Pfukelani kha mafhungo

Pfukelani kha zwi re ngomu

Ni Songo Tendela Lufuno Lwaṋu Lu Tshi Fhungudzea

Ni Songo Tendela Lufuno Lwaṋu Lu Tshi Fhungudzea

“Nga nṱhani ha u engedzea ha vhuvhi, lufuno lwa vhanzhi lu ḓo fhungudzea.”—MAT. 24:12.

NYIMBO: 60, 135

1, 2. (a) Maipfi a Yesu ane a vha kha Mateo 24:12 o vha a tshi shuma kha vhafhio mathomoni? (b) Bugu ya Mishumo yo sumbedza hani uri Vhakriste vhanzhi vha u thoma vho dzula vha tshi sumbedza lufuno? (Sedzani tshifanyiso tsha u thoma.)

MUSI Yesu a tshee kha ḽifhasi, o vhudza vhathu nga ha tshiṅwe tsha zwiga zwa “vhufhelo ha ano maitele a zwithu.” O vha vhudza uri vha ḓo vhona “lufuno lwa vhanzhi lu [tshi] fhungudzea.” (Mat. 24:3, 12) Ḓanani ḽa u thoma ḽa miṅwaha, Vhayuda vhe vha vha vha tshi ḓiita u nga vha vhathu vha Mudzimu, vho tendela u funa havho Mudzimu zwi tshi fhungudzea.

2 Kha ḽiṅwe sia, Vhakriste vhanzhi vha tshenetsho tshifhinga vho vha vho farekanea nga u “huwelela mafhungo maḓifha nga ha Kristo” nahone vho vha vha tshi sumbedza nḓila ine vha funa ngayo Mudzimu, Vhakriste ngavho na vhathu vhane vha si vhe Vhakriste. (Mish. 2:44-47; 5:42) Naho zwo ralo, vhaṅwe vha vhatevheli vha Yesu vha ḓanani ḽa u thoma ḽa miṅwaha vho tendela lufuno lwavho lu tshi fhungudzea.

3. Ndi mini zwe zwa ita uri lufuno lwa Vhakriste vhanzhi lu fhungudzee?

3 Musi Yesu Kristo a tshi amba na Vhakriste vha ḓanani ḽa u thoma ḽa miṅwaha vha ngei Efesa, o ri: “Ndi u kaidzela uri wo litsha  lufuno lwe wa vha u nalwo u thomani.” (Nzumb. 2:4) Ndi ngani o amba nga u ralo? Vhenevho vhafunziwa vha Kristo vha u thoma vha nga vha vho ṱuṱuwedzwa nga mahumbulele a vhathu vha shango. (Vhaef. 2:2, 3) U fana na musalauno, vhathu vha Efesa vha ḓanani ḽa u thoma ḽa miṅwaha vho vha vha tshi ita vhuvhi. Ho vha hu ḓorobo yo pfumaho vhukuma nahone vhathu vha hone vho vha vha tshi livhisa ṱhogomelo kha zwithu zwa vhunzhili-nzhili, miḓifho na u tshila vhutshilo ha vhuphuvhe-phuvhe. Vho vha vha tshi humbulela vhone vhane fhedzi. Zwiṅwe hafhu, u ḓifara luvhi zwo vha zwo phaḓalala.

4. (a) Lufuno lwa vhanzhi lwo fhungudzea hani misini yashu? (b) Lufuno lwashu lu nga lingwa kha masia afhio mararu?

4 Maipfi a Yesu a uri lufuno lwa vhanzhi lu ḓo fhungudzea a kha ḓi shuma na ṋamusi. Nḓila ine vhathu vha funa ngayo Mudzimu i khou fhungudzea musalauno. Vhathu vhanzhi vha ṱoḓa madzangano a vhathu a tshi vha tandululela thaidzo dzavho, nṱhani ha u ṱoḓa thuso kha Mudzimu. Nga zwenezwo, vhathu vha sa gwadameli Yehova Mudzimu, lufuno lwavho lu khou bvela phanḓa lu tshi fhungudzea. U fana na vhuimo ha tshivhidzoni tsha Efesa tsha ḓanani ḽa u thoma ḽa miṅwaha, Vhakriste vha ngoho ṋamusi vha nga vha vhathu vhane vha humbulela vhone vhaṋe fhedzi nahone vha nga tendela lufuno lwavho lu tshi fhungudzea. Zwino ri ḓo ṱolisisa masia mararu ane a sumbedza nḓila ine lufuno lwashu lwa nga lingwa ngayo: (1) U funa Yehova, (2) u funa ngoho i re Bivhilini, (3) na u funa vhahashu.

U FUNA YEHOVA

5. Ndi ngani ri tshi fanela u funa Mudzimu?

5 Ḓuvha ḽe Yesu a amba nga ha u fhungudzea ha lufuno, o ombedzela zwithu zwa ndeme vhukuma nga ha lufuno. O ri: “U tea u funa Yehova Mudzimu wau nga mbilu yau yoṱhe na nga zwoṱhe zwine wa vha zwone na nga muhumbulo wau woṱhe.’ Ndi yone ndaela ya ndeme vhukuma.” (Mat. 22:37, 38) Vhukuma, u funa hashu Yehova Mudzimu zwi ri thusa u thetshelesa ndaela dzawe, u konḓelela na u vhenga zwithu zwivhi. (Vhalani Psalme ya 97:10.) Naho zwo ralo, Sathane na shango ḽawe vha lingedza u ita uri nḓila ine ra funa ngayo Mudzimu i fhungudzee.

6. Ho itea mini musi vhathu vha si tsha funa Mudzimu?

6 Vhathu vha ḽino shango vha na mavhonele a si avhuḓi nga ha lufuno. Nṱhani ha uri vha fune Musiki wavho, vhathu vha “funa vhone vhaṋe fhedzi.” (2 Tim. 3:2) Ḽino shango ḽi vhuswaho nga Sathane ḽi ṱuṱuwedza “nyemulo ya ṋama na nyemulo ya maṱo na u ṱongisa zwine muthu a vha nazwo.” (1 Yoh. 2:16) Muapostola Paulo o tsivhudza Vhakriste ngae nga ha u fusha nyemulo dza ṋama, a ri: “U humbula nga zwithu zwa ṋama zwi amba lufu . . . ngauri u humbula nga zwa ṋama zwi amba u vha swina ḽa Mudzimu.” (Vharoma 8:6, 7) Vhukuma, vhathu vhe vha fhedza tshifhinga tshinzhi vha tshi ṱoḓa zwithu zwi vhonalaho kana u ḓitakadza nga zwa vhudzekani, mafheleloni vho pfa vhuṱungu nahone ha vha na masiandoitwa a si avhuḓi.—1 Vhakor. 6:18; 1 Tim. 6:9, 10.

7. Vhatevheli vha Kristo vha musalauno vha sedzana na khombo dzifhio?

7 Kha maṅwe mashango, vhathu vha sa tendi uri Mudzimu u hone, vhane vha timatima u vha hone ha Mudzimu na vhane vha tenda uri zwithu zwo sokou bvelela, vha ṱuṱuwedza vhathu uri vha si fune Mudzimu na u tenda uri u hone. Vho ita uri vhathu vhanzhi vha tende uri muthu ane a tenda kha Musiki ho ngo ṱalifha nahone ho ngo funzea. Naho zwo ralo, vhathu vhanzhi vha ṱhonifha zwine zwa ambiwa nga vhorasaintsi u fhira u ṱhonifha Musiki washu. (Vharoma 1:25) Arali ra thetshelesa zwenezwo zwithu, ri nga si tsha vha na vhushaka havhuḓi na Yehova nahone nḓila ine ra mu funa ngayo i ḓo fhungudzea.—Vhaheb. 3:12.

8. (a) Vhathu vhanzhi vha Yehova vha sedzana na vhuimo vhufhio vhune ha ita uri vha nyabwe? (b) Ndi khwaṱhisedzo ifhio ine ra i wana kha Psalme ya 136?

 8 U nyabwa zwi nga ita uri lutendo lwashu lu thenga-thenge na u ita uri u funa hashu Mudzimu zwi fhungudzee. Kha ano maitele mavhi a langwaho nga Sathane, nga zwiṅwe zwifhinga, roṱhe ri nga sedzana na vhuimo vhune ha ita uri ri nyabwe. (1 Yoh. 5:19) Khamusi ro sedzana na thaidzo dzi vhangwaho nga vhulala, u sa vha na mutakalo wavhuḓi kana vhuleme ha zwa ekonomi. Kana ri nga pfa vhuṱungu ngauri a ri koni u ita zwiṅwe zwithu zwe ra vha ri tshi humbula u nga ri nga zwi ita. Naho zwo ralo, a ro ngo fanela u vhuya ra tendela vhuimo ho raloho kana nḓila ine ra ḓipfa ngayo i tshi ita uri ri ḓipfe u nga Yehova o ri laṱa. Nṱhani hazwo, ri fanela u elekanya nga ha maipfi ane a ri khwaṱhisedza uri Yehova u a ri funa. Eneo maipfi a wanala kha Psalme ya 136:23, ine ya ri: “We ri tsikuni a ri elelwa, ngauri vhuthu hawe ndi ha lini na lini.” Vhukuma, nḓila ine Yehova a funa ngayo vhashumeli vhawe a i shanduki. Nga zwenezwo, ri nga vha na vhungoho ha uri u pfa ‘tshililo tshashu’ nahone u a fhindula.—Ps. 116:1; 136:24-26.

9. Ndi mini zwe zwa khwaṱhisa Paulo uri a dzule a tshi funa Mudzimu?

9 U fana na mupsalme, Paulo o khuthadzea musi a tshi elekanya nga ha nḓila ye Yehova a dzula ngayo a tshi mu tikedza. Paulo o ṅwala uri: “Yehova ndi muthusi wanga; a thi nga ofhi. Muthu a nga nyita’ni?” (Vhaheb. 13:6) Nga nṱhani ha uri Paulo o vha a tshi fulufhela Yehova, zwo mu thusa uri a kone u sedzana na thaidzo dza vhutshilo. Ho ngo tendela zwiimo zwi si zwavhuḓi zwi tshi mu ita uri a nyabwe. Zwi re zwone ndi uri musi Paulo e dzhele, o ṅwala marifhi a si gathi a ṱuṱuwedzaho. (Vhaef. 4:1; Vhafil. 1:7; Filem. 1) Naho o vha o neta, Paulo o dzula a tshi funa Mudzimu. Ndi mini zwe zwa mu khwaṱhisa uri a ite nga u ralo? O dzula a tshi ḓitika nga “Mudzimu wa u khuthadza hoṱhe, ane a ri khuthadza kha vhuṱungu hashu hoṱhe.” (2 Vhakor. 1:3, 4) Ri nga edzisa hani tsumbo ya Paulo na u dzula ri tshi funa Yehova nga ho engedzeaho?

Sumbedzani uri ni funa Yehova (Sedzani phara 10)

10. Ri nga dzula hani ri tshi funa Yehova nga ho engedzeaho?

10 Paulo o amba nga ha iṅwe nḓila ine ra nga dzula ngayo ri tshi funa Yehova nga ho engedzeaho. O ṅwalela vhatendi ngae a ri: “Ni dzule ni tshi rabela.” (1 Vhathes. 5:17; Vharoma 12:12) U davhidzana na Mudzimu nga thabelo zwi ita uri ri vhe na vhushaka ha tsini nae. (Ps. 86:3) Musi ri tshi ḓiṋea tshifhinga tsha u vhudza Yehova zwi re mbiluni yashu na nḓila ine ra ḓipfa ngayo, zwenezwo zwi ḓo ita uri ri sendele tsini na Khotsi ashu wa ṱaḓulu, “Mupfi wa dzithabelo.” (Ps. 65:2) Zwiṅwe hafhu, musi ri tshi vhona uri Yehova u a fhindula thabelo dzashu, nḓila ine ra mu funa ngayo i a engedzea. Ri ṱhogomela u fhira naho hu lini uri “Yehova u tsini na vhoṱhe vhané vha mu vhidza.” (Ps. 145:18) Arali ri na fulufhelo ḽa uri Yehova u a ri funa na u ri tikedza, zwi ḓo ri thusa u sedzana na thaidzo naho dzi dzifhio dzine ra sedzana nadzo zwino na tshifhingani tshi ḓaho.

U FUNA NGOHO I RE BIVHILINI

11, 12. Ri nga funa hani ngoho i re Bivhilini nga ho engedzeaho?

11 Sa Vhakriste, ri a funa na u dzhiela nṱha ngoho. Ri wana ngoho Ipfini ḽa Mudzimu. Yesu o vhudza Khotsi awe nga thabelo a ri: “Ipfi ḽau ndi ngoho.” (Yoh. 17:17) Nga zwenezwo, uri ri fune ngoho, ri fanela u thoma nga u ḓivha nḓivho yo teaho i re Bivhilini. (Vhakol. 1:10) Naho zwo ralo, zwenezwo zwi fhira u sokou ḓivha zwo ṅwalwaho khayo. Ṱhogomelani nḓila ine muṅwali wa Psalme ya 119 a ri thusa ngayo u pfesesa zwine u funa ngoho i re Bivhilini zwa amba zwone. (Vhalani Psalme ya 119:97-100.) Naa ri ḓiṋea tshifhinga tsha u elekanya nga ha zwe ra zwi vhala Maṅwaloni ḓuvha ḽoṱhe? U dzhiela hashu  nṱha ngoho i re Bivhilini zwi ḓo engedzea musi ri tshi elekanya nga ha nḓila ine zwa ri vhuyedza ngayo musi ri tshi zwi shumisa vhutshiloni hashu.

12 Mupsalme o bvela phanḓa a ri: “Zwe wa amba a si u ḓifha haṋwani hanga! Zwi fhira ṋotshi mulomoni wanga.” (Ps. 119:103) Na riṋe ri nga ḓifhelwa nga zwiḽiwa zwa lwa muya zwo thewaho Bivhili zwine ra zwi wana ndanguloni ya Mudzimu. Ri fanela u ḓiṋea tshifhinga tsha u zwi guda u itela uri zwi ri lelutshele u humbula maipfi a “takadzaho” a zwe ra zwi guda na u zwi shumisa u thusa vhaṅwe.—Muh. 12:10.

13. Ndi mini zwe zwa thusa Yeremia u funa ngoho i re Bivhilini, nahone zwenezwo zwo mu kwama hani?

13 Muporofita Yeremia o vha a tshi funa ngoho i re Bivhilini. Ṱhogomelani nḓila ye maipfi a Mudzimu a kwama ngayo mbilu yawe. O ri: “Nde’ u̗ wana fhungo ḽau, ḽa vha zwiḽiwa zwanga; nde’ ndó laiwa nga Iwe, mbilu yanga ya ḓi-phiṋa ya takala; nga u’ nda vhidzwa nga dzina ḽau, Yehova Mudzimu wa Mavhuthu.” (Yer. 15:16) Yeremia o vhala nahone a elekanya nga ha Ipfi ḽa Mudzimu. Nga yeneyo nḓila, o dzhiela nṱha vhukuma ndugelo ya u vhidzwa nga dzina ḽa Mudzimu. Naa nḓila ine ra funa ngayo ngoho i re Bivhilini i ri sudzulusela u ṱhogomela ndugelo yo khetheaho ine ra vha nayo ya u vhidzwa nga dzina ḽa Mudzimu na u huwelela nga ha Muvhuso wawe kha ano maḓuvha a vhufhelo?

Sumbedzani uri ni funa ngoho i re Bivhilini (Sedzani phara 14)

14. Ri nga funa hani ngoho i re Bivhilini nga ho engedzeaho?

14 Nga nnḓa ha u guda Bivhili na khandiso dzashu dzo thewaho Bivhilini, ndi mini zwiṅwe zwine zwa nga ri thusa u funa ngoho i re Bivhilini nga ho engedzeaho? Ri nga funa ngoho i re Bivhilini nga ho engedzeaho musi ri tshi ya miṱanganoni ya tshivhidzo tshifhinga tshoṱhe. Iṅwe nḓila ya ndeme ine ra gudiswa ngayo ndi u guda Bivhili vhege iṅwe na iṅwe ri tshi shumisa Tshiingamo. U itela u pfesesa thero ine ya ḓo haseledzwa, ri fanela u lugiselela zwavhuḓi Ngudo ya Tshiingamo ya vhege iṅwe na iṅwe. Iṅwe nḓila ine ra nga zwi ita ngayo, ndi nga u vhala Maṅwalo o redzwaho. Musalauno, Tshiingamo tshi nga kopiwa kha website ya jw.org/ve kana tshi nga vhaliwa kha JW Library app nga nyambo nnzhi. Zwiṅwe zwishumiswa zwa thekinolodzhi zwi  ita uri zwi leluwe u vhala Maṅwalo o redzwaho kha thero iṅwe na iṅwe i gudwaho. Hu sa londwi nḓila ine ra i shumisa musi ri tshi guda, u vhala Maṅwalo nga vhuronwane na u elekanya nga hao, zwi ḓo ita uri ri fune ngoho i re Bivhilini nga ho engedzeaho.—Vhalani Psalme ya 1:2.

U FUNA VHAHASHU

15, 16. (a) Yesu o ri ṋea ndaela ifhio kha Yohane 13:34, 35? (b) U funa vhahashu zwi tshimbidzana hani na u funa Mudzimu na Bivhili?

15 Vhusikuni hawe ha u fhedzisela kha ḽifhasi, Yesu o vhudza vhafunziwa vhawe a ri: “Ndi khou ni ṋea mulayo muswa, wa uri ni funane; samusi na nṋe ndo ni funa. Ndi zwine vhathu vhoṱhe vha ḓo ḓivha ngazwo uri ni vhafunziwa vhanga, arali ni tshi funana.”—Yoh. 13:34, 35.

16 U funa vhahashu zwi tshimbidzana na u funa hashu Yehova. Zwi re zwone ndi uri ri nga si kone u funa tshithihi ra litsha tshiṅwe. Muapostola Yohane o ṅwala uri: “Ane a si fune wahawe, ane a kona u mu vhona, a nga si fune Mudzimu ane a si kone u mu vhona.” (1 Yoh. 4:20) Zwiṅwe hafhu, u funa hashu Yehova na vhahashu zwi tshimbidzana na u funa Bivhili. Ndi ngani? Ngauri u funa ngoho i re Bivhilini zwi ri sudzulusela u thetshelesa zwi tshi bva mbiluni ndaela i bvaho Maṅwaloni ya uri ri fune Mudzimu na u funa vhahashu.—1 Pet. 1:22; 1 Yoh. 4:21.

Funani vhahashu (Sedzani phara 17)

17. Ndi dzifhio dziṅwe nḓila dzine ra nga sumbedza lufuno?

17 Vhalani 1 Vhathesalonika 4:9, 10. Ndi dzifhio dziṅwe tsumbo dzi shumaho dzine ra nga sumbedza ngadzo uri ri funa vhathu vha tshivhidzoni? Vhahashu vha vhalala vha nga ṱoḓa thuso ya tshiendedzi tsha u ya miṱanganoni ya Vhukriste. Tshilikadzi i nga ṱoḓa thuso ya u lugiselwa zwiṅwe hayani hayo. (Yak. 1:27) Hu sa londwi uri ni muṱuku kana ni muhulwane, vhahashu vhe vha nyabwa kana vho tsikeledzeaho kana vhe vha sedzana na milingo vha nga ṱoḓa u ṱhogomelwa, u ṱuṱuwedzwa na u khuthadzwa. (Mir. 12:25; Vhakol. 4:11) Ri sumbedza uri ri funa vhahashu nga zwine ra zwi amba, zwine ra zwi ita na nga u vhilaelela “vhane vha vha na lutendo lu fanaho na lwashu.”—Vhagal. 6:10.

18. Ndi mini zwine zwa ḓo ri thusa u tandulula khuḓano na vhatendi nga riṋe?

18 Bivhili yo dzula yo amba uri “maḓuvhani a vhufhelo” a ano maitele mavhi a zwithu, ri ḓo vhona nga vhathu vhane vha funa hu tshi naka zwavho fhedzi na vha re na tseḓa. (2 Tim. 3:1, 2) Nga zwenezwo, sa Vhakriste, ri fanela u ita zwoṱhe zwine ra nga kona u funa Mudzimu nga ho engedzeaho, u funa ngoho i re Bivhilini na u funa vhaṅwe. Ndi ngoho uri nga zwiṅwe zwifhinga ri nga kuḓana na vhatendi nga riṋe. Naho zwo ralo, ndi phaṱhutshedzo khulwane lungafhani kha vhathu vhoṱhe tshivhidzoni, musi lufuno lu tshi ri ṱuṱuwedza u tandulula u sa pfesesana nga nḓila ya lufuno! (Vhaef. 4:32; Vhakol. 3:14) Nga zwenezwo, ri songo vhuya ra tendela lufuno lwashu lu tshi fhungudzea! Nṱhani hazwo, u nga ri ri nga bvela phanḓa ri tshi funa Yehova, Ipfi ḽawe na vhahashu.