Pfukelani kha mafhungo

Pfukelani kha zwi re ngomu

Ndi Ngani Zwi Zwa Ndeme Uri Mukriste A Lovhedzwe?

Ndi Ngani Zwi Zwa Ndeme Uri Mukriste A Lovhedzwe?

“Ndovhedzo . . . i khou dovha ya tshidza na inwi.”—1 PET. 3:21.

NYIMBO: 7, 56

1, 2. (a) Vhaṅwe vhabebi vha Vhakriste vha ḓipfa hani musi ṅwana wavho a tshi ṱoḓa u lovhedzwa? (b) Ndi ngani vhane vha khou ya u lovhedzwa vha tshi vhudziswa arali vho ḓiṋekedzela kha Yehova? (Sedzani tshifanyiso tsha u thoma.)

VHABEBI vha muṅwe ṅwananyana ane ra ḓo mu vhidza Maria, vho vha vho mu lavhelesa musi o ima na vhaṅwe vhe a vha a tshi khou ḓo lovhedzwa navho. O fhindula nga ipfi ḽi pfalaho mbudziso mbili dze dza vhudziswa nga tshiambi. Nga murahu ha zwenezwo a lovhedzwa.

2 Vhabebi vha Maria vho ḓirwa khana nga phetho ye ṅwananyana wavho a i dzhia ya u ḓiṋekedzela kha Yehova na u lovhedzwa. Fhedzi musi a sa athu u lovhedzwa, mme awe vho vha vha tshi khou vhilaedziswa nga phetho yawe. Vho ḓivhudzisa uri: ‘Naa Maria u kha ḓi vha muṱuku uri a lovhedzwe? Naa u a pfesesa uri phetho ye a i dzhia ndi ya ndeme lungafhani? Naa zwi ḓo vha khwine uri a thome a aluwe a sa athu u lovhedzwa?’ Dzenedzi ndi mbudziso dzine vhabebi vhanzhi vha ḓivhudzisa dzone musi ṅwana wavho a tshi vha vhudza uri u ṱoḓa u lovhedzwa. (Muh. 5:4) Naho zwo ralo, ndi zwa ndeme vhukuma uri Mukriste a dzhie vhukando ha u ḓiṋekedzela na u  lovhedzwa.—Sedzani bogisi, “ Naa No Ḓiṋekedzela Kha Yehova?

3, 4. (a) Muapostola Petro o sumbedza hani nḓila ine u lovhedzwa zwa vha zwa ndeme ngayo? (b) Ndi ngani u lovhedzwa zwi tshi nga fanyiswa na u fhaṱwa ha gungwa misini ya Noaxe?

3 Muapostola Petro o fanyisa ndovhedzo na gungwa ḽe ḽa fhaṱwa nga Noaxe, o ri: “Ndovhedzo, ine ya fanyisela zwenezwo, i khou dovha ya tshidza na inwi.” (Vhalani 1 Petro 3:20, 21.) Gugwa ḽi sumbedza vhuṱanzi vhu vhonalaho ha uri Noaxe o vha o ḓiṋekedzela u ita zwine Mudzimu a zwi funa. Noaxe o ita nga u fulufhedzea mushumo we Yehova a mu ṋea wone. Lutendo lwe Noaxe a vha e nalwo, lwo ita uri ene na muṱa wawe vha tshidzwe nga tshifhinga tsha Maḓi Mahulu. Zwe Petro a zwi amba zwi ri gudisa mini?

4 Samusi gungwa ḽo sumbedza vhuṱanzi ha uri Noaxe o vha e na lutendo, u lovhedzwa khagala zwi sumbedza vhuṱanzi vhu vhonalaho. Zwi sumbedza vhuṱanzi ha mini? Zwi sumbedza vhuṱanzi ha uri mufunziwa wa Mukriste o ḓiṋekedzela kha Yehova ngauri u na lutendo kha tshiṱhavhelo tsha Kristo na u vuswa hawe. U fana na Noaxe, vhafunziwa vho ḓiṋekedzelaho vha bvela phanḓa na u ita mushumo we Mudzimu a vha ṋea wone. Samusi Noaxe o tshidzwa tshifhingani tsha Maḓi Mahulu, vhathu vha fulufhedzeaho vhe vha lovhedzwa vha ḓo tshidzwa musi ḽino shango ḽivhi ḽi tshi fheliswa. (Marko 13:10; Nzumb. 7:9, 10) Zwenezwi zwi ita uri u ḓiṋekedzela na u lovhedzwa zwi vhe zwa ndeme vhukuma. Arali muthu a lenga u dzhia vhukando ha u lovhedzwa nga nṱhani ha zwiitisi zwi sa pfali, zwi nga ita uri a sa wane vhutshilo vhu sa fheli.

5. Ri ḓo ṱolisisa mini kha ino thero?

5 Samusi zwino ri tshi vho ḓivha nḓila ine u lovhedzwa zwa vha zwa ndeme ngayo, ri fanela u ḓivha phindulo dza mbudziso tharu. Bivhili i ri mini nga ha u lovhedzwa? Ndi maga afhio ane  muthu a fanela u a dzhia musi a sa athu u lovhedzwa? Ndi ngani Mukriste a tshi fanela u dzula a tshi humbula nga ha nḓila ine ndovhedzo ya vha ya ndeme ngayo musi a tshi khou gudisa ṅwana wawe kana vhaṅwe vhane a guda navho Bivhili?

ZWINE BIVHILI YA ZWI FUNZA NGA HA NDOVHEDZO

6, 7. (a) Ṱalutshedzani zwine ndovhedzo ya Yohane ya amba zwone. (b) Ndi ifhio ndovhedzo yo khetheaho ye ya itwa nga Yohane?

6 Ndovhedzo ya u thoma ye ha ambiwa nga hayo Bivhilini ndi ye ya itwa nga Yohane Mulovhedzi. (Mat. 3:1-6) Vhe vha lovhedzwa nga Yohane, vho vha vha tshi khou sumbedza khagala uri vho rembuluwa kha zwivhi zwavho zwa u sa thetshelesa Mulayo wa Mushe. Naho zwo ralo, ndovhedzo ya ndeme na i swayeaho ye Yohane mulovhedzi a i ita, yo vha i sa tshimbidzani na u rembuluwa. Yohane o vha na ndugelo yo khetheaho vhukuma ya u lovhedza Yesu Murwa wa Mudzimu o fhelelaho. (Mat. 3:13-17) Yesu o vha a si na tshivhi, nga zwenezwo, zwo vha zwi sa ṱoḓei uri a rembuluwe. (1 Pet. 2:22) U lovhedzwa hawe ho vha hu tshi sumbedza uri o ḓiimisela u ita zwine Mudzimu a zwi funa.—Vhaheb. 10:7.

7 Musi Yesu a tshee kha ḽifhasi, vhafunziwa vhawe vho vha vha tshi lovhedza. (Yoh. 3:22; 4:1, 2) U fana na ndovhedzo dze dza itwa nga Yohane, dzenedzi ndovhedzo dzo vha dzi tshi khou sumbedza uri vhathu vho rembuluwa kha zwivhi zwavho zwa u sa thetshelesa Mulayo wa Mushe. Naho zwo ralo, nga murahu ha lufu na mvuwo ya Yesu, vhe vha vha vha tshi ṱoḓa u mu tevhela vho vha vha tshi fanela uri vha lovhedzwe vhe na tshiitisi tshi sa fani na tsha vhe vha lovhedzwa misini ya Yohane.

8. (a) Ndi ndaela ifhio ye Yesu a i vhudza vhatevheli vhawe musi o no vuswa vhafuni? (b) Ṱalutshedzani uri u lovhedzwa ndi zwa ndeme lungafhani kha Mukriste.

8 Musi Yesu a tshi vuswa nga 33 C.E., o ḓivhonadza kha vhathu vha fhiraho 500, khamusi hu tshi katelwa na vhana. Khamusi hu nga vha hu kha tshenetsho tshiitea he a amba uri: “Nga zwenezwo, iyani ni ite vhathu vha tshaka dzoṱhe vhafunziwa, ni vha lovhedze dzinani ḽa Khotsi na ḽa Murwa na ḽa muya mukhethwa, ni vha funze u tevhedza zwoṱhe zwe nda ni laya.” (Mat. 28:19, 20; 1 Vhakor. 15:6) Zwi vhonala u nga vhunzhi ha vhatevheli vha Yesu vho vha vhe hone musi a tshi khou ṋea ndaela ya u ita vhafunziwa. Yesu o amba uri vhane vha ṱoḓa u vha vhafunziwa vhawe kana u hwala dzhogo yawe, vha fanela u lovhedzwa. (Mat. 11:29, 30) Muthu ane a ṱoḓa u shumela Mudzimu nga nḓila ine a i ṱanganedza, u fanela u tenda uri Yehova u shumisa Yesu u khunyeledza zwine a zwi funa. Musi o no ita nga u ralo, a nga lovhedzwa. Yeneyi ndi ndovhedzo ine Mudzimu a i ṱanganedza. Zwe zwa ṅwalwa Bivhilini zwi ṋea vhuṱanzi ha uri vhafunziwa vhaswa vha Kristo vha ḓanani ḽa u thoma ḽa miṅwaha, vho vha vha tshi pfesesa uri u lovhedzwa ndi zwa ndeme. Nahone a vho ngo lenga u lovhedzwa nga nṱhani ha zwiitisi zwi sa pfali.—Mish. 2:41; 9:18; 16:14, 15, 32, 33.

NI SONGO LENGA

9, 10. Ri nga guda mini kha ndovhedzo ya munna wa Muetiopia na ya muapostola Paulo?

9 Vhalani Mishumo 8:35, 36. Ṱhogomelani tsumbo ya muṅwe munna wa Muetiopia we a vha tshi khou vhuyelela hayani a tshi bva Yerusalema u rabela. Muruṅwa wa Yehova o ṱuṱuwedza Filipo uri a ambe na onoyo munna wa Muetiopia na u “mu ḓivhadza mafhungo maḓifha nga ha Yesu.” Munna wa Muetiopia o aravha hani? Zwe a zwi ita zwo sumbedza khagala uri u a takalela ngoho ye a i guda. Nga zwenezwo, o lovhedzwa nga u ṱavhanya nga nṱhani ha uri o vha a tshi ṱoḓa u ita zwithu u tendelana na zwine Yehova a zwi funa.

10 Tsumbo ya vhuvhili ndi ya munna wa Muyuda we a vha a tshi tovhola Vhakriste. O bebwa kha lushaka lwe lwa vha lwo ḓiṋekedzela kha  Mudzimu. Naho zwo ralo, Vhayuda vho xelelwa nga vhushaka havho ho khetheaho na Yehova. Onoyo munna o vha a tshi fhisetshela mvelele ya Vhayuda, fhedzi o guda zwiṅwe zwithu zwa khwine. Yesu Kristo we a vuswa vhafuni o amba na onoyo munna e ṱaḓulu. Onoyo munna o aravha hani? O tenda u thusiwa nga Anania mufunziwa wa Mukriste. Bivhili i ri vhudza zwi tevhelaho nga ha onoyo munna: “A takuwa a lovhedzwa.” (Mish. 9:17, 18; Vhagal. 1:14) A zwi timatimisi uri ni a zwi ḓivha uri onoyo munna wa Muyuda ndi muapostola Paulo. Fhedzi humbulani uri Paulo o ṱavhanya a dzhia vhukando musi a tshi ḓivha uri Yehova u shumisa Yesu u itela u khunyeledza zwine a zwi funa. O lovhedzwa nga u ṱavhanya.—Vhalani Mishumo 22:12-16.

11. (a) Ndi mini zwine zwa ṱuṱuwedza vhagudiswa vha Bivhili uri vha lovhedzwe ṋamusi? (b) Ri ḓipfa hani musi vhaṅwe vha tshi lovhedzwa?

11 Zwo tou ralo na kha vhagudiswa vha Bivhili ṋamusi, hu sa londwi uri ndi vhaṱuku kana ndi vhahulwane. Vhane vha vha na lutendo na u dzhiela nṱha ngoho i re Bivhilini, vha lwa nga nungo dzoṱhe uri vha ḓiṋekedzele na u lovhedzwa. Nyambo ya ndovhedzo i vha tshiitea tsho khetheaho mabuthanoni na maguvhanganoni tshifhinga tshoṱhe. Ṱhanzi dza Yehova vha a takala musi vhagudiswa vha Bivhili vha tshi ṱanganedza ngoho na u ita mvelaphanḓa u swika vha tshi lovhedzwa. Vhabebi vha Vhakriste vha a takala vhukuma musi vha tshi vhona vhana vhavho na vhone vhe vhukati ha vhaṅwe vhane vha khou ya u lovhedzwa. Nga ṅwaha wa tshumelo wa 2017, vhathu vha fhiraho 284 000, vhane vha vha na “mavhonele o teaho,” vho sumbedza uri vho ḓiṋekedzela kha Yehova nga u lovhedzwa. (Mish. 13:48) Zwi tou vha khagala uri vhenevho vhafunziwa vhaswa vha a pfesesa uri ndi zwa ndeme uri Mukriste a lovhedzwe. Ndi maga afhio e vha a dzhia uri vha lovhedzwe?

12. Mugudiswa wa Bivhili u fanela u ita mini musi a sa athu u lovhedzwa?

12 Musi mugudiswa a sa athu u lovhedzwa, u fanela u ḓivha ngoho nga ha Mudzimu na u vha na lutendo khae, a ḓivhe na tshipikwa tsha Mudzimu nga ha vhathu na nga ha ḽifhasi na zwe a zwi ita u itela u tshidza vhathu. (1 Tim. 2:3-6) Lwonolwo lutendo lu ita uri mugudiswa a iledze vhuḓifari vhune ha sinyusa Yehova Mudzimu na u tshila u tendelana na milayo yawe. (Mish. 3:19) Zwi a pfesesea uri muthu a nga si ḓiṋekedzele kha Mudzimu ngeno a tshi ḓifara nga nḓila ine Mudzimu a si i takalele. (1 Vhakor. 6:9, 10) Fhedzi hu ṱoḓea zwo engedzeaho u fhira u sokou thetshelesa milayo ya Yehova ya vhuḓifari. Muthu ane a ṱoḓa u ita zwo lugaho, u ḓo vha hone miṱanganoni ya tshivhidzo na u shela mulenzhe kha mushumo wa u huwelela na wa u ita vhafunziwa. Yesu o amba uri wonoyu mushumo u ḓo itwa nga vhafunziwa vhawe vha ngoho. (Mish. 1:8) Musi mufunziwa muswa o no dzhia eneo maga, u ḓo ḓiṋekedzela kha Yehova nga thabelo tshiphirini nahone nga murahu a zwi sumbedza khagala nga u lovhedzwa.

TSHIPIKWA TSHA VHAGUDISWA VHA BIVHILI

Naa ni dzula ni tshi humbula uri ndovhedzo ndi ya ndeme lungafhani na u vhudza mugudiswa waṋu nga hazwo? (Sedzani phara 13)

13. Ndi ngani vhagudisi vha Bivhili vha tshi fanela u dzula vha tshi humbula uri ndi zwa ndeme uri Mukriste a lovhedzwe?

13 Musi ri tshi khou guda na vhana vhashu na vhaṅwe vhane ra guda navho Bivhili, ri fanela u humbula uri vhane vha ṱoḓa u vha vhafunziwa vha Yesu vha vhukuma vha fanela u lovhedzwa. Arali ra dzula ri tshi humbula nga ha zwenezwo, ri ḓo kona u vha humbudza nga hazwo. A ri nga litshi u amba navho musi zwo tea nga ha nḓila ine u ḓiṋekedzela na u lovhedzwa zwa vha zwa ndeme ngayo. Ndi ngoho uri ri ṱoḓa vha tshi ita mvelaphanḓa u swika vha tshi lovhedzwa!

14. Ndi ngani ri songo fanela u kombetshedza muthu uri a lovhedzwe?

14 Ndi ngoho uri a huna muthu ane a tea u pfa u nga u khou kombetshedzwa nga mubebi, mugudisi  wa Bivhili kana muṅwe muthu tshivhidzoni uri a lovhedzwe. Yeneyo a si nḓila ine Yehova a ita ngayo zwithu. (1 Yoh. 4:8) Musi ri tshi vha funza, ri fanela u ombedzela uri ndi zwa ndeme u vha na vhushaka ho khwaṱhaho na Mudzimu. Mugudiswa wa Bivhili u ḓo lovhedzwa nga nṱhani ha uri u dzhiela nṱha ngoho ye a i guda nga ha Mudzimu na u ṱoḓa u ita zwine Vhakriste vha ngoho vha fanela u zwi ita.—2 Vhakor. 5:14, 15.

15, 16. (a) Naa hu na miṅwaha yo vhewaho ine muthu a fanela u lovhedzwa e nayo? Ṱalutshedzani. (b) Ndi ngani mugudiswa wa Bivhili a tshi fanela u lovhedzwa sa muṅwe wa Ṱhanzi dza Yehova naho o no lovhedzwa kha vhuṅwe vhurereli?

15 A huna miṅwaha yo vhewaho ine muthu a fanela u lovhedzwa e nayo. Vhagudiswa vho fhambana nahone a vha iti mvelaphanḓa nga nḓila i fanaho. Vhanzhi vha lovhedzwa vha tshee vhaṱuku nahone vha bvela phanḓa vha tshi fulufhedzea kha Yehova. Vhaṅwe vha guda ngoho i re Bivhilini na u lovhedzwa musi vho no vha vhalala. Vhaṅwe vhe na miṅwaha i fhiraho 100!

16 Muṅwe mugudiswa wa Bivhili o no vhaho mulala o vhudzisa mugudisi wawe arali zwo tea uri a dovhe a lovhedzwe samusi o no lovhedzwa kha vhurereli ho fhamba-fhambanaho miṅwahani yo fhiraho. Onoyo mugudisi na mugudiswa wawe, vho ṱolisisa maṅwalo a bvaho Bivhilini u itela u fhindula yeneyo mbudziso. Onoyo mugudiswa o lovhedzwa musi o no pfesesa zwine Bivhili ya zwi amba nga ha ndovhedzo. Naho o vha o no vha tsini na u swikisa miṅwaha ya 80, o vhona zwi zwa ndeme uri a lovhedzwe. Musi muthu a sa athu u lovhedzwa, u fanela u thoma a ḓivha nga vhuḓalo zwine Yehova a zwi funa. Ndi ngazwo vhafunziwa vhaswa vha tshi fanela u lovhedzwa naho vho no lovhedzwa kha vhuṅwe vhurereli.—Vhalani Mishumo 19:3-5.

17. Ndi mini zwine ra fanela u zwi humbulisisa nga ḓuvha ḽa ndovhedzo?

17 Ḓuvha ḽa ndovhedzo ndi ḓuvha ḽi takadzaho vhukuma. Ḽi dovha ḽa vha ḓuvha ḽa u humbulisisa nga ha zwine u ḓiṋekedzela na u lovhedzwa zwa amba zwone. U tshila u tendelana na u ḓiṋekedzela haṋu zwi ṱoḓa vhuḓidini. Ndi ngazwo Yesu o vhambedza u vha mufunziwa wa Mukriste na dzhogo. Vhafunziwa vha Yesu a vha “tsha ḓitshilela, fhedzi vha [tshilela] we a vha fela nahone a vuswa.”—2 Vhakor. 5:15; Mat. 16:24.

18. Ndi mbudziso dzifhio dzine ra ḓo dzi haseledza kha thero i tevhelaho?

18 Samusi ro zwi guda kha ino thero, phetho ya u vha Mukriste wa ngoho ndi ya ndeme. Ndi ngazwo mme a Maria vho ḓivhudzisa mbudziso dzi re mathomoni a ino thero. Arali ni mubebi, ni nga vha no no ḓivhudzisa uri: ‘Naa ṅwana wanga o no lugela u lovhedzwa? Naa u a ḓivha Mudzimu nga vhuḓalo lune a nga ḓiṋekedzela? Hu pfi mini nga zwipikwa zwawe zwa pfunzo na zwa mushumo wa u ḓitshidza? Hu pfi mini arali ṅwana wanga a lovhedzwa nahone a ita tshivhi tshihulwane?’ Kha thero i tevhelaho, ri ḓo haseledza nga ha dzenedzi mbudziso na nḓila ine vhabebi vha Vhakriste vha nga vha ngayo na mavhonele o linganyiselwaho nga ha ndovhedzo.