Pfukelani kha mafhungo

Pfukelani kha zwi re ngomu

Naa No Vha Ni Tshi Zwi Ḓivha?

Naa No Vha Ni Tshi Zwi Ḓivha?

Zwifhingani zwa kale, mushumo wa mulanda wo vha u ufhio?

MULANDA o vha a tshi ṱhogomela nnḓu kana thundu ya muṅwe muthu. Nga zwiṅwe zwifhinga, Ipfi ḽa Luheberu na ḽa Lugerika ḽo ṱalutshedzelwaho nga uri “mulanda” ḽi ambela kha muthu ane a ṱhogomela nnḓu.

Musi Yosefa murwa wa Yakobo e phuli ngei Egipita, muṋe wawe o mu vhea sa mulanda wa nnḓu yawe. Zwavhuḓi vhuḓi, muṋe wawe Potifara o dzhia “zwoṱhe zwe a vha e nazwo a zwi vhea zwanḓani zwa Yosefa.” (Gen. 39:2-6) Musi Yosefa o no vha muvhusi wa maanḓa ngei Egipita, na ene o vha na mulanda we a ṱhogomela nnḓu yawe.—Gen. 44:4.

Zwifhingani zwa musi Yesu e kha ḽifhasi, vhe vha vha vhe na masimu, kanzhi vho vha vha tshi dzula ḓoroboni hune ha vha kule nao. Nga zwenezwo, vho vha vha tshi vhea vhalanda uri vha ṱhogomele vhashumi na masimu avho.

Mulanda o vha a tshi tea u vha muthu wa hani? Muṅwali wa Muroma wa ḓanani ḽa u thoma ane a pfi Columella o amba uri muthu ane a vhewa sa mulanda u tea u vha “[e na] tshenzhelo” kha zwa masimu. U tea u vha muthu ane a “kona u langa vhathu a sa bvafhi nahone a si na tshiṱuhu.” Columella o dovha a ri: “Tsha ndeme kha zwoṱhe ndi uri a vhe muthu o ḓiimiselaho u guda, ane a sa vhone u nga u ḓivha zwoṱhe.”

Bivhilini hu shumiswa tsumbo ya mulanda u itela uri ri pfesese nḓila ine mishumo ya tshivhidzo ya itwa ngayo. Sa tsumbo, muapostola Petro o ṱuṱuwedza Vhakriste uri vha shumise vhukoni he vha ṋewa nga Yehova “u itela u shumelana sa vhakoma vhavhuḓi vha vhuthu vhuhulu ha Mudzimu.”—1 Pet. 4:10.

Yesu ene muṋe o ita tshifanyiso nga ha mulanda kha maipfi a re kha Luka 16:1-8. Zwiṅwe hafhu, kha vhuporofita vhune ha amba nga ha musi a tshi ḓo vhewa sa Khosi, o sumbedzisa vhatevheli vhawe uri u ḓo vhea “mulanda a fulufhedzeaho na wa vhuṱali.” Mushumo muhulwane wa onoyo mulanda ndi u ṋea vhatevheli vha Yesu zwiḽiwa uri vha dzule vhe na vhushaka havhuḓi na Yehova tshifhingani tsha vhufhelo. (Mat. 24:45-47; Luka 12:42) Zwi a ri takadza vhukuma u wana khandiso dzi bvaho kha mulanda dzine dza vha hone shangoni ḽoṱhe.