Pfukelani kha mafhungo

Pfukelani kha zwi re ngomu

 THERO I GUDWAHO 36

Ro Lavhelela Haramagedo Nga Maṱo Matswuku!

Ro Lavhelela Haramagedo Nga Maṱo Matswuku!

“A vha kuvhanganyela fhethu hune . . . ha pfi Haramagedo.”—NZUMB. 16:16.

LUIMBO 150 Ṱoḓani U Tshidzwa Nga Mudzimu

MANWELEDZO *

1-2. (a) Ndi ngani ro lavhelela Haramagedo nga maṱo matswuku? (b) Ri ḓo haseledza mbudziso dzifhio kha ino thero?

VHAṄWE vhathu vha tenda uri shango ḽi ḓo fheliswa nga khombo ya mupo kana nndwa ine khayo ha ḓo shumiswa zwihali zwi re na nyuklia. Fhedzi zwenezwo a si zwine zwa funzwa nga Bivhili. Nṱhani hazwo i ri funza uri hu ḓo vha na nndwa ine ya ḓo ita uri hu vhe mvelelo dzavhuḓi. Yeneyi nndwa i vhidzwa Haramagedo nahone zwine Bivhili ya zwi amba nga hayo zwi tea u ri takadza. (Nzumb. 1:3) Nndwa ya Haramagedo i nga si fhelise vhathu, fhedzi i ḓo vha tshidza. Nga nḓila ḓe?

2 Bivhili i amba uri nndwa ya Haramagedo i ḓo tshidza vhathu nga u fhelisa mivhuso ya vhathu. Yeneyo nndwa i ḓo tshidza vhathu nga u fhelisa vhathu vhavhi nahone ha sala vho lugaho. Nahone i ḓo tshidza vhathu nga u ita uri shango ḽi si bvele phanḓa ḽi tshi tshinyiwa. (Nzumb. 11:18) U itela uri ri pfesese dzenedzi mbuno zwavhuḓi, kha ri haseledze mbudziso nṋa dzi tevhelaho: Haramagedo ndi mini? Ndi zwifhio zwiitea zwine zwa ḓo ri livhisa khayo? Ri nga ita mini uri ri vhe vhaṅwe vha vhathu vhane vha ḓo ponyoka Haramagedo? Ri nga dzula hani ri tshi fhulufhedzea samusi vhufhelo ho sendela?

HARAMAGEDO NDI MINI?

3. (a) Ipfi “Haramagedo” ḽi amba mini? (b) U ya nga Nzumbululo 16:14, 16, ndi ngani ri tshi nga amba uri Haramagedo a si fhethu ha vhukuma?

3 Vhalani Nzumbululo 16:14, 16. Ipfi Haramagedo ḽi bvelela luthihi fhedzi Bivhilini nahone ḽi bva kha ipfi ḽa Tshiheberu ḽine ḽa amba Thavha Ya Megido. (Nzumb. 16:16) Megido ndi fhethu he ha vha hu hone Isiraele ḽa kale. (Yosh. 17:11) Fhedzi Haramagedo  a si dzina ḽa fhethu ha vhukuma. Ḽi ambela kha musi “mahosi a ḽifhasi ḽoṱhe” a tshi ḓo shumisana u itela u lwa na Yehova. (Nzumb. 16:14) Naho zwo ralo, kha ino thero, ri dovha ra shumisa ipfi Haramagedo ri tshi ambela kha nndwa ine ya ḓo vha hone musi mahosi a ḽifhasi o no kuvhangana. Ri zwi ḓivha hani uri Haramagedo ndi fhethu ha pfanyisedzo? Tshiitisi tsha u thoma, Megido a hu na thavha. Tsha vhuvhili, fhethu ho tangaho Megido a ho ngo hula lune “mahosi a ḽifhasi ḽoṱhe” na zwihali zwao zwa nga fhelela. Tsha vhuraru, samusi ri tshi ḓo zwi guda, nndwa ya Haramagedo i ḓo thoma musi “mahosi” a ḽifhasi a tshi vutshela vhathu vha Mudzimu u mona na shango ḽoṱhe.

4. Ndi ngani Yehova o ṱumanya nndwa yawe khulwane ya u fhedzisela na Megido?

4 Ndi ngani Yehova o ṱumanya nndwa yawe khulwane ya u fhedzisela na Megido? Misini ya Bivhili, vhathu vhanzhi vho vha vha tshi lwa Megido na Govhani ḽa Yeseriele ḽe ḽa vha ḽi nga henefho tsini. Nga zwiṅwe zwifhinga, Yehova o vha a tshi dzhenelela nga ho livhaho. Sa tsumbo, Mudzimu o shumisa ‘milambo ya Megido’ u itela u thusa Muhaṱuli Baraka we a vha e Muisiraele uri a kunde mmbi ya Vhakanana ye ya vha i tshi khou rangwa phanḓa nga mulangammbi ane a pfi Sisera. Baraka na muporofita wa mufumakadzi ane a pfi Debora vho livhuwa Yehova nge a vha thusa uri vha kunde nga lwa vhuṱolo. Vho imba vha ri: “Dziṋaledzi ṱaḓulu . . . dzo lwa na Sisera . . . Vha kumbiwa nga kudambo kwa Kisoni.”—Vhahaṱ. 5:19-21.

5. Ndi ifhio phambano khulwane i re hone vhukati ha nndwa ye ya lwiwa nga Baraka na ya Haramagedo?

5 Baraka na Debora vho phetha luimbo lwavho nga maipfi ane a ri: “Atsina, o lovha maswina au oṱhe, hee Yehova! Vhane vha U funa vha fana na ḓuvha vhuhalini haḽo.” (Vhahaṱ. 5:31) Nga hu fanaho, maswina a Mudzimu a ḓo fheliswa nga Haramagedo nahone vhane vha mu funa vha ḓo tshidzwa. Fhedzi hu na phambano khulwane vhukati ha dzenedzi nndwa mbili. Vhathu vha Mudzimu a vha nga ḓo lwa nga Haramagedo. Vha nga si fare na zwihali! ‘Maanḓa avho ndi u ḓi-fhumulela na u fulufhela’ Yehova na vharuṅwa vhawe.—Yes. 30:15; Nzumb. 19:11-15.

6. Yehova a nga kunda hani maswina awe nga Haramagedo?

6 Mudzimu u ḓo kunda hani maswina awe nga Haramagedo? Hu na nḓila nnzhi dzine a nga dzi shumisa. Sa tsumbo, a nga shumisa midzinginyo, tshifhango na phenyo. (Yobo 38:22, 23; Hesek. 38:19-22) A nga ita uri maswina awe a vutshelane. (2 Koron. 20:17, 22, 23) Kana a nga shumisa vharuṅwa u itela u fhelisa vhathu vhavhi. (Yes. 37:36) Mudzimu u ḓo kunda hu sa londwi uri o shumisa nḓila ifhio. Maswina awe oṱhe a ḓo fheliswa. Nahone vhathu vhoṱhe vho lugaho vha ḓo tshidzwa.—Mir. 3:25, 26.

NDI ZWIFHIO ZWIITEA ZWINE ZWA ḒO RI LIVHISA KHA HARAMAGEDO?

7-8. (a) U ya nga 1 Vhathesalonika 5:1-6, ndi ifhio nḓivhadzo i songo ḓoweleaho ine vharangaphanḓa vha shango vha ḓo i ita? (b) Ndi ngani yeneyo nḓivhadzo i tshi ḓo vha mazwifhi a re na khombo?

7 Musi hu sa athu ḓa “ḓuvha ḽa Yehova,” hu ḓo vha na nḓivhadzo ya “mulalo na u tsireledzea.” (Vhalani 1 Vhathesalonika 5:1-6.) Kha 1 Vhathesalonika 5:2, “ḓuvha ḽa Yehova” ḽi ambela kha ‘maṱungu mahulu.’ (Nzumb. 7:14) Ri ḓo zwi ḓivha hani musi maṱungu mahulu e tsini na u thoma? Bivhili i ri vhudza uri hu ḓo vha na nḓivhadzo i songo ḓoweleaho. Yeneyo nḓivhadzo i ḓo vha tshiga tsha uri maṱungu mahulu a khou thoma.

8 Yeneyo nḓivhadzo yo ambiwaho hu tshee nga phanḓa i ḓo vha i ya uri hu na “mulalo na u tsireledzea.” Ndi ngani vharangaphanḓa vha shango vha tshi ḓo amba zwenezwo? Naa vharangaphanḓa vha vhurereli vha ḓo shela  mulenzhe kha yeneyo nḓivhadzo? Khamusi. Yeneyi nḓivhadzo i ḓo vha i mazwifhi a madimoni. Fhedzi eneo mazwifhi a ḓo vha e a khombo ngauri a ḓo fhura vhathu nga u ita uri vha humbule u nga vho tsireledzea, ngeno hu tshi ḓo vha hu khou thoma maṱungu mahulu ane ha athu vhuya a vha hone. “Ndozwo i ḓo vha ḓela vha songo zwi lavhelela sa vhuṱungu vhune ha pfiwa nga mufumakadzi musi e tsini na u beba.” Hu ḓo itea mini kha vhashumeli vha Yehova vha fhulufhedzeaho? A vha ḓivhi uri maṱungu mahulu a ḓo thoma lini, nga zwenezwo, vha nga mangala musi a tshi thoma, fhedzi vha ḓo dzula vho ita ngoma madzula wo vhambwa.  

9. Yehova u ḓo fhelisa hani shango ḽa Sathane?

9 Yehova a nga si fhelise shango ḽa Sathane nga luthihi u fana na nḓila ye a zwi ita ngayo misini ya Noaxe. Nṱhani hazwo, u ḓo ḽi fhelisa nga nḓila mbili. U ḓo thoma nga u fhelisa Babele Ḽihulu ḽine ḽa vha vhurereli hoṱhe ha mazwifhi. Nga murahu, u ḓo fhelisa shango ḽoṱhe ḽa Sathane u katela na zwipiḓa zwaḽo zwa politiki, mmbi na zwa mabindu. Kha ri haseledze zwenezwi zwiitea zwivhili zwa ndeme.

10. U ya nga Nzumbululo 17:1, 6 na 18:24, ndi ngani Yehova a tshi ḓo fhelisa Babele Ḽihulu?

10 ‘U haṱulwa ha phombwe khulu.’ (Vhalani Nzumbululo 17:1, 6; 18:24.) Phombwe khulu kana Babele Ḽihulu ḽo ḓodza dzina ḽa Mudzimu matope. Ḽo funza mazwifhi nga ha Mudzimu. Ḽo ita vhupombwe nga u tikedza mivhuso ya vhathu na u sa fhulufhedzea kha Yehova. Babele Ḽihulu ḽo tsikeledza vhathu vha re nga fhasi haḽo nahone ḽo ḽa na tshelede dzavho. Ḽo vhulaya vhathu vhanzhi u katela na vhaṅwe vhashumeli vha Mudzimu. (Nzumb. 19:2) Yehova u ḓo fhelisa hani Babele Ḽihulu?

11. “Ḽivhanda ḽitswuku-tswuku” ndi mini nahone Mudzimu u ḓo ḽi shumisa hani u itela u lwa na Babele Ḽihulu?

11 Yehova u ḓo shumisa “ṋanga dza fumi” dza “ḽivhanda ḽitswuku-tswuku” u itela u fhelisa “phombwe khulu.” Ḽeneḽo ḽivhanda ḽi imela United Nations. Ṋanga dza fumi dzi imela mivhuso ine ya tikedza United Nations. Nga tshifhinga tsho vhewaho nga Mudzimu, yeneyo mivhuso  i ḓo vutshela phombwe, ya i “bvula ya sala i fhedzi” nga u dzhia lupfumo lwayo na u sumbedza vhathu vhoṱhe nḓila ine yeneyo phombwe ya vha muvhi ngayo. (Nzumb. 17:3, 16) Phombwe i ḓo fheliswa nga u ṱavhanya, zwa nga zwo itea nga ḓuvha ḽithihi nahone zwenezwo zwi ḓo mangadza vhatikedzi vhayo, zwihuluhulu ngauri yo vha i tshi ḓirwa khana nga u amba uri: “Ndo dzula sa khosi ya mufumakadzi, a thi tshilikadzi, a thi nga ḓo vhuya nda ṱungufhala.”—Nzumb. 18:7, 8.

12. Ndi mini zwine Yehova a sa ḓo tendela dzitshaka dzi tshi zwi ita nahone ndi ngani?

12 Mudzimu a nga si tendele dzitshaka dzi tshi fhelisa vhathu vhawe. Vha vhidzwa nga dzina ḽawe nahone vho thetshelesa ndaela yawe ya uri vha bve kha Babele Ḽihulu. (Mish. 15:16, 17; Nzumb. 18:4) Zwiṅwe hafhu, vho ita zwoṱhe zwine vha nga kona u itela u thusa vhaṅwe uri vha bve khaḽo. Nga zwenezwo, vhashumeli vha Yehova vha nga si ḓo “baḓekanywa kha ṱhamu dzaḽo.” Naho zwo ralo, lutendo lwavho lu ḓo lingwa.

Vhathu vha Mudzimu vha ḓo mu fhulufhela musi vha tshi vutshelwa hu sa londwi hune vha dzula hone (Sedzani phara 13) *

13. (a) Gogo ndi nnyi? (b) U ya nga Hesekiele 38:2, 8, 9, ndi mini zwine zwa ḓo ita uri Gogo a ye fhethu ha lwa pfanyisedzo hune ha vhidzwa Haramagedo?

13 U vutshelwa nga Gogo. (Vhalani Hesekiele 38:2, 8, 9.) Nga murahu ha musi Yehova o no fhelisa vhurereli hoṱhe ha mazwifhi, hu ḓo sala vhurereli vhuthihi fhedzi shangoni, hu ḓo sala vhashumeli vha Yehova fhedzi. Zwenezwo zwi ḓo sinyusa Sathane. U ḓo sumbedza uri o sinyuwa nga u shumisa “mibulo . . . yo hevhedzwaho i re na tshika,” yeneyo mibulo i ḓo vha i mazwifhi ane a bva kha madimoni ane a ḓo ita uri dzitshaka dzi vutshele vhathu vha Yehova. (Nzumb. 16:13, 14) Dzenedzo tshaka dzi vhidzwa “Gogo kha ḽa Magogo.” Musi dzi tshi vutshela vhathu vha Yehova, nndwa ya Haramagedo i ḓo thoma.—Nzumb. 16:16.

14. Ndi mini zwine Gogo a ḓo zwi ṱhogomela?

14 Gogo u ḓo fhulufhela “tshanḓa tsha ṋama” tshine tsha vha mmbi yawe ya maanḓa. (2 Koron. 32:8) Fhedzi riṋe ri ḓo fhulufhela kha Yehova Mudzimu washu nahone zwenezwo zwi ḓo vhonala zwi vhutsilu kha dzitshaka. Ndi  ngani? Nga nṱhani ha uri Babele Ḽihulu ḽo vha ḽi na maanḓa, fhedzi midzimu yaḽo yo kundelwa u ḽi tshidza kha “ḽivhanda” na ‘ṋanga dzaḽo dza fumi’! (Nzumb. 17:16) Nga zwenezwo, Gogo u ḓo vhona u nga zwi ḓo mu lelutshela u ri fhelisa. U ḓo vutshela vhathu vha Yehova u fana na “gole ḽi fukedzaho shango.” (Hesek. 38:16) Fhedzi Gogo u ḓo zwi ṱhogomela uri a hu na vhushavhelo. U fana na tshifhingani tsha musi Farao e Lwanzheni Lutswuku, Gogo u ḓo zwi vhona uri u khou lwa na Yehova nga tsha vhukoma.—Ek. 14:1-4; Hesek. 38:3, 4, 18, 21-23.

15. Yesu u ḓo ita mini nga Haramagedo?

15 Kristo na vharuṅwa vha ḓo imelela vhathu vha Mudzimu nahone vha fhelisa Gogo na vha tikedzi vhawe. (Nzumb. 19:11, 14, 15) Fhedzi hu ḓo itea mini kha Sathane, swina ḽihulu ḽa Yehova we a zwifhela dzitshaka nahone a dzi ita uri dzi vutshele vhathu vha Mudzimu nga Haramagedo? Yesu u ḓo posa Sathane na madimoni awe mugodini, hune vha ḓo valelwa hone lwa miṅwaha ya tshigidi.—Nzumb. 20:1-3.

RI NGA ITA MINI URI RI PONYOKE HARAMAGEDO?

16. (a) Ri nga sumbedza hani uri ri ‘ḓivha Mudzimu’? (b) Hu ḓo itea mini kha vhathu vhane vha ḓivha Yehova nga Haramagedo?

16 Hu sa londwi uri ri na tshifhinga tshingafhani ri ngohoni, ri fanela u sumbedza uri ri ‘ḓivha Mudzimu’ na uri ri ‘thetshelesa mafhungo maḓifha a ambaho nga ha Murena washu Yesu’ u itela uri ri ponyoke Haramagedo. (2 Vhathes. 1:7-9) U ‘ḓivha Mudzimu’ zwi amba u ḓivha zwine a zwi takalela, zwine a si zwi takalele na zwine a ṱoḓa ri tshi zwi ita. Ri dovha ra sumbedza uri ri a mu ḓivha nga u mu funa, u mu thetshelesa na u shumela ene e eṱhe. (1 Yoh. 2:3-5; 5:3) Musi ri tshi ḓivha Mudzimu, ri vha na ndugelo ya u “ḓivhiwa ngae” nahone zwenezwo zwi ḓo ita uri ri ponyoke nga Haramagedo! (1 Vhakor. 8:3) Nga nḓila ḓe? Ngauri u “ḓivhiwa ngae” zwi nga amba u takalelwa ngae.

17. Zwi amba mini u thetshelesa “mafhungo maḓifha a ambaho nga ha Murena washu Yesu”?

17 “Mafhungo maḓifha a ambaho nga ha Murena washu Yesu” a katela ngoho ye Yesu a i funza  ine ya vha Ipfini ḽa Mudzimu. Ri thetshelesa mafhungo maḓifha musi ri tshi a shumisa vhutshiloni hashu. Zwenezwi zwi katela u ita uri u shumela Yehova zwi ḓe u thoma vhutshiloni hashu, u ita zwine zwa mu takadza na u huwelela nga Muvhuso wawe. (Mat. 6:33; 24:14) Zwi dovha zwa katela u tikedza vharathu vha Kristo vho ḓodzwaho musi vha tshi khou ita mushumo wavho wa ndeme.—Mat. 25:31-40.

18. Vharathu vha Kristo vho ḓodzwaho vha ḓo lambedza hani vha dziṅwe nngu?

18 Vhashumeli vha Mudzimu vho ḓodzwaho vha ḓo lambedza vha “dziṅwe nngu” nge vha vha thusa. (Yoh. 10:16) Nga nḓila ḓe? Musi nndwa ya Haramagedo i sa athu thoma, vha 144 000 vha ḓo vha vho no vuswa sa zwivhumbiwa zwa muya zwi sa fi ngei ṱaḓulu. Vha ḓo vha tshipiḓa tsha mmbi i re ṱaḓulu ine ya ḓo fhelisa Gogo nahone vha ḓo tsireledza “gogo ḽihulu” ḽa vhathu vha Yehova. (Nzumb. 2:26, 27; 7:9, 10) Gogo ḽihulu ḽi ḓo takala vhukuma nge ḽa tikedza vhashumeli vha Yehova vho ḓodzwaho musi vha tshee kha ḽifhasi.

RI NGA DZULA HANI RI TSHI FHULUFHEDZEA SAMUSI VHUFHELO HO SENDELA?

19-20. Samusi Haramagedo i tsini, ri nga dzula hani ri tshi fhulufhedzea naho ro sedzana na milingo?

19 Vhunzhi ha vhashumeli vha Yehova vha khou sedzana na milingo kha ano maḓuvha a vhufhelo a konḓaho u sedzana nao. Naho zwo ralo, ri nga kona u konḓelela ro takala. (Yak. 1:2-4) Zwine zwa nga ri thusa ndi u rabela zwi tshi bva mbiluni tshifhinga tshoṱhe. (Luka 21:36) A ro ngo tea u rabela fhedzi, fhedzi ri tea u guda Ipfi ḽa Mudzimu ḓuvha na ḓuvha na u elekanya nga haḽo u katela na nga ha zwithu zwavhuḓi zwine ḽa fhulufhedzisa uri zwi ḓo itea hu si kale. (Ps. 77:12) U ita zwenezwo na u ita zwoṱhe zwine ra nga kona mushumoni wa u huwelela zwi ḓo ita uri ri dzule ri na fhulufhelo na lutendo lwo khwaṱhaho.

20 Humbulani nga ha nḓila ine na ḓo takala ngayo musi Babele ḽihulu ḽi tshi fheliswa nahone nndwa ya Haramagedo i tshi fhela! Nahone humbulani nga ha nḓila ine na ḓo takala ngayo musi dzina ḽa Mudzimu ḽi tshi itwa ḽikhethwa nga vhathu vhoṱhe na musi vha tshi zwi vhona uri ndi ene o tewaho nga u vhusa. (Hesek. 38:23) Ndi ngazwo vhane vha ḓivha Mudzimu, u thetshelesa Murwa wawe na u konḓelela u swika vhufheloni vho lindela Haramagedo nga maṱo matswuku.—Mat. 24:13.

LUIMBO 143 Ni Ḓi Shuma, No Fhaṱuwa, No Lindela

^ phar. 5 Vhathu vha Yehova vho lindela Haramagedo u bva tsha ṅwaha wa mmbo na tsikidzi. Kha ino thero, ri ḓo haseledza uri Haramagedo ndi mini, zwiitea zwine zwa ḓo ri livhisa khayo na nḓila ine ra nga dzula ri tshi fhulufhedzea ngayo samusi vhufhelo ho sendela.

^ phar. 71 ṰHALUSO YA TSHIFANYISO: Zwiitea zwine zwa ḓo itea. (1) Ri ḓo ita zwoṱhe zwine ra nga kona mushumoni wa u huwelela, (2) ri ḓo dzula ri tshi guda nahone (3) ri ḓo bvela phanḓa ri tshi fhulufhela uri Yehova u ḓo ri tsireledza.

^ phar. 85 ṰHALUSO YA TSHIFANYISO: Mapholisa a khou lugela u ṱhasela muṱa wa Vhakriste, fhedzi wonoyo muṱa u na vhungoho ha uri Yesu na vharuṅwa vha khou vhona zwine zwa khou itea.