Pfukelani kha mafhungo

Pfukelani kha zwi re ngomu

Ṱhogomelani Uri Ni Ṱoḓa U Vha Muthu Wa Mufuda-ḓe

Ṱhogomelani Uri Ni Ṱoḓa U Vha Muthu Wa Mufuda-ḓe

“Ni ṱoḓa u vha vhathu vha mufuda-ḓe kha mishumo mikhethwa ya vhuḓifari na kha mishumo ya u ḓikumedza kha Mudzimu!”—2 PET. 3:11.

1, 2. ‘Ri ṱoḓa u vha vhathu vha mufuda-ḓe’ u itela uri ri ṱanganedzee kha Mudzimu?

ZWO ḓowelea uri ri vhe na dzangalelo ḽa uri vhathu vha humbula mini nga ha riṋe. Sa Vhakriste, naa a ro ngo fanela u vhilaela uri Yehova u humbula mini nga riṋe? Zwi re zwone ndi uri Yehova ndi Muthu Muhulwane wa fhethu hoṱhe nahone “tshisima tsha vhutshilo” tshi khae.—Ps. 36:9.

2 A tshi ombedzela ‘mufuda wa vhathu une ra ṱoḓa u vha wone’ u ya nga mavhonele a Yehova, muapostola Petro u ri ṱuṱuwedza uri ri ite “mishumo mikhethwa ya vhuḓifari na kha mishumo ya u ḓikumedza kha Mudzimu.” (Vhalani 2 Petro 3:11.) U itela uri ri ṱanganedzee kha Mudzimu, “mishumo” yashu i fanela u vha mikhethwa, zwine zwa vha u kuna—kha vhuḓifari, muhumbuloni na muyani. Zwiṅwe hafhu, ri fanela u ita “mishumo ya u ḓikumedza kha Mudzimu” ri tshi ṱuṱuwedzwa nga lufuno lwo dzikaho na u mu ṱhonifha. U ṱoḓa u ṱanganedzwa ngae a zwi kateli vhuḓifari hashu fhedzi, zwi dovha zwa katela na vhumuthu hashu ha nga ngomu. Samusi Yehova a tshi “sedza mbilu,” u a ḓivha arali vhuḓifari hashu vhu vhukhethwa nahone ro ḓiṋekedzela khae zwa vhukuma kana ri songo ḓiṋekedzela.—1 Koron. 29:17.

3. Malugana na vhushaka hashu na Mudzimu, ndi mbudziso dzifhio dzine ra fanela u dzi vhudzisa?

3 Sathane Diabolo ha ṱoḓi uri ri ṱoḓe u ṱanganedzwa nga Mudzimu. Zwi re zwone ndi uri u ita zwoṱhe zwine a nga kona uri ri laṱe vhushaka hashu na Yehova. Sathane ha timatimi u shumisa mazwifhi na vhufhura u itela u ri kunga na u ri sendedza kule na Mudzimu ane ra mu gwadamela. (Yoh. 8:44; 2 Vhakor. 11:13-15) Nga zwenezwo, ri fanela u ḓivhudzisa uri: ‘Sathane u fhura vhathu nga nḓila-ḓe? Ndi mini zwine nda fanela u zwi ita u tsireledza vhushaka hanga na Yehova?’

 SATHANE U FHURA HANI VHATHU?

4. Musi Sathane a tshi lingedza u fhelisa vhushaka hashu na Mudzimu, u shumisa mini nahone ndi ngani?

4 Mufunziwa Yakobo o ṅwala uri: “Muṅwe na muṅwe u lingwa a tshi kokodzwa na u kungwa nga nyemulo yawe. Musi nyemulo yo no hulela, i bveledza tshivhi; musi tshivhi tsho no itwa, tshi ḓisa lufu.” (Yak. 1:14, 15) Musi Sathane a tshi lingedza u fhelisa vhushaka hashu na Mudzimu, u ya mbiluni dzashu, hune lutamo lwashu lwa vha hone.

5, 6. (a) Sathane u linga mbilu dzashu e na tshipikwa tshifhio? (b) Ndi vhufhura vhufhio vhune Sathane a vhu shumisa u itela uri ri vhe na lutamo lu songo lugaho mbiluni dzashu, nahone u na tshenzhelo nngafhani kha u ita nga u ralo?

5 Sathane u linga mbilu dzashu e na tshipikwa tshifhio? Bivhili i ri: “Shango ḽoṱhe ḽi zwanḓani zwa muvhi.” (1 Yoh. 5:19) Zwihali zwa Sathane zwi katela ‘zwithu zwi re kha ḽifhasi.’ (Vhalani 1 Yohane 2:15, 16.) Miṅwahani minzhi yo fhiraho, Diabolo o tshinya nga vhuronwane ḽeneḽi shango ḽo ri tangaho. Samusi ri tshi dzula kha ḽeneḽi shango, ri fanela u ḓilinda kha vhukwila hawe.—Yoh. 17:15.

6 Sathane u ita uri ri vhe na lutamo lu songo lugaho mbiluni dzashu. Muapostola Yohane o ṱalusa vhufhura vhuraru vhune ha shumiswa nga Sathane: (1) “nyemulo ya ṋama,” (2) “nyemulo ya maṱo,” na (3) “u ṱongisa zwine muthu a vha nazwo.” Sathane o zwi shumisa u itela u linga Yesu ngei sogani. Sathane u na miṅwaha minzhi a tshi khou shumisa vhukwila ho raloho, u bvela phanḓa a tshi vhu shumisa na ṋamusi, u ḓivha mulingo une a nga u shumisa kha muṅwe na muṅwe. Musi ri sa athu ṱolisisa vhukando vhune ra nga vhu dzhia u itela u ḓitsireledza kha zwenezwi, kha ri vhone uri Diabolo o shumisa hani vhufhura hawe nga hu bvelelaho kha Eva, fhedzi a kundelwa u vhu shumisa kha Murwa wa Mudzimu.

“NYEMULO YA ṊAMA”

Sathane o shumisa “nyemulo ya ṋama” u fhura Eva (Sedzani phara 7)

7 Vhathu vha na ṱhoḓea khulwane ya u khwaṱhisa muvhili—ṱhoḓea ya zwiḽiwa. Musiki o sika ḽifhasi uri ḽi bveledze zwiḽiwa zwinzhi. Sathane a nga lingedza u shumisa dzangalelo ḽa zwiḽiwa ḽa nzulele u itela uri ri si tsha ita zwine zwa funwa nga Mudzimu. Ṱhogomelani zwe a zwi ita kha Eva. (Vhalani Genesi 3:1-6.) Sathane o vhudza Eva uri a nga ḽa “muri wa u ṱalukanya vhuḓi na vhuvhi” nahone a nga si fe, o dovha a amba uri musi a tshi ḽa wonoyo muri, u ḓo fana na Mudzimu. (Gen. 2:9) Diabolo o vhudza Eva uri ho ngo fanela u thetshelesa Mudzimu u itela uri a tshile. Eneo o vha e mazwifhi madala-dala! Musi muhumbulo wonoyo wo dzheniswa muhumbuloni wa Eva, o vha a tshi fanela u khetha kha zwithu zwivhili: O vha a tshi nga hana zwenezwo, kana a livhisa ṱhogomelo khazwo, a tshi tendela uri  lutamo lwa mutshelo lu hule khae. Hu sa londwi uri miṅwe miri ya tsimuni yo vha i hone henefho, o khetha u livhisa ṱhogomelo kha zwe zwa ambiwa nga Sathane malugana na muri u re vhukati ha tsimu, nahone a thoma u “fula mutshelo wawo, a ḽa.” Nga zwenezwo, Sathane o ita uri a tame zwithu zwo dzivhiswaho nga Musiki wawe.

Yesu ho ngo tendela tshithu na tshithihi tshi tshi mu ita uri a hangwe zwithu zwa ndeme (Sedzani phara 8)

8. A tshi shumisa “nyemulo ya ṋama” Sathane o lingedza hani u fhura Yesu, nahone ndi ngani wonoyo mulingo u songo shuma?

8 Sathane o shumisa vhukwila vhu fanaho musi a tshi lingedza u linga Yesu sogani. Musi Yesu o no ḓidzima lwa maḓuvha a 40 na vhusiku ha 40, Sathane o lingedza u linga Yesu nga zwiḽiwa. Sathane o ri: “Arali u murwa wa Mudzimu, amba na heḽi tombo ḽi shanduke ḽi vhe tshinkwa.” (Luka 4:1-3) Yesu o vha a tshi fanela u khetha kha zwithu zwivhili: O vha a tshi nga khetha u sa shumisa maanḓa awe nga vhuṱolo u itela u ḓifusha nga zwiḽiwa, kana a khetha u a shumisa. Yesu o vha a tshi zwi ḓivha uri ho ngo fanela u shumisa maanḓa awe u itela u ḓihumbulela. Naho o vha e na nḓala, u fusha nḓala yawe ho vha hu si tshithu tsha u thoma u fhira u dzula e na vhushaka havhuḓi na Yehova. Yesu o fhindula a ri: “Muthu ha tshili nga tshinkwa fhedzi, fhedzi u tshila nga maipfi oṱhe a bvaho mulomoni wa Yehova.”—Luka 4:4, sedzani ṱhaluso i re magumoni a siaṱari kha RBi8-E.

“NYEMULO YA MAṰO”

9. Mubulo une wa ri “nyemulo ya maṱo” u sumbedza mini, nahone Sathane o shumisa hani yeneyi nyemulo kha mafhungo a Eva?

9 Yohane o dovha a amba nga ha “nyemulo ya maṱo” sa u fhura. Mubulo wonoyo u sumbedza uri muthu a nga thoma u emula tshithu nga u tou tshi sedza. Kha mafhungo a Eva, Sathane o mu kunga nga yeneyo nyemulo, musi a tshi ri: “Maṱo aṋu a ḓo bonyolowa.” Musi Eva a tshi lavhelesa, a vhona muri wo dzivhiswaho u tshi kunga. Eva o vhona muri ‘wo fanela u ḽiwa nahone u tshi takadza maṱo.’

10. Sathane o shumisa hani “nyemulo ya maṱo” u linga Yesu, nahone Yesu o mu fhindula hani?

10 Hu pfi mini kha mafhungo a Yesu? Sathane o “sumbedza [Yesu] mivhuso yoṱhe ya ḽifhasi. Diabolo a amba nae a ri: ‘Ndi ḓo u ṋea enea maanḓa kha yeneyi mivhuso yoṱhe na vhugala hayo.’” (Luka 4:5, 6) Yesu ho ngo kona u vhona mivhuso yoṱhe nga tshenetsho tshifhinga nga maṱo awe, fhedzi Sathane a nga vha o vhona u nga vhugala ha yeneyo mivhuso samusi o mu sumbedza nga iṱo ḽa muhumbulo, zwi nga kunga Yesu. A si na na ṱhoni, Sathane o mu vhudza uri: “Arali wa nthabela, zwoṱhe zwi ḓo vha zwau.” (Luka 4:7) Yesu o vha a sa ṱoḓi u vha muthu ane Sathane a ṱoḓa uri a vhe zwine ene a ṱoḓa. O fhindula nga u ṱavhanya. O ri: “Ho ṅwalwa u pfi: ‘U tea u rabela Yehova Mudzimu wau, ngauri ndi ene e eṱhe ane wa tea u mu itela tshumelo khethwa.’”—Luka 4:8.

 “U ṰONGISA ZWINE MUTHU A VHA NAZWO”

11. Eva o fhurwa hani nga Sathane?

11 Musi a tshi redza zwithu zwa shango, Yohane o amba nga ha “u ṱongisa zwine muthu a vha nazwo.” Musi Adamu na Eva vha tshi kha ḓi vha vhavhili fhedzi kha ḽifhasi, a vho ngo kona ‘u ṱongisa zwine vha vha nazwo’ kha vhaṅwe vhathu. Fhedzi vho sumbedza u ḓikukumusa. Musi Sathane a tshi linga Eva, o mu vhudza uri Mudzimu u khou mu dzivhisa tshithu tshavhuḓi. Diabolo o mu vhudza uri ḓuvha ḽeneḽo ḽine a ḓo ḽa “muri wa u ṱalukanya vhuḓi na vhuvhi,” u ḓo ‘nga Mudzimu, a ḓo ḓivha vhuḓi na vhuvhi.’ (Gen. 2:17; 3:5) Sathane o vhudza Eva uri u ḓo tshila vhutshilo hawe a sa ṱoḓi Yehova. U ḓikukumusa ndi hone ho itaho uri a tende mazwifhi eneo. O ṱanganedza wonoyo mutshelo wo dzivhiswaho, a tshi fulufhela uri a nga si fe. O vha o khakha vhukuma!

12. Ndi ifhio iṅwe nḓila ye Sathane a lingedza ngayo u linga Yesu, nahone Yesu o fhindula nga nḓila-ḓe?

12 U fhambana na Eva, Yesu o ri vhetshela tsumbo yavhuḓi lungafhani ya u ḓiṱukufhadza! Sathane o lingedza u mu linga nga iṅwe nḓila, fhedzi Yesu o landula tshithu tshine tsha nga ita uri a linge Mudzimu. Zwenezwo zwo vha zwi tshi ḓo sumbedza u ḓikukumusa! Nṱhani hazwo, phindulo ya Yesu yo vha i tshi pfala nahone yo livha: “Ho ṅwalwa u pfi: ‘U songo linga Yehova Mudzimu wau.’”—Vhalani Luka 4:9-12.

RI NGA TSIRELEDZA HANI VHUSHAKA HASHU NA YEHOVA?

13 Ṋamusi, Sathane u shumisa vhufhura vhu fanaho na he a vhu shumisa kha Eva na Yesu. A tshi shumisa “nyemulo ya ṋama,” Diabolo u shumisa shango ḽawe a tshi tikedza u ḓifara luvhi, u ḽesa na u nwesa. Nga u shumisa zwifanyiso zwi karusaho maḓipfele a zwa vhudzekani, zwihuluhulu kha Inthanethe, a nga kunga vhathu vho ṱalelaho vha sa ṱhogomeli nahone a tshi shumisa “nyemulo ya maṱo.” U shumisa vhathu uri vha ‘ṱongise zwine vha vha nazwo,’ a tshi ita uri vha fune zwithu zwi vhonalaho, maanḓa na bvumo zwine zwa ita uri vha ḓikukumuse!

Ndi maitele afhio a Maṅwalo ane a fanela u ḓa muhumbuloni waṋu musi no sedzana na honovhu vhuimo? (Sedzani dziphara 13, 14)

13, 14. Ṱalutshedzani uri Sathane u shumisa hani vhufhura ṋamusi.

14 ‘Zwithu zwi re shangoni’ zwi fana na luṱale lwa murei wa khovhe. Lu a kunga, fhedzi tsho ṱumiwaho kha luṱale ndi tshihuka. Sathane u shumisa zwine vhathu vha zwi dzhia sa ṱhoḓea yo ḓoweleaho ya ḓuvha ḽiṅwe na ḽiṅwe u itela uri vha lwisane na milayo  ya Mudzimu. Milingo yeneyo yo itelwa u ṱuṱuwedza nyemulo dzashu na u tshinya mbilu dzashu. I ita uri ri fulufhele uri u ṱhogomela ṱhoḓea dzashu na u ita uri vhutshilo hashu vhu vhe havhuḓi zwi ḓe u thoma u fhira u ita zwine Mudzimu a zwi funa. Naa vhufhura ho raloho vhu nga shuma na kha riṋe?

15. Ri nga edzisa hani Yesu nga u sa tenda u lingwa nga Sathane?

15 Naho Eva o fhurwa nga Sathane, Yesu ho ngo tenda u fhurwa. Tshifhinga tshoṱhe o vha a tshi fhindula nga Maṅwalo, a tshi ri: “Ho ṅwalwa u pfi.” Arali ri vhagudi vha Bivhili vha fhiseaho, ri ḓo ḓowelana na Maṅwalo nahone ra kona u humbula dziṅwe ndimana dzine dza nga ri thusa u itela uri ri humbule zwithu zwo livhaho musi ri tshi sedzana na milingo. (Ps. 1:1, 2) U humbula tsumbo dza Maṅwalo dza vhathu vha fulufhedzeaho kha Mudzimu zwi ḓo ri thusa uri ri vha edzise. (Vharoma 15:4) U ṱhonifha Yehova nga ho dzikaho, u funa zwine a zwi funa na u vhenga zwine a zwi vhenga zwi ḓo ri tsireledza.—Ps. 97:10.

16, 17. ‘Maanḓa ashu a u humbula’ a ri ita uri ri vhe vhathu vha mufuda-ḓe?

16 Muapostola Paulo o ri ṱuṱuwedza uri ri shumise ‘maanḓa ashu a u humbula’ u itela uri ri vhe vhathu vho vhumbwaho nga mihumbulo ya Mudzimu, hu si nga shango. (Vharoma 12:1, 2) Musi Paulo a tshi ombedzela ṱhoḓea ya u langa zwine ra zwi humbula, o amba uri: “Ri khou hanedza mihumbulo ya mazwifhi na zwithithisi zwoṱhe zwine zwa thivhela nḓivho ya Mudzimu, na u kunda mihumbulo yoṱhe uri i pfe Kristo.” (2 Vhakor. 10:5) Zwine ra zwi humbula zwi na ṱhuṱhuwedzo khulwane kha zwine ra vha zwone, ngauralo ri fanela u ‘bvela phanḓa ri tshi humbula’ zwithu zwi fhaṱaho.—Vhafil. 4:8.

17 Ri nga si lavhelele u vha vhakhethwa, arali ri tshi humbula zwithu zwi si zwavhuḓi na u zwi tama. Ri fanela u funa Yehova nga “mbilu yo kunaho.” (1 Tim. 1:5) Fhedzi mbilu ndi mudzia-tshimbevha, nahone ri nga si zwi ṱhogomele uri ‘zwithu zwi re shangoni’ zwi a ri kwama vhukuma. (Yer. 17:9) Naho zwo ralo, naa a ro ngo fanela u ‘dzula ri tshi ḓiṱolisisa uri ri ḓivhe arali ri tshee ro farelela kha lutendo,’ nga u ḓiṱolisisa nga u fulufhedzea nga zwe ra zwi guda Bivhilini?—2 Vhakor. 13:5.

18, 19. Ndi ngani ri tshi fanela u ḓiimisela u vha muthu ane Yehova a ṱoḓa ri tshi vha ene?

18 Tshiṅwe tshithu tshine tsha ri thusa uri ri iledze ‘zwithu zwi re shangoni’ ndi u dzula ri tshi humbula nga maipfi o hevhedzwaho a Yohane: “Shango ḽi a fhira na nyemulo dzaḽo, fhedzi ane a ita zwine Mudzimu a zwi funa u ḓo dzula e hone lini na lini.” (1 Yoh. 2:17) Maitele a Sathane a vhonala a tshi nga ndi a tshoṱhe nahone ndi a vhukuma. Naho zwo ralo, a ḓo fhela hu si kale. Zwine shango ḽa Sathane ḽa ri fha zwone zwi ḓo fhela hu si kale. U humbula nga zwenezwo zwi ḓo ri thusa uri ri si fhurwe nga Diabolo.

19 Muapostola Petro u ri ṱuṱuwedza uri ri vhe vhathu vhane vha takalelwa nga Mudzimu ‘vhunga ro lindela na u dzula ri tshi humbula u vha hone ha ḓuvha ḽa Yehova, nga tshifhinga tshine maṱaḓulu a ḓo fhiswa nga mulilo, na thikho dza ṋokiswa nga mulilo u fhisaho zwihulu!’ (2 Pet. 3:12) Hu si kale, ḓuvha ḽeneḽo ḽi ḓo ḓa nahone Yehova u ḓo fhelisa shango ḽoṱhe ḽa Sathane. U swika zwenezwo, Sathane u ḓo bvela phanḓa a tshi shumisa ‘zwithu zwi re shangoni’ u ri linga, samusi o linga Eva na Yesu. A ro ngo fanela u fana na Eva nahone ra ṱoḓa u fusha nyemulo dzashu riṋe vhane. U ita nga u ralo zwi ḓo nga ri dzhia Sathane sa mudzimu washu. Ri fanela u fana na Yesu nahone ra landula yeneyo milingo, hu sa londwi nḓila ye ya itwa uri i kunge ngayo. U nga ri muṅwe na muṅwe washu a nga ḓiimisela u vha muthu ane Yehova a ṱoḓa ri tshi vha ene.