Pfukelani kha mafhungo

Pfukelani kha zwi re ngomu

Ni Nga Vha Hani Na Mulalo?

Ni Nga Vha Hani Na Mulalo?

SAMUSI ri tshi khou tshila kha shango ḽo ḓalaho dzikhakhathi, ri fanela u shuma nga nungo dzoṱhe u itela u vha na mulalo. Naho ra nga vha na mulalo, kanzhi zwi a konḓa uri ri dzule ri nawo. Ipfi ḽa Mudzimu ḽi nga ri thusa hani u vha na mulalo wa vhukuma na wa tshoṱhe? Ri nga thusa hani vhaṅwe u ita nga u ralo?

HU ṰOḒEA MINI U ITELA U VHA NA MULALO WA VHUKUMA?

Ri nga vha na mulalo wa vhukuma musi ri tshi ḓipfa ro tsireledzea na u dzula ro takala. Ri fanela u dovha ra vha na vhushaka ho khwaṱhaho na vhaṅwe. U itela u ḓiphina nga mulalo wa vhukuma, ri fanela u vha vhushaka ha tsini na Mudzimu. Ri nga zwi itisa hani?

Mbilaelo dzi ita uri vhathu vhanzhi vha si vhe na mulalo

Musi ri tshi thetshelesa ndaela dza Yehova na u tshila u tendelana na milayo yawe, ri vha ri tshi khou sumbedza uri ri a mu fulufhela na uri ri ṱoḓa u vha na vhushaka havhuḓi nae. (Yer. 17:7, 8; Yak. 2:22, 23) Nga hu fanaho, na ene u a sendela tsini na riṋe nahone u a ri fhaṱutshedza nga u ita uri ri vhe na mulalo. Yesaya 32:17 i ri: “Zwivhuya zwi ḓo bveledza mulalo, zwivhuya zwi ḓo ḓisa phaṱho na u ḓi-takalela hu sá gumi.” Ri nga vha na mulalo wa vhukuma musi ri tshi thetshelesa Yehova zwi tshi bva mbiluni.—Yes. 48:18, 19.

Tshifhiwa tsho khetheaho tshi bvaho ha Khotsi ashu wa ṱaḓulu tshine tsha vha muya mukhethwa, tshi dovha tsha ri thusa uri ri vhe na mulalo wa tshoṱhe.—Mish. 9:31.

MUYA MUKHEWA WA MUDZIMU URI THUSA URI RI VHE NA MULALO

Mulalo ndi pfaneleo ya vhuraru ye muapostola Paulo a amba nga hayo kha “zwiaṋwiwa nga muya.” (Vhagal. 5:22, 23) Samusi mulalo wa vhukuma u tshi bveledzwa nga muya mukhethwa wa Mudzimu, ri fanela u tendela wonoyo muya mukhethwa u tshi ri ṱuṱuwedza uri ri vhe na mulalo wa vhukuma. Kha ri ṱolisise nyeletshedzo mbili dza nḓila ine muya mukhethwa wa Mudzimu wa nga ri thusa ngayo uri ri vhe mulalo.

 Ya u thoma, u vhala Ipfi ḽa Mudzimu ḓuvha ḽiṅwe na ḽiṅwe zwi ḓo ri thusa uri ri vhe na mulalo. (Ps. 1:2, 3) Musi ri tshi elekanya nga ha zwine ra zwi guda Bivhilini, muya mukhethwa wa Yehova Mudzimu u ḓo ri thusa uri ri humbule nga nḓila i fanaho na yawe. Sa tsumbo, ri kona u vhona nḓila ine a dzula ngayo e na mulalo na nḓila ine mulalo wa vha wa ndeme ngayo khae. Musi ri tshi shumisa zwine ra zwi guda Ipfini ḽa Mudzimu ri ḓo vha na mulalo.—Mir. 3:1, 2.

Ya vhuvhili, ri fanela u humbela muya mukhethwa wa Mudzimu nga thabelo. (Luka 11:13) Yehova o ri fulufhedzisa uri arali ra humbela thuso, “mulalo wa Mudzimu une wa fhira u ṱalukanya hoṱhe u ḓo tsireledza mbilu [dzashu] na maanḓa [ashu] a muhumbulo nga Kristo Yesu.” (Vhafil. 4:6, 7) Musi ri tshi rabela Yehova Mudzimu ḓuvha ḽiṅwe na ḽiṅwe na u mu humbela muya mukhethwa, u ḓo ri ṋea mulalo une a u ṋea fhedzi vhane vha vha na vhushaka havhuḓi nae.—Vharoma 15:13.

Vhaṅwe vho shumisa hani yeneyi nyeletshedzo i bvaho Maṅwaloni u ita tshanduko dze dza vha thusa uri vha vhe na mulalo wa tshoṱhe na Yehova, vhone vhaṋe na vhaṅwe vhathu?     

NḒILA YE VHA WANA NGAYO MULALO WA TSHOṰHE

Tshivhidzoni tsha Vhakriste ṋamusi, hu na vhaṅwe vhe vha vha vhe na ‘mbiti,’ fhedzi zwino vho no vha vhathu vha humbulelaho, vha re na vhuthu, vha sa fheli mbilu nahone vha shumisana na vhaṅwe nga mulalo. * (Mir. 29:22) Ṱhogomelani tsumbo ya vhahashu vhavhili vhe vha thuswa u kunda mbiti na u ṱahulela u vha na mulalo na vhaṅwe.

U tshila u tendelana na milayo ya Bivhili na u dzula ri tshi humbela muya mukhethwa wa Mudzimu nga thabelo zwi ḓo ri thusa u vha na mulalo

Mavhonele a David a si avhuḓi o kwama nḓila ye a vha a tshi amba ngayo. Musi a sa athu u ḓiṋekedzela kha Mudzimu, o vha a tshi sasaladza vhaṅwe na u shumisa luambo lu songo kunaho musi a tshi amba na vha muṱa wawe. Nga u ya ha tshifhinga, David o vhona hu na ṱhoḓea ya uri a shanduke na uri a vhe na mulalo. O wana hani mulalo? O ri: “Ndo thoma u shumisa zwine Bivhili ya zwi amba vhutshiloni hanga nahone zwenezwo zwo ita ri ndi thome u ṱhonifha vha muṱani wanga.”

Vhubvo ha Rachel ho ṱuṱuwedza mavhonele awe. O ri: “Ndi kha ḓi vha na thaidzo ya u ṱavhanya  u sinyuwa sa izwi ndo aluswa muṱani wa vhathu vhane vha ṱavhanya u sinyuwa.” O thuswa nga mini uri a vhe na mulalo? O ri: “Ndi rabela Yehova ḓuvha ḽiṅwe na ḽiṅwe na u humbela uri a nthuse.”

David na Rachel ndi dziṅwe dza tsumbo mbili dzi sumbedzaho uri musi ri tshi shumisa zwine Bivhili ya zwi amba vhutshiloni hashu na u humbela muya mukhethwa wa Mudzimu uri u ri thuse, ri ḓo vha na mulalo. Ndi ngoho uri hu sa londwi uri ri tshila kha shango ḽo ḓalaho dzikhakhathi, ri nga kona u vha na mulalo une wa ri thusa u vha na vhuthihi na miṱa yashu na Vhakriste nga riṋe. Naho zwo ralo, Yehova o ri ṱuṱuwedza uri ri vhe “na mulalo na vhathu vhoṱhe.” (Vharoma 12:18) Naa zwenezwo zwi a konadzea zwa vhukuma? Ri vhuyelwa hani nga u ita vhuḓidini ha uri ri vhe na mulalo?

IVHANI NA MULALO NA VHAṄWE

Ri ita uri vhathu vha vhe na mulalo musi ri tshi amba navho nga ha Muvhuso wa Mudzimu vhuḓinḓani hashu. (Yes. 9:6, 7; Mat. 24:14) Zwi takadzaho ndi uri vhunzhi havho vha a ṱanganedza wonoyo mulaedza. Zwenezwo zwi ita uri vha si tsha tsikeledzwa kana u sinyuswa nga zwine zwa khou itea. Nṱhani hazwo, vha na fulufhelo ḽa zwine zwa ḓo itea tshifhingani tshi ḓaho nahone vha a ṱuṱuwedzea u ‘ṱoḓa mulalo na u u tovhola.’—Ps. 34:14.

Fhedzi a si vhoṱhe vhane vha ṱanganedza mulaedza washu nga lwa u tou thoma. (Yoh. 3:19) Naho zwo ralo, muya mukhethwa wa Mudzimu u ri thusa uri ri huwelele mafhungo maḓifha nga mulalo na nga ṱhonifho. Nga yeneyi nḓila, ri tevhedza ndaela dza Yesu dzo bulwaho kha Mateo 10:11-13 dzi ambaho nga ha u huwelela, dzine dza ri: “Ni tshi dzhena nḓuni, ni lumelise vhaṋe vha nnḓu; arali nnḓu yeneyo yo fanelea, mulalo waṋu u vhe kha yeneyo nnḓu, arali i songo fanelea, mulalo waṋu kha u humele kha inwi.” Musi ri tshi tevhedza ndaela dza Yesu, ri ṱuwa ri na mulalo nahone ri tshi fulufhela uri onoyo muthu u ḓo thetshelesa tshifhingani tshi ḓaho.

Ri dovha ra ita uri hu vhe na mulalo musi ri tshi amba na vhavhusi nga nḓila i ṱhonifheaho, zwihuluhulu vhane vha hanedza mushumo washu. Sa tsumbo, tshiṱalula tsho ita uri muvhuso wa ḽiṅwe shango ḽa fhano Afurika u si tende hu tshi fhaṱwa Holo dza Muvhuso. Muṅwe wahashu we a vha a tshi shuma sa murumiwa kha ḽeneḽo shango o rumelwa uri a ye u amba na Muambasada wa ḽeneḽo shango ngei London kha ḽa England, u itela u tandulula eneo mafhungo nga mulalo. O vhudza onoyo muambasada nga ha mushumo wavhuḓi une Ṱhanzi dza Yehova dza u ita kha ḽeneḽo shango. Ho vha na mvelelo dzifhio?

O ri: “Musi ndi tshi swika hune ha ṱanganedzwa hone vhaeni, nḓila ye muṱanganedzi wa vhaeni a vha o ambara ngayo yo ita uri ndi ḓivhe uri onoyo muthu u amba luambo lune nda lu kona. Nga zwenezwo, ndo mu lumelisa nga luambo lwawe lwa ḓamuni. O mbo ḓi mangala nahone a mbudzisa uri, ‘Ndi ngani ni fhano?’ Ndo amba nae nga vhulenda uri ndi khou ṱoḓa u amba na Muambasada. Onoyo muthu o rwela muambasada luṱingo, musi muambasada a tshi swika o ndumelisa nga luambo lwa henefho. Nga murahu ha zwenezwo, o nthetshelesa nga vhuronwane musi ndi tshi mu ṱalutshedza nga ha mushumo wavhuḓi une wa khou itwa nga Dziṱhanzi.”

Ṱhonifho ye onoyo wahashu a i sumbedza musi a tshi a amba na muambasada yo ita uri a pfesese mushumo washu nahone a si tsha u vhenga. Nga murahu ha tshifhinga, muvhuso wa ḽeneḽo shango ḽa Afurika wo dovha wa ṋea thendelo ya uri hu fhaṱiwe Holo dza Muvhuso. Musi zwenezwo zwi tshi itea vhahashu vho takala vhukuma! Ndi ngoho uri hu vha na mbuyelo nnzhi musi ri tshi ṱhonifha vhaṅwe nahone zwi ita uri ri vhe na mulalo.

U ḒIPHINA NGA MULALO WA TSHOṰHE

Ṋamusi, vhathu vha Yehova vha ḓiphina nga u vha na mulalo wa vhukuma. Na inwi ni ḓo shela mulenzhe kha wonoyo mulalo musi ni tshi ṱahulela tshenetshi tshiaṋwiwa nga muya vhutshiloni haṋu. Tsha ndeme u fhira zwoṱhe ndi uri ni ḓo takalelwa nga Yehova na vha na mulalo wa tshoṱhe shangoni ḽiswa ḽa Mudzimu.—2 Pet. 3:13, 14.

^ phar. 13 Samusi ri tshi khou haseledza mutevhe wa zwiaṋwiwa nga muya mukhethwa wa Mudzimu, kha thero i tevhelaho ri ḓo haseledza nga ha pfaneleo ya vhuthu.