Pfukelani kha mafhungo

Pfukelani kha zwi re ngomu

“Arali Ni Tshi Ḓivha Zwenezwi Zwithu, Ni Ḓo Takala Arali Na Zwi Ita”

“Arali Ni Tshi Ḓivha Zwenezwi Zwithu, Ni Ḓo Takala Arali Na Zwi Ita”

“Zwiḽiwa zwanga ndi u ita zwi funwaho nga o nthumaho na u vuledza mushumo wawe.”—YOH. 4:34.

NYIMBO: 80, 35

1. Muya wa shango wa u ḓihumbulela u nga kwama hani u ḓiṱukufhadza hashu?

NDI ngani zwi tshi konḓa u shumisa zwine ra zwi guda Bivhilini? Ndi ngauri hu ṱoḓea u ḓiṱukufhadza uri ri ite zwithu nga nḓila yo teaho nahone u ḓiṱukufhadza hashu hu khomboni. Kha ano ‘maḓuvha a vhufhelo,’ ro tangwa nga vhathu vhane vha ‘funa vhone vhaṋe fhedzi, vhafuni vha tshelede, vhazuwi, vhadzia-u-ḓihudza’ na “vha sa koni u ḓifara.” (2 Tim. 3:1-3) Samusi ri vhashumeli vha Mudzimu, ri a zwi ḓivha uri zwenezwi zwithu zwo vhifha, fhedzi nga zwiṅwe zwifhinga ri nga vhona u nga vhathu vhane vha tshila nga yeneyo nḓila vha khou bvelela nahone vha khou ḓiphina. (Ps. 37:1; 73:3) Ri nga ḓivhudzisa uri: ‘Naa zwi a ṱoḓea uri ndi vhee madzangalelo a vhaṅwe u thoma? Arali nda “ḓiita muṱuku,” naa vhathu a vha tsha ḓo nṱhonifha?’ (Luka 9:48) Arali ra tendela muya wa shango wa u ḓihumbulela u tshi ri langa, zwi nga ita uri ri si tsha funa vhahashu tshivhidzoni nahone zwi ḓo konḓela vhaṅwe uri vha ri ṱalule sa Vhakriste. Fhedzi ri a vhuyelwa musi ri tshi guda na u edzisa tsumbo dzavhuḓi dzi re Bivhilini.

2. Tsumbo dza vhashumeli vha Mudzimu vha fulufhedzeaho dzi nga ri kwama hani?

2 Arali ri tshi ṱoḓa u edzisa tsumbo dza vhathu vhe vha fulufhedzea,  ri fanela u ṱoḓisisa zwe zwa ita uri vha vhe khonani dza Mudzimu. Ndi mini zwe vha zwi ita uri vha vhe na vhushaka havhuḓi nae, u takalelwa ngae nahone vho zwi kona hani u khunyeledza zwine a zwi funa? U guda nga ha zwenezwo ndi zwa ndeme nahone zwi ita uri ri vhe na lutendo lwo khwaṱhaho.

ZWIḼIWA ZWA MUYA—ZWI FHIRA U SOKOU ḒIVHA MAFHUNGO

3, 4. (a) Yehova u ri gudisa hani? (b) Ndi ngani ri tshi nga amba uri zwiḽiwa zwa muya zwi katela zwo engedzeaho u fhira u sokou vha na nḓivho?

3 Yehova u ri ṋea zwine ra zwi ṱoḓa u itela uri ri dzule ri na lutendo lwo khwaṱhaho. U ri ṋea nyeletshedzo dzavhuḓi na uri gudisa a tshi shumisa Bivhili, khandiso dzashu, website dzashu, JW Broadcasting, miṱangano na maguvhangano. Zwe Yesu a zwi amba kha Yohane 4:34 zwi katela zwo engedzeaho u fhira u sokou vha na nḓivho. Zwi katela mini? Yesu o ri: “Zwiḽiwa zwanga ndi u ita zwi funwaho nga o nthumaho na u vuledza mushumo wawe.”

4 Kha Yesu, zwiḽiwa zwa muya zwo vha zwi tshi katela u tevhela vhulivhisi ha Mudzimu. Zwenezwi zwithu zwi nga zwiḽiwa nga nḓila-ḓe? Samusi mivhili yashu i tshi takala na u penyelela musi ri tshi ḽa zwiḽiwa zwi re na pfushi, nga hu fanaho, ri a vha na lutendo lwo khwaṱhaho musi ri tshi ita zwine Mudzimu a zwi funa. Ndi lungana ni tshi ya miṱanganoni ya tsimu ni sa ḓipfi zwavhuḓi, fhedzi ni tshi tshaisa na ḓipfa no homolowa nahone ni na nungo?

5. Ndi mbuyelo dzifhio dzine ra dzi wana musi ri tshi sumbedza vhuṱali?

5 Zwi sumbedza vhuṱali musi ri tshi shumisa zwine Mudzimu a ri gudisa zwone. (Ps. 107:43) Malamba a u ṱalifha ndi manzhi vhukuma. Bivhili i ri: “Madzanga oṱhe ha lingani naho. . . . Vhuṱali ndi muri wa vhutshilo wa vhe vha vhu fara; ane a pfi wa mashudu ndi uyo we a vhu fara a khwaṱhisa.” (Mir. 3:13-18) Yesu o ri: “Arali ni tshi ḓivha zwenezwi zwithu, ni ḓo takala arali na zwi ita.” (Yoh. 13:17) Vhafunziwa vha Yesu vho vha vha tshi ḓo dzula vho takala arali vha bvela phanḓa vha tshi ita zwe a vha vhudza zwone. A vho ngo tevhela tsumbo yawe na zwe a zwi amba kha tshenetsho tshiitea fhedzi, fhedzi vho zwi tevhela tshifhinga tshoṱhe.

6. Ndi ngani ri tshi fanela u bvela phanḓa ri tshi shumisa zwine ra zwi guda?

6 Ndi zwa ndeme uri ri dzule ri tshi shumisa zwine ra zwi guda. Sa tsumbo, mulugisi a nga kha ḓi vha na zwishumiswa na nḓivho. Fhedzi arali a sa shumisa zwenezwo zwithu, a nga si vhe mulugisi makone. Arali o no ita mushumo wa u lugisa tshifhingani tsho fhiraho nahone o no vha na tshenzhemo nnzhi kha wonoyo mushumo, u tea u bvela phanḓa a tshi shumisa zwe a zwi guda u itela uri a dzule a tshi ita wonoyo mushumo zwavhuḓi na u dzula e na honoho vhutsila. Nga hu fanaho, ro vha ro takala musi ri tshi thoma u guda ngoho na u shumisa zwe ra zwi guda Bivhilini. Fhedzi u itela uri ri takale lwa tshoṱhe, ri tea u bvela phanḓa ri tshi shumisa zwine Yehova a ri vhudza zwone na u ḓiṱukufhadza tshifhinga tshoṱhe.

7. Ri guda mini kha tsumbo dzi re Bivhilini?

7 Kha ri ṱolisise maṅwe masia ane a nga linga u ḓiṱukufhadza hashu na u vhona nḓila ye vhashumeli vha Mudzimu vha tshifhingani tsho fhiraho vha sedzana naho. Ri tea u ita zwo engedzeaho u fhira u sokou vhala. Ri tea u elekanya nga hazwo na u zwi shumisa.

DZHIANI VHATHU VHOṰHE NGA NḒILA INE YA LINGANA

8, 9. Zwiitea zwo ṅwalwaho kha Mishumo 14:8-15, zwi dzumbulula mini nga ha u ḓiṱukufhadza ha muapostola Paulo? (Sedzani tshifanyiso tsha u thoma.)

8 Mudzimu u funa “vhathu vha mifuda yoṱhe vha tshi tshidzwa nahone vha vha na nḓivho  yo teaho ya ngoho.” (1 Tim. 2:4) Ni ḓipfa hani nga ha vhathu vha sa athu u guda ngoho? Naho muapostola Paulo o huwelela kha Vhayuda vhe vha vha vha tshi ḓivha zwiṅwe nga ha Mudzimu, o dovha a huwelela na kha vhathu vhe vha vha vha tshi gwadamela midzimu i sili. Nḓila ye vhathu vhe vha vha vha tshi gwadamela midzimu i sili vha aravha ngayo, yo linga u ḓiṱukufhadza ha Paulo.

9 Sa tsumbo, kha lwendo lwawe lwa u thoma sa murumiwa, Paulo o ṱuwa na Baranaba ngei Lisitara. Henefho, vhathu vhane vha amba Lulikaonia vho thoma u hulisa Paulo na Baranaba nahone vha thoma u vha dzhia sa midzimu yavho Ziasi na Heremisi. Naa Paulo na Baranaba vho lingea uri vha ḓiitele bvumo? Naa vho vhona zwenezwi hu tshanduko yavhuḓi vhukuma samusi vho tovholwa kha miṅwe miḓi ye vha i dalela? Naa vho humbula uri zwenezwi zwithu zwoṱhe zwi ḓo thusa vhathu vhanzhi uri vha pfe mafhungo maḓifha? Na khathihi! Vho dinalea nahone vha kherukanya zwiambaro zwavho, vha huwelela vha ri: “Ni khou zwi itela’ni? Na riṋe ri vhathu vha re na vhushayanungo u fana na inwi.”—Mish. 14:8-15.

10. Ndi ngani Paulo na Baranaba vha songo ḓipfa vhe vha khwine u fhira vhathu vhane vha amba Lulikaonia?

10 Musi Paulo na Baranaba vha tshi amba uri na vhone a vho ngo fhelela, vho vha vha sa khou amba uri vhurabeli havho vhu fana na ha vhenevho vhathu vhane vha gwadamela midzimu ya mazwifhi. Paulo na Baranaba vho vha vhe vharumiwa. (Mish. 13:2) Vho vha vho ḓodzwa nga muya mukhethwa nahone vhe na fulufhelo ḽavhuḓi. Paulo na Baranaba vho vha vha tshi pfesesa uri na vhathu vhane vha amba Lulikaonia vha nga wana ndugelo dzi fanaho arali vha thetshelesa mafhungo maḓifha.

11. Ri nga edzisa hani tsumbo ya Paulo ya u ḓiṱukufhadza musi ri tshi huwelela?

11 Ri nga edzisa hani tsumbo ya Paulo ya u ḓiṱukufhadza? Tsha u thoma, u fana na Paulo, ri songo vhuya ra vhona u nga mushumo washu wa u huwelela kana zwithu zwe Yehova a ri thusa uri ri zwi khunyeledze zwi ite uri ri ḓipfe u nga ri khwine. Muṅwe na muṅwe u tea u ḓivhudzisa uri: ‘Ndi dzhia hani vhathu vhane nda huwelela khavho? Naa ndi a ṱalula vhaṅwe vhathu ndi sa zwi ṱhogomeli?’ Zwi takadzaho ndi uri Ṱhanzi dza Yehova u mona na shango ḽoṱhe, dzi khou lingedza u wana vhane vha ṱoḓa u guda Bivhili. Nga zwiṅwe zwifhinga, zwenezwi zwi nga ṱoḓa uri vha gude dziṅwe nyambo na mvelele dza vhathu vhane vha dzhielwa fhasi. Ṱhanzi dzine dza swikelela vhenevho vhathu a dzi tei u ḓi dzhia dzi khwine u fhira vhenevho vhathu. Nṱhani hazwo, vha ṱoḓa u pfesesa nḓila ine muṅwe na muṅwe a ḓipfa ngayo u itela uri vha swikelele mbilu yawe nga mulaedza wa Muvhuso wa Mudzimu.

BULANI VHAṄWE NGA MADZINA MUSI NI TSHI RABELA

12. Epafra o sumbedza hani uri ha humbuleli ene muṋe fhedzi?

12 Iṅwe nḓila ine ra nga sumbedza ngayo uri ri tevhela vhulivhisi nga u ḓiṱukufhadza, ndi nga u rabelela “vhe vha wana lutendo, lune lwa vha lwa ndeme u fana na lwashu.” (2 Pet. 1:1) Epafra o ita ngauralo. Ho ambiwa nga hae luraru Bivhilini kha mafhungo e a ṅwaliwa nga Paulo. Musi Paulo o farwa ngei Roma, o ṅwalela Vhakriste vha ngei Kolosa uri Epafra u “dzula a tshi ḓidina nga u [vha] rabelela.” (Vhakol. 4:12) Epafra o vha a tshi ḓivha Vhakriste ngae zwavhuḓi nahone o vha e na ndavha navho. U valelwa hawe dzhele na Paulo a zwo ngo mu ita uri a si vhe na ndavha na vhushaka ha vhaṅwe na Mudzimu. (Filem. 23) O ita zwe a vha a tshi nga kona u itela u vha thusa. Naa zwenezwi a zwi sumbedzi uri o vha a sa humbulela ene muṋe fhedzi? U rabelela vhahashu zwi na maanḓa, zwihuluhulu musi ri tshi vha  rabelela nga muthihi nga muthihi nahone nga madzina avho.—2 Vhakor. 1:11; Yak. 5:16.

13. Ni nga edzisa hani tsumbo ya Epafra musi ni tshi rabela?

13 Humbulani nga ha vhane na nga bula madzina avho musi ni tshi rabela. U fana na Epafra, vhahashu vha rabelela vhane vha vha tshivhidzoni tshavho na miṱa ine ya vha na vhuḓifhinduleli vhu lemelaho, vhane vha fanela u ita phetho dzi konḓaho kana vho sedzanaho na milingo. Vhaṅwe vha rabelela vhe madzina avho a ambiwa kha thero ine ya wanala kha jw.org, ine ya ri “Jehovah’s Witnesses Imprisoned for Their Faith.” (Sedzani kha NEWSROOM > LEGAL DEVELOPMENTS.) Ri fanela u dovha ra rabelela vhe vha felwa nga vhane vha vha funa, vhe vha ponyoka musi hu tshi vha na khombo, dzinndwa na vhane vha khou konḓelela vhuimo ha ekonomi. Zwi tou vha khagala uri hu na vhahashu vhanzhi vhane vha ṱoḓa ri tshi vha rabelela na vhane vha nga vhuyelwa nga thabelo dzashu. Musi ri tshi rabelela vhenevho vhathu, zwi sumbedza uri a ri humbuleli riṋe vhaṋe fhedzi, fhedzi ri humbulela na vhaṅwe vhathu. (Vhafil. 2:4) Yehova u pfa thabelo dzo raloho.

‘NI ṰAVHANYE U THETSHELESA’

14. Yehova o ri vhetshela hani tsumbo yavhuḓi ya u thetshelesa?

14 Iṅwe nḓila ine ra nga sumbedza ngayo uri ri a ḓiṱukufhadza, ndi nga u thetshelesa vhaṅwe. Yakobo 1:19 i amba uri ri fanela “u ṱavhanya u thetshelesa.” Yehova ndi tsumbo yavhuḓi ya zwenezwo. (Gen. 18:32; Yosh. 10:14) Kha ri vhone zwine ra nga zwi guda kha nyambedzano i re kha Ekisodo 32:11-14. (Vhalani.) Naho Yehova o vha a sa khou ṱoḓa thuso ya Mushe, o mu tendela a tshi amba nḓila ye a vha a khou ḓipfa ngayo. Ndi nnyi ane a nga thetshelesa muthu ane a humbula nga nḓila yo khakheaho nahone a ita zwe onoyo muthu a amba? Fhedzi Yehova u thetshelesa a sa fheli mbilu vhathu vhane vha rabela khae vhe na lutendo.

15. Ni nga edzisa hani Yehova kha u hulisa vhaṅwe?

15 Ḓivhudziseni uri: ‘Arali Yehova a tshi kona u ḓiṱukufhadza na u thetshelesa vhathu nga nḓila ye a thetshelesa ngayo Abrahamu, Rahele, Mushe, Yoshua, Manoa, Elia na Hiskia, naa ndi nga si kone u lingedza u ita zwi fanaho? Naa ndi nga kona u hulisa vhahashu nga u thetshelesa mavhonele avho na u a shumisa arali zwi tshi konadzea? Naa hu na muthu tshivhidzoni tshanga kana muṱani wanga ane nda nga mu sumbedza lufuno nga yeneyi nḓila? Ndi fanela u ita mini? Ndi ḓo ita mini?’—Gen. 30:6; Vhahaṱ. 13:9; 1 Dzikh. 17:22; 2 Koron. 30:20.

“KHAMUSI YEHOVA U ḒO VHONA VHUSIWANA HANGA”

Davida o ri: “Mu litsheni!” No vha ni tshi ḓo ita mini? (Sedzani phara 16 na 17)

16. Davida o ita mini musi a tshi ṱokonyiwa nga Simei?

16 U ḓiṱukufhadza zwi ri thusa uri ri ḓifare musi ri tshi ṱokonyiwa. (Vhaef. 4:2) Tsumbo yavhuḓi ya zwenezwo i wanala kha 2 Samuele 16:5-13. (Vhalani.) Davida na vhalanda vhawe vho konḓelela musi Simei we a vha e shaka ḽa Khosi Saulo a tshi vha sema na u vha rwa. Davida o konḓelela naho o vha a tshi nga vha o zwi thivhela. Davida o thuswa nga mini uri a kone u ḓifara? U itela u wana phindulo, kha ri ṱolisise Psalme ndima ya 3.

17. Ndi mini zwe zwa thusa Davida uri a kone u ḓifara, nahone ri nga mu edzisa hani?

17 Davida o ṅwala mafhungo ane a wanala kha Psalme ndima ya 3, nga tshifhinga tshe a vha a tshi khou shavha murwa wawe Abesalomo. Mafhungo ane a wanala kha ndimana 1 na 2 a tshimbidzana na zwe zwa ṅwaliwa kha Samuele ya Vhuvhili ndima ya 16. Davida o bvela phanḓa o dzika. O thuswa nga mini? Psalme ya 3:4 i ri: “Ndo ṱavhela  Yehova mukosi, a mpfa é thavhani khethwa yawe.” Na riṋe ri nga rabela musi ri tshi tovholwa. Yehova u fhindula thabelo dzashu nga u ri ṋea muya wawe mukhethwa une wa ri thusa uri ri konḓelele. Ndi vhuimo vhufhio vhune ha nga ṱoḓa uri ni ḓifare kana u hangwela vhaṅwe musi vha tshi ni fara nga nḓila i si yavhuḓi? Naa ni a fulufhela uri Yehova u a zwi vhona musi ni tshi tambula na uri u ḓo ni thusa na u ni fhaṱutshedza?

“TSHIHULWANE KHA [ZWOṰHE NDI] VHUṰALI”

18. Ri vhuyelwa hani ngani u tevhela vhulivhisi ha Yehova?

18 U ita zwo lugaho zwi ḓisa phaṱhutshedzo nnzhi. Ndi ngazwo Mirero 4:7 i tshi amba uri “tshihulwane kha [zwoṱhe ndi] vhuṱali”! Vhuṱali a si u sokou u vha na nḓivho, zwi dovha zwa katela na tsheo dzine ra dzi dzhia. Vhusunzi na hone ho ṱalifha. Vhu sumbedza uri ho ṱalifha nga u vhulunga zwiḽiwa zwinzhi nga tshilimo. (Mir. 30:24, 25) Kristo ane a vha “vhuṱali ha Mudzimu” u dzula a tshi ita zwithu zwine zwa takadza Khotsi awe. (1 Vhakor. 1:24; Yoh. 8:29) Mudzimu u ḓivha phambano vhukati ha u dzhia phetho yavhuḓi na u tshila u tendelana nayo. Mudzimu u ḓo ri lambedza arali ra ḓiṱukufhadza na u vha na vhuṱali nga u khetha u ita zwo lugaho. (Vhalani Mateo 7:21-23.) Nga zwenezwo, bvelani phanḓa ni tshi ita uri tshivhidzoni hu vhe fhethu hune vhathu vhoṱhe vha nga kona u shumela Yehova nga u ḓiṱukufhadza. Hu ṱoḓea tshifhinga na u sa fhela mbilu uri ri ite zwo lugaho. U ita zwo lugaho zwi ṱoḓa tshifhinga na u sa fhela mbilu, fhedzi u ita nga u ralo zwi sumbedza u ḓiṱukufhadza nahone zwi ḓo ita uri ri takale zwino na nga hu sa fheli.