Pfukelani kha mafhungo

Pfukelani kha zwi re ngomu

Tikedzani Vhuvhusahoṱhe Ha Yehova!

Tikedzani Vhuvhusahoṱhe Ha Yehova!

“Iwe Yehova Mudzimu, ndi iwe wo fanelwaho nga vhugala na u huliswa na maanḓa, ngauri wo sika zwithu zwoṱhe.”—NZUMB. 4:11.

NYIMBO: 112, 133

1, 2. Muṅwe na muṅwe washu u fanela u vha na vhungoho ha mini? (Sedzani tshifanyiso tsha u thoma.)

SAMUSI zwo haseledzwa kha thero yo fhiraho, Diabolo o amba uri Yehova u shumisa vhuvhusahoṱhe hawe nga nḓila i si yavhuḓi na uri vhathu vha ḓo takala arali vha ḓivhusa vhone vhaṋe. Naa Sathane u khou amba ngoho? Kha ri ri vhathu vhe vha khetha u ḓivhusa vha tshila tshoṱhe. Naa vha nga kona u ḓivhusa nga nnḓa ha u vhuswa nga Mudzimu? Naa no vha ni tshi ḓo takala arali no vha ni tshi kona u ḓivhusa na u tshila tshoṱhe?

2 A huna muthu ane a nga ni fhindulela dzenedzo mbudziso. Muṅwe na muṅwe u fanela u humbulisisa nga ha eneo mafhungo. Musi ri tshi ita nga u ralo, zwi fanela u vha khagala uri vhuvhusahoṱhe ha Mudzimu ndi hone ha khwine. Ndi muvhusi wa khwine. Nahone ri fanela u vhu tikedza zwi tshi bva mbiluni. Bivhili i ri ṋea tshiitisi tsha zwenezwo. Sa tsumbo, ṱhogomelani zwine Maṅwalo a ri vhudza zwone nga ha uri Yehova u na ndugelo ya u vhusa fhethu hoṱhe.  

YEHOVA U NA NDUGELO YA U VHUSA

3. Ndi ngani hu Yehova fhedzi a re na ndugelo ya u vhusa?

3 Yehova u na ndugelo ya u vhusa fhethu hoṱhe ngauri ndi Mudzimu ramaanḓaoṱhe na Musiki. (1 Koron. 29:11; Mish. 4:24) Kha  Nzumbululo 4:11, vha 144 000 vhane vha ḓo vhusa na Kristo ṱaḓulu vha amba uri: “Iwe Yehova Mudzimu, ndi iwe wo fanelwaho nga vhugala na u huliswa na maanḓa, ngauri wo sika zwithu zwoṱhe, huno zwo vha hone na u sikwa nge wa zwi funa.” Vhukuma, ngauri Yehova o sika zwithu zwoṱhe, u na ndugelo ya u vhusa vhathu u katela na zwivhumbiwa zwi re ṱaḓulu.

4. Ndi ngani u shandukela vhuvhusahoṱhe ha Mudzimu hu u sa shumisa zwavhuḓi mbofholowo ya u ḓikhethela?

4 Sathane ho ngo sika tshithu. Nga zwenezwo, ha na ndugelo ya u ḓiita muvhusi wa fhethu hoṱhe. Samusi Sathane o shandukela vhuvhusahoṱhe ha Yehova, ene na vhavhingani vha u thoma vho ḓihudza. (Yer. 10:23) Vhukuma, samusi zwivhumbiwa zwi na mbofholowo ya u ḓikhethela, zwi nga khetha u sa vhuswa nga Mudzimu. Fhedzi naa zwenezwo zwi vha ṋea ndugelo ya u ita nga u ralo? Hai. Mbofholowo ya u ḓikhethela i ita uri vhathu vha kone u ḓidzhiela phetho dzo teaho ḓuvha ḽiṅwe na ḽiṅwe. Naho zwo ralo, a zwi vha ṋei ndugelo ya uri vha shandukele Musiki wavho na Muṋei wa Vhutshilo. Vhukuma, u shandukela Yehova ndi u sa shumisa zwavhuḓi mbofholowo ya u ḓikhethela. Roṱhe ri fanela u vhuswa nga Yehova.

5. Ndi ngani ri tshi nga vha na vhungoho ha uri phetho dzine Mudzimu a dzi dzhia dzo luga?

5 Hu na tshiṅwe tshiitisi tshine tsha ita uri Yehova a vhe muvhusi o teaho. U shumisa maanḓa awe u haṱula nga nḓila yo teaho. O ri: “Ndi Nṋe Yehova, [ane] a ita vhuthu, na u luga, na zwivhuya fhano shangoni; ngauri ndi takalela zwenezwo.” (Yer. 9:23) Ha sedzi kha milayo yo ṅwalwaho nga vhathu vha songo fhelelaho uri a kone u ḓivha zwo lugaho na zwi songo lugaho. Ndi ene ane a ḓivhetshela milayo nahone o ṅwalela vhathu milayo ine vha fanela u i tevhela. “U luga na u lulama ndi dzone thikho dza khuluṋoni [yawe],” nga zwenezwo, ri nga vha na vhungoho ha uri milayo yawe yoṱhe, zwilinganyo zwawe na phetho dzawe zwo luga. (Ps. 89:14; 119:128) Zwo fhambanaho na zwenezwo, hu sa londwi mazwifhi e Sathane a amba nga ha vhuvhusahoṱhe ha Yehova, ho ngo kona u ita uri shangoni hu vhe na khaṱulokwayo.

6. Ndi tshifhio tshiitisi tshine tsha sumbedza uri ndi ngani Yehova e na ndugelo ya u vhusa ḽifhasi?  

6 Zwiṅwe hafhu, Yehova u na ndugelo ya u vhusa ngauri u na nḓivho na vhuṱali zwine zwa ita uri a kone u ṱhogomela fhethu hoṱhe. Sa tsumbo, Mudzimu o ita uri Murwa wawe a kone u fhodza malwadze ane madokotela a si kone u a fhodza. (Mat. 4:23, 24; Marko 5:25-29) Kha Yehova, zwenezwi zwo vha zwi si vhuṱolo. U a pfesesa nḓila ine muvhili wa muthu wa shuma ngayo nahone u na vhukoni ha u itulula zwe zwa tshinyala. Nahone u na vhukoni ha u vusa vho faho na u thivhela khombo dza mupo.

7. Vhuṱali ha Yehova ndi vhuhulwane lungafhani musi vhu tshi vhambedzwa na ṱhuṱhuwedzo ya Sathane?

7 Ḽino shango ḽine ḽa khou ṱuṱuwedzwa nga Sathane, ḽi kha ḓi ita ṱhoḓisiso ya nḓila ine ḽa nga fhelisa ngayo dzinndwa vhukati ha dzitshaka na nndwa dza kha maṅwe mashango. Ndi Yehova fhedzi ane a vha na vhukoni ha u ḓisa mulalo kha ḽifhasi. (Yes. 2:3, 4; 54:13) Samusi ri tshi guda nga ha nḓivho na vhuṱali ha Yehova, ri ḓipfa nga nḓila i fanaho na ya muapostola Paulo we a ṅwala uri: “Lupfumo, vhuṱali, na nḓivho zwa Mudzimu ndi zwihulwane. A hu na ane a nga ṱalukanya khaṱulo dzawe nahone a ri koni u pfesesa nḓila dzawe dzoṱhe.”—Vharoma 11:33.

VHUVHUSI HA YEHOVA NDI HA KHWINE

8. Ndi mini zwine zwa ni takadza nga ha nḓila ine Yehova a vhusa ngayo?

8 Bivhili i sumbedza uri Yehova u na ndugelo ya u vhusa. I sumbedza uri vhuvhusahoṱhe hawe ndi vhuhulwane u fhira mivhuso ya vhathu. Tshiṅwe tshiitisi ndi tsha uri u vhusa nga  lufuno. Vhukuma, ri a kwamea nga nḓila ine a vhusa ngayo. U na ‘khathutshelo na vhuthu, ha fheli mbilu, u na vhuhwavho vhuhulu na u fulufhedzea.’ (Ek. 34:6) Mudzimu u fara zwavhuḓi vhashumeli vhawe nahone u a vha ṱhonifha. U a ri ṱhogomela u fhira nḓila ine ra ḓiṱhogomela ngayo. Diabolo u amba uri Yehova ha ṱoḓeli vhashumeli vhawe zwa khwine, fhedzi zwenezwo ndi mazwifhi madala-dala. Yehova o ri ṋea Murwa wawe a funwaho u itela uri ri vhe na tshilavhelelwa tsha u wana vhutshilo vhu sa fheli!—Vhalani Psalme ya 84:11; Vharoma 8:32.

9. Ri zwi ḓivha hani uri Yehova u na dzangalelo kha muṅwe na muṅwe?

9 Yehova u funa vhathu vhawe vhoṱhe sa tshigwada. U dovha a sumbedza u vha na dzangalelo kha muthu muṅwe na muṅwe. Sa tsumbo, ṱhogomelani zwe zwa itea maḓanani mararu a miṅwaha musi Yehova a tshi shumisa vhahaṱuli uri vha livhise lushaka lwawe na u ita uri vha kunde maswina avho. Nga tshenetsho tshifhinga, Yehova o ṱhogomela muṅwe mufumakadzi we a vha e si Muisiraele we a vha a tshi pfi Ruthe. O vha o ḓidzima zwiṅwe zwithu uri a vhe mugwadameli wa Yehova wa ngoho. Yehova o fhaṱutshedza Ruthe nga munna na murwa. Fhedzi a zwo ngo fhelela henefho. Musi Ruthe a tshi vuswa, u ḓo ḓivha uri murwa wawe o vha tshipiḓa tsha mutevhe wa lushaka lwa Messia. Edzani u humbula nḓila ine a ḓo takala ngayo musi a tshi pfa uri nganeavhutshilo yawe yo ṅwalwa kha bugu ya Bivhili ine ya vhidzwa nga dzina ḽawe!—Ruthe 4:13; Mat. 1:5, 16.

10. Ndi ngani ri tshi nga amba uri Yehova u vhusa nga nḓila yavhuḓi?

10 Yehova ha vhusi nga nḓila i tsikeledzaho nahone ha shandu-shanduki. U ita uri hu vhe na mbofholowo na dakalo. (2 Vhakor. 3:17) Davida o amba zwi tevhelaho: “[Mudzimu] o livhana na vhurena na vhuhosi. Nḓuni yawe hu na maanḓa na dakalo.” (1 Koron. 16:7, 27) Nga hu fanaho, mupsalme Ethani o ṅwala uri: “Vha mashudu ndi avho vhathu vhané vha ḓivha khuwa, Yehova; ndi avho vhané vha tshimbila tshedzani tsha tshifhaṱuwo tshau. Vha pembelela dzina ḽau misi yoṱhe, vha zuwa u luga hau.”—Ps. 89:15, 16.

11. Ri nga vha hani na khwaṱhisedzo ya uri Yehova u vhusa nga nḓila ya khwine?

11 U dzula ri tshi elekanya nga ha vhuḓi ha Yehova zwi nga ita uri ri vhe na khwaṱhisedzo ya uri u vhusa nga nḓila ya khwine. Ri ḓipfa nga nḓila i fanaho na ya mupsalme we a ri: “Ḓuvha ḽiné muthu a vha dzikhoroni dzau, ndi ḽone ḽavhuḓi kha a maḓana a fumi.” (Ps. 84:10) Zwenezwo zwi nga konadzea hani? Sa Muvhumbi na Musiki washu, Yehova u a ḓivha zwine ra zwi ṱoḓa u itela uri ri takale nahone u a fusha ṱhoḓea dzashu. Zwiṅwe na zwiṅwe zwine a zwi ṱoḓa kha riṋe zwi a ri vhuyedza nahone zwi ita uri ri takale vhukuma, naho zwine a zwi ṱoḓa kha riṋe zwi tshi ita uri ri ḓidzime zwiṅwe zwithu.—Vhalani Yesaya 48:17.

12. Ndi mini zwine zwa ri ṱuṱuwedza u tikedza vhuvhusahoṱhe ha Yehova?

12 Bivhili i sumbedza uri nga murahu ha u Vhusa Ha Kristo Lwa Miṅwaha Ya Tshigidi, vhaṅwe vhathu vha ḓo khetha u shandukela vhuvhusahoṱhe ha Yehova. (Nzumb. 20:7, 8) Ndi mini zwine zwa ḓo vha ṱuṱuwedza u ita nga u ralo? Samusi u bva kale Diabolo a tshi ḓihumbulela ene muṋe fhedzi, nga tshenetsho tshifhinga u ḓo vha o no vhofhololwa nahone a tshi khou xedza vhathu. A nga lingedza na u ṱuṱuwedza vhathu uri hu na nḓila ya u tshila tshoṱhe naho vha sa thetshelesi Yehova. Vhukuma, zwenezwo ndi mazwifhi madala-dala. Fhedzi ri fanela u ḓivhudzisa uri: Naa ndi ḓo tenda mazwifhi o raloho? Arali ri tshi funa Yehova nahone ri tshi mu shumela nga nṱhani ha vhuḓi hawe na nga uri u na ndugelo ya u vhusa fhethu hoṱhe, eneo mazwifhi a Diabolo a ḓo vha a ṋengisaho. Ri ḓo ṱoḓa u tshila nga fhasi ha vhuvhusi ha Yehova ane a vhusa nga lufuno.

 TIKEDZANI VHUVHUSAHOṰHE HA MUDZIMU NGA U FULUFHEDZEA

13. U edzisa Mudzimu zwi sumbedza hani uri ri a mu tikedza?

13 Vhukuma, ri fanela u tikedza vhuvhusahoṱhe ha Yehova zwi tshi bva mbiluni. Samusi ro zwi vhona, u na ndugelo ya u vhusa nahone nḓila ine a vhusa ngayo ndi yone ya khwine. Ri nga tikedza vhuvhusahoṱhe ha Yehova nga u dzula ri tshi fulufhedzea na u shumela Mudzimu nga u fulufhedzea. Ri nga dovha ra sumbedza hani nḓila ine ra vhu tikedza ngayo? Ri nga ita zwenezwo nga u ita zwine Yehova a zwi takalela. Musi ri tshi tandulula thaidzo nga nḓila ine Yehova a tandulula ngayo, ri vha ri tshi khou sumbedza uri ri a funa na u tikedza nḓila ine a vhusa ngayo.—Vhalani Vhaefesa 5:1, 2.

14. Vhahulwane na ṱhoho dza miṱa vha nga edzisa hani Yehova?

14 Ri guda Bivhilini uri Yehova u shumisa maanḓa awe nga nḓila ya lufuno. Zwi tshimbidzanaho na zwenezwo, ṱhoho dza miṱa na vhahulwane vhane vha funa vhuvhusahoṱhe hawe, vha nga si ṱoḓe zwithu zwi tshi tshimbila nga nḓila yavho zwa tou nga vha khou ṱoḓa u vhusa. Nṱhani hazwo, vha ḓo edzisa Yehova. Paulo o vha a tshi edzisa Mudzimu na Murwa wawe. (1 Vhakor. 11:1) Paulo ho ngo shonisa vhaṅwe kana u vha tsikeledza uri vha ite zwo lugaho. Nṱhani hazwo, o vha ṱuṱuwedza uri vha ite zwo lugaho. (Vharoma 12:1; Vhaef. 4:1; Filem. 8-10) Yeneyo ndi nḓila ine Yehova a dzudzanya ngayo mafhungo. Nga zwenezwo, musi ri tshi fara vhaṅwe nga nḓila ya lufuno, ri vha ri tshi khou tikedza vhuvhusahoṱhe hawe.

15. Musi ri tshi ṱhonifha vharangaphanḓa, zwi sumbedza hani uri ri funa nḓila ine Yehova a vhusa ngayo?

15 Ri nga sumbedza hani uri ri ṱhonifha vharangaphanḓa? Musi ri tshi thetshelesa vharangaphanḓa, ri vha ri tshi khou sumbedza uri ri tikedza vhuvhusahoṱhe ha Yehova. Naho ri sa pfesesi nga vhuḓalo kana ri sa tendelani na phetho dze vha dzi dzhia, ri fanela u tikedza nzudzanyo ya lwa ṱaḓulu. Zwenezwo zwo fhambana na nḓila ine vhathu vha ḽino shango vha dzhia ngayo zwithu, fhedzi ndi nḓila ine  ra fanela u tshila ngayo nga fhasi ha vhuvhusi ha Yehova. (Vhaef. 5:22, 23; 6:1-3; Vhaheb. 13:17) Ri a vhuyelwa nga u ita nga u ralo, ngauri Mudzimu u ri ṱoḓela zwa khwine.

16. Vhane vha tikedza vhuvhusahoṱhe ha Mudzimu vha dzhia hani phetho ya muthu nga eṱhe?

16 Ri nga dovha ra sumbedza uri ri tikedza vhuvhusahoṱhe ha Mudzimu nga phetho dzine ra dzi dzhia. Yehova ha vhei milayo yo livhaho ya phetho iṅwe na iṅwe ine ra fanela u i dzhia. Nṱhani hazwo, samusi a tshi ri livhisa, u ri vhudza nḓila ine a humbula ngayo. Sa tsumbo, ha vhudzi Vhakriste zwidodombedzwa zwa nḓila ine vha fanela u ambara ngayo. Nṱhani hazwo, u sumbedza uri nḓila ine ra ambara na u ḓilugisa ngayo i fanela u vha i ṱhonifheaho na ine ya vha na tshirunzi kha vhaḓinḓa vha Vhakriste. (1 Tim. 2:9, 10) U dovha a amba uri a ro ngo fanela u khukhulisa vhaṅwe kana u vha khakhisa nga nṱhani ha phetho dzine ra dzi dzhia. (1 Vhakor. 10:31-33) Ri fanela u ṱhogomela zwine ra zwi ita, hu si zwine ra zwi takalela fhedzi nahone musi ri tshi dzhia phetho dzo thewaho kha nḓila ine Yehova a humbula ngayo, zwi sumbedza uri ri funa na u tikedza nḓila ine a vhusa ngayo.

Tikedzani vhuvhusahoṱhe ha Mudzimu musi ni tshi dzhia phetho na muṱani (Sedzani dziphara 16-18)

17, 18. Vhavhingani vha nga sumbedza hani uri vha tikedza vhuvhusahoṱhe ha Yehova?

17 Ṱhogomelani nḓila ine vhavhingani vha Vhakriste vha nga tikedza ngayo vhuvhusahoṱhe ha Yehova. Vhavhingani vha nga vhona mbingano yavho i si tsha vha nga nḓila ye vha vha vho i lavhelela. Vha nga kha ḓi vha vhe na thaidzo khulwane mbinganoni yavho. Zwi nga vha zwavhuḓi arali vha nga thoma u humbula nga ha nḓila ye Yehova a shumisana ngayo na Vhaisiraele. Yehova u ḓiṱalusa sa munna wa lushaka lwa Isiraele. (Yes. 54:5; 62:4, vhambedzani na NW.) Yeneyo i nga vha yo vha i mbingano i konḓaho vhukuma! Naho zwo ralo, Yehova ho ngo ṱavhanya u laṱela thaula. O dovha a khathutshela lwonolwo lushaka lunzhi-lunzhi nahone a ita zwe a lu fulufhedzisa. (Vhalani Psalme ya 106:43-45.) Naa zwenezwo a zwi iti uri ri sendele tsini-tsini na Yehova?

18 Vhavhingani vhane vha funa Yehova vha a mu edzisa. Naho vhe na thaidzo mbinganoni yavho, a vha ṱoḓi nyeletshedzo dzi songo thewaho Maṅwaloni u itela u fhelisa yeneyo mbingano. Vha ṱhogomela uri vho vhofhekanywa nga Yehova nahone u ṱoḓa vha tshi ‘nambatelana.’ U ḓifara luvhi nga zwa vhudzekani ndi tshone tshiitisi tshi tshoṱhe tsho thewaho Maṅwaloni tshine tsha nga ita uri muthu a ṱale mufarisi wawe nahone a vhingane na muṅwe muthu. (Mateo 19:5, 6, 9) Musi vhavhingani vha Vhakriste vha tshi ita zwoṱhe zwine vha nga kona uri mbingano yavho i bvelele, vha vha vha tshi khou tikedza vhuvhusahoṱhe ha Yehova.

19. Arali ra khakhela Mudzimu, ri fanela u ita mini?

19 Samusi ri songo fhelela, nga zwiṅwe zwifhinga ri ḓo ita zwithu zwine zwa ḓo pfisa Yehova vhuṱungu. U a zwi ḓivha nahone ndi ngazwo o ri ṋea tshirengululi tsha Kristo. Nga zwenezwo, musi ri tshi ita vhukhakhi, ri fanela u humbela uri Yehova a ri hangwele. (1 Yoh. 2:1, 2) Nṱhani ha u dzula ri tshi ḓisola nga vhukhakhi hashu, ri fanela u ita vhuḓidini ha u guda kha vhukhakhi he ra vhu ita. Arali ra dzula ri tsini na Yehova, u ḓo ri hangwela na u ri thusa uri ri si tsha vhilaela nahone tshifhingani tshi ḓaho ri ḓo kona u sedzana nga hu bvelelaho na vhuimo vhu fanaho.—Ps. 103:3.

20. Ndi ngani ri tshi fanela u tikedza vhuvhusahoṱhe ha Yehova zwino?

20 Shangoni ḽiswa, roṱhe ri ḓo tikedza vhuvhusahoṱhe ha Yehova na u guda nḓila dzawe dzo lugaho. (Yes. 11:9) Naho zwo ralo, na zwino ri khou guda zwo engedzeaho nga ha zwenezwo. Hu si kale, a huna ane a ḓo nyadza vhuvhusahoṱhe ha Mudzimu. Zwino ndi tshifhinga tsha u tikedza vhuvhusahoṱhe ha Mudzimu nga u fulufhedzea hashu, tshumelo yashu na u mu edzisa kha zwoṱhe zwine ra zwi ita.