Pfukelani kha mafhungo

Pfukelani kha zwi re ngomu

‘Tshedza Tshaṋu Kha Tshi Vhonetshele’ U Itela Uri Ni Ṋee Yehova Vhugala

‘Tshedza Tshaṋu Kha Tshi Vhonetshele’ U Itela Uri Ni Ṋee Yehova Vhugala

“Tshaṋu tshedza kha tshi vhonetshele vhathu . . . uri vha ṋee Khotsi aṋu wa ṱaḓulu vhugala.”—MAT. 5:16.

NYIMBO: 77, 59

1. Ndi mini zwine zwa ita uri ri takale?

ZWI a ri takadza vhukuma musi ri tshi pfa nga ha nyengedzeo ine ya khou vha hone kha vhathu vha Yehova! Ṅwaha wo fhiraho ho farwa pfunzo dza Bivhili dzi fhiraho 10 000 000. Hezwi zwi ṋea vhuṱanzi ha uri vhashumeli vha Mudzimu vha khou ita uri tshedza tshavho tshi vhonetshele! Humbulani nga ha vhathu vha dzimiḽioni vhe ra vha ṱanganedza Tshihumbudzoni. Vho guda nga ha lufuno lwe Mudzimu a lu sumbedza musi a tshi ri ṋea tshifhiwa tsha tshirengululi.—1 Yoh. 4:9.

2, 3. (a) Ndi mini zwine zwa si kone u ri thivhela uri ri ‘vhonetshele sa maḓenzhe’? (b) Ri ḓo ṱolisisa mini kha ino thero?

2 Vhathu vha Yehova u mona na shango ḽoṱhe vha amba nyambo dzo fhamba-fhambanaho. Fhedzi zwenezwi a zwi ri thivheli uri ri rende Khotsi ashu Yehova nga vhuthihi. (Nzumb. 7:9) Hu sa londwi luambo lune ra lu amba kana hune ra dzula hone, ri nga vhonetshela “sa maḓenzhe shangoni.”—Vhafil. 2:15.

3 Nyengedzeo ine ra i vhona, vhuthihi vhune ra ḓiphina ngaho na u  dzula ro fhaṱuwa, zwi shela mulenzhe kha u ṋea Yehova vhugala. Kha ino thero, ri ḓo ṱolisisa nḓila ine zwenezwo ra zwi khunyeledza ngayo.—Vhalani Mateo 5:14-16.

THUSANI VHAṄWE URI VHA SHUMELE YEHOVA

4, 5. (a) Nga nnḓa ha u huwelela, ri nga ita hani uri tshedza tshashu tshi vhonetshele? (b) U vha na vhuthu zwi nga ita uri hu vhe na mbuyelo dzifhio? (Sedzani tshifanyiso tsha u thoma.)

4 Nga 1925, thero ine ya ri “Light in the Darkness,” yo amba uri a huna muthu ane a nga fulufhedzea kha Murena arali a songo shumisa “tshibuli tsha u ita uri tshedza tshawe tshi vhonetshele.” Yo dovha ya ri: “Muthu u ita uri tshedza tshawe tshi vhonetshele nga u vhudza vhathu mafhungo maḓifha ḽifhasini ḽoṱhe na u tshila u tendelana na zwilinganyo zwa Yehova.” (The Watch Tower, June 1, 1925) Zwi tou vha khagala uri ri ita uri tshedza tshashu tshi vhonetshele nga u huwelela mafhungo maḓifha na u ita vhafunziwa. (Mat. 28:19, 20) Zwiṅwe hafhu, nḓila ine ra ḓifara ngayo sa Vhakriste i ṋea Yehova vhugala. Vhathu vhane ra huwelela khavho na vhane vha ri vhona ri tshi khou huwelela, vha sedza nḓila ine ra ḓifara ngayo. Musi ri tshi ṅweṅwela na u vha lumelisa zwavhuḓi, zwi ita uri vha vhe na mavhonele avhuḓi nga ha riṋe na Mudzimu ane ra mu shumela.

5 Yesu o vhudza vhafunziwa vhawe a ri: “Ni tshi dzhena nḓuni, ni lumelise vhaṋe vha nnḓu.” (Mat. 10:12) Kanzhi fhethu he Yesu na vhaapostola vhawe vha vha vha tshi huwelela hone, vhathu vho vha vha sa ṱanganedzi vhathu vha sa vha ḓivhi miḓini yavho. A zwo ngo tou ralo fhethu hunzhi ṋamusi. Musi vhathu vha tshi vhona muthu ane vha si mu ḓivhe, vha mbo ḓi tshuwa kana vha dinalea. Fhedzi ri nga vha ita uri vha ḓipfe vho vhofholowa arali ra ṅweṅwela na u amba navho zwavhuḓi. U ṅweṅwela ndi nḓila yavhuḓi ya u thoma nyambedzano. Musi ni tshi khou huwelela fhethu ha vhomuthumunzhi ni tshi shumisa tshigariki, naa no no zwi ṱhogomela uri vhathu vhanzhi vha aravha nga nḓila yavhuḓi musi ni tshi ṅweṅwela na u vha lumelisa zwavhuḓi? Zwi nga ita uri vha ḓe kha riṋe nahone vha dzhie khandiso dzashu. U vha haṋu na vhuthu zwi nga dovha zwa ni thusa uri ni kone u thoma nyambedzano.

6. Vhaṅwe vhavhingani vhane vha vha vhalala vho ita hani zwo engedzeaho vhuḓinḓani?

6 Vhaṅwe vhavhingani vhane vha vha vhalala vhane vha dzula ngei England, a vha tsha kona u ya u huwelela nnḓu nga nnḓu nga nṱhani ha thaidzo dza mutakalo. Nga zwenezwo, vha vhea ṱafula ine ya vha na khandiso nnḓa ha muḓi wavho. Vha vhea dzenedzo khandiso nga tshifhinga tshine vhabebi vha ya ngatsho u dzhia vhana vhavho tshikoloni tshi re tsini na muḓi wavho. Vhunzhi ha vhabebi vha dzhia dzenedzo khandiso u katela na bugu Mbudziso Dzine Vhaswa Vha Dzi VhudzisaPhindulo Dzi Shumaho, Volumu 1 na 2. Wahashu wa tshifumakadzini ane a vha muvulanḓila tshivhidzoni tshavho, u ṱanganela navho kha yeneyi nḓila ya u huwelela. Vhuthu ha onoyo wahashu na vhuḓidini vhune vhenevho vhavhingani vha vhu ita, zwo ita uri muṅwe mubebi a tende u guda navho Bivhili.

7. Ni nga thusa hani vhathu vha hune na dzula hone vhane vha bva kha maṅwe mashango?

7 Miṅwahani yo fhiraho, vhathu vhanzhi vho pfulutshela kha maṅwe mashango. Ni nga thusa hani vhenevho vhathu uri vha gude nga ha Yehova? Ndi ngani ni sa thomi nga u guda nḓila ine ha lumeliswa ngayo nga nyambo dzine vhenevho vhathu vha dzi amba? JW Language app i nga ni thusa u ita zwenezwo. Ndi ngani ni sa gudi maipfi mavhili mararu ane a nga ita uri vha ṱoḓe u amba na inwi? Nga murahu ha zwenezwo, ni nga vha sumbedza website yashu ya jw.org, vidio na khandiso dzo fhamba-fhambanaho dzine dza wanala nga luambo lwavho.—Doit. 10:19.

8, 9. (a) Ndi ifhio nyeletshedzo i shumaho ine ra i wana kha miṱangano yashu ya vhukati ha vhege? (b) Vhabebi vha nga thusa hani vhana vhavho uri vha shele mulenzhe miṱanganoni?

8 Yehova o ita ndugiselelo ya Muṱangano Wa  Vhutshilo Na Vhuḓinḓa u itela uri ri kone u huwelela nga nḓila i bvelelaho. Nyeletshedzo i shumaho ine ra i wana kha yeneyi miṱangano i ri thusa uri ri kone u ita nyendo dza u vhuyelela na u fara pfunzo dza Bivhili.

9 Vhunzhi ha vhathu vhane vha ḓa miṱanganoni yashu lwa u tou thoma vha ṱhogomela nḓila ine vhana vha fhindula ngayo. Vhabebi, thusani vhana vhaṋu uri vha ite uri tshedza tshavho tshi vhonetshele nga u vha gudisa uri vha fhindule nga maipfi avho. Phindulo dzavho dzi bvaho mbiluni dzo ita uri vhaṅwe vha ṱanganedze ngoho.—1 Vhakor. 14:25.

IVHANI NA VHUTHIHI

10. Vhurabeli ha muṱa vhu nga ita hani uri hu vhe na vhuthihi?

10 Iṅwe nḓila ine na nga ita ngayo uri tshedza tshaṋu tshi vhonetshele, ndi nga u vha na vhuthihi muṱani waṋu na tshivhidzoni. Iṅwe nḓila ine vhabebi vha nga ita ngayo zwenezwo, ndi nga u vha na Vhurabeli ha Muṱa tshifhinga tshoṱhe. Vhaṅwe vha dzudzanya u ṱalela JW Broadcasting ṅwedzi muṅwe na muṅwe. Nga murahu ha u i ṱalela, ndi ngani ni sa haseledzi nḓila ine na nga shumisa ngayo zwe na zwi guda? Musi mubebi o fara vhurabeli ha muṱa, u fanela u humbula uri nḓila ine a ḓo gudisa ngayo ṅwana muṱuku a i fani na nḓila ine a ḓo gudisa ngayo muswa. Itani zwoṱhe zwi re maanḓani aṋu u itela uri muṅwe na muṅwe muṱani a vhuyelwe.—Ps. 148:12, 13.

U konana na vhaaluwa zwi ita uri ri gude zwithu zwinzhi (Sedzani phara 11)

11-13. Vhathu vhoṱhe vha nga ita hani uri hu vhe na vhuthihi tshivhidzoni na u thusa vhaṅwe uri vha ite uri tshedza tshavho tshi vhonetshele?

11 Vhaswa vha nga ita hani uri hu vhe na vhuthihi tshivhidzoni na u ṱuṱuwedza vhaṅwe uri vha ite uri tshedza tshavho tshi vhonetshele? Arali ni muswa wa Mukriste, ndi ngani ni sa ḓivhetsheli tshipikwa tsha u konana na vhaaluwa? Ni nga vha vhudzisa uri ndi mini zwe zwa vha thusa uri vha bvele phanḓa vha tshi shumela Yehova lwa miṅwaha minzhi. Ni ḓo guda zwithu zwinzhi zwa ndeme khavho nahone zwenezwo zwi ḓo ni ṱuṱuwedza noṱhe. Nahone roṱhe ri nga ḓivhetshela tshipikwa tsha uri ri ṱanganedze vhoṱhe vhane vha ḓa miṱanganoni. Musi ni tshi ita nga u ralo, zwi ḓo ita uri hu vhe na vhuthihi nahone zwenezwo zwi nga ita uri vhathu vho ḓaho vha ṱanganele kha u ita uri tshedza tshavho tshi vhonetshele. Itani vhuḓidini ha u vha lumelisa ni tshi khou ṅweṅwela na u vha thusa uri vha wane hune vha nga dzula hone. Itani uri vha ḓipfe vhe hayani nga u vha ḓivhadza kha vhaṅwe vhathu.

12 Arali ni tshi fara muṱangano wa tsimu, ni nga  ita zwo engedzeaho u itela u thusa vhaaluwa uri vha kone u ṱanganela vhuḓinḓani. Vha waneleni fhethu hune vha nga huwelela hone hune ha tendelana na zwiimo zwavho. Itani uri vha shume tsimu na vhaswa vhane vha nga kona u vha thusa. Ni nga dovha na tikedza vhane vha vha na thaidzo dza mutakalo na vhane vhuimo havho ha si vha tendele uri vha ite zwo engedzeaho. Hu sa londwi miṅwaha yavho kana miṅwaha ine vha vha nayo vhe tshumeloni, vhuthu haṋu vhu nga vha ṱuṱuwedza uri vha bvele phanḓa vha tshi huwelela nga u fhisea.—Lev. 19:32.

13 Mupsalme o ri: “A si u naka na u ḓifha mukomana na murathu vhó dzula vhé vhathihi!” (Vhalani Psalme ya 133:1, 2.) Vhaisiraele vho ḓiphina nga u shumela Yehova nga vhuthihi. Mupsalme o vhambedza honovhu vhuthihi na mapfura ane a ita uri lukanda lu suvhelele na u nukhelela. Nga hu fanaho, na riṋe ri nga fana na eneo mapfura musi ri tshi vha na vhuthu kha vhahashu. U ita nga u ralo zwi ita uri hu vhe na vhuthihi tshivhidzoni. Ri a ni khoḓa arali no no thoma u ita nga u ralo. Naa ni nga ita zwo engedzeaho uri ni kone u ḓivha vhahaṋu khwine?—2 Vhakor. 6:11-13.

14. Ni nga ita hani uri tshedza tshaṋu tshi vhonetshele kha vhahura vhaṋu?

14 Ndi ngani ni sa iti vhuḓidini ho engedzeaho ha uri tshedza tshaṋu tshi vhonetshele kha vhahura vhaṋu? Nḓila ine na amba ngayo na nḓila ine na tshila ngayo, zwi nga ita uri vhahura vhaṋu vha ṱanganedze ngoho. Ḓivhudziseni uri: ‘Vhahura vhanga vha ndzhia hani? Naa muḓi wanga na dzharaṱa yanga zwi dzula zwo kuna lune zwa ita uri na tshiṱaraṱa tshine nda dzula khatsho tshi vhonale tsho kuna? Naa ndi lwela u thusa vhaṅwe?’ Musi ni tshi khou amba na dziṅwe Ṱhanzi, ndi ngani ni sa vha vhudzisi uri vhuḓifari havho havhuḓi ho kwama hani mashaka avho, vhahura, vhane vha shuma navho kana vhane vha dzhena navho tshikolo? Kanzhi vha nga ni vhudza nga ha tshenzhelo dzavhuḓi.—Vhaef. 5:9.

DZULANI NO FHAṰUWA

15. Ndi ngani zwi zwa ndeme uri ri dzule ro fhaṱuwa?

15 Arali ri tshi ṱoḓa uri tshedza tshashu tshi vhonetshele, ri tea u ṱhogomela tshifhinga tshine ra khou tshila khatsho. Yesu o vhudza vhafunziwa vhawe lunzhi a ri: “Dzulani no fhaṱuwa.” (Mat. 24:42; 25:13; 26:41) Zwi tou vha khagala uri ri nga si vhone zwo ṱavhanyiswa uri ri ite mushumo wa u huwelela arali ri tshi vhona u nga “maṱungu mahulu” a tshee kule. (Mat. 24:21) Nṱhani ha uri tshedza tshashu tshi vhonetshele vhahura vhashu, nga zwiṱuku nga zwiṱuku tshi ḓo fhungudzea nahone tsha fhelela muyani.

16, 17. Ni nga ita mini uri ni dzule no fhaṱuwa?

16 Samusi zwithu zwi tshi khou ṋaṋa u vhifha kha ano maḓuvha a vhufhelo, roṱhe ri fanela u dzula ro fhaṱuwa. Yehova u ḓo dzhia vhukando nga tshifhinga tsho teaho. Zwenezwo a zwi vhuyi zwa vhudziswa. (Mat. 24:42-44) Zwa zwino kha ri lindele ri sa fheli mbilu na u dzula ro fhaṱuwa. Vhalani Ipfi ḽa Mudzimu ḓuvha ḽiṅwe na ḽiṅwe nahone ni dzule ni tshi rabela. (1 Pet. 4:7) Ri nga guda kha tsumbo dza vhahashu vhe vha ḓiphina nga u dzula vho fhaṱuwa na u ita uri tshedza tshavho tshi vhonetshele. Sa tsumbo, ni nga vhala nga ha tshenzhelo dzavho. Iṅwe ya dzenedzo tshenzhelo i wanala kha thero i re na tshiṱoho tshine tsha ri, “Miṅwaha Ya 70 Ya U Farelela Nguvho Ya Muyuda,” yo gandiswaho kha Tshiingamo tsha ḽa 15 April 2012, masiaṱari 18-21.

17 Dzulani no farakanea nga u shumela Yehova na u vha na vhukonani havhuḓi na vhahaṋu. Zwenezwo zwi ḓo ita uri ni dzule no takala nahone ni ḓo vhona tshifhinga tshi tshi khou gidima. (Vhaef. 5:16) Miṅwahani minzhi yo fhiraho, vhahashu vho dzula vho farakanea nahone vho khunyeledza zwithu zwinzhi. Fhedzi Yehova u khou ri livhisa uri ri khunyeledze zwinzhi ṋamusi. Ri khou ita uri tshedza tshashu tshi vhonetshele nga hune zwa nga konadzea ngaho u fhira naho hu lini.

U ita nyendo dza vhulisa zwi ita uri ri wane vhuṱali vhu bvaho Ipfini ḽa Mudzimu (Sedzani dziphara 18, 19)

18, 19. Vhahulwane vha tshivhidzo vha nga ri thusa hani uri ri dzule ro fhaṱuwa na u fhisea? Ṋeani tsumbo.

 18 Zwi khwaṱhisa lutendo lwashu u ḓivha uri u sa fhelela hashu a zwi ri thivheli u shumela Yehova nga nḓila ine a i ṱanganedza. Ri livhuwa ndugiselelo ya Yehova ya u ri ṋea vhahulwane vha tshivhidzo vhane vha vha “zwifhiwa zwine zwa vha vhathu.” (Vhalani Vhaefesa 4:8, 11, 12.) Musi vhahulwane vha tshivhidzo vha tshi ni dalela, dzhiani tshenetsho hu tshibuli tsha u guda kha vhuṱali havho na u vhuyelwa nga nyeletshedzo dzavho.

19 Vhaṅwe vhahulwane vha tshivhidzo vhavhili vha ngei England, vho thusa vhaṅwe vhavhingani vhe vha vha vhe na thaidzo mbinganoni yavho. Wa mufumakadzi o amba uri munna wawe ha khou ranga phanḓa kha u shumela Yehova. Munna wawe o tenda uri o vha e si mugudisi wavhuḓi nahone o vha a sa iti vhurabeli ha muṱa tshifhinga tshoṱhe. Vhahulwane vho vhudza vhenevho vhavhingani uri vha livhise ṱhogomelo kha tsumbo ya Yesu. Yesu o vha a tshi funa vhafunziwa vhawe nahone o ṱhogomela zwishaiwa zwavho. Vhahulwane vho ṱuṱuwedza onoyo munna uri a edzise tsumbo ya Yesu. Nahone vha ṱuṱuwedza onoyo mufumakadzi uri a si fhele mbilu. Vhahulwane vho dovha vha ṋea vhenevho vhavhingani nyeletshedzo dzi shumaho dza nḓila ine vha nga farisana ngayo kha u ita uri vha vhe na vhurabeli ha muṱa na vhana vhavho vhavhili. (Vhaef. 5:21-29) Nga murahu, vhahulwane vho khoḓa onoyo munna nga vhuḓidini he a vhu ita. Vho mu ṱuṱuwedza uri a konḓelele na u ḓitika nga muya mukhethwa uri hu vhe wone une wa mu thusa uri a vhe ṱhoho ya muṱa yavhuḓi. Lufuno na vhuthu he vhenevho vhahulwane vha vhu sumbedza zwo thusa vhukuma wonoyo muṱa kha u ita uri tshedza tshawo tshi vhonetshele.

20. Hu ḓo vha na mbuyelo dzifhio musi ni tshi ita uri tshedza tshaṋu tshi vhonetshele?

20 Mupsalme o imba a ri: “Wa mashudu ndi uyo ané a ofha Yehova, nnyi na nnyi ané a fara nḓila dzawe.” (Ps. 128:1) Musi ni tshi ḓifara nga nḓila ine ya ita uri hu vhe na vhuthihi, u thusa vhaṅwe uri vha shumele Mudzimu na u dzula no fhaṱuwa, ni vha ni tshi khou ita uri tshedza tshaṋu tshi vhonetshele nahone zwi ḓo ita uri ni vhe na dakalo ḽo engedzeaho. Vhaṅwe vha ḓo vhona tsumbo yaṋu yavhuḓi nahone zwi ḓo ita uri vha ṱoḓe u ṋea Yehova vhugala.—Mat. 5:16.