiraho. U huwelela tsimuni ya luambo lusili zwo ita uri ri dovhe ri ḓipfe ri vhaswa. U swika zwino, ro no guda Bivhili na Vhatshaina vha 112! Vhunzhi havho vho no ḓa muṱanganoni. Zwino muṅwe wavho o no vha muvulanḓila u fana na riṋe.”

Ni nga vha ni sa athu vha mulala nga maanḓa u itela u ṱanḓavhudza vhuḓinḓa haṋu (Sedzani dziphara 12, 13)

 ḒIPHINENI NGA U ITA ZWINE NA NGA KONA

14. Vhakriste vho no aluwaho vha nga takalela mini, nahone tsumbo ya Paulo i vha ṱuṱuwedza hani?

14 Naho Vhakriste vhanzhi vha re miṅwahani ya vhu-50 vhe na zwibuli zwavhuḓi zwa u ita zwithu zwiswa tshumeloni ya Yehova, a si vhoṱhe vhane vha nga kona. Vhaṅwe a vha na mutakalo wavhuḓi nahone vhaṅwe vha ṱhogomela vhabebi vhane vha vha vhalala kana vhana. Ni nga takadzwa nga u ḓivha uri Yehova u dzhiela nṱha tshiṅwe na tshiṅwe tshine na tshi ita tshumeloni yawe. Nṱhani ha u vhilaedziswa nga zwine ni si kone u zwi ita, ḓiphineni nga zwine na zwi kona. Ṱhogomelani tsumbo ya muapostola Paulo. Lwa miṅwaha yo vhalaho, o vha o farwa, a tshi kundelwa u ita nyendo dzawe dza vhurumiwa. Fhedzi musi vhathu vha tshi mu dalela, o vha a tshi amba navho nga Maṅwalo nahone a tshi khwaṱhisa lutendo lwavho.—Mish. 28:16, 30, 31.

15. Ndi ngani Vhakriste vha re vhalala vhe vha ndeme vhukuma?

15 Yehova u dovha a dzhiela nṱha zwine vhalala vha kona u zwi ita tshumeloni yawe. Naho Salomo o amba uri misi mivhi ine mutakalo wa vha u si wavhuḓi a si tshifhinga tshi takadzaho tsha vhutshilo, Yehova u dzhiela nṱha zwine Vhakriste vha re vhalala vha zwi khunyeledza musi vha tshi mu renda. (Luka 21:2-4) Zwivhidzo zwi dzhiela nṱha tsumbo ya vhashumeli vha tshifhinga tshilapfu vha fulufhedzeaho.

16. Ndi ndugelo dzifhio dze Ana a si dzi wane, fhedzi o vha a tshi kona u ita mini u itela u gwadamela Mudzimu?

16 Bivhili i amba uri muṅwe mukegulu ane a pfi Ana o bvela phanḓa a tshi renda Yehova nga u fulufhedzea vhutshiloni hawe. O vha e tshilikadzi i re na miṅwaha ya 84 musi Yesu a tshi bebwa. Zwi vhonala uri ho ngo tshila u swikela a tshi vha mutevheli wa Yesu na u ḓodzwa nga muya mukhethwa, kana u huwelela mafhungo maḓifha a Muvhuso. Naho zwo ralo, Ana o takalela zwe a vha a tshi kona u zwi ita. “O vha a tshi dzula e hone thembeleni, a tshi ita tshumelo khethwa vhusiku na masiari.” (Luka 2:36, 37) Musi tshifhe a tshi ṋekedza zwioro thembeleni matsheloni na madekwana maṅwe na maṅwe, Ana o vha a tshi vha e na gogo ḽo kuvhanganaho muṱani a tshi khou rabelela mbiluni, khamusi lwa hafu ya awara. Musi a tshi vhona Yesu a tshee lushie, a thoma u “amba nga ha ṅwana kha vhoṱhe vho lindelaho u tshidzwa ha Yerusalema.”—Luka 2:38.

17. Ri nga thusa hani Vhakriste vha re vhalala khathihi na vhane vha khou lwala uri vha ṱanganele kha vhurabeli ha ngoho?

17 Ṋamusi, ri fanela u fhaṱutshela u thusa Vhakriste vha re vhalala kana vhane vha khou lwala. Vhaṅwe vhane vha takalela u ya miṱangoni ya Vhukriste na maguvhanganoni vha nga kha ḓi sa kona u ita nga u ralo. Huṅwe fhethu, nga lufuno zwivhidzo zwi dzudzanyela vhalala vho raloho uri vha thetshelese miṱangano nga luṱingo. Huṅwe fhethu, zwenezwi zwi nga kha ḓi sa konadzea. Naho zwo ralo, Vhakriste vha sa koni u vha hone miṱanganoni vha nga tikedza vhurabeli ha ngoho. Sa tsumbo, thabelo dzavho dzi a thusa uri tshivhidzo tsha Vhukriste tshi bvelele.—Vhalani Psalme 92:13, 14.

18, 19. (a) Ndi ngani Vhakriste vho no aluwaho vha tshi nga kha ḓi sa ṱhogomela nḓila ine vha ṱuṱuwedza ngayo vhaṅwe? (b) Ndi vhafhio vhane vha nga shumisa nyeletshedzo ine ya ri: “U songo hangwa Muvhumbi wau”?

18 Vhakriste vha re vhalala vha nga kha ḓi sa ṱhogomela nḓila ine vha ṱuṱuwedza ngayo vhaṅwe. Sa tsumbo, naho Ana o vha o fulufhedzea miṅwaha yeneyo yoṱhe thembeleni, khamusi ho ngo zwi ṱhogomela uri nga murahu ha miṅwaha ya maḓana, tsumbo yawe yo vha i tshi nga ṱuṱuwedza vhaṅwe. Nḓila ye a vha a tshi funa ngayo Yehova yo ṅwalwa Maṅwaloni. A zwi timatimisi uri nḓila ine na funa ngayo Mudzimu yo ṅwalwa mbiluni dza vhagwadameli nga inwi. Ndi ngazwo Ipfi ḽa Mudzimu ḽi tshi ri: “Mmvi ndi tshiala tsha vhugala; tshi wanwa nga vha nḓila ya zwivhuya.”—Mir. 16:31.

19 Hu na mikano kha zwine roṱhe ra nga kona u zwi ita tshumeloni ya Yehova. Fhedzi u nga ri roṱhe vhane ra kha ḓi vha na nungo na maanḓa ri nga dzhiela nṱha maipfi o hevhedzwaho ane a ri: “U songo hangwa Muvhumbi wau . . . hú sathu u ḓa misi mivhi.”—Muh. 12:1.