Pfukelani kha mafhungo

Pfukelani kha zwi re ngomu

 ZWE RA ZWI VHULUNGA

“Ndo Vha Ndi Tshi Nga Tshibode Kha Gwati Ḽatsho”

“Ndo Vha Ndi Tshi Nga Tshibode Kha Gwati Ḽatsho”

TSHIFHINGA tsha fulo ḽa u huwelela ḽa maḓuvha a ṱahe nga August/September 1929 tsho vha tsho ṱavhanyiswa sa tshiḓumbumukwe, vhahuweleli vha fhiraho 10 000 vho tshimbila kha ḽoṱhe ḽa United States. Vho tshimbidza bugu na bugwana dza kotara ya milioni. Kha vhenevho vhahuweleli vha Muvhuso, ho vha hu na vha-colporteur vha tshigidi. Tshivhalo tshenetsho tsho no engedzea vhukuma! Bulletin * yo amba uri “zwo vha zwi sa tendisei” uri tshumelo ya vhavulanḓila yo engedzea kararu u bva nga 1927 u swika 1929.

Mafheleloni a 1929, vhuimo ha zwa dzitshelede ho mbo ḓi tshinyala. Nga ḓuvha ḽine ḽa vhidzwa Black Tuesday—ḽa 29 October, 1929—u wa ha mitengo Makete wa zwa Dzitshelede ngei New York ho ita uri ekonomi ya shango ḽoṱhe i we, ha vha na Mutsiko Muhulwane wa ekonomi. Bannga dzo fhelelwa nga tshelede. Mabulasi a si tsha shuma. Mamaga mahulwane a valwa. Vhathu vha dzimilioni vho xelelwa nga mishumo. Nga 1933 ngei United States, ho vha hu tshi dzhiululwa nnḓu dza 1000 nga ḓuvha.

Vhahuweleli vha tshifhinga tsho ḓalaho vho vha vha tshi ḓo kona hani u tshila tshifhingani tsha eneo maṱungu? Thandululo ho vha hu nnḓu ya malinga. Samusi yeneyi nnḓu ya malinga yo vha i sa badelwi rennde na muthelo, zwo ita uri vhavulanḓila vhanzhi vha tovhole vhuḓinḓa havho vha si na tshinyalelo nnzhi. * Nga tshifhinga tsha buthano, nnḓu ya malinga yo vha i tshi shuma sa kamara ya hodelani ya mahala. Nga 1934, Bulletin yo amba nga ha pulane dza nnḓu ṱhukhu, dzavhuḓi dzi re na tshumelo ya zwithu zwi ngaho maḓi, tshiṱofu, mbete u peteaho na zwithu zwa u thivhela phepho.

Vhahuweleli vha re na vhutsila shangoni ḽoṱhe vho dzudzanya u ḓifhaṱela nnḓu dzi re na malinga. Victor Blackwell o amba uri: “Noaxe o vha e si na tshenzhelo ya u fhaṱa gungwa, nahone na nṋe ndo vha ndi si na tshenzhelo kana nḓivho ya u fhaṱa nnḓu ya malinga.” Fhedzi o i fhaṱa.

Nnḓu ya malinga i tshi khou ṱoḓa u pfukiswa mulambo tshifhingani tsha dzimvula ngei India

Avery na Lovenia Bristow vho vha vhe na nnḓu ya malinga. Avery o amba uri: “Ndo vha ndi tshi nga tshibode kha gwati ḽatsho—ndo vha ndi tshi dzula ndi na nnḓu yanga.” Muṱa wa ha Bristow wo vha u tshi vula nḓila na Harvey na Anne Conrow, vhe nnḓu yavho ya malinga ya vha i na luvhondo lwa mabammbiri. Tshifhinga tshoṱhe musi vha tshi pfuluwa ho vha hu tshi wa zwipiḓa zwa mabammbiri. Avery o amba uri: “A hu na muthu we a vhuya a vhona goloi i ngaho yeneyo, nahone a hu na we a vhuya a i vhona u bva tsheetsho!” Fhedzi Avery o amba uri muṱa wa ha Conrow na vharwa vhavho vhavhili vho vha vhe “muṱa wo takalaho vhukuma we a vhuya a u vhona.” Harvey Conrow o ṅwala uri: “Ro vha ri sa shayi tshithu, nahone ro vha ri tshi pfa ro tsireledzea vhukuma tshumeloni ya Yehova na nga fhasi ha ṱhogomelo yawe ya lufuno.” Nga murahu, muṱa wa ha Conrow u re na miraḓo miṋa wo ya Tshikoloni tsha Gilead nahone wa rumelwa ngei Peru sa vharumiwa.

Muṱa wa ha Battaino na wone wo vula nḓila. Musi Giusto na Vincenza vha tshi wana uri vha ḓo vha vhabebi, vho shandula ṱhiraka yavho ya Ford Model A ya 1929 uri i vhe haya hune ha “vhonala hu tshi nga ndi hodela yavhuḓi” musi hu tshi vhambedzwa na madennde  e vha vhuya vha dzula khao. Vhe na ṅwananyana wavho, vho bvela phanḓa na mushumo wavho une vha u funa, wa u huwelela kha Vhataliana vhane vha dzula kha ḽa United States.

Vhathu vhanzhi vho vha vha tshi thetshelesa mafhungo maḓifha, fhedzi vhane vha vha vhashai na vha sa shumi vho vha vha sa koni u ṋeela nga tshelede u itela khandiso dza Bivhili. Nṱhani hazwo, vho vha vha tshi vha ṋea thundu vhudzuloni ha tshelede. Vhavulanḓila vhavhili vho ṅwala mutevhe wa thundu dza 64 dze vha ṋewa nga vhe vha vha vhe na dzangalelo. Mutevhe wa hone wo vha u tshi ri “zwidodombedzwa zwi bvaho vhengeleni.”

Fred Anderson o ṱangana na mulimi we a vha a tshi ṱoḓa bugu dzashu nahone a ṋeela nga ngilasi dza maṱo dze dza vha dzi dza mme awe. Bulasini ḽi tevhelaho, muṅwe munna o sumbedza dzangalelo kha khandiso dzashu, fhedzi a amba uri: “A thi na ngilasi dza maṱo dza u vhala.” Naho zwo ralo, musi a tshi ambara ngilasi dze dza ṋeelwa nga muhura wawe, o vha a tshi kona u vhala zwavhuḓi nahone a bvisa muṋeelo wa bugu na mangilasi.

Herbert Abbott o vha e na hoko ya khuhu goloini yawe. Nga murahu ha u renga khuhu tharu kana nṋa, o vha a tshi dzi isa makete nahone a dzi rengisa a kona u shela peṱirolo. O ṅwala uri: “Naa ho vha hu na zwifhinga zwe ra vha ri si na tshelede? Ee, fhedzi a ro ngo tendela zwenezwo zwi tshi ri thivhela. Arali ri na peṱirolo goloini, ro vha ri tshi bvela phanḓa ri tshi sumbedza u vha na lutendo na fulufhelo kha Yehova.”

U ḓitika nga Yehova na u ḓiimisela vhukuma zwo khwaṱhisa vhathu vhawe miṅwahani yeneyo i konḓaho. Nga tshifhinga tsha mvula ya maḓumbu Maxwell na Emmy Lewis vho ponyoka kha goloi yavho musi muri u tshi wela goloi nahone wa i fhandula nga vhukati. Maxwell o ṅwala uri: “Zwenezwi a zwo ngo vha zwithithisi, zwo vha zwi tshi tou vha zwiitea nahone a ro ngo vha na muhumbulo wa u litsha. Ho vha hu na mushumo munzhi we wa vha u tshi fanelwa u itwa nahone ro vha ro ḓiimisela u u ita.” Vha sa ofhi nahone nga thuso ye vha i wana kha khonani dzi re na lufuno, Maxwell na Emmy vho fhaṱulula nnḓu yavho ya malinga.

Zwifhingani zwashu zwi konḓaho, Ṱhanzi dza Yehova dzi fhiseaho dza dzimilioni dzi sumbedza muya u fanaho wa u ḓiṋekedzela. Nga zwenezwo, u fana na vhavulanḓila vha tshifhingani tsho fhiraho, ro ḓiimisela u bvela phanḓa na mushumo wa u huwelela u swikela Yehova a tshi ri mushumo wo fhela.

^ par. 3 Zwino i vhidzwa Vhuḓinḓa Hashu ha Muvhuso.

^ par. 5 Nga zwenezwo zwifhinga, vhavulanḓila vhanzhi vho vha vha si na mushumo wa u ḓitshidza. Vho vha vha tshi wana khandiso dza Bivhili nga tshelede ṱhukhu nahone vha tshi shumisa miṋeelo yeneyo u itela u ḓitshidza.