Pfukelani kha mafhungo

Pfukelani kha zwi re ngomu

Nḓila Ye Gayo A Thusa Ngayo Vhahawe

Nḓila Ye Gayo A Thusa Ngayo Vhahawe

GAYO na vhaṅwe Vhakriste vha ḓanani ḽa u thoma ḽa miṅwaha vho sedzana na khaedu. Vhathu vhe vha vha vha tshi phaḓaladza pfunzo dza mazwifhi vho lingedza u ita uri tshivhidzo tshi thenga-thenge na u tshi fhandekanya. (1 Yoh. 2:18, 19; 2 Yoh. 7) Muṅwe munna we a vha a pfi Diotirefe o vha a tshi “amba zwithu zwivhi” nga ha muapostola Yohane na vhaṅwe, o vha a sa sumbedzi Vhakriste vho dalaho muya wa u ṱanganedza vhaeni nahone o lingedza u ṱuṱuwedza vhaṅwe uri vha ite nga u ralo. (3 Yoh. 9, 10) Vhuimo ho vha ho tou ralo musi Yohane a tshi ṅwalela Gayo. Vhurifhi ha muapostola ho ṅwalwa miṅwahani i ṱoḓaho u vha 98 C.E., nahone vhu wanala kha Maṅwalo a Tshikriste a Lugerika sa “Vhurifhi Ha Vhuraru Ha Yohane.”

Hu sa londwi milingo yoṱhe ye a sedzana nayo, Gayo o bvela phanḓa a tshi shumela Yehova nga u fulufhedza. O sumbedza hani uri u a fulufhedzea? Ndi ngani ri tshi ṱoḓa u edzisa tsumbo ya Gayo ṋamusi? Vhurifhi ha Yohane vhu nga ri thusa hani u ita nga u ralo?

VHURIFHI VHU YAHO KHA KHONANI YAVHUḒI

Muṅwali wa Yohane ya Vhuraru u ḓivhidza “mukalaha.” Gayo we a vha e ṅwana wawe wa lwa muya, o vha a tshi mu vhidza muapostola Yohane. Musi Yohane a tshi vhidza Gayo o vha a tshi ri “a funwaho, ane nda mu funa vhukuma.” Yohane o amba uri u fulufhela uri mutakalo wavhuḓi wa Gayo u fane na mutakalo wawe wa lwa muya. Eneo ndi maipfi avhuḓi vhukuma na a khuthadzaho!—3 Yoh. 1, 2, 4.

Khamusi Gayo o vha e mulavhelesi wa tshivhidzo, fhedzi vhurifhi ha Yohane a vhu zwi sumbedzi. Yohane o khoḓa Gayo nge a sumbedza vhahawe muya wa u ṱanganedza vhaeni naho o vha a sa vha ḓivhi. Yohane o vhona zwenezwi zwi vhuṱanzi ha uri Gayo u a fulufhedzea, samusi muya wa u ṱanganedza vhaeni hu zwithu zwine vhashumeli vha Mudzimu vha dzula vha tshi zwi ita.—Gen. 18:1-8; 1 Tim. 3:2; 3 Yoh. 5.

Maipfi a Yohane a u livhuwa Gayo nge a sumbedza vhahawe muya wa u ṱanganedza vhaeni a sumbedza uri tshifhinga tshoṱhe Vhakriste vho vha vha tshi dalela Yohane na zwivhidzo nahone vhenevho vhathu vho vhudza Yohane zwe vha ṱangana nazwo. Khamusi Yohane o wana wonoyo mulaedza nga ha zwenezwo zwivhidzo.

Vhukuma, Vhakriste vhe vha vha vha tshi ita mushumo wa u dalela vho vha vha tshi ṱoḓa u dzula na vhatendi ngavho. Nnḓu dza vhaeni dzo vha dzi si na bvumo ḽavhuḓi, vhathu vho vha vha sa farwi nga nḓila yavhuḓi nahone ho ḓala u ḓifara luvhi. Nga zwenezwo, musi zwi tshi konadzea, vhadali vho vha vha tshi dzula na dzikhonani; Vhakriste vhe vha vha vha tshi ita mushumo wa u dalela vho vha vha tshi dzula na Vhakriste ngavho.

 “VHO ṰUWA VHA TSHI ITELA DZINA ḼAWE”

Muapostola Yohane o ṱuṱuwedza Gayo uri a dovhe a sumbedze muya wa u ṱanganedza vhaeni, o mu humbela uri a “vha litshe vha ṱuwe nga nḓila yo fanelaho vha Mudzimu.” Musi a tshi amba uri a vha litshe vha ṱuwe nga nḓila yo fanelaho, o vha a tshi khou amba uri a vhe ṋee zwoṱhe zwe vha vha vha tshi ḓo zwi shaya musi vhe lwendoni lwavho u swika vha tshi swika hune vha khou ya hone. Zwo vha zwi khagala uri Gayo o vha o no vhuya a ita zwenezwi kha vhaṅwe vhaeni vhawe, samusi vho vha vho vhudza Yohane nga ha nḓila ine Gayo a vha ngayo na lufuno na lutendo.—3 Yoh. 3, 6.

Khamusi vhenevho vhaeni vho vha vhe vharumiwa, vhaḓinḓa vha Yohane kana vhalavhelesi vha dalelaho. Naho zwo ralo, vho vha vha tshi ita mushumo wa u dalela vha tshi itela mafhungo maḓifha. Yohane o ri: “Vho ṱuwa vha tshi itela dzina ḽawe.” (3 Yoh. 7) Yohane o vha a tshi khou ambela kha Mudzimu (sedzani ndimana 6), nga zwenezwo, maipfi ane a ri, “itela dzina ḽawe” a ambela kha dzina Yehova. Nga zwenezwo, vhahashu vho vha vhe tshipiḓa tsha tshivhidzo tsha Vhukriste nahone vho vha vha tshi fanela u farwa zwavhuḓi. Yohane o ṅwala uri: “Ri a kombetshedzea u ṱanganedza vhathu vho raloho, uri ri vhe vhashumisani ngohoni.”—3 Yoh. 8.

U THUSA KHA VHUIMO VHU KONḒAHO

Yohane ho ngo ṅwalela Gayo nga nṱhani ha uri o vha a tshi ṱoḓa u mu livhuha fhedzi. Yohane o vha a tshi ṱoḓa u mu thusa uri a kone u sedzana na thaidzo. Sa tsumbo, muṅwe muraḓo wa tshivhidzo we a vha a tshi pfi Diotirefe o vha a songo ḓiimisela u sumbedza Vhakriste vha dalelaho muya wa u ṱanganedza vhaeni. O dovha a lingedza u thivhela vhaṅwe uri vha si sumbedze muya wa u ṱanganedza vhaeni.—3 Yoh. 9, 10.

A zwi timatimisi uri Vhakriste vha fulufhedzeaho vho vha vha sa ṱoḓi u ḓisendedza tsini na Diotirefe naho arali zwenezwo zwo vha zwi tshi konadzea. O vha a tshi funa u vha na vhuimo ha nṱha tshivhidzoni, ho ngo wana tshithu tshi bvaho ha Yohane nahone o vha a tshi phaḓaladza mazwifhi nga ha muapostola na vhaṅwe. Naho Yohane a songo vhuya a mu vhidza uri ndi mufunzi wa mazwifhi, Diotirefe o vha a tshi lwisana na ndugelo ya muapostola Yohane. Lutamo lwa Diotirefe lwa u ṱoḓa u vha na bvumo na mavhonele awe a si a Vhukriste o vha a tshi sumbedza uri ha fulufhedzei. Vhuimo ha Diotirefe vhu sumbedza uri musi muthu e na vhuhovheleli nahone a tshi ḓihudza zwi nga vha na ṱhuṱhuwedzo i si yavhuḓi tshivhidzoni. Nga zwenezwo, Yohane o vhudza Gayo maipfi a shumaho na kha riṋe, ane a ri: “U songo edzisa vhuvhi.”—3 Yoh. 11.

TSHIITISI TSHAVHUḒI TSHA U ITA ZWO LUGAHO

U fhambana na Diotirefe, Yohane o amba uri muṅwe Mukriste we a vha a tshi pfi Demetrio o vha e tsumbo yavhuḓi. Yohane o ṅwala uri: “Vhoṱhe vho amba zwavhuḓi nga ha Demetrio . . . Zwi re zwone ndi uri na riṋe ri a mu ṱanzielela, nahone ni a zwi ḓivha uri vhuṱanzi vhune ra vhu ṱanziela ndi ngoho.” (3 Yoh. 12) Khamusi Demetrio o vha a tshi ṱoḓa thikhedzo ya Gayo nahone khamusi vhurifhi ha Yohane ha Vhuraru ho vha hu nḓila ya u ḓiṱalusa na u khoḓa. Khamusi Demetrio ndi ene we a isa vhurifhi kha Gayo. Samusi ho vha hu ene muḓinḓa wa Yohane kana khamusi mulavhelesi a dalelaho, zwe zwa ṅwalwa nga Yohane zwi nga vha zwo khwaṱhisa Demetrio.

Ndi ngani Yohane o ṱuṱuwedza Gayo uri a bvele phanḓa a tshi sumbedza muya wa u ṱanganedza vhaeni naho o vha a tshi khou ita nga u ralo? Naa Yohane o vhona hu na ṱhoḓea ya u khwaṱhisa Gayo? Naa muapostola a nga vha o vha a tshi khou vhilaedziswa nga ha uri Gayo a nga si dzhiele nzhele zwe zwa vha zwi tshi khou itwa nga Diotirefe, samusi o vha a tshi khou lingedza u ita uri Vhakriste vha si sumbedze muya wa u ṱanganedza vhaeni tshivhidzoni? Hu sa londwi uri zwone ndi zwifhio, Yohane o khwaṱhisedza Gayo a ri: “Ane a ita zwo lugaho u bva ha Mudzimu.” (3 Yoh. 11) Tshenetsho ndi tshiitisi tshavhuḓi vhukuma tsha u ita zwo lugaho na u bvela phanḓa u tshi zwi ita.

Naa vhurifhi ha Yohane ho ṱuṱuwedza Gayo uri a bvele phanḓa a tshi sumbedza muya wa u  ṱanganedza vhaeni? Zwo tou ralo, ngauri vhurifhi ha Yohane ya Vhuraru ho ṅwalwa Bivhilini nahone ho ṅwalelwa uri vhu ṱuṱuwedze vhaṅwe uri vha “edzise zwo lugaho.”

NGUDO I RE KHA VHURIFHI HA YOHANE YA VHURARU

A huna zwinzhi zwo ṅwalwaho nga ha wahashu Gayo wa tshifhingani tsha kale. Naho zwo ralo, ri nga guda ngudo nnzhi kha zwithu zwi si gathi zwe zwa ṅwalwa nga ha vhutshilo hawe.

Ri nga sumbedza hani “muya wa u ṱanganedza vhaeni”?

Ya u thoma, vhunzhi hashu ro wana ngoho kha vhathu vha fulufhedzeaho vhe vha vha vho ḓiimisela u bva hune vha dzula hone u itela u ri ḓivhadza ngoho. Ndi ngoho uri musalauno a si Vhakriste vhoṱhe tshivhidzoni vhane vha fara lwendo lulapfu vha tshi itela mafhungo maḓifha. Naho zwo ralo, u fana na Gayo, na riṋe ri nga tikedza na u ṱuṱuwedza vhane vha shuma fhethu hu re kule, u fana na mulavhelesi wa ḽiisela na mufumakadzi wawe. Kana ri nga tikedza vhahashu vhane vha shuma kule na mahaya avho kana vhane vha ya kha maṅwe mashango u itela u shuma hune ha vha na ṱhoḓea ya vhahuweleli vha Muvhuso. Nga zwenezwo, u nga ri ri nga “sumbedza muya wa u ṱanganedza vhaeni.”—Vharoma 12:13; 1 Tim. 5:9, 10.

Ya vhuvhili, a ro ngo fanela u mangala arali nga zwiṅwe zwifhinga ha nga vuwa khuḓano ya u ṱoḓa vhuimo ha nṱha tshivhidzoni. Vhathu vho vha vha tshi nyadza maanḓa e Yohane a vha e nao; samusi vho zwi ita na kha muapostola Paulo. (2 Vhakor. 10:7-12; 12:11-13) Nga zwenezwo, ri fanela u aravha hani musi ri tshi sedzana na vhuimo vhu fanaho tshivhidzoni? Paulo o ṋea Timotheo nyeletshedzo ine ya ri: “Mulanda wa Murena ho ngo fanela u lwa, u fanela u vha na vhulenda kha vhoṱhe, a kone u funza, na u kona u ḓifara musi a tshi khakhelwa, a laye mashandukwa o vuḓa.” Arali ra dzula ro vuḓa musi ri tshi levhelwa, nga zwiṱuku nga zwiṱuku vhathu vhane vha khou ri tovhola vha nga shandula nḓila dzavho. Nahone Yehova “u ḓo ita uri vha shandule mbilu dzavho, zwi itaho uri vha wane nḓivho yo teaho ya ngoho.”—2 Tim. 2:24, 25.

Ya vhuraru, Vhakriste nga riṋe vhane vha shumela Yehova nga u fulufhedzea hu sa londwi milingo ine vha sedzana nayo vha fanela u ṱhogomelwa na u khoḓwa ngauri vha bvela phanḓa vha tshi fulufhedzea. Muapostola Yohane o ṱuṱuwedza Gayo nahone a mu khwaṱhisedza uri u khou ita zwo lugaho. Nga hu fanaho, vhahulwane ṋamusi vha fanela u tevhela tsumbo ya Yohane nga u ṱuṱuwedza vhahashu uri vha si kulee nungo.—Yes. 40:31; 1 Vhathes. 5:11.

Vhurifhi he muapostola Yohane a vhu ṅwalela Gayo vhu na maipfi a si gathi fhedzi, nahone ndi bugu ṱhukhu vhukuma Bivhilini. Naho zwo ralo, ndi ya ndeme vhukuma kha Vhakriste ṋamusi.