Pfukelani kha mafhungo

Pfukelani kha zwi re ngomu

‘Ngavhe A Tshi Vuledza Zwine Na Ṱoḓa U Zwi Ita’

‘Ngavhe A Tshi Vuledza Zwine Na Ṱoḓa U Zwi Ita’

“Ḓifhelwa nga Yehova, u ḓo U ṋea zwiné mbilu yau ya humbela zwone.”—PS. 37:4.

NYIMBO: 89, 140

1. Ndi phetho ifhio ine muswa a fanela u i dzhia nga ha vhumatshelo, fhedzi ndi ngani hu si na ṱhoḓea ya u vhilaela nga ho kalulaho? (Sedzani tshifanyiso tsha u thoma.)

KHAMUSI vhaswa vha nga tendelana nazwo uri musi muthu a sa athu u thoma lwendo, zwi sumbedza vhuṱali u thoma a dzudzanya hune a khou ya hone. Vhutshilo vhu fana na lwendo nahone musi u tshee muswa u vha na tshifhinga tshavhuḓi tsha u dzudzanya lwonolo lwendo. Vhukuma, zwi nga vha khaedu u lu dzudzanya. Muṅwe ṅwananyana ane a pfi Heather o ri: “Zwi a tshuwisa. Ni fanela u dzhia phetho ya zwine na ḓo zwi ita vhutshiloni haṋu hoṱhe.” Fhedzi ivhani na tshivhindi. Yehova o vhudza vhathu vhawe a ri: “U songo [vhilaela]; ngauri Mudzimu wau ndi Nṋe. Ndi ḓo U khwaṱhisa, ndi ḓo U farisa.”—Yes. 41:10.

2. Ni zwi ḓivha hani uri Yehova u ṱoḓa ni tshi dzudzanya zwavhuḓi vhumatshelo?

2 Yehova u ni ṱuṱuwedza uri ni ite nzudzanyo ya vhuṱali nga ha vhumatshelo. (Muh. 12:1; Mat. 6:20) U ṱoḓa ni tshi takala. Ngauri ri a kona u vhona, u pfa na u thetshela zwe a zwi sika. Dovhani ni ṱhogomele nḓila ine a ri funa ngayo na u ri funza nḓila ya khwine ine ra fanela u tshila ngayo. Yehova u amba zwi tevhelaho kha vhane vha landula nyeletshedzo yawe: “[No] nanga zwine Nṋe ndi si zwi fune. . . . vhalanda vhanga vha ḓo takala, inwi ni tshi khou shona. Ngangoho vhalanda vhanga vha ḓo fhululedza vha tshi ḓi-phiṋa.” (Yes. 65:12-14) Zwi rendisa  Yehova musi vhathu vhawe vha tshi dzhia phetho dza vhuṱali vhutshiloni.—Mir. 27:11.

NZUDZANYO DZINE DZA ḒO ITA URI NI TAKALE

3. Yehova u ṱoḓa ni tshi ita mini?

3 Yehova u ṱoḓa ni tshi ita nzudzanyo dzifhio? U itela uri ni takale, ni fanela u mu ḓivha na u mu shumela nga u fulufhedzea. (Ps. 128:1; Mat. 5:3) Zwenezwi zwo fhambana na zwipuka zwe a zwi sika, mushumo wa zwipuka ndi u ḽa, u nwa na u beba vhana. Mudzimu u ṱoḓa ni tshi takala nga u dzudzanya zwithu zwi fhiraho zwine zwa takadza zwipuka. Musiki waṋu ndi “Mudzimu wa lufuno” nahone ndi “Mudzimu o takalaho” we a sika vhathu a tshi “ḓi-fanyisa.” (2 Vhakor. 13:11; 1 Tim. 1:11; Gen. 1:27) Ni ḓo takala musi ni tshi edzisa Mudzimu washu wa lufuno. Naa no no vhuya na tshenzhela vhungoho ha luṅwalo lune lwa ri: “U ṋea zwi ḓisa dakalo ḽihulu u fhira u ṋewa”? (Mish. 20:35) Zwenezwo ndi ngoho. Nga zwenezwo, Yehova Mudzimu u ṱoḓa uri zwine ra zwi dzudzanya zwi livhise ṱhogomelo kha u funa vhaṅwe na u mu funa.—Vhalani Mateo 22:36-39.

4, 5. Ndi mini zwe zwa takadza Yesu?

4 Yesu Kristo o vhetshela vhaswa tsumbo yavhuḓi vhukuma. Musi a tshee muṱuku, a zwi timatimisi uri o vha a tshi tamba na u ḓitakadza. Ipfi ḽa Mudzimu ḽi amba uri “u sea hu na tshifhinga tshaho . . . na u tshina hu na tshifhinga tshaho.” (Muh. 3:4) Yesu o dovha a sendela tsini na Yehova nga u guda Maṅwalo. Musi e na miṅwaha ya 12, vhagudisi vha thembeleni vho vha vho mangadzwa nga “nḓila ine a pfesesa ngayo na nga phindulo dzawe” nga ha zwithu zwa lwa muya.—Luka 2:42, 46, 47.

5 Yesu o aluwa e muthu o takalaho. Ndi mini zwe zwa ita uri a takale? O vha a tshi zwi ḓivha uri kha zwithu zwoṱhe, Mudzimu o vha a tshi ṱoḓa uri a “ḓivhadze vhashai mafhungo maḓifha . . . na uri vho pofulaho vha [vhone]”. (Luka 4:18) U ita zwe Mudzimu a mu humbela zwo ita uri Yesu a takale. Psalme ya 40:8 yo sumbedza nḓila ye Yesu a ḓipfa ngayo musi i tshi ri: “Zwi ntakadzaho ndi u ita zwiné Iwe Mudzimu wanga wa zwi funa.” Yesu o vha a tshi takalela u funza vhathu nga ha Khotsi awe wa ṱaḓulu. (Vhalani Luka 10:21.) Musi o no funza muṅwe mufumakadzi nga ha vhurabeli ha ngoho, Yesu o vhudza vhafunziwa vhawe a ri: “Zwiḽiwa zwanga ndi u ita zwi funwaho nga o nthumaho na u vuledza mushumo wawe.” (Yoh. 4:31-34) U funa hawe Mudzimu na vhaṅwe zwo ita uri Yesu a takale. Na inwi zwi nga ita uri ni takale.

6. Ndi ngani zwi tshi vhuyedza u haseledza nga ha nzudzanyo dzaṋu na Vhakriste vhane vha vha na tshenzhelo?

6 Musi vha tshee vhaswa, Vhakriste vhanzhi vho vha vha tshi takalela u vula nḓila. Zwi nga vha zwavhuḓi uri ni haseledze navho nga ha zwiṅwe zwine na khou zwi dzudzanya. Bivhili i ri: “Maano o kunda nga u litsha u langana; zwi ḓo konadzea, vhaeletshedzi vha tshi anda.” (Mir. 15:22) Vhenevho vhahashu vha nga ni vhudza uri u vha tshumeloni ya tshifhinga tsho ḓalaho zwi ita uri ni wane ngudo ine ya ḓo ni vhuyedza vhutshilo haṋu hoṱhe. Yesu o guda zwithu zwinzhi kha Khotsi awe musi a tshee ṱaḓulu, nahone o bvela phanḓa a tshi guda musi e kha ḽifhasi. Sa tsumbo, o takadzwa nga u swikelela mbilu dza vhathu nga mafhungo maḓifha nahone o dovha a takadzwa nga u dzula a tshi fulufhedzea musi a tshi lingwa. (Vhalani Yesaya 50:4; Vhaheb. 5:8; 12:2) Kha ri ṱolisise maṅwe masia a tshumelo ya tshifhinga tsho ḓalaho ane a nga ita uri ni takale.

ZWI ITAHO URI, U ITA VHATHU VHAFUNZIWA ZWI VHE ZWI BVELELAHO

7. Ndi ngani vhathu vhanzhi vha tshi takalela u ita vhathu vhafunziwa?

7 Yesu o amba uri: “Iyani ni ite vhathu . . . vhafunziwa . . . ni vha funze.” (Mat. 28:19, 20) Arali no dzudzanya u ita vhathu vhafunziwa, ni ḓo vha no khetha buḓo ḽavhuḓi ḽine ḽa rendisa Mudzimu. Sa buḓo ḽiṅwe na ḽiṅwe, zwi dzhia tshifhinga uri ni vhe na vhutsila. Muṅwe muswa ane a pfi Timothy ane a kha ḓi tou bva u vula nḓila o ri: “Ndi takalela u shumela Yehova lwa tshifhinga tsho ḓalaho ngauri ndi nḓila ine  nda sumbedza ngayo uri ndi a mu funa. Mathomoni, zwo vha zwi tshi nkonḓela u vha na pfunzo dza Bivhili, fhedzi musi ndi tshi pfulutshela kha iṅwe tsimu ndo thoma u vha na pfunzo dzi si gathi nga ṅwedzi muthihi. Muṅwe wa vhagudiswa vhanga o thoma u ḓa Holoni ya Muvhuso. Musi ndo no ya Tshikoloni Tsha Bivhili Tsha Vhahashu Vha Tshinnani Vha Songo Vhingaho * tshe tsha dzhia miṅwedzi mivhili, ndo ṋewa mushumo muswa nahone ndo kona u thoma pfunzo nṋa. Ndi takalela u funza vhathu, samusi ndi tshi kona u vhona uri muya mukhethwa u khou vha shandula.”—1 Vhathes. 2:19.

8. Vhaṅwe vhaswa vha Vhakriste vho shela hani mulenzhe nga vhuḓalo kha u ita vhathu vhafunziwa?

8 Vhaṅwe vhaswa vha Vhakriste vho guda luṅwe luambo. Sa tsumbo, Jacob ane a bva ngei Amerika Devhula o ṅwala uri: “Musi ndi na miṅwaha ya sumbe, vhunzhi ha vhana vhe nda vha ndi tshi dzhena navho kilasini vho vha vhe Vhavietnam. Ndo vha ndi tshi ṱoḓa u vha vhudza nga ha Yehova, nga murahu ha tshifhinganyana ndo guda luambo lwavho. Kanzhi ndo vha ndi tshi guda nga u vhambedza khandiso dza Tshiingamo tsha Luisimane na tsha Luvietnam. Ndo dovha nda vhumba vhukonani na vhathu vha tshivhidzoni tsha Luvietnam tsha tsini. Ndo thoma u vula nḓila ndi na miṅwaha ya 18. Nga murahu, ndo ya Tshikoloni Tsha Bivhili Tsha Vhahashu Vha Tshinnani Vha Songo Vhingaho. Zwenezwo zwo nthusa vhukuma samusi ndi tshi khou vula nḓila kha tshigwada tsha Luvietnam hune nda vha muhulwane ndi ndoṱhe. Vhathu vhanzhi vhane vha amba Luvietnam vho mangadzwa nga uri ndo guda luambo lwavho. Vha a mmbidza miḓini yavho nahone kanzhi ndi guda navho Bivhili. Vhaṅwe vhavho vho lovhedzwa.”—Vhambedzani na Mishumo 2:7, 8.

9. Mushumo wa u ita vhathu vhafunziwa u ni gudisa mini?

9 U ita vhathu vhafunziwa ndi pfunzo yavhuḓi vhukuma ine ya ni gudisa uri ni ḓowele u shuma, u davhidzana, u vha na tshivhindi na vhulenda. (Mir. 21:5; 2 Tim. 2:24) Fhedzi u ita vhathu vhafunziwa zwi ita uri ni takale ngauri ni guda nḓila ine na nga imelela ngayo zwine na zwi tenda ni tshi shumisa Maṅwalo. Ni dovha na guda nḓila ine na nga shumisana ngayo na Yehova.—1 Vhakor. 3:9.

10. Ni nga ita hani uri ni takale kha u ita vhathu vhafunziwa naho vha sa iti mvelaphanḓa?

10 Naho hu na vhathu vhaṱuku tsimuni yaṋu vhane vha ṱanganedza mafhungo maḓifha, ni nga takalela u ita vhathu vhafunziwa. Mushumo wa u ita vhafunziwa ndi mushumo wa vhathu vhoṱhe. Tshivhidzo tshoṱhe tshi huwelela kha vhathu vha mbilu dzavhuḓi. Naho wahashu muthihi a tshi nga wana muthu o raloho nahone mafheleloni a vha mufunziwa, tshivhidzo tshoṱhe tshi vha tsho shela mulenzhe kha u ṱoḓa onoyo muthu nahone vhoṱhe vha a takala. Sa tsumbo, Brandon o fhedza miṅwaha ya ṱahe a tshi khou vula nḓila tsimuni ya vhathu vha si na dzangalelo. O ri: “Ndi takalela u huwelela mafhungo maḓifha ngauri ndi zwe Yehova a ri humbela uri ri zwi ite. Ndo thoma u vula nḓila ndi tshi tou fhedza tshikolo. Ndi takalela u ṱuṱuwedza vhaswa tshivhidzoni na u vhona vha tshi ita mvelaphanḓa ya lwa muya. Musi ndi tshi vhuya Tshikoloni Tsha Bivhili Tsha Vhahashu Vha Tshinnani Vha Songo Vhingaho, ndo ṋewa mushumo muswa wa u vula nḓila. Ndi ngoho uri a thi athu u wana muthu na muthihi tsimuni we a ita mvelaphanḓa u swika a tshi lovhedzwa, fhedzi vhaṅwe vho vha wana. Ndi a takala uri ndi khou shela mulenzhe nga vhuḓalo kha mushumo wa u ita vhathu vhafunziwa.”—Muh. 11:6.

HUNE ZWE NA DZUDZANYA ZWA NGA NI LIVHISA HONE

11. Ndi ifhio iṅwe nḓila ya u shumela Yehova ye vhaswa vhanzhi vha i takalela?

11 Hu na zwibuli zwinzhi zwa u shumela Yehova. Sa tsumbo, vhaswa vhanzhi vha shela mulenzhe nga u ḓifunela kha mushumo wa u fhaṱa. Hu ṱoḓea Holo nnzhi dza Muvhuso. U fhaṱa  dzenedzo Holo ndi mushumo mukhethwa nahone u rendisa Mudzimu na u ita uri ni takale. Samusi hu na dziṅwe tshumelo khethwa, u ḓikonanya na vhane ra shuma navho kha yeneyo mishumo zwi ita uri ri takale. Mushumo wa u fhaṱa na wone u a gudisa vhukuma samusi u tshi ita uri ni ṱhogomele khombo, u vha mushumi wa biko na u shumisana na vhalavhelesi.

Phaṱhutshedzo nnzhi dzo lindela vhane vha dzhenela tshumelo ya tshifhinga tsho ḓalaho (Sedzani dziphara 11-13)

12. Vhuvulanḓila vhu ita uri hu vhe na zwibuli zwifhio?

12 Muṅwe wahashu ane a pfi Kevin o ri: “U bva ndi tshee muṱuku, ndo vha ndi tshi ṱoḓa u shumela Yehova lwa tshifhinga tsho ḓalaho. Mafheleloni ndo thoma u vula nḓila musi ndi na miṅwaha ya 19. Ndo vha ndi tshi ita mushumo wa tshifhinganyana wa u ḓitshidza kha wahashu we a vha e mufhaṱi. Ndo guda u dzhenisa ṱhanga, mafasiṱere na miṋango. Nga murahu, ndo fhedza miṅwaha mivhili ndi tshi shuma na tshigwada tshine tsha thusa vho welwaho nga khombo ya ḓumbumazwikule, u fhaṱa Holo dza Muvhuso na mahaya a vhahashu. Musi ndi tshi pfa uri hu na ṱhoḓea ya vhafhaṱi Afurika Tshipembe, ndo ita khumbelo nahone nda rambiwa uri ndi ye hone. Lwa vhege dzi si gathi, ro vha ri tshi ya u fhaṱa Holo dza Muvhuso dzo fhamba-fhambanaho Afurika. Tshigwada tshine nda shuma natsho tshi tou nga muṱa. Ri dzula roṱhe, u guda roṱhe Bivhili na u shuma roṱhe. Ndi dovha nda takalela u huwelela na vhahashu vha henefho vhege iṅwe na iṅwe. Nzudzanyo dze nda dzi ita musi ndi tshee muṱuku dzo ita uri ndi takale nga nḓila ye nda vha ndi songo i lavhelela.”

13. Ndi ngani vhaswa vha tshi takalela tshumelo ya Bethele?

13 Vhaṅwe vhe vha ita nzudzanyo ya u shumela Yehova lwa tshifhinga tsho ḓalaho vho no vha miraḓo ya Bethele. Tshumelo ya Bethele i a takadza vhukuma ngauri zwoṱhe zwine na zwi ita ni vha ni tshi khou itela Yehova. Muṱa wa Bethele u thusa nga u ṋea zwiḽiwa zwa muya.  Dustin ane a vha muraḓo wa Bethele o ri: “U vha tshumeloni ya tshifhinga tsho ḓalaho ho vha hu tshipikwa tshanga u bva ndi na miṅwaha ya ṱahe nahone ndo thoma u vula nḓila ndi tshi fhedza tshikolo. Nga murahu ha ṅwaha na hafu, ndo wana khumbelo ya u ya u shuma Bethele he nda guda u shumisa mutshini wa u gandisa nahone nga murahu ndo shuma nga dzikhomphyutha. Samusi ndi Bethele, ndi takalela u vha muthu wa u thoma u pfa nga ha mvelaphanḓa ine ya khou itwa ya u ita vhathu vhafunziwa shangoni ḽoṱhe. Ndi takalela u shuma henefha ngauri zwine ra zwi ita zwi thusa vhathu uri vha sendele tsini na Yehova.”

NDI NZUDZANYO DZIFHIO DZINE NA ḒO DZI ITA NGA HA VHUMATSHELO?

14. Ni nga dzudzanya hani u dzhenela tshumelo ya tshifhinga tsho ḓalaho?

14 Ni nga dzudzanya hani u vha muḓinḓa wa Mukriste wa tshifhinga tsho ḓalaho? Zwa ndeme vhukuma, pfaneleo dza lwa muya dzi ḓo ni thusa uri ni bvelele kha u shumela Yehova nga vhuḓalo. Nga zwenezwo, fhisetshelani u guda Ipfi ḽa Mudzimu, elekanyani nga ho dzikaho nga ha zwine ḽa amba zwone nahone ni ṱoḓe nḓila ine na nga sumbedza ngayo lutendo lwaṋu miṱanganoni ya tshivhidzo. Musi ni tshee tshikoloni, ni nga vha na tshenzhelo na vhutsila sa muhuweleli wa mafhungo maḓifha. Gudani u vha na dzangalelo kha vhathu nga u vha vhudzisa mavhonele avho na u vha thetshelesa musi vha tshi ni fhindula. Ni nga dovha na ita miṅwe mishumo tshivhidzoni i ngaho u thusa u kunakisa na u lugisa zwithu zwo tshinyalaho Holoni ya Muvhuso. Yehova u takalela u shumisa vhane vha ḓiṱukufhadza na vho ḓiimiselaho. (Vhalani Psalme ya 110:3; Mish. 6:1-3) Muapostola Paulo o ramba Timotheo tshumeloni ya vhurumiwa ngauri “o vha e na bvumo ḽavhuḓi kha vhahawe.”—Mish. 16:1-5.

15. Ni nga ita nzudzanyo ifhio u itela uri ni kone u ḓitshidza?

15 Vhashumeli vha tshifhinga tsho ḓalaho kanzhi vha fanela u vha na mushumo wa u ḓitshidza. (Mish. 18:2, 3) Khamusi u ita khoso i sa dzhii tshifhinga tshilapfu zwi nga ni thusa uri ni wane mushumo wa tshifhinganyana une wa sa ite uri ni dzule no farakanea. Samusi ni tshi khou ita dzenedzo nzudzanyo, zwi nga vha zwavhuḓi uri ni ambe na mulavhelesi wa ḽiisela na vhavulanḓila vha henefho. Vha vhudziseni uri ndi ufhio mushumo une wa nga itwa nga vhavulanḓila. Bivhili i amba uri, “kumedzela Yehova mishumo yau yoṱhe, uri hu vulee zwine wa zwi elekanya.”—Mir. 16:3; 20:18.

16. U vha tshumeloni ya tshifhinga tsho ḓalaho ni tshee muswa zwi ni lugiselela hani u hwala vhuṅwe vhuḓifhinduleli ha tshifhingani tshi ḓaho?

16 Ni nga vha na vhungoho ha uri Yehova u ṱoḓa ni tshi ‘farelela no khwaṱha’ u itela uri ni vhe na vhumatshelo vhu takadzaho. (Vhalani 1 Timotheo 6:18, 19.) Tshumelo ya tshifhinga tsho ḓalaho i ita uri ni vhe na vhukonani na vhatendi nga inwi vhane vha vha tshumeloni ya tshifhinga tsho ḓalaho nahone i ni thusa uri ni vhe Mukriste o vhibvaho. Vhanzhi vho wana uri u vha tshumeloni ya tshifhinga tsho ḓalaho musi vha tshee vhaswa zwo vha thusa uri vha vhe na mbingano i bvelelaho. Kanzhi, vhathu vhe vha vula nḓila musi vha sa athu u vha mbinganoni, vho kona u bvela phanḓa na yeneyo tshumelo vhoṱhe sa vhavhingani.—Vharoma 16:3, 4.

17, 18. U dzudzanya zwi fanela u kwama hani mbilu?

17 U dzudzanya zwi fanela u bva mbiluni. Psalme ya 20:4 i amba zwi tevhelaho nga ha Yehova: “Nga a U ṋee zwiné mbilu yau ya zwi ṱoḓa; nga a vuledze zwiné wa funa u ita.” Nga zwenezwo, humbulani nga ha zwine na ṱoḓa u zwi ita nga vhutshilo haṋu. Ṱhogomelani zwine Yehova a khou zwi ita misini yashu na nḓila ine na nga shela ngayo mulenzhe tshumeloni yawe. Nga zwenezwo, dzudzanyani u ita zwine zwa ḓo mu takadza.

18 U vha tshumeloni ya Yehova Mudzimu ya tshifhinga tsho ḓalaho zwi ḓo ni ita uri ni takale ngauri ndi nḓila ya vhutshilo ine ya mu rendisa. Vhukuma, “ḓifhelwa nga Yehova, u ḓo U ṋea zwiné mbilu yau ya humbela zwone.”—Ps. 37:4.

^ phar. 7 Zwino tshi vho vhidzwa Tshikolo tsha Vhahuweleli vha Muvhuso.