Pfukelani kha mafhungo

Pfukelani kha zwi re ngomu

Vhahulwane—Naa Ni Nga Homolosa “Mbilu Yo Netaho”?

Vhahulwane—Naa Ni Nga Homolosa “Mbilu Yo Netaho”?

Angela, * muṅwe wahashu wa tshisadzini a songo vhingwaho ane a vha miṅwahani ya vhu-30, u ḓipfa o tshuwa. O lindela vhahulwane. Vha ḓo mu vhudza mini? Ndi ngoho uri o no fhirwa nga miṱangano i si gathi, fhedzi u ḓipfa o neta nga murahu ha u shuma ḓuvha ḽoṱhe a tshi khou ṱhogomela vhalala. Zwiṅwe zwine zwa engedza mutsiko a re nawo ḓuvha ḽiṅwe na ḽiṅwe, u vhilaela nga maanḓa nga mutakalo wa mme awe.

Arali no vha ni tshi fanela u dalela Angela, no vha ni tshi ḓo khuthadza hani onoyo muthu a re na “mbilu yo netaho”? (Yer. 31:25) Tsha u thoma, no vha ni tshi ḓo dzudzanya hani u ita lwendo lwa vhulisa lu homolosaho?

HUMBULANI NGA HA VHUIMO HA VHAHAṊU

Nga zwiṅwe zwifhinga, roṱhe ri a neta nga nṱhani ha mushumo wa u ḓitshidza kana vhuḓifhinduleli ha lwa ṱaḓulu. Sa tsumbo, muporofita Daniele o ‘pfa ó neta’ musi a tshi sumbedzwa bono ḽe a vha a sa ḽi pfesesi. (Dan. 8:27) O wana thuso musi muruṅwa Gabriele a tshi ḓi vhonadza khae. Vhaḓinḓa vha Mudzimu vha ita uri Daniele a pfesese, vha mu khwaṱhisedza uri thabelo dzawe dzo pfiwa nga Yehova, nahone vha mu vhudza uri u kha ḓi vha “mufuniwa.” (Dan. 9:21-23) Nga murahu ha tshenetsho tshiitea, maipfi avhuḓi o ambiwaho nga muṅwe muruṅwa o khwaṱhisa onoyo muporofita o netaho.—Dan. 10:19.

Ni sa athu u dalela mutendi nga inwi, ṱhogomelani vhuimo hawe

Nga hu fanaho, musi ni sa athu u dalela muṅwe mutendi nga iṅwi o netaho kana o kuleaho nungo, ḓiṋeeni tshifhinga tsha u humbula nga ha vhuimo hawe. Ndi vhuleme vhufhio vhune a khou sedzana naho? Honohu vhuleme vhu nga vha vhu tshi khou mu  kula hani nungo? Ndi pfaneleo dzifhio dzavhuḓi dzine a dzi sumbedza? Richard ane a vha muhulwane lwa miṅwaha i fhiraho 20, o ri: “Ndi livhisa ṱhogomelo kha nungo dza vhahashu, nga u ṱolisisa nga vhuronwane vhuimo havho musi ndi sa athu vha dalela.” O dovha a engedza nga u ri: “Zwi a leluwa u wana nḓila dza u vha ṱuṱuwedza dzine dza tea zwishaiwa zwavho.” Arali na ṱuwa na muhulwane kha lwendo lwa vhulisa, zwi nga vha zwavhuḓi u ṱolisisa vhuimo ha muthu ane na ḓo mu dalela.

ITANI URI VHAHAṊU VHA ḒIPFE VHO VHOFHOLOWA

Ni nga tenda uri u amba nga ha maḓipfele zwi nga shonisa. Sa tsumbo: Zwi nga kha ḓi konḓa uri muthu a ambe maḓipfele awe musi o dalelwa nga vhahulwane. Ni nga ita mini uri a ḓipfe o vhofholowa? U ṅwethuwa na u mu khuthadza zwi nga vha na mvelele yavhuḓi. Michael ane a vha muhulwane lwa miṅwaha i fhiraho 40, u anzela u thoma nga u amba uri: “Ni a ḓivha, iṅwe ndugelo yavhuḓisa ya muhulwane ndi ya u dalela vhahashu mahayani avho na u vha ḓivha khwine. Ngauralo, ndo zwi lavhelela nga maṱo matswuku u ni dalela ṋamusi.”

Ni nga kha ḓi khetha u thoma nga thabelo i bvaho mbiluni musi ni tshi tou swika. Kha thabelo dzawe, muapostola Paulo o amba nga ha lutendo, lufuno na u konḓelela zwa vhahawe. (1 Vhathes. 1:2, 3) Nga u sumbedza nḓila ine na ḓipfa ngayo nga ha pfaneleo dzavhuḓi dza vhahaṋu, ni vha ni tshi khou lugiselela mbilu yaṋu na yawe uri hu vhe na nyambedzano i fhaṱaho. Maipfi aṋu a nga vha khuthadzo yavhuḓi. Ray ane a vha muhulwane a re na tshenzhelo o ṱhogomela uri: “Nga zwiṅwe zwifhinga, roṱhe ri a hangwa nga ha zwivhuya zwine ra zwi khunyeledza. Ngauralo arali muṅwe a ri humbudza nga hazwo, zwi a ri homolosa.”

ṊEANI TSHIFHIWA TSHA MUYA

U fana na Paulo, ni nga kona u ṋea “tshifhiwa tsha muya” nga u haseledza Maṅwalo, naho hu ndimana nthihi fhedzi. (Vharoma  1:11) Sa tsumbo, wahashu o tsikeledzeaho a nga ḓipfa e si tshithu, u fana na mupsalme we a ḓivhambedza na “tshikumbu [tsho omaho] tsho itwaho nga mukumba tshi vhutsini.” (Ps. 119:83, 176, NW) Nga murahu ha u ṋea ṱhalutshedzo pfufhi ya wonoyo mubulo, ni nga vha na fulufhelo ḽa uri wahaṋu ho ngo “hangwa” ndaela dza Mudzimu.

Nga hu fanaho, naa tsumbo ya sheleni nthihi yo xelaho i nga kwama wahashu wa tshisadzini we a litsha u ṱanganela na tshivhidzo kana ane a si tsha ḓa tshifhinga tshoṱhe? (Luka 15:8-10) Sheleni yo xelaho i nga vha yo vha i tshipiḓa tsha vhulungu havhuḓi ho itwaho nga maseṱha manzhi. Nga u haseledza yeneyo tsumbo, a nga thuswa u vhona uri u tshipiḓa tsha ndeme tsha tshivhidzo tsha Vhukriste. Musi ni tshi fhedza u haseledza zwenezwo, ni nga ombedzela nḓila ine Yehova a mu ṱhogomela sa iṅwe ya nngu ṱhukhu dzawe.

Kanzhi vhatendi nga riṋe vha takalela u amba nga ha Bivhili. Nga u ralo, ni vha ṋee tshibuli tsha u amba! Musi no no vhala ndimana ine ya kwama vhuimo havho, ni nga khetha ipfi ḽa ndeme kana mubulo na vha vhudzisa uri vha ambe nga hao. Sa tsumbo, nga murahu ha u vhala 2 Vhakorinta 4:16, muhulwane a nga vhudzisa uri, “Naa no no tshenzhela nḓila ine Yehova a ni vusulusa ngayo?” Yeneyi nḓila ya u amba i nga livhisa kha u ‘ṱuṱuwedzana’ ha ngoho.—Vharoma 1:12.

Kanzhi vhatendi nga riṋe vha takalela u amba nga ha Bivhili

Ni nga kha ḓi humbudza mutendi nga inwi nga u haseledza nae nga muṅwe muthu a re Bivhilini ane vhuimo hawe ha fana na hawe. Muthu o fulufhuwaho a nga pfesesa vhuimo ha Hanna kana Epafrodito, vhe nga zwiṅwe zwifhinga vha ḓipfa vho tsikeledzea, fhedzi vha ḓi dzula vhe vha ndeme kha Mudzimu. (1 Sam. 1:9-11, 20; Vhafil. 2:25-30) Zwi nga vha zwavhuḓi arali na haseledza dziṅwe tsumbo dzavhuḓi dzire Bivhilini musi vhuimo vhu tshi ni tendela.

ITANI VHUNGOHO HA URI NI A VHUYELELA

Ni nga sumbedza uri ni vhilaelela vhahaṋu vha tshinnani na vha tshisadzini nga u vha na dalela. (Mish. 15:36) Musi ni tshi vho ṱuwa, ni nga wana zwi tshi thusa u langana na onoyo muthu uri ni tshimbile nae vhuḓinḓani. Musi Bernard, muhulwane a re na tshenzhelo a tshi ṱangana na wahashu wa tshisadzini kana wa tshinnani we a mu dalela, u vhudzisa nga vhuṱali nga nyeletshedzo ye a mu ṋea yone nga uri: “Naa zwiḽa zwithu zwo shuma?” Nga u sumbedza u vha na dzangalelo, ni ḓo kona u vhona arali hu tshi ṱoḓea thuso yo engedzeaho.

Zwiṅwe hafhu, vhahashu vha tshinnani na vha tshisadzini vha fanela u ṱhogomelwa, u pfeseswa na u funiwa. (1 Vhathes. 5:11) Nga zwenezwo, ni sa athu u ita lwendo lwa vhulisa, ḓiṋeeni tshifhinga tsha u elekanya nga ha vhuimo ha wahaṋu. Rabelani nga hazwo. Khethani maṅwalo o teaho. Arali na ita nga u ralo ni ḓo wana maipfi o teaho a u homolosa “mbilu yo netaho”!

^ par. 2 Madzina o shandulwa.