Pfukelani kha mafhungo

Pfukelani kha zwi re ngomu

Yehova U Dzhiela Nṱha “Amen” Yaṋu

Yehova U Dzhiela Nṱha “Amen” Yaṋu

YEHOVA u dzhiela nṱha vhurabeli hashu. ‘U a sedza na u pfa’ vhashumeli vhawe nahone u dzhiela nṱha zwiṅwe na zwiṅwe zwine ra zwi ita u itela u mu renda hu sa londwi uri ndi zwiṱuku lungafhani. (Mal. 3:16) Sa tsumbo, humbulani ipfi ḽine ra anzela u ḽi shumisa. Ḽeneḽo ipfi ndi “amen.” Naa Yehova u a dzhiela nṱha ḽeneḽo ipfi? Ee! U itela u ḓivha uri ndi ngani, kha ri ṱolisise zwine ḽeneḽo ipfi ḽa amba zwone na nḓila ine ḽa shumiswa ngayo Bivhilini.

‘VHATHU VHOṰHE VHA BVUMELE VHA RI: AMEN!’

Ipfi ḽine ḽa ri “amen” ḽi amba uri “nga zwi ralo” kana “ngangoho.” Ḽi bva kha ipfi ḽa Luheberu ḽine ḽa amba “u fulufhedzea.” Nga zwiṅwe zwifhinga ḽo vha ḽi tshi shumiswa kha zwa mulayo. Musi muthu o no ita muano, o vha tshi ri “amen” u itela u khwaṱhisa uri zwe a zwi amba ndi ngoho na uri u ḓo imela masiandoitwa azwo. (Num. 5:22) Musi a tshi ri “amen” khagala, o vha na tshiitisi tshihulwane tsha u ita zwe a fulufhedzisa.—Neh. 5:13.

Tsumbo yavhuḓi ya u shumiswa ha ipfi “amen” i wanala kha Doiteronomio ndima 27. Musi Vhaisiraele vho no dzhena Shangoni ḽo Fulufhedziswaho, vho vha vha tshi fanela u kuvhangana Thavhani ya Ebala na ya Garitsimi u itela u pfa hu tshi vhalwa Mulayo. Vho vha vha songo yela u sokou thetshelesa Mulayo, fhedzi na u u ṱanganedza. Zwenezwi vho zwi ita nga u fhindula uri “Ngangoho!” kana Amen! musi hu tshi vhalwa masiandoitwa a u sa thetshelesa. (Doit. 27:15-26) Edzani u humbula vhanna, vhafumakadzi na vhana vhanzhi-vhanzhi vha tshi khou fhindula! (Yosh. 8:30-35) A vho ngo vhuya vha vuwa vho hangwa zwe vha zwi amba ḽeneḽo ḓuvha. Vhenevho Vhaisiraele vho ita zwe vha zwi amba, ngauri Bivhili i ri: “Vha-Isiraele vhone vho shumela Yehova misi yoṱhe Yoshua á tshee hone, na misi yoṱhe vhahulwane vhe Yoshua a vha sia vhá tshee hone; ndi avho vhe vha vha vha tshi ḓivha zwoṱhe zwe Yehova a ita Isiraele.”—Yosh. 24:31.

Yesu o dovha a shumisa ipfi “amen” u itela u khwaṱhisedza uri zwine a khou amba ndi ngoho, fhedzi o zwi ita nga nḓila yo khetheaho. Nṱhani ha u i shumisa u itela u fhindula, o shumisa ipfi “amen” a sa athu amba zwiṅwe zwithu u itela u ombedzela uri ndi ngoho. Nga zwiṅwe zwifhinga, o dovholola ḽeneḽo ipfi nga u amba uri “amen amen.” (Mat. 5:18; Yoh. 1:51) Nga zwenezwo, o  vha a tshi khwaṱhisedza vhathetshelesi vhawe uri maipfi awe ndi a ngoho. Yesu o vha a tshi nga amba o khwaṱhisa ngauri ndi ene we a ṋewa maanḓa a u ita uri mafulufhedziso oṱhe a Mudzimu a ḓadzee.—2 Vhakor. 1:20; Nzumb. 3:14.

‘MAVHUTHU OṰHE A MBO RI: AMEN, NGA HU RENDIWE YEHOVA’

Vhaisiraele na vhone vho shumisa ipfi “amen” musi vha tshi renda na u rabela Yehova. (Neh. 8:6; Ps. 41:13) Musi vho thetshelesaho vha tshi ri “amen,” vho vha vha khou sumbedza uri vha tendelana na zwe zwa ambiwa. Nga zwenezwo, vhoṱhe vhe vha vha vhe henefho vho shela mulenzhe nahone vha takalela u gwadamela Yehova nga yeneyi nḓila. Zwenezwo ndi zwe zwa itea musi Khosi Davida a tshi ḓisa mbulungelo ya mulanga ya Yehova ngei Yerusalema. Musi hu tshi khou pembelelwa, o ita thabelo i bvaho mbiluni ya luimbo ye ya ṅwalwa kha 1 Koronika 16:8-36. Vhathu vhe vha vha vhe henefho, vho kwamiwa vhukuma nga maipfi awe lwe vha ri ‘Amen, nga hu rendiwe Yehova.’ Vho vha vho takalela u gwadamela Yehova vhoṱhe.

Vhakriste vha ḓanani ḽa u thoma ḽa miṅwaha na vhone vho shumisa ipfi “amen” musi vha tshi renda Yehova. Kanzhi vhaṅwali vha Bivhili vho vha vha tshi ḽi katela kha marifhi avho. (Vharoma 1:25; 16:27; 1 Pet. 4:11) Bugu ya Nzumbululo i amba nga ha zwivhumbwa zwa muya zwi re ṱaḓulu zwi tshi renda Mudzimu zwi tshi ri: “Amen! Rendani Yah!” (Nzumb. 19:1, 4) Vhakriste vho vha vha tshi anzela uri “amen” musi vha tshi fhedza u rabela miṱanganoni yavho. (1 Vhakor. 14:16) Naho zwo ralo, ḽo vha ḽi si ipfi ḽine vha sokou ḽi amba vha songo thoma vha humbula.

ZWINE ZWA ITA URI “AMEN” YAṊU I VHE YA NDEME

Samusi ro no guda nḓila ye vhashumeli vha Yehova vha shumisa ngayo “amen,” ri kona u vhona uri ndi ngani ḽeneḽo ipfi ḽi ḽa ndeme nga u rali musi ri tshi fhedza u rabela. Musi ri tshi ḽi amba magumoni a thabelo yashu, ri sumbedza uri ri tendelana  na zwe ra zwi amba. Musi ri tshi ri “amen” naho ri tshi i ambela mbiluni, ri sumbedza uri ri tendelana na zwe zwa ambiwa. Kha ri ṱhogomele maṅwe masia ane a sumbedza uri ndi ngani “amen” yashu i ya ndeme.

Ri a thetshelesa musi hu tshi rabelwa ngauri ndi tshipiḓa tsha vhurabeli hashu. Musi ri tshi gwadamela Yehova nga thabelo, tsha ndeme a si zwine ra zwi amba fhedzi, fhedzi na nḓila ine ra ḓifara ngayo musi hu tshi khou rabelwa. Nga nṱhani ha uri ri ṱoḓa uri “amen” zwi tshi bva mbiluni, zwenezwo zwi ḓo ri thusa uri ri vhe na mavhonele o teaho na u livhisa ṱhogomelo kha thabelo.

Sa vhagwadameli vha Mudzimu ri na vhuthihi. Thabelo ine ya itwa tshivhidzoni i ita uri ri livhise ṱhogomelo kha zwine zwa khou pfiwa nga tshivhidzo tshoṱhe. (Mish. 1:14; 12:5) Musi ri tshi ri “amen” roṱhe zwi ita uri ri vhe na vhuthihi. Musi ri tshi ri “amen” roṱhe kana ri tshi i ambela mbiluni, thabelo yashu i nga ita uri Yehova a ite zwe ra mu humbela.

“Amen” yashu i renda Yehova

Ri renda Yehova. Yehova u vhona na zwiṱuku-ṱuku zwine ra zwi ita kha vhurabeli hawe. (Luka 21:2, 3) U vhona zwiṱuṱuwedzi zwashu na zwi re mbiluni dzashu. Na musi ro thetshelesa miṱangano nga luṱingo, ri nga vha na vhungoho ha uri Yehova u a pfa “amen” yashu. Ri vha ri tshi khou ṱanganela na vha re miṱanganoni kha u renda Yehova.

“Amen” yashu i nga vhonala i si ya ndeme, fhedzi ndi ya ndeme vhukuma. Iṅwe encyclopedia ya Bivhili i ri vhathu vha Mudzimu vha nga “shumisa ḽeneḽi ipfi ḽithihi u itela u sumbedza nḓila ine vha khou ḓipfa ngayo zwi tshi bva mbiluni na u sumbedza uri vha na fulufhelo.” U nga ri “amen” yashu iṅwe na iṅwe i nga takadza Yehova.—Ps. 19:14.