Pfukelani kha mafhungo

Pfukelani kha zwi re ngomu

Ri Nga Dzula Hani Ri Na “Muya Wa U Lindela”?

Ri Nga Dzula Hani Ri Na “Muya Wa U Lindela”?

“Ndi ḓo sumbedza muya wa u lindela.”—MIXA 7:7, NW.

1. Ndi mini zwine zwa nga ita uri ri fhele mbilu?

MAḒUVHA a vhufhelo a maitele a Sathane o thoma nga 1914 musi hu tshi thewa Muvhuso wa Vhumessia. Nga nṱhani ha nndwa ye ya vuwa ngei ṱaḓulu, Yesu o posela Diabolo na madimoni kha ḽifhasi. (Vhalani Nzumbululo 12:7-9.) Sathane u a zwi ḓivha uri “o salelwa nga tshifhinga tshiṱuku.” (Nzumb. 12:12) Naho zwo ralo, tshenetsho “tshifhinga tshiṱuku” tsho dzhia mahumi a miṅwaha, nahone vhaṅwe vha nga vhona u nga maḓuvha a vhufhelo o no bvela phanḓa lwa tshifhinga tshilapfu. Musi ro lindela uri Yehova a dzhie vhukando, naa ri a fhela mbilu?

2. Ri ḓo ṱolisisa mini kha ino thero?

2 U fhela mbilu zwi nga vha na khombo, ngauri zwi nga ita uri ri ite zwithu ri songo thoma ra humbula. Ri nga dzula hani ri na muya wa u lindela? Heyi thero i ḓo ri thusa u ita nga u ralo nga u fhindula mbudziso dzi tevhelaho. (1) Ri nga guda mini nga u sa fhela mbilu kha tsumbo yo vhewaho nga muporofita Mixa? (2) Ndi zwiitea zwifhio zwine zwa ḓo vha tshiga tsha uri tshifhinga tshashu tsha u lindela tsho fhela? (3) Ri nga sumbedza hani u livhuha Yehova nga u sa fhela mbilu hawe?

RI NGA GUDA MINI KHA TSUMBO YA MIXA?

3. Misini ya Mixa, vhuimo ho vha hu vhufhio ngei Isiraele?

3 Vhalani Mixa 7:2-6. Mixa muporofita wa Yehova o vhona vhuimo vhu si havhuḓi ha lwa muya ngei Isiraele u swika zwi tshi ṋaṋa u vhifha nga fhasi ha vhuvhusi ha Ahasi Khosi mmbi. Mixa o fanyisa Vhaisiraele vha sa fulufhedzei na “ṱanzu ḽa mipfa” na “luhura lwa mipfa.” Samusi ṱanzu ḽa mipfa kana luhura lwa mipfa lu tshi nga vhaisa muṅwe na muṅwe ane a lu kanda, vhenevho Vhaisiraele vha sa fulufhedzei vho vhaisa vhoṱhe vhe vha vha vha tshi shumisana navho. U sa fulufhedzea ho mbo ḓi ṋaṋa lwe zwa tshinya vhushaka ha muṱa. Musi Mixa a tshi ṱhogomela uri a hu na zwine a nga zwi ita u itela u shandula honoho vhuimo, o vhudza Yehova zwi re  mbiluni yawe. Nga zwenezwo, o lindela Mudzimu a sa fheli mbilu uri a dzhie vhukando. Mixa o vha e na fulufhelo ḽa uri Yehova u ḓo dzhia vhukando nga tshifhinga Tshawe.

4. Ndi dzifhio khaedu dzine ra sedzana nadzo?

4 U fana na Mixa, ri tshila vhukati ha vhathu vha re na tseḓa. Vhathu vhanzhi a ‘vha livhuhi, a vha fulufhedzei.’ (2 Tim. 3:2, 3) Zwi a tsikeledza musi vhane ra shuma navho, vhane ra dzhena navho tshikolo na vhahura vhashu vha tshi sumbedza muya wa tseḓa. Naho zwo ralo, vhaṅwe vhashumeli vha Mudzimu vho sedzana na khaedu khulwane. Yesu o amba uri vhatevheli vhawe vha ḓo pikiswa nga vha muṱani, nahone a shumisa maipfi a fanaho na e a ṅwalwa kha Mixa 7:6 u itela u ṱalusa nḓila ye mulaedza wawe wa vha u tshi ḓo kwama ngayo vhathu. Yesu o amba uri: “Ndo ḓela u luṱanya muṱhannga na khotsi awe, ṅwananyana u ḓo lwa na mme awe, mazwale a lwa na mazwale wawe. Vhukuma, maswina a muthu a ḓo vha vha muṱani wawe.” (Mat. 10:35, 36) Zwi a konḓa vhukuma u konḓelela u holedzwa na u hanedzwa nga miraḓo ya muṱa ine ya si vhe vhatendi nga riṋe! Arali ra sedzana na milingo yo raloho, ri songo tenda u tsikeledzwa nga vha muṱani. Nṱhani hazwo, u nga ri ri nga dzula ri tshi fulufhedzea nahone ra lindela Yehova ri sa fheli mbilu uri a tandulule vhuleme. Arali ri tshi dzula ri tshi mu humbela thuso, u ḓo ri ṋea nungo na vhuṱali vhune ra vhu ṱoḓa u itela u konḓelela.

5, 6. Yehova o lambedza hani Mixa, fhedzi ndi mini zwe Mixa a si zwi vhone?

5 Yehova o lambedza Mixa nga nṱhani ha u sa fhela mbilu hawe. Mixa o vhona hu tshi fheliswa Khosi Ahasi na vhuvhusi hawe vhuvhi. O vhona Khosi yavhuḓi Hiskia murwa wa Ahasi, a tshi ṋewa khuluṋoni sa ifa nahone a vhuyedzedza vhurabeli ho kunaho. Mulaedza wa khaṱulo ya Vhasamaria we Yehova a u ṋea Mixa wo ḓadzea musi Vhaasuri vha tshi vutshela muvhuso wa devhula wa Isiraele.—Mixa 1:6.

6 Naho zwo ralo, Mixa ho ngo vhona vhuporofita hoṱhe he Yehova a mu hevhedza uri a porofite ngaho vhu tshi ḓadzea. Sa tsumbo, Mixa o ṅwala uri: “Nga maḓuvha a u ḓo ḓa thavha ya nnḓu ya Yehova i ḓo ima ya fhira dzithavha, ya vha ṱaḓulu ha mivhundu, dzitshakha dza ḓo dubekana dzi tshi ya hone. Dzitshakha nnzhi dzi ḓo ya dzi tshi ri: Nḓarieni, ri gonye, ri ye thavhani ya Yehova.” (Mixa 4:1, 2) Mixa o vha o no fa kale musi honoho vhuporofita vhu tshi ḓadzea. Naho zwo ralo, o vha o ḓiimisela u dzula a tshi fulufhedzea kha Yehova u swikela a tshi fa, hu sa londwi zwine vhaṅwe vha re henefho vha zwi ita. Kha zwenezwi, Mixa o ṅwala uri: “Vhunga lushaka lufhio na lufhio lu tshi tshimbila dzinani ḽa mudzimu walwo, na riṋe nga ri tshimbile dzinani ḽa Yehova Mudzimu washu wa kale na kale na lini na lini.” (Mixa 4:5) Mixa o vha a tshi nga lindela a sa fheli mbilu zwifhingani zwi tsikeledzaho ngauri o vha e na fulufhelo ḽo khwaṱhaho ḽa uri Yehova u ḓo ḓadzisa mafulufhedziso Awe oṱhe. Onoyo muporofita a fulufhedzeaho o vha a tshi fulufhela Yehova.

7, 8. (a) Ndi ngani ri na tshiitisi tsha u vha na fulufhelo? (b) Ndi mini zwine zwa ḓo ita uri tshifhinga tshi fhire nga u ṱavhanya?

7 Naa na riṋe ri fulufhela Yehova? Ri na tshiitisi tshi pfalaho tsha u mu fulufhela. Ro no vhona vhuporofita ha Mixa vhu tshi ḓadzea. Kha ano “maḓuvha” a vhufhelo vha dzimilioni vhane vha bva kha tshaka dzoṱhe, tshitshavha na nyambo dzo fhamba-fhambanaho vho dubekana vha tshi ya kha “thavha ya nnḓu ya Yehova.” Hu sa londwi uri vha bva kha tshaka dzine dza vhangisana, vhenevha vhagwadameli ‘mafumo avho vho a fululula vha ita malembe,’ nahone vha hana u “guda u lwa.” (Mixa 4:3) Ndi ndugelo vhukuma u vha vhukati ha vhathu vha Yehova vha re na mulalo!

8 Zwi a pfesesea uri ri ṱoḓa Yehova a tshi fhelisa ano maitele mavhi a zwithu nga u ṱavhanya. Naho zwo ralo, arali ri tshi fanela u lindela ri sa fheli mbilu, ri tea u dzhia  zwithu nga nḓila ine Yehova a zwi dzhia ngayo. O vhea ḓuvha ḽine ngaḽo a ḓo haṱula vhathu a tshi shumisa Yesu Kristo “muthu we a mu nanga.” (Mish. 17:31) Musi hu sa athu itea zwenezwo, Mudzimu u khou ṋea vhathu vhoṱhe tshibuli tsha u wana “nḓivho yo teaho ya ngoho,” uri vha shumise yeneyo nḓivho nahone vha tshidzwe. Vhutshilo ha vhathu vhu khomboni. (Vhalani 1 Timotheo 2:3, 4.) Arali ro farakanea kha u thusa vhaṅwe u wana nḓivho yo teaho nga ha Mudzimu, tshifhinga tsho salaho musi hu sa athu ḓa khaṱhulo ya Yehova tshi ḓo fhira nga u ṱavhanya. Hu si kale—na nga khathihi fhedzi—tshifhinga tsho salaho tshi ḓo fhela. Musi zwi tshi itea, ri ḓo takala vhukuma ngauri ro dzula ro farakanea kha mushumo wa u huwelela wa Muvhuso!

NDI ZWIITEA ZWIFHIO ZWINE ZWA ḒO VHA TSHIGA TSHA URI U LINDELA HO FHELA?

9-11. Naa 1 Vhathesalonika 5:3 yo no ḓadzea? Ṱalutshedzani.

9 Vhalani 1 Vhathesalonika 5:1-3. Hu si kale, tshaka dzi ḓo huwelela uri “Mulalo na u tsireledzea!” Arali ri sa ṱoḓi uri yeneyi khuwelelo i ri wane ri songo humbulela, ri fanela u ‘dzula ro fhaṱuwa na u dzula ro dzivhuluwa.’ (1 Vhathes. 5:6) U itela uri ri dzule ro fhaṱuwa nga lwa muya, kha ri ṱolisise zwithu zwe zwa itea u itela u lugiselela yeneyi nḓivhadzo ya ndeme.

10 Nga murahu ha nndwa mbili dza shango, tshaka dzo vha dzi tshi ṱoḓa uri hu vhe na mulalo nga maṱo matswuku. Musi nndwa ya u thoma i tshi fhela, ho thomiwa Ndangano ya Dzitshaka nga fulufhelo ḽa uri hu vhe na mulalo. Nga murahu ha nndwa ya vhuvhili ya khungulu yoṱhe, Yuno (United Nations) yo ḓivhiwa nga u ḓisa mulalo kha ḽifhasi. Muvhuso na vharangaphanḓa vha vhurereli vho vha vha tshi fulufhela uri zwenezwi zwigwada zwi ḓo ḓisela vhathu mulalo. Sa tsumbo, nga 1986, Yuno yo ḓivhadza Ṅwaha wa Mulalo wa Tshaka Dzoṱhe. Nga wonoyo ṅwaha, vharangaphanḓa vha tshaka nnzhi na vhurereli vho ṱangana na muhulwane wa Kereke ya Katolika ngei Assisi kha ḽa Italy, uri vha rabelele mulalo.

11 Naho zwo ralo, u ḓivhadza mulalo na u tsireledzea na dziṅwe nḓivhadzo dzi fanaho na dzenedzo a zwo ngo vha u ḓadzea ha vhuporofita  ho ṅwalwaho kha 1 Vhathesalonika 5:3. Ndi ngani? Ngauri zwe zwa dzula zwo ambiwa nga ha ‘ndozwo ine ya ḓo vha ḓela vha songo zwi lavhelela’ a zwi athu itea.

12. Ndi mini zwine ra zwi ḓivha nga ha nḓivhadzo ya “Mulalo na u tsireledzea”?

12 Ndi nnyi ane a ḓo ita yeneyi nḓivhadzo ya ndeme ya tshifhingani tshi ḓaho ya uri “Mulalo na u tsireledzea”? Ndi ifhio ndima ine ya ḓo itwa nga vharangaphanḓa vha ḽa Vhudzhagane na vha vhuṅwe vhurereli? Vharangaphanḓa vha mivhuso yo fhamba-fhambanaho vha ḓo dzhenelela hani kha yeneyi nḓivhadzo? Maṅwalo ha ri vhudzi. Zwine ra zwi ḓivha ndi uri hu sa londwi uri zwo ḓivhadzwa hani kana zwi vhonala zwi tshi ṱuṱuwedza nga nḓila-ḓe, zwi ḓo vha zwi si zwa vhukuma. Enea maitele a kale a ḓo dzula e nga fhasi ha vhuvhusi ha Sathane. O sina nahone a nga si shanduke. Zwo vha zwi tshi ḓo ṱungufhadza vhukuma arali muṅwe washu a tenda mazwifhi a Sathane nahone a tshinya u sa dzhia hashu sia ha Vhukriste!

13. Ndi ngani vharuṅwa vho fara mimuya i vhudzulaho i tshinyadzaho?

13 Vhalani Nzumbululo 7:1-4. Samusi ro lindela u ḓadzea ha 1 Vhathesalonika 5:3, vharuṅwa vha re na maanḓa vho fara mimuya i vhudzulaho ya maṱungu mahulu. Ndi mini zwe vha zwi lindela? Tshiṅwe tshiitea tsho ṱaluswa nga muapostola Yohane—u swaiwa ha u fhedzisela ha “vhalanda vha Mudzimu” vho ḓodzwaho. * Musi vho no swaiwa, vharuṅwa vha ḓo litsha mimuya i vhudzulaho i tshinyadzaho. Nga murahu ha zwenezwo hu ḓo itea mini?

14. Ndi mini zwine zwa sumbedza uri u fheliswa ha Babele Ḽihulu zwi tsini?

14 Babele Ḽihulu, muvhuso wa shango wa vhurereli ha mazwifhi, ḽi ḓo fheliswa. “Vhathu, gogo na dzitshaka na dzindimi” a vha nga ḓo kona u ḽi tikedza nga hu bvelelaho. Ṋamusi ri vhona vhuṱanzi ha uri ḽi tsini na u fheliswa. (Nzumb. 16:12; 17:15-18; 18:7, 8, 21) Zwi re zwone ndi uri u shayea ha yeneyi thikhedzo hu a vhonala kha zwianḓadza mafhungo, hune vhurereli na vharangaphanḓa vha vhurereli vha vha vha tshi khou vutshelwa nga ho engedzeaho. Naho zwo ralo, vharangaphanḓa vha Babele Ḽihulu vha vhona u nga a vhaho khomboni. Vho khakha vhukuma! Nga murahu ha nḓivhadzo ya uri “Mulalo na u tsireledzea!” vhorapolitiki vha maitele a Sathane vha ḓo lwa na vhurereli ha mazwifhi nahone vha vhu fhelisa. Babele Ḽihulu a ḽi tsha ḓo dovha ḽa vha hone! Vhukuma, ndi zwa ndeme u dzula ro lindela zwenezwo zwiitea zwa ndeme ri sa fheli mbilu.—Nzumb. 18:8, 10.

RI NGA SUMBEDZA HANI U DZHIELA NṰHA U SA FHELA MBILU HA MUDZIMU?

15. Ndi ngani Yehova a songo dzhia vhukando nga u ṱavhanya?

15 Hu sa londwi uri vhathu vho nyadza hani dzina ḽawe, Yehova o lindela a sa fheli mbilu tshifhinga tshavhuḓi tsha u dzhia vhukando. Yehova ha ṱoḓi vhathu vha re na mbilu dzavhuḓi vha tshi fheliswa. (2 Pet. 3:9, 10) Naa ri ḓipfa nga nḓila i fanaho? Musi ḓuvha ḽa Yehova ḽi sa athu ḓa, ri nga sumbedza u dzhiela hashu nṱha u sa fhela mbilu hawe nga nḓila dzi tevhelaho.

16, 17. (a) Ndi ngani ri tshi ṱoḓa u thusa vho fholaho muyani? (b) Ndi ngani zwo ṱavhanyiswa uri vho fholaho muyani vha vhuyelele kha Yehova?

16 Thusani vho fholaho muyani. Yesu o ri hu vha na dakalo ṱaḓulu musi nngu nthihi ye ya vha yo xela i tshi wanala. (Mat. 18:14; Luka 15:3-7) Zwi tou vha khagala uri Yehova u ṱhogomela vhukuma vhoṱhe vhane vha sumbedza uri vha funa dzina ḽawe, naho vha sa khou mu shumela zwino. Musi ri tshi thusa vhenevho uri vha vhuyelele tshivhidzoni, ri vha ri tshi khou shela mulenzhe kha u ita uri Yehova na vharuṅwa vha takale.

17 Naa ni muṅwe wa vhathu vhane zwino vha sa khou shumela Mudzimu nga  vhuḓalo? Khamusi muṅwe tshivhidzoni o ni pfisa vhuṱungu nahone zwa ita uri ni litshe u ṱanganela na ndangulo ya Yehova. Samusi ho no fhela tshifhinga, ḓivhudziseni uri: ‘Naa zwino vhutshilo hanga vhu na ndivho, nahone zwino ndo takala? Naa ndo khukhuliswa nga Yehova, kana nga muthu a songo fhelelaho? Naa Yehova Mudzimu o no vhuya a ita zwiṅwe zwithu u mpfisa vhuṱungu?’ Vhukuma, u dzula a tshi ri itela zwivhuya. Naho ri sa khou tshila u tendelana na u ḓiṋekedzela hashu khae, u ri tendela u ḓiphina nga zwithu zwavhuḓi zwine a ri ṋea zwone. (Yak. 1:16, 17) Hu si kale, ḓuvha ḽa Yehova ḽi ḓo ḓa. Zwino ndi tshifhinga tsha u humela kha Khotsi ashu wa ṱaḓulu a re na lufuno na kha tshivhidzo—fhethu huthihi fhedzi ho tsireledzeaho vhukuma maḓuvhani ano a vhufhelo.—Doit. 33:27; Vhaheb. 10:24, 25.

Vhathu vha Yehova vha ita zwoṱhe zwine vha nga kona u thusa vho fholaho muyani uri vha humele kha Yehova (Sedzani dziphara 16, 17)

18. Ndi ngani ri tshi fanela u tikedza vhane vha ranga phanḓa?

18 Tikedzani nga u fulufhedzea vhane vha ranga phanḓa. Sa Mulisa a re na lufuno, Yehova u a ri livhisa na u ri tsireledza. O vhea Murwa wawe uri a vhe Mulisa Muhulwane wa sambi. (1 Pet. 5:4) Vhahulwane vha zwivhidzo zwi fhiraho 100 000 vha ḓiṋea tshifhinga tsha u lisa nngu dza Mudzimu. (Mish. 20:28) Musi ri tshi tikedza nga u fulufhedzea vhe vha vhewa uri vha range phanḓa, ri vha ri tshi khou sumbedza u dzhiela nṱha Yehova na Yesu kha zwoṱhe zwe vha ri itela zwone.

19. Ri nga sendela hani tsini na vhaṅwe?

19 Sendelani tsini na vhaṅwe. Zwenezwo zwi amba mini? Musi mmbi yo gudiswaho zwavhuḓi i tshi vutshelwa nga swina, swole ḽiṅwe na ḽiṅwe ḽi sendela tsini na ḽiṅwe. Nga nḓila yeneyo vha thivha uri hu si fhirwe. Sathane u khou vutshela vhathu vha Mudzimu nga ho engedzeaho. Zwino a si tshifhinga tsha u lwa na vhahashu. Zwino ndi tshifhinga tsha u sendela tsini na vhaṅwe, u sa dzhiela nṱha u sa fhelela ha vhaṅwe na u sumbedza u vha na fulufhelo kha vhurangaphanḓa ha Yehova.

Zwino ndi tshifhinga tsha u valela Sathane na madimoni tshikhala tsha u sendela tsini na riṋe (Sedzani phara 19))

20. Zwino ri fanela u ita mini?

20 U nga ri roṱhe ri nga dzula ro fhaṱuwa muyani nahone ra sumbedza muya wa u lindela. Kha ri lindele ri sa fheli mbilu nḓivhadzo ine ya ri, “Mulalo na u tsireledzea!” na u swaiwa ha u fhedzisela ha vho nangwaho. Nga murahu, vharuṅwa vhaṋa vha ḓo litshelela mimuya i tshinyadzaho, nahone Babele Ḽihulu ḽi ḓo fheliswa. Samusi ro lindela zwenezwi zwi tshi itea, kha ri ṱanganedze vhulivhisi vhu bvaho kha vho vhewaho uri vha range phanḓa ndangulo ya Yehova. Valelani Diabolo na madimoni tshikhala tsha u sendela tsini na vhoiwe! Zwino ndi tshifhinga tsha u tevhedza nyeletshedzo ya mupsalme ine ya ri: “Fulufhelani, khwaṱhisani dzimbilu dzaṋu, inwi noṱhe no lavhelesaho Yehova.”—Ps. 31:24.

^ par. 13 U itela u wana phambano vhukati ha u swaiwa ha u thoma ha miraḓo ya vhaḓodzwa na u swaiwa havho ha u fhedzisela, sedzani Tshiingamo (nga Luisimane) tsha ḽa 1 January, 2007, masiaṱari 30-31.