Pfukelani kha mafhungo

Pfukelani kha zwi re ngomu

 THERO I GUDWAHO 28

Dzulani Ni Tshi Gwadamela Yehova Musi Mushumo Washu Wo Thivhelwa

Dzulani Ni Tshi Gwadamela Yehova Musi Mushumo Washu Wo Thivhelwa

“Ri nga si litshe u amba nga ha zwithu zwe ra zwi vhona na u zwi pfa.”—MISH. 4:19, 20.

LUIMBO 122 Khwaṱhani, Ni Songo Dzinginyea!

MANWELEDZO *

1-2. (a) Ndi ngani u thivhelwa u gwadamela Yehova zwi sa ri mangadzi? (b) Ri ḓo haseledza mini kha ino thero?

NGA 2018, vhahuweleli vha fhiraho 223 000 vho dzula fhethu he mishumo yashu yoṱhe ya vha yo thivhelwa kana ho thivhelwa miṅwe yayo. Zwenezwi a zwi ri mangadzi. Samusi ro zwi guda kha thero yo fhiraho, Vhakriste vha ngoho vha lavhelela u tovholwa. (2 Tim. 3:12) Hu sa londwi hune ra dzula hone, mivhuso i nga ri thivhela u gwadamela Yehova Mudzimu washu wa lufuno nga u bonya ha iṱo nahone ri songo zwi lavhelela.

2 Arali hune na dzula hone muvhuso wa ni thivhela uri ni sa gwadamele Yehova, ni nga ḓivhudzisa mbudziso dzi ngaho hedzi: ‘Naa u tovholwa zwi amba uri Mudzimu ha tsha ri takalela? Naa u thivhelwa zwi ḓo ita uri ri si tsha gwadamela Yehova? Naa ndi tea u pfulutshela he mushumo washu wa si thivhelwe?’ Ri ḓo haseledza dzenedzo mbudziso kha ino thero. Ri ḓo dovha ra haseledza uri ri nga bvela hani phanḓa na u gwadamela Yehova musi mushumo washu wo thivhelwa na zwine ra fanela u zwi iledza.

NAA U TOVHOLWA ZWI AMBA URI MUDZIMU HA TSHA RI TAKALELA?

3. U ya nga 2 Vhakorinta 11:23-27, Paulo muapostola a fhulufhedzeaho o tovholwa hani nahone ri guda mini kha tsumbo yawe?

3 Arali muvhuso wa ri thivhela u gwadamela Yehova, ri nga humbula uri Mudzimu ha tsha ri takalela. Fhedzi humbulani uri u tovholwa a zwi ambi uri Yehova ha ri takaleli. Sa tsumbo, humbulani nga ha muapostola Paulo. A zwi timatimisi uri Mudzimu o vha a tshi mu takalela. O vha na ndugelo ya u ṅwala marifhi  a 14 a Maṅwalo a Tshikriste a Lugerika nahone o vha e muapostola kha dzitshaka. Fhedzi o tovholwa vhukuma. (Vhalani 2 Vhakorinta 11:23-27.) Zwo iteaho kha Paulo zwi ri gudisa uri Yehova u tendela vhashumeli vhawe vha fhulufhedzeaho vha tshi tovholwa.

4. Ndi ngani shango ḽi tshi ri vhenga?

4 Yesu o ṱalutshedza uri ndi ngani ri tshi fanela u lavhelela u tovholwa. O amba uri ri ḓo vhengwa ngauri a ri tshipiḓa tsha shango. (Yoh. 15:18, 19) U tovholwa a zwi ambi uri Yehova ha ri takaleli. Fhedzi zwi sumbedza uri ri khou ita zwo lugaho!

NAA U THIVHELWA ZWI ḒO ITA URI RI SA TSHA GWADAMELA YEHOVA?

5. Naa vhathu vha na maanḓa a u thivhela tshoṱhe mushumo wa Yehova? Ṋeani tsumbo.

5 Vhathu a vha na maanḓa a u thivhela tshoṱhe mushumo wa Yehova Mudzimu Ramaanḓaoṱhe. Vhanzhi vho lingedza, fhedzi vho kundelwa. Ṱhogomelani zwo iteaho nga Nndwa Ya Vhuvhili Ya Shango. Nga tshenetsho tshifhinga, vhathu vha Mudzimu vho tovholwa vhukuma nga mivhuso kha mashango manzhi. Mushumo wa Ṱhanzi Dza Yehova wo thivhelwa nga Vhanazi ngei Dzheremane, wa dovha wa thivhelwa na nga mivhuso ya ngei Australia, Canada na kha maṅwe mashango. Fhedzi ṱhogomelani uri ho bvelela mini. Musi nndwa i tshi thoma nga 1939, ho vha hu na vhahuweleli vha 72 475 u mona na shango ḽoṱhe. Mivhigo yo sumbedza uri mafheleloni a nndwa nga 1945, vhahuweleli vho vha vho no vha 156 299 nga nṱhani ha uri Yehova o fhaṱutshedza vhathu vhawe. Tshivhalo tsha vhahuweleli tsho vha tshi tshi fhira tsha u thoma kavhili!

6. U tovholwa zwi nga vhuyedza hani? Ṋeani tsumbo.

6 U tovholwa zwi nga ri thusa uri ri shumele Yehova nga ho engedzeaho, hu si uri ri ofhe nga ho kalulaho. Sa tsumbo, vhaṅwe vhavhingani vhe vha vha vhe na ṅwana muṱuku vho vha vha tshi dzula he muvhuso wa thivhela mushumo washu. Nṱhani ha u dzhenwa nga nyofho na u litsha u shumela Yehova nga ho engedzeaho, vho dzhia vhuvulanḓila ha tshifhinga tshoṱhe. Wa mufumakadzi o litsha na mushumo wawe u holelaho vhukuma u itela u vula nḓila. Wa munna o amba uri u thivhelwa zwo ita uri vhathu vhanzhi vha ṱoḓe u ḓivha nga ha Ṱhanzi Dza Yehova. Zwenezwo zwo ita uri zwi mu lelutshele u thoma ngudo dza Bivhili. U thivhelwa zwo dovha zwa vhuyedza na vhaṅwe. Muhulwane ane a dzula kha ḽeneḽo shango o amba uri vhunzhi ha vhathu vhe vha vha vho litsha u shumela  Yehova vho thoma u ya miṱanganoni nahone vha dovha vha bvela phanḓa na u huwelela.

7. (a) Ri guda mini kha Levitiko 26:36, 37? (b) Ni ḓo ita mini musi mushumo washu wo thivhelwa?

7 Musi maswina ashu a tshi ri thivhela u gwadamela Yehova, a vha a tshi khou ṱoḓa uri ri ofhe u mu shumela. Zwiṅwe hafhu, vha nga phaḓaladza mazwifhi nga ha riṋe, u ruma mapholisa uri a setshe miḓi yashu, u ri isa khothe kana u ri valela dzhele. Musi vha tshi valela vhaṅwe vhashu dzhele, tshipikwa tshavho hu vha hu u ita uri ri ofhe. Arali ra thoma u vha ofha na u ofha zwine vha nga zwi ita, ri nga kundelwa u bvela phanḓa kana ra litsha u shumela Yehova. A ri ṱoḓi u fana na vhe vha ambiwa kha Levitiko 26:36, 37. (Vhalani.) A ri nga tendi nyofho dzi tshi ita uri ri sa tsha bvela phanḓa kana u litsha u shumela Yehova. Ri fhulufhela Yehova nga ho fhelelaho nahone a ri ofhi. (Yes. 28:16) Ri humbela vhulivhisi ha Yehova nga thabelo. Nahone ri a zwi ḓivha uri nga thuso ya Yehova, a hu na muvhuso une wa nga ri thivhela uri ri mu shumele nga u fhulufhedzea.—Vhaheb. 13:6.

NAA NDI TEA U PFULUTSHELA HE MUSHUMO WASHU WA SI THIVHELWE?

8-9. (a) Ndi phetho ifhio ine ṱhoho ya muṱa ya fanela u i dzhia kana ine muṅwe na muṅwe a tea u ḓidzhiela yone? (b) Muthu a nga thuswa nga mini uri a dzhie phetho ya vhuṱali?

8 Arali muvhuso wa thivhela mushumo washu hune na dzula hone, ni nga ḓivhudzisa arali ni tshi tea u pfulutshela fhethu hune na ḓo shumela hone Yehova no vhofholowa. Yeneyi ndi phetho ya muthu nga eṱhe nahone a hu na muthu ane a nga ni itela yone. Ni sa athu dzhia phetho, ni nga guda zwe Vhakriste vha ḓanani ḽa u thoma vha zwi ita musi vha tshi tovholwa. Musi maswina o no kanḓa Stefano nga matombo u swika a tshi fa, vhane vha dzula Yerusalema vho pfulutshela Yudea na Samaria, vhaṅwe vha pfulutshela kule sa Fenikia, Kipiro na Antiokia. (Mat. 10:23; Mish. 8:1; 11:19) Vhaṅwe vha nga guda zwe Paulo a zwi ita musi hu tshi tovholwa Vhakriste vha ḓanani ḽa u thoma. Ho ngo pfuluwa musi vhathu vha tshi khou tovhola mushumo wa u huwelela naho zwo vha zwi tshi nga vhea vhutshilo hawe khomboni, zwenezwo o zwi itela u bvela phanḓa na u huwelela na u ṱuṱuwedza vhahawe vhane vha khou tovholwa.—Mish. 14:19-23.

9 Zwenezwi zwiitea zwi ri gudisa mini? Ṱhoho ya muṱa i tea u dzhia phetho ya u pfuluwa kana u sa pfuluwa. Musi i sa athu dzhia phetho, i tea u thoma ya rabela na u humbulisisa nga ha vhuimo ha muṱa wayo na nḓila ine u pfuluwa zwa ḓo vha kwama ngayo. Kha haya mafhungo, Mukriste muṅwe na muṅwe u tea u “hwala muhwalo wawe.” (Vhagal. 6:5) A ro ngo tea u haṱula vhaṅwe nga nṱhani ha phetho ye vha i dzhia.

RI ḒO BVELA HANI PHANḒA NA U GWADAMELA YEHOVA MUSI MUSHUMO WASHU WO THIVHELWA?

10. Ofisi ya davhi na vhahulwane vha ḓo ṋea vhulivhisi vhufhio?

10 Ni nga bvela hani phanḓa na u gwadamela Yehova musi mushumo washu wo thivhelwa? Ofisi ya davhi i ḓo ṋea vhahulwane vhulivhisi na nḓila dzi shumaho dzine ra nga wana ngadzo khandiso, u fara miṱangano na nḓila dzine ra nga huwelela ngadzo. Arali ofisi ya davhi i sa koni u kwamana na vhahulwane, vhahulwane vha ḓo thusa inwi na miraḓo yoṱhe ya tshivhidzo uri ni bvele phanḓa na u gwadamela Yehova. Vha ḓo ni livhisa u ya nga zwine Bivhili na khandiso dzashu zwa amba.—Mat. 28:19, 20; Mish. 5:29; Vhaheb. 10:24, 25.

11. Ndi ngani ni tshi nga vha na vhungoho ha uri ni ḓo wana zwoṱhe zwine na zwi ṱoḓa u itela u dzula no khwaṱha lutendoni, nahone ni nga ita mini u itela u tsireledza Bivhili na khandiso dzaṋu?

11 Yehova o fhulufhedzisa uri vhashumeli vhawe vha ḓo wana zwithu zwoṱhe zwine vha zwi ṱoḓa u itela uri vha dzule vho khwaṱha lutendoni.  (Yes. 65:13, 14; Luka 12:42-44) Ni nga vha na vhungoho ha uri ndangulo yawe i ḓo ita zwoṱhe zwine ya nga kona u itela u ni thusa uri ni dzule ni tshi fhulufhedzea. Fhedzi ndi mini zwine na nga zwi ita? Musi mushumo washu wo thivhelwa, ni tea u wana fhethu havhuḓi hune na nga dzumba hone Bivhili yaṋu na dziṅwe khandiso dzine na nga vha ni nadzo. Hu sa londwi uri ndi khandiso dzo phirinthiwaho kana dzi re kha tshishumiswa tsha thekinolodzhi, ni songo sia zwenezwo zwithu zwa ndeme fhethu hune zwa nga leluwa uri zwi wanale. Roṱhe ri fanela u ita zwoṱhe zwine ra nga kona u itela u dzula ri na lutendo lwo khwaṱhaho.

Nga thuso ya Yehova, ri nga kona u ṱangana nga tshashu ri sa ofhi (Sedzani phara 12) *

12. Vhahulwane vha nga lugiselela hani miṱangano nga nḓila ine ya sa ḓo ṱhogomelwa nga vhatovholi?

12 Hu pfi mini nga miṱangano yashu ya vhege iṅwe na iṅwe? Vhahulwane vha ḓo lugiselela uri ni ye miṱanganoni nga nḓila ine vhatovholi vha sa ḓo i ṱhogomela. Vha nga ni livhisa uri ni ṱangane nga zwigwada zwiṱuku nahone vha nga shandula tshifhinga na fhethu hune miṱanganoni ya farelelwa hone tshifhinga tshoṱhe. Ni nga thusa vhahashu uri vha dzule vho tsireledzea nga u ambela fhasi musi ni tshi ya miṱanganoni na musi ni tshi bva. Ni nga tea u ambara nga nḓila ine ya ḓo ita uri zwi sa vhonale uri ni khou ya miṱanganoni.

Hu sa londwi u thivhelwa nga muvhuso, a ri nga litshi u huwelela (Sedzani phara 13) *

13. Ri guda mini kha vhahashu vha ngei Soviet Union ya kale?

13 Zwi tshi ḓa kha mafhungo a u huwelela, zwiimo zwi nga fhambana zwi tshi ya nga fhethu. Fhedzi ri ḓo wana nḓila dza u huwelela nga nṱhani ha uri ri funa Yehova nahone ri ḓiphina nga u vhudza vhaṅwe nga ha Muvhuso wawe. (Luka 8:1; Mish. 4:29) Musi muḓivhazwakale Emily B. Baran a tshi amba nga ha mushumo wa Ṱhanzi Dza Yehova wa u huwelela ngei Soviet Union ya kale, o ri: “Musi muvhuso u tshi vhudza Ṱhanzi uri a dzi tsha tea u huwelela, Ṱhanzi dzo thoma u fara nyambedzano na vhahura, vhashumisani na dzikhonani. Musi vha tshi valelwa dzhele nga nṱhani ha u ita zwenezwo, vho huwelela kha vhaṅwe vhafariwa.” Hu sa londwi u thivhelwa ha mushumo washu, vhahashu vha ngei Russia na kha maṅwe mashango a nga tsini vho bvela phanḓa na u huwelela. Arali mushumo washu wa thivhelwa hune na dzula hone, u nga ri ni nga edzisa u ḓiimisela havho!

ZWINE RA FANELA U ZWI ILEDZA

Ri fanela u ḓivha uri ndi lini hune ra tea u fhumula (Sedzani phara 14) *

14. Psalme ya 39:1 i nga ri thusa u iledza mini?

14 Ni ṱhogomele zwine na zwi amba na vhaṅwe. Musi mushumo washu wo thivhelwa, ri fanela u ṱhogomela uri ndi lini hune ra fanela “u fhumula.” (Muh. 3:7) Ri fanela u sa amba mafhungo ane a nga dzhenisa vhahashu khomboni, a ngaho sa madzina a vhahashu, hune ra farela hone miṱangano, nḓila ine ra huwelela ngayo na uri ri wana hani khandiso. Ri nga si vhudze enea mafhungo vhathu vhane vha shumela muvhuso kana khonani na mashaka vha re na zwiṱuṱuwedzi zwavhuḓi vhane vha dzula shangoni ḽashu kana kha maṅwe mashango. Arali ra kundelwa  u iledza zwenezwi, ri nga dzhenisa vhahashu khomboni.—Vhalani Psalme ya 39:1.

15. Sathane u ḓo lingedza u ita mini nahone ri fanela u ita mini?

15 Ni songo tenda thaidzo ṱhukhu dzi tshi ri fhandekanya. Sathane u a zwi ḓivha uri nnḓu ya fhandekana, i a wa. (Marko 3:24, 25) U ḓo bvela phanḓa na u lingedza u ri fhandekanya. Musi a tshi ita zwenezwo, u vha a tshi khou lavhelela uri ri lwe nga tshashu nṱhani ha u lwa nae.

16. Wahashu Gertrud Poetzinger o ri vhetshela tsumbo ifhio yavhuḓi?

16 Na Vhakriste vho vhibvaho vha tea u iledza zwenezwi. Ṱhogomelani tsumbo ya vhahashu vhavhili vha tshifumakadzini vho ḓodzwaho, Gertrud Poetzinger na Elfriede Löhr. Vho vha vho fariwa na vhaṅwe vhahavho vha tshifumakadzini gammbani ya tshengedzo ya Vhanazi. Gertrud o thoma u vha na vivho musi Elfriede a tshi ṋekedza nyambo dzi ṱuṱuwedzaho gammbani kha vhahashu vha tshifumakadzini. Nga murahu, Gertrud o ḓisola nahone a humbela thuso kha Yehova. O ṅwala uri: “Ri fanela u ḓigudisa u ṱanganedza musi vhaṅwe vhe na vhukoni kana vhuḓifhinduleli vhu fhiraho hashu.” O kunda hani vivho ḽawe? O livhisa ṱhogomelo kha pfaneleo dzavhuḓi dze Elfriede a vha e nadzo na uri o vha e muthu o no konana na vhathu. Zwenezwo zwo ita uri a dovhe a vhe na vhukonani havhuḓi na Elfriede. Vhoṱhe vho bva gammbani ya tshengedzo nahone vha bvela phanḓa na u shumela Yehova u swika vhutshilo havho ha kha ḽifhasi vhu tshi guma. Arali ra lwela u lugisa thaidzo vhukati hashu na vhahashu, ri ḓo iledza naho tshi tshini tshine tsha nga ri fhandekanya.—Vhakol. 3:13, 14.

17. Ndi ngani ri tshi tea u iledza u sa tevhela vhulivhisi he ra ṋewa?

17 Dzulani ni tshi tevhela vhulivhisi. U tevhela vhulivhisi he ra ṋewa nga vhahashu vha re na vhuḓifhunduleli vhane vha fhulufhelwa, zwi ḓo ita uri ri iledze thaidzo. (1 Pet. 5:5) Sa tsumbo, kha ḽiṅwe shango ḽe mushumo washu wa vha wo thivhelwa, vhahashu vha re na vhuḓifhinduleli vho eletshedza vhahuweleli uri musi vhe vhuḓinḓani vha songo tshimbidza khandiso dzo phirinthiwaho. Fhedzi wahashu wa tshinnani wa muvulanḓila o vhona u nga u ḓivha khwine nahone a tshimbidza khandiso. Ho vha na mvelelo dzifhio? Nga murahunyana ha musi onoyo wahashu na vhaṅwe vho no fhedza u huwelela lu songo dzudzanywaho, vho mbo ḓi vhudziswa nga mapholisa. Zwi vhonala u nga mapholisa vho vha vha tshi khou vha tevhela nahone vho wana khandiso ye vha i tshimbidza. Zwenezwi zwi ri gudisa mini? Ri tea u tevhela vhulivhisi naho ri tshi vhona u nga ri ḓivha khwine. Yehova u dzula a tshi ri fhaṱutshedza musi ri tshi tevhela vhulivhisi vhune ra vhu wana kha vhahashu vhe a vha vhea uri vha ri range phanḓa.—Vhaheb. 13:7, 17.

18. Ndi ngani ri tshi fanela u iledza u vhea milayo i sa ṱoḓei?

 18 Ni songo vhea milayo i sa ṱoḓei. Arali vhahulwane vha vhea milayo i sa ṱoḓei, zwi ḓo vha muhwalo kha vhaṅwe. Wahashu wa tshinnani ane a pfi Juraj Kaminský o amba nga ha zwo iteaho musi mushumo washu wo thivhelwa ngei Czechoslovakia ya kale, o ri: “Musi vhahulwane vhanzhi vho farwa, vhaṅwe vhe vha sala vha tshi khou ranga phanḓa zwivhidzoni na kha maisela vho thoma u vhetshela vhahuweleli milayo ya vhuḓifari na u vha vhudza zwithu zwine vha fanela u zwi ita na u sa zwi ita.” Yehova ho ngo ri ṋea ndugelo ya u vhetshela vhahashu milayo. Muthu ane a vhetshela vhahawe milayo i sa ṱoḓei u vha a tshi khou vhusa lutendo lwavho, hu si u vha tsireledza.—2 Vhakor. 1:24.

NI SONGO LITSHA U GWADAMELA YEHOVA

19. U ya nga 2 Koronika 32:7, 8, ndi ngani ri tshi nga vha na tshivhindi hu sa londwi zwine Sathane a ita?

19 Sathane Diabolo, swina ḽashu ḽihulwane u ḓo dzula a tshi lingedza u tovhola vhashumeli vha Yehova vha fhulufhedzeaho. (1 Pet. 5:8; Nzumb. 2:10) Sathane na vhashumeli vhawe vha ḓo lingedza u ri thivhela u shumela Yehova. Fhedzi a ri nga litshi u shumela Yehova naho ri tshi khou ofha! (Doit. 7:21) Yehova u na riṋe nahone u ḓo bvela phanḓa na u ri tikedza naho mushumo washu wo thivhelwa.—Vhalani 2 Koronika 32:7, 8.

20. No ḓiimisela u ita mini?

20 U nga ri ri nga ḓiimisela u edzisa tsumbo ya vhahashu vha ḓanani ḽa u thoma, vhe vha vhudza vhavhusi vha tshifhingani tshavho u ri: “Haṱulani inwi vhaṋe arali zwo luga phanḓa ha Mudzimu uri ri thetshelese inwi nṱhani ha u thetshelesa Mudzimu. Fhedzi riṋe ri nga si litshe u amba nga ha zwithu zwe ra zwi vhona na u zwi pfa.”—Mish. 4:19, 20.

LUIMBO 73 Ri Fhe Tshivhindi

^ phar. 5 Ri fanela u ita mini arali muvhuso wa ri thivhela uri ri si tsha gwadamela Yehova? Ino thero i ḓo haseledza zwine ra fanela u zwi ita na zwine a ro ngo fanela u zwi ita u itela uri ri sa litshe u shumela Yehova!

^ phar. 59 ṰHALUSO YA TSHIFANYISO: Zwinepe zwoṱhe zwi sumbedza Ṱhanzi dzine dza dzula fhethu he miṅwe ya mishumo yashu ya thivhelwa. Kha hetshi tshinepe, tshigwada tsha vhathu vha si gathi tsho fara miṱangano nḓuni ya wahashu ya u vhetshela thundu.

^ phar. 61 ṰHALUSO YA TSHIFANYISO: Wahashu wa tshifumakadzini (a re kha tshanḓa tsha monde) o faraho khaseledzo na mufumakadzi u ṱoḓa tshibuli tsha u amba nga ha Yehova.

^ phar. 63 ṰHALUSO YA TSHIFANYISO: Wahashu wa tshinnani ane a khou sengiswa nga mapholisa u hana u amba mafhungo nga ha tshivhidzo tshawe.