Pfukelani kha mafhungo

Pfukelani kha zwi re ngomu

“Muvhuso Wau Nga U Ḓe”—Fhedzi Lini?

“Muvhuso Wau Nga U Ḓe”—Fhedzi Lini?

“Musi ni tshi vhona zwenezwi zwithu zwoṱhe, ni ḓivhe uri . . . u tsini u muṋangoni.”—MAT. 24:33.

1, 2. (a) Ndi mini zwine zwa nga ṱuṱuwedza zwine ra khou zwi vhona zwa vhukuma? (b) Ndi mini zwine ra nga vha na vhungoho nazwo malugana na Muvhuso wa Mudzimu?

KHAMUSI no no zwi ṱhogomela uri vhathu vhe vha vhona tshiṅwe tshiitea, kanzhi a vha humbuli zwidodombedzwa zwatsho nga nḓila i fanaho. Nga hu fanaho, muthu a nga wana zwi tshi mu konḓela u humbula zwoṱhe zwe dokotela a zwi amba musi o no mu poṱiela. Kana muṅwe a nga konḓelwa u wana khii kana mangilasi a maṱo, naho e henefho tsini. Zwenezwi zwoṱhe zwi tshimbidzana na zwine vhaṱoḓisisi vha zwi vhidza uri ndi muṅwe mufuda wa u pofula—u sa ṱhogomela kana u hangwa zwiṅwe zwithu nga nṱhani ha u ita zwithu zwinzhi nga tshifhinga tshithihi. Vha amba uri yeneyi ndi iṅwe nḓila ine vhuluvhi hashu ha shuma ngayo.

2 Vhathu vhanzhi ṋamusi vho pofula nga lwa pfanyisedzo malugana na zwiitea zwa shango. Vha nga kha ḓi tenda uri shango ḽo shanduka nga nḓila khulwane u bva nga 1914, fhedzi a vha pfesesi zwine zwenezwi zwiitea zwa amba zwone. Riṋe sa vhagudi vha Bivhili, ri a zwi ḓivha uri Muvhuso wa Mudzimu wo thoma u vhusa nga 1914 musi Yesu a tshi vhewa sa Khosi ngei ṱaḓulu. Fhedzi ri a zwi ḓivha uri hu katelwa zwo engedzeaho malugana na thabelo ine ya ri “Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.” (Mat. 6:10) Yeneyi thabelo i ḓo fhindulwa nga vhuḓalo musi ano maitele mavhi a tshi fheliswa. Musi zwenezwo zwo no itea, ndi hone zwine Mudzimu a zwi funa  zwi tshi ḓo itwa kha ḽifhasi vhunga zwi tshi itwa ngei ṱaḓulu.

3. U guda Ipfi ḽa Mudzimu zwi ri vhuyedza hani?

3 Nga nṱhani ha uri ri guda Ipfi ḽa Mudzimu misi yoṱhe, ri kona u vhona uri vhuporofita vhu khou ḓadzea zwino. Zwenezwo vhathu vhanzhi a vha zwi ṱhogomeli! Vho farakanea vhukuma nga vhutshilo na zwine vha zwi ṱoḓa nahone a vha londi vhuṱanzi vhu pfalaho ha uri Kristo u khou vhusa u bva nga 1914, nahone hu si kale u ḓo ḓisa khaṱulo ya Mudzimu. Naho zwo ralo, ḓivhudziseni zwi tevhelaho: Arali no no shumela Mudzimu lwa miṅwaha minzhi, naa ni tshe no fhaṱutshela na u vhilaedziswa nga ha zwine zwifhinga zwashu zwa amba zwone u fana na kale? Naho ni tshi kha ḓi tou bva u vha Ṱhanzi, ndi mini zwe na livhisa ṱhogomelo khazwo? Hu sa londwi phindulo dzashu, kha ri haseledze zwiitisi zwiraru zwa ndeme zwi itaho uri ri vhe na vhungoho ha uri Khosi ya Mudzimu yo ḓodzwaho, hu si kale i ḓo dzhia vhuṅwe vhukando u itela uri zwine Mudzimu a zwi funa zwi itwe kha ḽifhasi nga vhuḓalo.

VHAṊAMELI VHA DZIBERE VHO ḒIVHONADZA

4, 5. (a) Yesu o vha a tshi khou ita mini u bva nga 1914? (Sedzani tshifanyiso tsha u thoma.) (b) Vhaṋameli vhararu vha dzibere vha fanyisela mini, nahone zwithu zwo tshimbila nga nḓila-ḓe?

4 Nga 1914, Yesu Kristo—ane a fanyiswa sa o ṋamelaho bere tshena—o vhewa uri a vhe Khosi ṱaḓulu. Nga u ṱavhanya, o mbo ḓi thoma nga u kunda maitele mavhi a Sathane. (Vhalani Nzumbululo 6:1, 2.) Ṱhaluso ya vhuporofita i re kha Nzumbululo ndima ya 6, yo ṋea tshiitisi tsha u lavhelela uri musi Muvhuso wa Mudzimu wo no thoma u vhusa, zwiimo zwa shango zwo vha zwi tshi ḓo ṋaṋa u tshinyala—ho vha hu tshi ḓo vha na dzinndwa, u ṱahela ha zwiḽiwa, malwadze na zwiṅwe zwiitisi zwa lufu. Zwenezwi zwiitea zwi fanyiselwa nga vhaṋameli vhararu vha dzibere vhane vha khou tevhela Yesu Kristo vhe tsini-tsini nae.—Nzumb. 6:3-8.

5 Samusi zwo dzula zwo ambiwa, mulalo wo ‘dzhiiwa kha ḽifhasi’ hu sa londwi mafulufhedziso a uri vhathu vha tshaka dzoṱhe na mashango zwi ḓo shumisana. Nndwa ya Shango ya U Thoma i nga dzhiiwa sa mathomo a nndwa dzi swayeaho, samusi zwi tshi vhonala kha zwiitea zwa shango zwa zwenezwino. Hu sa londwi mvelaphanḓa kha zwa ekonomi na kha zwa saintsi u bva nga 1914, u ṱahela ha zwiḽiwa zwi bvela phanḓa zwi tshi ita uri shangoni hu vhe na khuḓano na dzinndwa. Zwiṅwe hafhu, zwi tou vha khagala uri mifuda yoṱhe ya ‘malwadze’ na khombo dza mupo zwi bvela phanḓa zwi tshi vhulaha vhathu vha dzimilioni ṅwaha muṅwe na muṅwe. Zwenezwi zwiitea zwi na khombo, zwi itea lunzhi-lunzhi nahone zwi vhulaha vhathu vhanzhi u fhira naho hu lini kha ḓivhazwakale ya vhathu. Naa ni dzhiela nṱha zwine zwenezwi zwa amba zwone?

Samusi vhaṋameli vho ṋamela dzibere, vhuimo ha shango vhu bvela phanḓa vhu tshi ṋaṋa (Sedzani dziphara 4, 5)

6. Ndi vhafhio vhe vha pfesesa u ḓadzea ha vhuporofita ha Bivhilini, nahone zwenezwo zwo vha sudzulusela u ita mini?

6 Vhathu vhanzhi vho thithiswa nga nṱhani ha Nndwa ya Shango ya U Thoma na mukhushwane wa Spain. Naho zwo ralo, Vhakriste vho ḓodzwaho vho vha vho lavhelela ṅwaha wa 1914 nga maṱo matswuku sa vhufhelo ha Zwifhinga zwa Vhannḓa kana “zwifhinga zwo vhewaho zwa dzitshaka.” (Luka 21:24) Vho vha vhe si na vhuṱanzi ho fhelelaho nga ha zwe zwa vha zwi tshi ḓo itea. Naho zwo ralo, vho vha vha tshi ḓivha uri nga 1914 ho vha hu tshi ḓo vha na tshiitea tsha ndeme malugana na vhuvhusi ha Mudzimu. Musi vha tshi vho pfesesa u ḓadzea ha vhuporofita ha Bivhili, vho huwelela nga tshivhindi kha vhaṅwe uri vhuvhusi ha Mudzimu ho thoma. Vhuḓidini havho ha u ḓivhadza nga ha Muvhuso ho ita uri vha tovholwe vhukuma. Nga nṱhani ha uri honoho u tovholwa ho itea kha tshaka nnzhi, zwenezwo zwo vha u ḓadzea ha vhuporofita nga nḓila yo engedzeaho. Miṅwahani minzhi ye ya tevhela, maswina a Muvhuso o ‘tshinya mulayo.’ O dovha a fara vhahashu luvhi, a vha valela dzhele na u vha vhulaha nga u vha hunga, u vha thuntsha kana u vha tumula ṱhoho.—Ps. 94:20; Nzumb. 12:15.

7. Ndi ngani vhathu vhanzhi vha sa koni u pfesesa zwine zwiitea zwa shango zwa amba zwone zwa vhukuma?

 7 Samusi hu na vhuṱanzi vhunzhi nga u rali ha uri Muvhuso wa Mudzimu wo no thoma u vhusa ṱaḓulu, ndi ngani vhunzhi ha vhathu vha sa tendi zwine zwenezwi zwa amba zwone? Ndi ngani vha sa koni u vhambedza vhuimo ha shango na vhuporofita ha Bivhilini he vhathu vha Mudzimu vha vhu phaḓaladza u bva kale? Naa hu nga vha hu nga nṱhani ha uri vhathu vhanzhi vho livhisa ṱhogomelo kha zwine vha kona u zwi vhona fhedzi? (2 Vhakor. 5:7) Naa u farakanea havho nga zwithu zwavho zwi vha ita uri vha si kone u vhona zwine Mudzimu a khou zwi ita? (Mat. 24:37-39) Naa vhaṅwe vhavho vha thithiswa nga mazwifhi a Sathane? (2 Vhakor. 4:4) Zwi ṱoḓa lutendo na u vha na mavhonele a lwa muya u itela u pfesesa zwine Muvhuso wa Mudzimu wa khou zwi ita. Zwi takadza lungafhani u pfesesa zwine zwa khou itea!

VHUVHI VHU ḒO TOU ṊAṊA

8-10. (a) Luṅwalo lwa 2 Timotheo 3:1-5 lwo ḓadzea hani? (b) Ndi ngani ri tshi nga amba uri vhuvhi ho ṋaṋa?

8 Hu na tshiitisi tsha vhuvhili tshi itaho uri ri ḓivhe uri hu si kale Muvhuso wa Mudzimu u ḓo vhusa kha ḽifhasi. Tshenetsho tshiitisi ndi u ṋaṋa ha vhuvhi shangoni. Lwa miṅwaha i ṱoḓaho u vha tshigidi, vhuimo ho dzulaho ho ambiwa kha 2 Timotheo 3:1-5 vhu khou vhonala. Honoho vhuimo vhu khou ṋaṋa. Zwi tou vha khagala uri honovhu vhuporofita vhu khou ḓadzea nga ho engedzeaho. Kha ri ṱhogomele dziṅwe tsumbo dzine dza bvisela zwenezwi khagala.—Vhalani 2 Timotheo 3:1, 13.

9 Edzani u humbula nga ha phambano i re hone vhukati ha zwe zwa vha zwi tshi ofhisa nga vho-1940 kana vho-1950 na zwine zwa khou itea ṋamusi mishumoni, kha zwa u ḓimvumvusa, zwa mitambo na fesheni. Vhuvemu na u ḓifara luvhi zwo kalulaho ndi zwithu zwo ḓoweleaho ṋamusi. Vhathu vha ṱaṱisana nga uri ndi nnyi ane a vha na vhuvemu ho kalulaho, ane a ita vhuḓifari vhu songo kunaho na ane a vha na tshiṱuhu u fhira vhaṅwe. Mbekanyamushumo dza thelevishini dze dza vha dzi tshi tatisa nga vho-1950, zwino dzi vho pfi dzi nga ṱalelwa nga muṱa woṱhe. Vhathu vhanzhi vha a zwi ṱhogomela uri vhane vha ita zwa vhusawana vhu na ṱhuṱhuwedzo khulwane kha zwa u ḓimvumvusa na zwa fesheni, vha tshi tikedza matshilele avho vhathuni. Ri a livhuha vhukuma uri ri ḓivha mavhonele a Mudzimu!—Vhalani Yuda 14, 15.

10 Kana Mukriste a nga kha ḓi humbula nga  zwe zwa vha zwi tshi dzhiiwa sa vhushandukwa ha vhaswa nga vho-1950 na zwine zwa khou itea ṋamusi. Vhabebi vho vha vha tshi vhilaela arali vhana vhavho vha tshi khou daha fola, u nwa halwa kana u tshina nga nḓila i karusaho maḓipfele a zwa vhudzekani. Ṋamusi, ho ḓowelea mivhigo i tshuwisaho: Mugudiswa wa miṅwaha ya 15 o thuntsha vhane a dzhena navho kilasini, a vhulaha vhavhili nahone a huvhadza vha 13. Tshigwada tsha vhaswa vho kambiwaho tsho vhulaha musidzana wa miṅwaha ya ṱahe lwa tshiṱuhu nahone tsha rwa khotsi awe na muzwala wawe. Vhaswa vha ḽiṅwe shango ḽa ngei Asia ndi vhone vhe vha ita vhunzhi ha vhuvemu he ha itea miṅwahani ya fumi yo fhiraho. A hu na ane a nga hanedza uri vhuimo ha shango ho ṋaṋa vhukuma.

11. Ndi ngani vhathu vhanzhi vha sa ṱhogomeli uri zwithu zwi khou ṋaṋa?

11 Muapostola Petro o amba nga ho teaho a ri: “Maḓuvhani a vhufhelo hu ḓo vha na vhagoḓi vhane vha ḓo ni goḓa, vha tshi langwa nga nyemulo dzavho nahone vha ri: ‘Zwe zwa fulufhedziswa nga ha u vha hone hawe zwi ngafhi? U bva nga ḓuvha ḽe vhomakhulukuku washu vha fa, zwithu zwoṱhe zwi kha ḓi bvela phanḓa nga nḓila i fanaho na musi zwithu zwi tshi thoma u sikwa.’” (2 Pet. 3:3, 4) Ndi ngani vhathu vha tshi aravha nga yeneyi nḓila? Zwi vhonala u nga musi ri tshi vhona tshithu lwo vhalaho, a ri tsha tshi dzhiela nṱha nga maanḓa. Ri nga kha ḓi sa zwi ṱhogomela arali mavhonele a vhathu na vhuḓifari zwa shanduka nga zwiṱuku nga zwiṱuku, fhedzi arali khonani ya tsini ya shanduka ri songo zwi lavhelela, zwenezwi zwi nga kha ḓi ri kanukisa. Naho zwo ralo, honohu u tshinyala ha vhuḓifari nga zwiṱuku nga zwiṱuku hu na khombo.

12, 13. (a) Ndi ngani ri songo fanela u kulwa nungo nga zwiitea zwa shango? (b) Ndi mini zwine zwa ḓo ri thusa u konḓelela u sedzana na vhuimo ‘vhu konḓaho u sedzana naho’?

12 Muapostola Paulo o ri sevha uri “maḓuvhani a vhufhelo,” zwiimo zwi ḓo vha “zwi konḓaho u sedzana nazwo.” (2 Tim. 3:1) Fhedzi zwi a konadzea u sedzana nazwo, nga zwenezwo a ro ngo fanela u shavha ngoho ya mafhungo. Ri tshi thuswa nga Yehova, muya wawe na tshivhidzo tsha Vhukriste, ri nga kona u kunda u shoniswa kana nyofho naho dzi dzifhio nga hu bvelelaho. Ri nga kona u dzula ri tshi fulufhedzea. “Maanḓa a fhiraho o ḓoweleaho” ndi a Mudzimu, hu si ashu.—2 Vhakor. 4:7-10.

13 Ndi zwavhuḓi u ḓivha uri Paulo o thoma u amba nga vhuporofita vhu re malugana na maḓuvha a vhufhelo nga maipfi ane a ri, “ḓivha hezwi.” Eneo maipfi a khwaṱhisedza uri honoho vhuporofita vhu ḓo ḓadzea. A zwi timatimisi uri vhathu vha sa ofhi Mudzimu vha ḓo bvela phanḓa vha tshi ṋaṋa u swika Yehova a tshi dzhia vhukando ha u vha fhelisa. Vhaḓivhazwakale vho ṅwala nga ha vhathu kana lushaka lwe lwa vhuya lwa sedzana na vhuḓifari vhu songo kunaho nahone nga murahu ha zwenezwo lwa mbo ḓi wa. Naho zwo ralo, a zwi athu u vhuya zwa itea kha ḓivhazwakale yoṱhe uri vhuḓifari ha shango ḽoṱhe vhu tshinyale nga nḓila ye ha tshinyala ngayo zwino. Vhathu vhanzhi vha nga nyadza zwine zwenezwi zwa amba zwone, fhedzi zwenezwi zwiitea zwo khetheaho zwe zwa itea u bva nga 1914, zwi fanela u ri sumbedza uri ri fanela u fulufhela uri Muvhuso wa Mudzimu u ḓo dzhia vhukando hu si kale.

MURAFHO UYU U NGA SI LOVHE

14-16. Ndi tshiitisi tshifhio tsha vhuraru tshine tsha ri ita uri ri tende uri Muvhuso wa Mudzimu u ḓo ‘ḓa’ hu si kale?

14 Hu na tshiitisi tsha vhuraru tsha uri ndi ngani ri tshi fanela u vha na fulufhelo. Zwe zwa itea kha vhathu vha Mudzimu zwi sumbedza uri vhufhelo vhu tsini. Sa tsumbo, musi Muvhuso wa Mudzimu u sa athu u thoma u vhusa ngei ṱaḓulu, tshigwada tsha vhaḓodzwa vha fulufhedzeaho tsho vha tshi tshi khou shumela Mudzimu nga u fhisea. Musi zwiṅwe zwe vha vha vho zwi lavhelela malugana na zwe zwa vha zwi tshi ḓo itea nga 1914 zwi songo tsha itea, vho ita mini? Vhunzhi havho vho bvela phanḓa vha tshi shumela  Yehova nga u fulufhedzea musi vho sedzana na milingo na u tovholwa. Lwa miṅwaha yo vhalaho, vhanzhi—naho hu si vhoṱhe—vha vhenevho vhaḓodzwa vho dzula vha tshi fulufhedzea u swika vha tshi fa.

15 Kha zwidodombedzwa zwa vhuporofita hawe malugana na vhufhelo ha ano maitele a zwithu, Yesu o ri: “Murafho uyu u nga si lovhe hezwi zwithu zwoṱhe zwi sa athu itea.” (Vhalani Mateo 24:33-35.) Ri a zwi pfesesa uri musi Yesu a tshi amba nga “murafho uyu,” o vha a tshi khou ambela kha zwigwada zwivhili zwa Vhakriste vho ḓodzwaho. Tshigwada tsha u thoma tsho vha tshi hone nga 1914, nahone tsho pfesesa uri Kristo o thoma u vhusa sa Khosi nga wonoyo ṅwaha. Vhane vha vhumba tshenetshi tshigwada a vho ngo sokou tshila nga 1914 fhedzi, fhedzi vho ḓodzwa nga muya sa vharwa vha Mudzimu nga wonoyo ṅwaha kana nga phanḓa hawo.—Vharoma 8:14-17.

16 Tshigwada tsha vhuvhili tshine tsha katelwa kha “murafho uyu” ndi vhaḓodzwa vhe vha tshila tshifhingani tsha vha tshigwada tsha u thoma. A vho ngo sokou tshila tshifhingani tsha vha tshigwada tsha u thoma, fhedzi vho ḓodzwa nga muya mukhethwa tshifhingani tsha musi vha tshigwada tsha u thoma vha tshi kha ḓi vha kha ḽifhasi. Nga zwenezwo, a si muḓodzwa muṅwe na muṅwe ṋamusi ane a katelwa kha “murafho uyu” we Yesu a amba nga hawo. Ṋamusi vhane vha vha kha tshenetshi tshigwada tsha vhuvhili vho no vha vhalala. Naho zwo ralo, maipfi a Yesu a re kha Mateo 24:34 a ri khwaṱhisedza uri vhaṅwe vha ‘murafho uyu vha nga si lovhe’ vha sa athu u vhona u thoma ha maṱungu mahulu. Zwenezwi zwi fanela u ri khwaṱhisedza uri ho sala tshifhinga tshiṱuku uri Khosi ya Muvhuso wa Mudzimu i dzhie vhukando ha u fhelisa vhathu vhavhi nahone i ḓise shango ḽiswa ḽa u luga.—2 Pet. 3:13.

KRISTO U ḒO KUNDA HU SI KALE

17. Ri swikelela phetho ifhio kha vhuṱanzi vhuraru he ra vhu haseledza?

17 Ndi phetho ifhio ine ra i swikelela kha vhuṱanzi vhuraru he ra vhu haseledza? Yesu o ri sevha uri a ri nga ḓo ḓivha ḓuvha kana tshifhinga tsho livhaho. (Mat. 24:36; 25:13) Fhedzi ri a zwi ḓivha uri ‘tshifhinga tsho swika tsha uri ri karuwe khofheni,’ sa zwe Paulo a zwi amba. (Vhalani Vharoma 13:11.) Ri khou tshila maḓuvhani a vhufhelo. Arali ra livhisa ṱhogomelo yashu yoṱhe kha vhuporofita ha Bivhili na zwine Yehova Mudzimu na Yesu Kristo vha khou zwi ita, ri ḓo kona u vhona vhuṱanzi vhu pfalaho ha uri vhukuma ri khou tshila tsini na vhufhelo ha ano maitele a zwithu.

18. Vhane vha hana u ṱanganedza Muvhuso wa Mudzimu vho lindelwa nga mini?

18 Hu si kale, vhane vha hana u ṱanganedza maanḓa mahulwane e a ṋewa Yesu Kristo, Muṋameli a kundaho wa bere tshena, vha ḓo kombetshedzea u ṱanganedza vhukhakhi havho. A vha nga ponyoki. Nga tshenetsho tshifhinga, vhanzhi vha ḓo lila nga u ofha vha ri: “Ndi nnyi ane a ḓo kona u ima?” (Nzumb. 6:15-17) Naho zwo ralo, ndima i tevhelaho ya Nzumbululo i ri ṋea phindulo. Vhaḓodzwa na vha re na fulufhelo ḽa u tshila kha ḽifhasi nga ḓuvha ḽeneḽo vha ḓo “ima” nga nṱhani ha uri vha a ṱanganedzea phanḓa ha Mudzimu. Nga zwenezwo, vha “gogo ḽihulu” ḽa dziṅwe nngu vha ḓo ponyoka maṱungu mahulu.—Nzumb. 7:9, 13-15.

19. Ndi mini zwe na zwi lavhelela sa muthu ane a pfesesa, u ṱanganedza na u aravha kha vhuṱanzi vhu pfalaho ha uri maḓuvha a vhufhelo a ḓo guma hu si kale?

19 Arali ra livhisa ṱhogomelo kha u ḓadzea ha vhuporofita ha Bivhili zwifhingani zwino zwi takadzaho, ri nga si thithiswe nga shango ḽa Sathane; nahone ri ḓo pfesesa zwine zwiitea zwa shango zwa amba zwone. Hu si kale, Kristo u ḓo kunda shango ḽa vhathu vha sa ofhi Mudzimu nga u lwa nndwa ya u fhedzisela ya u luga. (Nzumb. 19:11, 19-21) U humbula nga ha zwine Bivhili ya ri khwaṱhisedza zwone zwi ḓo ita uri ri takale vhukuma!—Nzumb. 20:1-3, 6; 21:3, 4.