Pfukelani kha mafhungo

Pfukelani kha zwi re ngomu

 THERO I GUDWAHO 24

Hanedzani Mihumbulo Ine Ya Lwisana Na Zwine Mudzimu A Funza!

Hanedzani Mihumbulo Ine Ya Lwisana Na Zwine Mudzimu A Funza!

“Ri khou hanedza mihumbulo ya mazwifhi na zwithithisi zwoṱhe zwine zwa thivhela nḓivho ya Mudzimu.”—2 VHAKOR. 10:5.

LUIMBO 124 U Fulufhedzea Misi Yoṱhe

MANWELEDZO *

1. Ndi tsivhudzo ifhio ye Paulo a ṅwalela Vhakriste vho ḓodzwaho?

“NI SONGO edzisa nḓila dza ano maitele a zwithu.” (Vharoma 12:2) Paulo o ṅwalela Vhakriste vha ḓanani ḽa u thoma eneo maipfi. Ndi ngani o ṋea yeneyi tsivhudzo yo livhaho vhashumeli vha Mudzimu vho ḓiṋekedzaho, vho ḓodzwaho nga muya mukhethwa?—Vharoma 1:7.

2-3. Sathane u lingedza hani u ita uri ri shandukele Yehova, fhedzi ri nga tupula hani “pfunzo dza mazwifhi” dzo goḓombelaho mihumbuloni yashu?

2 Paulo o vha a tshi khou vhilaedziswa ngauri vhaṅwe Vhakriste vho vha vha tshi khou ṱuṱuwedzwa nga mahumbulele a shango ḽa Sathane. (Vhaef. 4:17-19) Zwenezwo zwi nga itea kha muṅwe na muṅwe washu. Sathane, mudzimu wa ḽino shango u shumisa vhukwila ho fhambanaho u itela u lingedza u ri ita uri ri shandukele Yehova. Sa tsumbo, arali ri tshi ṱoḓa u vha vhathu vha ndeme kana vha re na bvumo, Sathane u shumisa zwenezwo u itela u ri sendedza kule na Yehova. A nga dovha a lingedza u shumisa zwithu zwe ra zwi guda hayani, tshikoloni na kha vhathu vhe vha ri tanga u itela uri ri humbule nga nḓila ine a humbula ngayo.

3 Naa zwi a konadzea u tupula “pfunzo dza mazwifhi” dzo goḓombelaho mihumbuloni yashu? (2 Vhakor. 10:4) Paulo o fhindula a ri: “Ri khou hanedza mihumbulo ya mazwifhi na zwithithisi zwoṱhe zwine zwa thivhela nḓivho ya Mudzimu, na u kunda mihumbulo yoṱhe uri i pfe Kristo.” (2 Vhakor. 10:5) Nga  thuso ya Yehova, ri nga kunda mahumbulele o khakheaho. Samusi mushonga u tshi nga fhelisa maanḓa a mulimo, nga hu fanaho, Ipfi ḽa Mudzimu ḽi nga ri thusa uri ri si ṱuṱuwedzwe nga shango ḽa Sathane.

“SHANDULANI NḒILA INE NA HUMBULA NGAYO”

4. Ndi tshanduko dzifhio dze vhunzhi hashu ra tea u dzi ita musi ri tshi ṱanganedza ngoho?

4 Humbulani nga ha tshanduko dze na tea u dzi ita musi ni tshi ṱanganedza ngoho i re Bivhilini na u dzhia phetho ya u shumela Yehova. Kha vhunzhi hashu, zwo vha zwi tshi katela u litsha vhuḓifari vhu si havhuḓi. (1 Vhakor. 6:9-11) Ri livhuwa Yehova nge a ri thusa u litsha zwenezwo zwivhi!

5. Ndi zwifhio zwithu zwivhili zwine Vharoma 12:2 ya ri ri fanela u zwi ita?

5 Naho zwo ralo, a ro ngo tea u humbula uri a ri tsha tea u ita tshanduko. Naho ri si tsha ita zwivhi zwihulwane zwe ra vha ri tshi zwi ita musi ri sa athu lovhedzwa, ri fanela u lwa nga nungo dzoṱhe uri ri iledze naho tshi tshini tshine tsha nga ita uri ri dovhe ri zwi ite. Ri nga zwi ita hani? Paulo o ri: “Ni songo edzisa nḓila dza ano maitele a zwithu, shandulani nḓila ine na humbula ngayo.” (Vharoma 12:2) Nga zwenezwo, ri fanela u ita zwithu zwivhili. Tsha u thoma, ri “songo edzisa” kana u ṱuṱuwedzwa nga ḽino shango. Tsha vhuvhili, ri fanela u ‘shandula’ nḓila ine ra humbula ngayo.

6. Ri guda mini kha maipfi a Yesu a re kha Mateo 12:43-45?

6 U shanduka he Paulo a hu amba a si u shanduka ha mbonalo yashu. Hu kwama masia oṱhe a vhutshilo hashu. (Sedzani bogisi “ Naa No Shanduka Zwa Vhukuma Kana Ni Ḓiita U Nga No Shanduka?”) Ri fanela u shandula nḓila ine ra humbula ngayo nga ho fhelelaho, zwine zwa katela nḓila ine ra ita ngayo zwithu, nḓila ine ra ḓipfa ngayo na zwine ra zwi tama. Nga zwenezwo, roṱhe ri fanela u ḓivhudzisa uri, ‘Naa tshanduko dzine  nda khou dzi ita dzi kwama nḓila ine vhathu vha mmbona ngayo fhedzi kana naa ndi khou ita tshanduko mbiluni na muhumbuloni wanga?’ Maipfi a Yesu a re kha Mateo 12:43-45 a sumbedza zwine ra fanela u zwi ita. (Vhalani.) Eneo maipfi a ri funza ngudo ya ndeme: Ri fanela u bvisa mahumbulele a songo teaho mihumbuloni yashu nahone ri humbule zwine Mudzimu a zwi ṱanganedza.

‘ITWANI VHASWA KHA NḒILA INE NA HUMBULA NGAYO’

7. Ri nga shandula hani zwine ra vha zwone nga ngomu?

7 Naa zwi a konadzea u shandula nḓila ine ra humbula ngayo kana zwine ra vha zwone nga ngomu? Ipfi ḽa Mudzimu ḽi ri: “Ni fanela u bvela phanḓa ni tshi itwa vhaswa maanḓani aṋu ane a ṱuṱuwedza muhumbulo, nahone ni fanela u ambara vhumuthu vhuswa he ha sikwa u ya nga zwine Mudzimu a zwi funa, zwi tshi bva kha u luga ha ngoho na u fulufhedzea.” (Vhaef. 4:23, 24) Nga zwenezwo, zwi a konadzea u shandula zwine ra vha zwone nga ngomu, fhedzi a zwo ngo leluwa. Ri fanela u ita zwi fhiraho u iledza lutamo lu si lwavhuḓi na u ita zwithu zwi si zwavhuḓi. Ri fanela u shandula “muhumbulo” washu. Zwenezwo zwi katela u shandula zwine ra zwi tama, vhuḓifari hashu na zwiṱuṱuwedzi zwashu. Zwi ṱoḓa uri ri bvele phanḓa ri tshi ita vhuḓidini.

8-9. Tshenzhelo ya wahashu i sumbedza hani uri ndi zwa ndeme u shandula zwine ra vha zwone nga ngomu?

8 Kha ri haseledze tsumbo ya wahashu we a vha a tshi funa dzinndwa. Nga murahu ha u litsha u nwa na dzinndwa, o fanelea uri a lovhedzwe nahone zwenezwo zwo ṋea vhuṱanzi havhuḓi kha vhathu vha vhuponi ha hawe. Fhedzi nga murahu ha tshifhinganyana o lovhedzwa, nga vhuṅwe vhusiku o lingwa nga nḓila ye a vha a songo i lavhelela. Muṅwe munna we a vha o vhu shela mavhendeni o ya muḓini wawe a tshi khou ṱoḓa u lwa nae. U thomani onoyo wahashu o hana u lwa. Fhedzi onoyo munna o amba luvhi nga ha dzina ḽa Yehova nahone zwa ita uri wahashu a sinyuwe lwe a balelwa u langa mbiti dzawe. Wahashu o bvela nnḓa nahone a rwa onoyo munna. Ndi ngani o ita zwenezwo? Naho Bivhili yo mu thusa uri a litshe u funa dzinndwa, o vha a sa athu shandula nḓila ine a humbula ngayo. Nga maṅwe maipfi, o vha a songo shandula zwine a vha zwone nga ngomu.

9 Fhedzi onoyo wahashu ho ngo kulea nungo. (Mir. 24:16) A tshi thuswa nga vhahulwane, o bvela phanḓa a tshi ita tshanduko. Nga murahu o fanelea u vha muhulwane. Vhuṅwe vhusiku, musi e nnḓa ha Holo Ya Ṱhanzi Dza Yehova o sedzana na mulingo u fanaho na we a sedzana nawo miṅwahani yo fhelaho. Muṅwe munna we a vha o vhu shela mavhendeni o vha a tshi khou ṱoḓa u rwa muṅwe wa vhahulwane. Wahashu o ita mini? O amba na onoyo munna nga u ḓiṱukufhadza nahone o dzika. A ita uri onoyo munna a dzike nahone a mu thusa uri a ye hayani. Ho vha ho shanduka mini? Wahashu o vha o shandula nḓila ine a humbula ngayo. O vha o no shandula zwine a vha zwone nga ngomu, o no vha muthu wa mulalo, ane a ḓiṱukufhadza nahone zwenezwo zwo rendisa Yehova.

10. Ri fanela u ita mini u itela u shandula zwine ra vha zwone nga ngomu?

10 Dzenedzi tshanduko a dzi sokou itea. Ri nga tea u ita “vhuḓidini hoṱhe” nahone lwa miṅwaha minzhi. (2 Pet. 1:5) Dzenedzi tshanduko a dzi sokou itea nga nṱhani ha uri ri na tshifhinga tshilapfu ri tshi khou shumela Yehova. Ri fanela u ita zwoṱhe zwi re maanḓani ashu u itela u shandula zwine ra vha zwone nga ngomu. Hu na zwithu zwa ndeme zwine zwa ḓo ri thusa u ita yeneyo tshanduko. Kha ri haseledze zwiṅwe zwazwo.

 RI NGA SHANDULA HANI NḒILA INE RA HUMBULA NGAYO?

11. Thabelo i ri thusa hani uri ri shandule nḓila ine ra humbula ngayo?

11 Thabelo ndi tshithu tsha u thoma tsha ndeme tshine ra fanela u tshi ita. Ri fanela u rabela u fana na mupsalme we a ri: “Ntsikele mbilu yo ṱambaho, U mphe muya muswa wo khwaṱhaho.” (Ps. 51:10) Ri fanela u tenda uri ri tea u shandula nḓila ine ra humbula ngayo nahone ri humbele Yehova uri a ri thuse. Ri nga vha hani na vhungoho ha uri Yehova u ḓo ri thusa u ita tshanduko? Ri nga ṱuṱuwedzwa nga zwe Yehova a fhulufhedzisa Vhaisiraele vha tshifhingani tsha Hesekiele vha re na tshikhuna, o ri: “Ndi ḓo vha ṋea mbilu iṅwe na muya muswa; mbilu ya tombo ndi ḓo i bvisa khanani dzavho, nda vha ṋea mbilu ya ṋama [ine ya tevhedza nyeletshedzo dza Mudzimu].” (Hesek. 11:19) Yehova o vha o ḓiimisela u thusa Vhaisiraele uri vha ite tshanduko nahone na riṋe o ḓiimisela u ri thusa.

12-13. (a) U ya nga Psalme ya 119:59, ndi mini zwine ra fanela u elekanya nga hazwo? (b) Ndi mbudziso dzifhio dzine na fanela u ḓivhudzisa dzone?

12 U elekanya ndi tshithu tsha vhuvhili tsha ndeme. Musi ri tshi vhala Ipfi ḽa Mudzimu ḓuvha na ḓuvha, ri fanela u ḓiṋea tshifhinga tsha u elekanya na u humbulisisa nga ha nḓila ine ra nga shandula ngayo zwine ra zwi humbula na nḓila ine ra ḓipfa ngayo. (Vhalani Psalme ya 119:59; Vhaheb. 4:12; Yak. 1:25) Ri fanela u sedza arali nḓila ine ra humbula na u ḓipfa ngayo i tshi ṱuṱuwedzwa nga mahumbulele a shango. Ri fanela u ḓivha uri vhushayanungo hashu ndi vhufhio nahone ri lwe nga nungo dzoṱhe u itela u vhu kunda.

13 Sa tsumbo, ḓivhudziseni uri: ‘Naa ndi khou thoma u vha na vivho?’ (1 Pet. 2:1) ‘Naa ndi ḓipfa ndi wa ndeme u fhira vhaṅwe nga nṱhani ha hune nda bva hone, pfunzo ine nda vha nayo kana tshelede ine nda vha nayo?’ (Mir. 16:5) ‘Naa ndi dzhiela fhasi vhathu vha si na zwine nda vha nazwo kana vha re na muvhala wa lukanda wo fhambanaho na wanga?’ (Yak. 2:2-4) ‘Naa ndi a kungea nga zwine shango ḽa Sathane ḽa nga nṋea zwone?’ (1 Yoh. 2:15-17) ‘Naa ndi takalela vhuḓimvumvusi vhune ha vha na u ḓifara luvhi na vhuvemu?’ (Ps. 97:10; 101:3; Amosi 5:15) Phindulo dza dzenedzi mbudziso dzi nga ni sumbedza hune na fanela u shumela hone. Arali ra kona u tupula zwenezwi zwithu zwine zwa nga vha zwo ṱoka midzi mbiluni dzashu, ri ḓo takadza Khotsi ashu wa ṱaḓulu.—Ps. 19:14.

14. Ndi ngani zwi zwa ndeme u khetha khonani dzavhuḓi?

14 U khetha khonani dzavhuḓi ndi tshithu tsha vhuraru tsha ndeme. Vhane ra konana navho vha ṱuṱuwedza zwine ra zwi ita. (Mir. 13:20) Musi ri mushumoni kana tshikoloni, kanzhi ri vha ro tangwa nga vhathu vhane vha sa ri thuse u humbula nga nḓila ine Mudzimu a humbula ngayo. Fhedzi khonani dza khwinesa dzine ra nga vha nadzo, ndi dzine ra dzi wana miṱanganoni ya Vhukriste. Musi ri miṱanganoni ri ṱuṱuwedzwa uri ri ‘funane na u ita mishumo mivhuya.’—Vhaheb. 10:24, 25.

‘KHWAṰHANI LUTENDONI’

15-16. Sathane u lingedza hani u shandula nḓila ine ra humbula ngayo?

15 Ni songo hangwa uri Sathane o ḓiimisela u shandula nḓila ine ra humbula ngayo. U shumisa pfunzo dzo fhambanaho u itela u tshinya nḓila yavhuḓi ye Ipfi ḽa Mudzimu ḽa ita uri ri humbule ngayo.

16 Sathane u kha ḓi vhudzisa mbudziso ye a vhudzisa Eva tsimuni ya Edeni, ine ya ri: “Nangoho Mudzimu o amba a ri . . . ?” (Gen. 3:1) Kha ḽino shango ḽine ḽa khou vhuswa nga Sathane, ri pfa mbudziso dzine dza ita uri ri timatime zwine ra tenda khazwo, mbudziso dzi ngaho: ‘Nangoho Mudzimu ha ṱanganedzi mbingano ya vhathu vha mbeu nthihi?  Nangoho Mudzimu ha ṱoḓi ni tshi pembelela Khirisimusi na maḓuvha a mabebo? Nangoho Mudzimu waṋu ha ṱoḓi ni tshi shelwa malofha? Nangoho Mudzimu wa lufuno ha ṱoḓi ni tshi konana na vhathu vhane na vha funa vho bviswaho tshivhidzoni?’

17. Ri fanela u ita mini musi ri tshi vhudziswa mbudziso dzine dza nga ita uri ri timatime zwine ra tenda khazwo nahone u ya nga Vhakolosa 2:6, 7 hu nga vha na mvelelo dzifhio?

17 Ri fanela u vha na vhungoho ha zwine ra tenda khazwo. Arali ra sa wana phindulo dza mbudziso dzine dza kwama zwine ra tenda, zwi nga ita uri ri timatime. U timatima zwi nga fhedza zwo shandula nḓila ine ra humbula ngayo nahone zwa fhelisa lutendo lwashu. Fhedzi ndi mini zwine ra fanela u zwi ita? Bivhili i ri vhudza uri ri shandule nḓila ine ra humbula ngayo uri ri kone u ṱalukanya zwine “Mudzimu a zwi funa, zwine zwa vha zwavhuḓi, zwo fhelelaho na zwine zwa mu takadza.” (Vharoma 12:2) Ri nga kona u ṱalukanya ngoho i re Bivhilini nga u guda misi yoṱhe. Ri nga vha na vhungoho ha uri zwine Mudzimu a amba zwi a vhuyedza. Nahone u fana na muri u re na midzi yo khwaṱhaho, ri ḓo vha vho ṱokaho midzi na u “khwaṱha lutendoni.”—Vhalani Vhakolosa 2:6, 7.

18. Ndi mini zwine zwa ḓo ri thusa uri ri ḓitsireledze kha ṱhuṱhuwedzo mmbi dza shango ḽa Sathane?

18 A hu na muthu ane a nga ita uri lutendo lwaṋu lu khwaṱhe, nga zwenezwo, bvelani phanḓa ni tshi shandula nḓila ine na humbula ngayo. Rabelani tshifhinga tshoṱhe, ni humbele Yehova uri a ni thuse nga muya wawe. Elekanyani, ni bvele phanḓa ni tshi ṱolisisa mahumbulele na zwiṱuṱuwedzi zwaṋu. Khethani khonani dzavhuḓi, ni vhe vhukati ha vhathu vhane vha ḓo ni thusa u shandula nḓila ine na humbula ngayo. Musi ni tshi ita zwenezwo, ni ḓo ḓitsireledza kha ṱhuṱhuwedzo mmbi ya shango ḽa Sathane nahone ni ḓo hanedza nga hu bvelelaho “mihumbulo ya mazwifhi na zwithithisi zwoṱhe zwine zwa thivhela nḓivho ya Mudzimu.”—2 Vhakor. 10:5.

LUIMBO 50 Thabelo Yanga Ya U Ḓiṋekedza

^ phar. 5 Nḓila ine ra humbula ngayo i ṱuṱuwedzwa nga zwe ra zwi tshenzhela, mvelele yashu na nga pfunzo ine ra vha nayo. Ri nga wana uri ri na mahumbulele a si avhuḓi ane ra khou kundelwa u a kunda. Ino thero i ḓo ri sumbedza uri ri nga kunda hani mahumbulele a si avhuḓi ane ra nga vha ri nao.