Pfukelani kha mafhungo

Pfukelani kha zwi re ngomu

 THERO I GUDWAHO 46

Ṱhogomelani “Tshiṱangu [Tshaṋu] Tshihulwane Tsha Lutendo”

Ṱhogomelani “Tshiṱangu [Tshaṋu] Tshihulwane Tsha Lutendo”

“Farani tshiṱangu tshihulwane tsha lutendo.”—VHAEF. 6:16.

LUIMBO 119 Ri Fanela U Vha Na Lutendo

MANWELEDZO *

1-2. (a) U ya nga Vhaefesa 6:16, ndi ngani ri tshi tea u vha na “tshiṱangu tshihulwane tsha lutendo”? (b) Ri ḓo haseledza mbudziso dzifhio?

NAA ni na “tshiṱangu tshihulwane tsha lutendo”? (Vhalani Vhaefesa 6:16.) Zwi tou vha khagala uri ni natsho. Lutendo lwashu lu ri tsireledza kha ḽino shango ḽivhi, dzikhakhathi na vhuḓifari vhu si havhuḓi u fana na musi tshiṱangu tshi tshi tsireledza muvhili wa swole.

2 Samusi ri tshi khou tshila “maḓuvhani a vhufhelo,” lutendo lwashu lu ḓo dzula lu tshi lingwa. (2 Tim. 3:1) Ni nga ṱolisisa hani tshiṱangu tshaṋu tsha lutendo u itela u vhona arali tshi tshee kha vhuimo havhuḓi? Nahone ni nga dzula hani no tshi fara no tou tshi nyima? Kha ri haseledze phindulo dza dzenedzi mbudziso.

ṰOLISISANI TSHIṰANGU TSHAṊU

Nga murahu ha nndwa, swole ḽo vha ḽi tshi ita vhungoho ha uri tshiṱangu tshaḽo tshi a lugiswa (Sedzani phara 3)

3. Swole ḽo vha ḽi tshi ṱhogomela hani tshiṱangu tshaḽo nahone ndi ngani?

3 Zwifhingani zwa kale, zwiṱangu zwa maswole zwo vha zwi tshi anzela u vha na mukumba nga nnḓa. Maswole o vha a tshi ḓodza mapfura kha tshiṱangu uri mukumba u si ṱahale na uri tsimbi yatsho i si vhe na rosi. Arali swole ḽa wana tshi si tsheeho kha vhuimo havhuḓi, ḽo vha ḽi tshi ita vhungoho ha uri tshi a lugiswa uri ḽi dzule ḽo lugela nndwa. Yeneyo tsumbo i shuma hani kha lutendo lwaṋu?

4. Ndi ngani ni tshi tea u ṱolisisa tshiṱangu tshaṋu tsha lutendo nahone ni nga zwi ita hani?

4 Ni fanela u dzula ni tshi ṱolisisa na u ṱhogomela lutendo lwaṋu uri ni dzule no lugela nndwa, u fana na swole ḽa tshifhingani  tsha kale. Samusi ri Vhakriste, ri lwa na mimuya mivhi. (Vhaef. 6:10-12) Ndi inwi muṋe ane a vha na vhuḓifhinduleli ha u ṱhogomela tshiṱangu tshaṋu tsha lutendo. Ni nga zwi ḓivha hani uri no lugela u lwisana na milingo? Ni nga thoma nga u rabela uri Mudzimu a ni thuse. Ni kone u shumisa Ipfi ḽa Mudzimu u ṱolisisa lutendo lwaṋu uri ni vhone arali ni tshi kha ḓi tshila u tendelana na zwine Mudzimu a zwi funa. (Vhaheb. 4:12) Bivhili i ri: “Fulufhedza Mudzimu nga mbilu yau yoṱhe; U songo ḓi-tika nga u ri: Ndi a ṱalukanya.” (Mir. 3:5, 6) Humbulani nga ha phetho dzine a si kale no dzi ita. Sa tsumbo, arali no vha ni na thaidzo dza zwa masheleni, naa no humbula nga ha luṅwalo lwa Vhaheberu 13:5 lune lwa ri: “Ndi nga si vhuye nda u ṱutshela nahone ndi nga si vhuye nda u laṱa”? Naa lwo ni ṋea fhulufhelo ḽa uri Yehova u ḓo ni thusa? Arali zwo ralo, zwi amba uri ni khou ṱhogomela tshiṱangu tshaṋu tsha lutendo.

5. Ndi mini zwine na nga zwi wana musi ni tshi ṱolisisa lutendo lwaṋu?

5 Musi ni tshi ṱolisisa lutendo lwaṋu, ni nga wana uri hu na zwine na tea u zwi lugisa. Ni nga mangala musi ni tshi wana uri hu na zwithu zwi si zwavhuḓi zwe na vha no tea u vha no zwi vhona kale. Sa tsumbo, ni nga wana uri lutendo lwaṋu a lwo ngo tsha khwaṱha nga nṱhani ha u vhilaela ho kalulaho, mazwifhi ane na a pfa na u kulea nungo. Arali lutendo lwaṋu lu songo tsha khwaṱha nga nṱhani ha zwenezwo zwithu, ni nga ita hani uri lu dovhe lu khwaṱhe?

ḒITSIRELEDZENI KHA MAZWIFHI, U KULEA NUNGO NA U VHILAELA HO KALULAHO

6. Ndi dzifhio dziṅwe tsumbo dza u vhilaela hu songo khakheaho?

6 Hu na zwiṅwe zwithu zwine a zwo ngo khakhea u vhilaela nga hazwo. Sa tsumbo, a zwo ngo khakhea arali ri tshi khou vhilaela nga ha uri ri nga takadza hani Yehova na Yesu. (1 Vhakor. 7:32) Musi ro ita tshivhi tshihulwane, ri a vhilaela uri vhushaka hashu na Yehova ho tshinyala nahone ri ṱoḓa u vhu lugisa. (Ps. 38:18) Ri dovha ra vhilaela nga u ṱoḓa u takadza mufarisi wa mbingano, u ṱhogomela muṱa na vhahashu.—1 Vhakor. 7:33; 2 Vhakor. 11:28.

7. U ya nga Mirero 29:25, ndi ngani ri songo tea u ofha vhathu?

7 Kha ḽiṅwe sia, u vhilaela nga ho kalulaho zwi nga tshinya lutendo lwashu. Sa tsumbo, ri nga dzula ri tshi vhilaela nga ha uri ri ḓo ambara’ni, ri ḓo ḽa’ni. (Mat. 6:31, 32) Ri nga gidimedzana na lupfumo na u ṱoḓa u vha na zwithu zwinzhi ri tshi vhona u nga zwi ḓo ita uri ri si tsha vhilaela. Ri nga thoma na u funa tshelede. Zwenezwo zwithu zwi nga tshinya lutendo lwashu na vhushaka hashu na Yehova. (Marko 4:19; 1 Tim. 6:10) Kana ri nga ḓiwana ri tshi khou vhilaedziswa nga u ṱoḓa u takadza vhathu. Zwi nga ita uri ri konḓelwe u takadza Yehova nga nṱhani ha uri ri ofha uri vhathu vha ḓo ri kolela na u ri tovhola. Ri nga humbela Yehova uri a ri ṋee tshivhindi na lutendo uri ri kone u ḓitsireledza kha tshenetsho tshikwekwe.—Vhalani Mirero 29:25; Luka 17:5.

(Sedzani phara 8) *

8. Ri tea u ita mini musi ri tshi pfa mazwifhi?

8 Sathane ane a vha “khotsi a vhadzia-u-zwifha” u ṱuṱuwedza vhane vha mu thetshelesa uri vha ambe mazwifhi nga ha Yehova na nga vhahashu. (Yoh. 8:44) Sa tsumbo, vhagunei vha ita uri ri timatime ndangulo ya Yehova nga u phaḓaladza mazwifhi kha inthanethe, thelevishini na kha zwiṅwe zwishumiswa zwa u phaḓaladza mafhungo. Eneo mazwifhi ndi miṅwe ya “misevhe . . . i dugaho” ine Sathane a ri pfula ngayo. (Vhaef. 6:16) Ri tea u ita mini musi ri tshi pfa eneo mazwifhi? Ri songo a thetshelesa! Ndi ngani? Ndi ngauri ri a fhulufhela vhahashu nahone ri na lutendo  kha Yehova. Zwavhuḓi vhuḓi, a ri ṱoḓi u pfa tshithu na tshithihi tshi ambiwaho nga vhagunei. Naho ri tshi nga ṱoḓa u ḓivha zwine vha nga amba, a ri nga tendeli tshithu naho tshi tshifhio tshi tshi ita uri ri ṱaṱisane khani navho.

9. Ndi mini zwine zwa nga itea arali ro kulea nungo?

9 U kulea nungo zwi nga ita uri lutendo lwashu lu si tsha khwaṱha. Nga zwiṅwe zwifhinga, thaidzo dzashu dzi a ri kula nungo. Zwi tou pfala uri ri nga si tshile u nga a ri na thaidzo ngeno ri nadzo. Fhedzi a ro ngo tea u dzula ri tshi humbula nga hadzo. Arali ra dzula ri tshi humbula nga hadzo ri nga hangwa nga ha zwithu zwavhuḓi zwe Yehova a ri fhulufhedzisa. (Nzumb. 21:3, 4) Ri nga kulea nungo ri si tsha ṱoḓa u bvela phanḓa ri tshi shumela Yehova. (Mir. 24:10) Ri songo zwi tendela zwi tshi swika kha honovhu vhuimo.

10. Ndi mini zwine ra zwi guda kha vhurifhi ho ṅwalwaho nga wahashu wa tshifumakadzini?

10 Humbulani nga ha muṅwe wahashu wa tshifumakadzini wa ngei Amerika ane lutendo lwawe lwa dzula lwo khwaṱha naho a tshi khou ṱhogomela munna wawe ane a khou lwala. O ṅwalela ofisi khulwane ya davhi vhurifhi vhune ha ri: “Nga tshiṅwe tshifhinga vhuimo hashu vhu a ri tsikeledza na u ri kula nungo, fhedzi ri dzula ri na fhulufhelo. Ndangulo i ri ṋea zwine ra zwi ṱoḓa u itela u khwaṱhisa lutendo lwashu na u ri ṱuṱuwedza nahone zwenezwi zwi a ntakadza vhukuma. Zwi a ri thusa vhukuma. Zwi ita uri ri bvele phanḓa ri tshi shumela Yehova nahone zwi ri thusa u konḓelela milingo ine Sathane a ri posa ngayo.” Musi ri tshi sedza tsumbo ya onoyo wahashu, ri guda uri ri nga kona u kunda milingo. Ri nga zwi kona hani? Ri tea u humbula uri Sathane ndi ene we a ita uri hu vhe na thaidzo dzi ngaho u lwala, u tsikeledzea na u kulea nungo. Fhedzi Yehova a nga ri khuthadza. Ri tea u dzhiela nṱha nḓila ine Yehova a shumisa ngayo mulanda a fhulufhedzeaho u ri ṱhogomela.

Naa ni khou ṱhogomela “tshiṱangu [tshaṋu] tshihulwane tsha lutendo”? (Sedzani phara 11) *

11. U itela u vhona arali lutendo lwashu lu tshee lwo khwaṱha, ri tea u ḓivhudzisa mbudziso dzifhio?

11 Naa kha tshiṱangu tshaṋu tsha lutendo hu na hune ha fanela u lugiswa? Naa no iledza u vhilaela nga ho kalulaho miṅwedzi i si gathi yo fhiraho? Naa no lingedza nga nḓila dzoṱhe u  sa thetshelesa na u sa ṱaṱisana khani na vhagunei nga ha mazwifhi ane vha a amba? Naa no kona u lwisana na u kulea nungo? Arali zwo ralo, zwi amba uri lutendo lwaṋu lwo khwaṱha. Fhedzi ri tea u dzula ro fhaṱuwa ngauri Sathane u na maṅwe mafumo ane a lingedza u a shumisa kha riṋe. Kha ri haseledze ḽiṅwe ḽa eneo mafumo.

ḒITSIRELEDZENI URI NI SI FUNE LUPFUMO

12. Ndi mini zwine zwa nga itea kha riṋe arali ra funa lupfumo?

12 U funa lupfumo zwi nga ri khakhisa zwa ita uri ri si tsha ṱhogomela tshiṱangu tshashu tsha lutendo. Muapostola Paulo o ri: “A hu na ḽiswole ḽine ḽa ḓidzhenisa kha zwa mabindu, ḽi tshi itela uri ḽi takalelwe nga we a ḽi ṅwalisa uri ḽi vhe ḽiswole.” (2 Tim. 2:4) Maswole a Roma o vha a songo tendelwa u ita zwa mabindu. Ho vha hu tshi nga itea mini arali swole ḽa ḓidzhenisa kha zwa mabindu?

13. Ndi ngani swole ḽi songo tea u ḓidzhenisa kha zwa mabindu?

13 Kha ri ri maswole a khou ḓiḓowedza u shumisa mabanga avho, fhedzi ḽiṅwe swole a ḽiho. Ḽo ya ḓoroboni u itela u ṱhogomela bindu ḽa zwiḽiwa. Musi ḽi tshi kovhela, maṅwe maswole a ḓiṋea tshifhinga tsha u ṱuṱula mabanga avho. Nga tshenetsho tshifhinga, swole ḽine ḽa vha na bindu ḽa zwiḽiwa ḽi fhedza tshifhinga ḽi tshi khou dzudzanya zwiḽiwa zwine ḽa ḓo rengisa nga matshelo. Musi ḽi tshi tsha, maswina a mbo ḓi vha ṱhasela vha songo zwi lavhelela. Ndi ḽifhio swole ḽine ḽa ḓo vha ḽo lugela u lwa nahone ḽa takalelwa nga mulanguli wa maswole? Kha swole ḽe ḽa ḓiṋea tshifhinga tsha u ṱuṱula banga na ḽe ḽa fhedza tshifhinga ḽi tshi khou ita zwa mabindu, ni nga ṱoḓa u lwa ni tsini na ḽifhio?

14. Samusi ri maswole a Kristo, ndi mini zwine zwa vha zwa ndeme kha riṋe?

14 Sa maswole o fhaṱuwaho, tsha ndeme kha riṋe ndi u takadza Vhalanguli vhashu, Yehova na Yesu. U takadza Yehova na Yesu ndi zwa ndeme kha riṋe u fhira tshiṅwe na tshiṅwe tshine shango ḽa Sathane ḽa nga ri ṋea tshone. Ri ita vhungoho ha uri ri shumisa tshifhinga na nungo dzashu u ita zwine Yehova a zwi funa. Ri tea u dovha ra dzula ri tshi  ṱhogomela tshiṱangu tshashu tsha lutendo na maṅwe mafumo oṱhe ane Mudzimu a ri ṋea one.

15. Paulo o ri tsivhudza nga ha mini nahone ndi ngani?

15 Ri tea u dzula ro fhaṱuwa. Ndi ngani? Muapostola Paulo o tsivhudza a ri: “Vho ḓiimiselaho u pfuma . . . [vha ḓo] ṱutshela lutendo.” (1 Tim. 6:9, 10) Maipfi ane a ri “[u] ṱutshela lutendo” a sumbedza uri u ṱoḓa zwithu zwine ra nga kona u tshila ri si nazwo zwi nga ri khakhisa. Zwi nga ita uri ri vhe na “[nyemulo] nnzhi dza vhutsilu dzi huvhadzaho.” Ri tea u iledza dzenedzo nyemulo, ri dzi dzhie sa mafumo ane a nga ri huvhadza.

16. Musi ri tshi vhala Marko 10:17-22, ri nga ḓivhudzisa mbudziso dzifhio?

16 Kha ri ri ni na tshelede yo eḓanaho ya u renga tshiṅwe na tshiṅwe tshine na ṱoḓa. Naa zwo khakhea u renga zwithu zwine ra zwi ṱoḓa naho zwi si zwa ndeme? Ri nga si ambe uri zwo khakhea. Fhedzi ḓivhudziseni mbudziso dzi tevhelaho: Naho ri na tshelede ya u renga tshiṅwe tshithu, naa ri na tshifhinga na nungo zwa u tshi shumisa na u tshi ṱhogomela? Hafhu, naa zwi nga itea uri ri thome u zwi funa na u fhirisisa? Naa u funesa hashu thundu zwi nga ita uri ri nge uḽa munna we a landula musi Yesu a tshi mu vhidza uri a vhe mutevheli wawe? (Vhalani Marko 10:17-22.) Zwi nga  vha khwine u sa vha na zwithu zwinzhi vhutshiloni, wa shumisa tshifhinga tshau na nungo dzau u shumela Mudzimu!

DZULANI NO FARELELA TSHIṰANGU TSHAṊU TSHA LUTENDO

17. Ndi mini zwine ra tea u dzula ri tshi zwi humbula?

17 Ri songo vhuya ra hangwa uri ri nndwani nahone ri tea u dzula ro lugela u lwa ḓuvha ḽiṅwe na ḽiṅwe. (Nzumb. 12:17) Vhahashu vha nga si kone u ri farela tshiṱangu tshashu tsha lutendo. Inwi muṋe ni tea u dzula no tshi fara no tshi nyima.

18. Ndi ngani maswole a tshifhingani tsha kale o vha a tshi fara tshiṱangu a tou tshi nyima?

18 Zwifhingani zwa kale, swole ḽe ḽa lwa nga tshivhindi, ḽo vha ḽi tshi huliswa. Fhedzi u vhuya u si na tshiṱangu zwo vha zwi tshi shonisa. Muḓivhazwakale wa Muroma ane a pfi Tacitus o ṅwala uri: “Ho vha hu si na tshithu tshine tsha shonisa u fana na musi swole ḽi tshi vhuya ḽi si na tshiṱangu tshaḽo.” Ndi ngazwo maswole o vha a tshi fara tshiṱangu a tou tshi nyima.

Wahashu wa tshifumakadzini o fara tshiṱangu tshawe tshihulwane tsha lutendo nga u vhala Ipfi ḽa Mudzimu na u rabela, u ya miṱanganoni tshifhinga tshoṱhe na nga u vhudza vhaṅwe mafhungo maḓifha (Sedzani phara 19)

19. Ri nga fara hani tshiṱangu tshashu tsha lutendo?

19 Ri dzula ro fara tshiṱangu tshashu tsha lutendo nga u ya miṱanganoni na u vhudza vhaṅwe mafhungo maḓifha. (Vhaheb. 10:23-25) Ri dovha ra vhala Ipfi ḽa Mudzimu ḓuvha na ḓuvha nahone ra rabela uri Mudzimu a ri thuse u shumisa zwe ra vhala vhutshiloni hashu. (2 Tim. 3:16, 17) Musi ri tshi ita ngauralo, a hu na pfumo na ḽithihi ḽa Sathane ḽine ḽa ḓo ri huvhadza. (Yes. 54:17) “Tshiṱangu [tshashu] tshihulwane tsha lutendo” tshi ḓo ri tsireledza. Ri ḓo ima ro khwaṱha ri na vhuthihi na vhahashu. Ri ḓo kunda kha nndwa yashu ya ḓuvha ḽiṅwe na ḽiṅwe nahone ri ḓo ima na Yesu musi a tshi lwa na Sathane na vhatikedzi vhawe.—Nzumb. 17:14; 20:10.

LUIMBO 118 “Ri Ṋee Lutendo Lwo Engedzeaho”

^ phar. 5 Maswole a ḓitsireledza nga tshiṱangu. Lutendo lwashu ndi tshiṱangu. Lu ṱoḓa u ṱhogomelwa u fana na musi swole ḽi tshi ṱhogomela tshiṱangu. Heyi thero i ḓo haseledza zwine ra tea u ita uri ri dzule ri tshi ṱhogomela “tshiṱangu [tshashu] tshihulwane tsha lutendo.”

^ phar. 58 ṰHALUSO YA TSHIFANYISO: Khotsi u tsima TV nga u ṱavhanya musi a tshi vhona vhagunei vha tshi khou amba mazwifhi nga ha Ṱhanzi Dza Yehova.

^ phar. 60 ṰHALUSO YA TSHIFANYISO: Nga murahu, musi vha tshi ita vhurabeli ha muṱa, khotsi u shumisa Bivhili u itela u khwaṱhisa lutendo lwa muṱa wawe.