Pfukelani kha mafhungo

Pfukelani kha zwi re ngomu

 THERO 1

“U Songo Vhilaela, Ngauri Ndi Mudzimu Wau”

“U Songo Vhilaela, Ngauri Ndi Mudzimu Wau”

“U songo ofha, ngauri ndi na iwe. U songo vhilaela, ngauri ndi Mudzimu wau. Ndi ḓo u khwaṱhisa, ndi ḓo u thusa.”—YES. 41:10NW.

LUIMBO 7 Yehova Ndi Maanḓa Ashu

MANWELEDZO *

1-2. (a) Mulaedza u re kha Yesaya 41:10 wo kwama hani Yoshiko? (b) Ndi nnyi ane a nga vhuyelwa nga mulaedza we Yehova a u ṅwala kha Yesaya 41:10?

WAHASHU wa tshifumakadzini a fulufhedzeaho ane a pfi Yoshiko o vhudzwa mafhungo a si avhuḓi. Dokotela ḽawe ḽo mu vhudza uri o salelwa nga vhege dzi si gathi dza u tshila. O aravha hani? Yoshiko o humbula luṅwalo lwe a vha a tshi lu funesa lwa Yesaya 41:10. (Read.) Lu ri: “U songo ofha, ngauri ndi na iwe. U songo vhilaela, ngauri ndi Mudzimu wau. Ndi ḓo u khwaṱhisa, ndi ḓo u thusa, Ndi ḓo u fara nga tshanḓa tshanga tsha u ḽa tsha u luga.” O vhudza dokotela ḽawe uri ha ofhi nga nṱhani ha uri Yehova u ḓo mu farisa. * Mulaedza u khuthadzaho une wa vha kha yeneyo ndimana wo thusa wahashu uri a fulufhele Yehova nga ho fhelelaho nahone na riṋe u nga ri thusa uri ri dzule ro dzika musi ro sedzana na vhuimo vhu konḓaho. U itela u pfesesa nḓila ine wonoyo mulaedza wa nga ri thusa ngayo, kha ri thome nga u ṱolisisa uri ndi ngani Mudzimu o ṋea Yesaya wonoyo mulaedza.

2 Yehova o vhudza Yesaya uri a ṅwale enea maipfi uri a khuthadze Vhayuda vhe vha vha vha tshi ḓo ya vhuthubwani ngei Babele. Yehova ho ngo ṅwalela Vhayuda vhe vha vha vha tshi ḓo ya vhuthubwani fhedzi, fhedzi o ṅwalela na riṋe. (Yes. 40:8; Vharoma 15:4) Ri khou tshila kha “zwifhinga zwi lemelaho zwi konḓaho u sedzana nazwo” nahone ri ṱoḓa khuthadzo ine ya wanala kha bugu ya Yesaya u fhira naho hu lini.—2 Tim. 3:1.

3. (a) Ndi mafulufhedziso afhio ane ra a wana kha luṅwalo lwa Yesaya 41:10 he ndimana yashu ya ṅwaha wa 2019 ya thewa hone? (b) Ndi ngani ri tshi ṱoḓa eneo mafulufhedziso?

 3 Kha ino thero, ri ḓo livhisa ṱhogomelo kha mafulufhedziso mararu ane a wanala kha Yesaya 41:10 ane a khwaṱhisa lutendo lwashu kha Yehova: (1) Yehova u ḓo vha na riṋe, (2) ndi Mudzimu washu, nahone (3) u ḓo ri thusa. Na riṋe ri ṱoḓa eneo mafulufhedziso * ngauri ri sedzana na thaidzo vhutshiloni u fana na Yoshiko. Ri dovha ra vha na thaidzo nga nṱhani ha zwithu zwi si zwavhuḓi zwine zwa itea kha ḽino shango. Vhaṅwe vhashu ri khou konḓelela u tovholwa nga mivhuso i re na maanḓa. Kha ri ṱolisise eneo mafulufhedziso nga ḽithihi nga ḽithihi.

“NDI NA IWE”

4. (a) Ndi khwaṱhisedzo ifhio ya u thoma ine ra ḓo i ṱolisisa? (Sedzani ṱhaluso i re magumoni.) (b) Yehova u ḓipfa hani nga ha riṋe? (c) Maipfi a Mudzimu a ita uri ni ḓipfe hani?

4 Yehova u thoma nga u ri khwaṱhisedza nga maipfi ane a ri: “U songo ofha, ngauri ndi na iwe.” * Yehova u ri sumbedza uri u na riṋe nga uri ṋea tshifhinga tshawe na u ri funa. Ṱhogomelani nḓila ine a ḓipfa ngayo nga ha riṋe. O ri: “Ndi wana Ú tshi tamisa, Ú wa thengo khulu; Nṋe ndi a U funa.” (Yes. 43:4) A hu na tshithu na tshithihi tshine tsha nga ita uri Yehova a litshe u funa vhane vha mu shumela ngauri u a fulufhedzea. (Yes. 54:10) Lufuno lwawe na u vha hawe na vhukonani zwi ri ṋea tshivhindi. U ḓo ri tsireledza u fana na nḓila ye a tsireledza ngayo Abramu (Abrahamu) khonani yawe. Yehova o mu vhudza uri: “Abramu, U songo ofha! Tshiṱangu tshau ndi Nṋe.”—Gen. 15:1.

Nga thuso ya Yehova, ri nga kona u konḓelela thaidzo dzine dza nga milambo ine ya kumba na mulilo muhulu (Sedzani dziphara 5-6) *

5-6. (a) Ri zwi ḓivha hani uri Yehova u ṱoḓa uri thusa musi ro sedzana na thaidzo? (b) Ri guda mini kha tsumbo ya Yoshiko?

5 Ri a zwi ḓivha uri Yehova u na dzangalelo kha uri thusa musi ro sedzana na vhuimo vhu konḓaho. O fulufhedzisa vhathu vhawe uri: “U tshi dzhena maḓini, ndi na iwe; U tshi wela milambo, a U nga kumbiwi. U tshi tshimbila vhukati ha mulilo, a U nga swi; khavhu a i  nga U fhisi.” (Yes. 43:2) Zwenezwo zwi amba mini?

6 Yehova a nga si fhelise thaidzo dzine dza ri konḓisela vhutshilo, fhedzi a nga si tendele thaidzo dzine dza nga “milambo” dzi tshi ri kumba kana milingo ine ya nga ‘mililo’ i tshi ri huvhadza lwa tshoṱhe. Uri fulufhedzisa uri u ḓo vha na riṋe na u ri thusa u fhira vhukati ha dzenedzo thaidzo. Yehova u ḓo ita mini? U ḓo ri thusa uri ri si ofhese u itela uri ri kone u dzula ri tshi fulufhedzea khae naho ra nga sedzana na lufu. (Yes. 41:13) Yoshiko we a bulwa mathomoni o vhona vhungoho ha eneo mafhungo. Ṅwananyana wawe o ri: “Ro mangadzwa nga nḓila ye Mme anga vha vha vho dzika ngayo. Ro zwi vhona uri Yehova o vha ṋea mulalo. Mme anga vho amba na vhaongi na vhalwadze nga ha Yehova na mafulufhedziso awe u swika vha tshi lovha.” Ri guda mini kha tsumbo ya Yoshiko? Musi ri tshi fulufhela fulufhedziso ḽa Mudzimu ḽine ḽa ri, “ndi na iwe,” na riṋe ri ḓo kona u vha na tshivhindi na u vha na nungo musi ro sedzana na thaidzo.

“NDI MUDZIMU WAU”

7-8. (a) Ndi khwaṱhisedzo ifhio ya vhuvhili ine ra ḓo i haseledza, nahone i amba mini? (b) Ndi ngani Yehova o vhudza Vhayuda vho thubwaho uri: “U songo vhilaela”? (c) Ndi afhio maipfi ane a wanala kha Yesaya 46:3, 4 e a thusa vhathu vha Mudzimu uri vha si ofhe?

7 Ṱhogomelani khwaṱhisedzo ya vhuvhili ye ya ṅwaliwa nga Yesaya: “U songo vhilaela, ngauri ndi Mudzimu wau.” U sa vhilaela zwi amba mini? Ipfi u “vhilaela” ḽi ambela kha “u dzula u tshi sedza murahu ngauri u khou ofha uri hu na muthu kana tshithu tshine tsha nga u huvhadza” kana “u tshuwa u fana na muthu ane a vha khomboni.”

8 Ndi ngani Yehova o vhudza Vhayuda vhe vha vha vha tshi ḓo ya vhuthubwani ngei Babele uri vha songo “vhilaela”? Ndi ngauri o vha a tshi zwi ḓivha uri vhathu vha ḽeneḽo shango vho vha vha tshi ḓo dzhenwa nga nyofho. Ndi mini zwe zwa vha zwi tshi ḓo ita uri vha ofhe? Musi miṅwaha ya 70 i tsini na u fhela Vhayuda vhe vhuthubwani, Babele ḽo vha ḽi tshi ḓo vutshelwa nga mmbi ya Meda na Peresia ye ya vha i na maanḓa. Yehova o vha a tshi ḓo shumisa yeneyo mmbi u itela u vhofholola vhathu vhawe vhuthubwani ha Babele. (Yes. 41:2-4) Musi Vhababele na vhathu vha dziṅwe tshaka vhe vha vha vha tshi khou tshila nga tshenetshiḽa tshifhinga vha tshi vhona uri swina ḽavho ḽi tsini, vho lingedza u khuthadzana nga u amba uri: “Konḓelela.” Vho dovha vha ḓiitela midzimu ya zwifanyiso vha tshi fulufhela uri i ḓo vha tsireledza. (Yes. 41:5-7) Nga tshenetsho tshifhinga, Yehova o khuthadza Vhayuda vho thubwaho uri: “Iwe Isiraele . . . muḓinḓa wanga [u fhambana na vhahura vha vheiwe] . . . U songo vhilaela, ngauri ndi Mudzimu wau.” (Yes. 41:8-10) Ṱhogomelani uri Yehova o ri: “Ndi Mudzimu wau.” Nga eneo maipfi, Yehova o vha a tshi khou khwaṱhisedza vhagwadameli vhawe vha fulufhedzeaho uri ho ngo vha hangwa, u kha ḓi vha Mudzimu wavho navho vha kha ḓi vha vhathu vhawe. O vha vhudza uri: “Ndi ḓo ḓi ni hwala . . . nda ni hanyisa.” A zwi timatimisi uri eneo maipfi a khuthadzaho na a ṱuṱuwedzaho o khwaṱhisa Vhayuda vhe vha vha vhe vhuthubwani.—Vhalani Yesaya 46:3, 4.

9-10. Ndi ngani ri sa faneli u ofha? Fanyisani.

9 Vhathu vha vhilaedziswa nga zwiimo zwa ḽino shango zwine zwa khou ṋaṋa u vhifha u fhira naho hu lini. Ndi ngoho uri na riṋe ri a kwamea nga dzenedzo thaidzo. Fhedzi a ri tei u ofha. Yehova u ri vhudza uri: “Ndi Mudzimu wau.” Ndi ngani eneo maipfi a tshiitisi tshavhuḓi tsha uri ri dzule ro dzika?

10 Ṱhogomelani tshifanyiso tshi tevhelaho: Jim na Ben vho ṋamela bufho ḽine ḽa khou  iswa ngeno na ngei nga ḓumbu. Musi ḓumbu ḽi tshi khou isa bufho nṱha na fhasi, mureili wa bufho u vhudza vhathu uri: “Vhofhani mabannda a khwaṱhe. Lwa tshifhinganyana, ri ḓo fhufha fhethu hune a zwo ngo leluwa u fhufha.” Jim o thoma u vhilaela nga ho kalulaho. Fhedzi mureili wa bufho o dovha a ri: “Ni songo vhilaela. Ndi nṋe mureili wa vhoiwe.” Jim o dzungudza ṱhoho a ri: “Ndi khwaṱhisedzo ya mufuda-ḓe iyi?” Fhedzi o ṱhogomela uri Ben o vha a sa khou vhilaela na luthihi. Jim u mu vhudzisa uri: “Ndi ngani no dzika?” Ben a ṅwethuwa nahone a ri: “Ndi ngauri hoyu mureili ndi mu ḓivha nda mu fhedza. Ndi khotsi anga! Irini ndi ni vhudze nga ha khotsi anga. Ndi na vhungoho ha uri musi ni tshi vha ḓivha na u ḓivha zwine vha kona u ita, na inwi ni ḓo dzika.”

11. Ri guda mini kha tshifanyiso tsha vhaṋameli vhavhili vha bufho?

11 Ri guda mini kha tshenetshi tshifanyiso? U fana na Ben, na riṋe ro dzika nga nṱhani ha uri ri ḓivha zwavhuḓi Yehova ane a vha Khotsi ashu wa ṱaḓulu. Ri a zwi ḓivha uri u ḓo ri thusa uri ri konḓelele thaidzo dzine ra sedzana nadzo kha ano maḓuvha a vhufhelo. (Yes. 35:4) Ri fulufhela Yehova uri ri dzule ro dzika ngeno shango ḽi tshi khou ofha. (Yes. 30:15) Ri dovha ra fana na Ben musi ri tshi vhudza vhahura vhashu nga ha zwiitisi zwine zwa ita uri ri vhe na fulufhelo kha Mudzimu. Navho vha nga vha na vhungoho ha uri Yehova u ḓo vha tikedza hu sa londwi thaidzo dzine vha sedzana nadzo.

“NDI ḒO U KHWAṰHISA, NDI ḒO U THUSA”

12. (a) Ndi khwaṱhisedzo ifhio ya vhuraru ine ra ḓo i haseledza? (b) Maipfi ane a ri “tshanḓa” tsha Yehova a ri humbudza mbuno ifhio ya ndeme?

12 Ṱhogomelani khwaṱhisedzo ya vhuraru ye ya ṅwalwa nga Yesaya: “Ndi ḓo u khwaṱhisa, ndi ḓo u thusa.” Yesaya o vha o dzula o amba nga ha nḓila ine Yehova a ḓo khwaṱhisa vhathu  vhawe ngayo, o ri: “Yehova; u ḓa é wa maanḓa; tshanḓa tshawe tshi mu konisa u vhusa.” (Yes. 40:10) Bivhili i anzela u shumisa ipfi “tshanḓa” zwine zwa ambela kha maanḓa. Maipfi ane a ri “tshanḓa tshawe tshi mu konisa u vhusa” a ri humbudza uri Yehova ndi Khosi i re na maanḓa. O shumisa maanḓa awe u itela u tikedza na u imelela vhashumeli vhawe vha tshifhingani tsho fhiraho nahone u bvela phanḓa a tshi khwaṱhisa na u tsireledza vhane vha mu fulufhela musalauno.—Doit. 1:30, 31; Yes. 43:10.

Mafumo oṱhe a nga si kone u lwa na tshanḓa tsha Yehova tsha maanḓa tshine tsha tsireledza (Sedzani dziphara 12-16) *

13. (a) Ndi lini hune Yehova a ri khwaṱhisa? (b) Ndi fulufhedziso ḽifhio ḽine ḽa ita uri ri vhe na nungo?

13 Musi maswina a tshi ri tovhola, Yehova u ita zwe a zwi fulufhedzisa: “Ndi ḓo u khwaṱhisa.” Kha maṅwe mashango, maswina ashu a lingedza u thivhela mushumo washu wa u huwelela kana ndangulo yashu. Fhedzi a ri vhilaedziswi nga u vutshelwa ho raloho. Yehova o ri ṋea khwaṱhisedzo ine ya ita uri ri vhe na nungo. U ri fulufhedzisa u ri: “Mafumo oṱhe a fúlelwaho u lwa na iwe ha nga koni tshithu.” (Yes. 54:17) Ḽeneḽo fulufhedziso ḽi ri humbudza mbuno tharu dza ndeme.

14. Ndi ngani zwi sa ri mangadzi uri maswina a Mudzimu a a ri vutshela?

14 Ya u thoma, sa vhatevheli vha Kristo ri lavhelela u vhengwa. (Mat. 10:22) Yesu o dzula o amba uri maḓuvhani a vhufhelo vhafunziwa vhawe vha ḓo tovholwa lu vhavhaho. (Mat. 24:9; Yoh. 15:20) Ya vhuvhili, vhuporofita ha Yesaya ho dzula ho amba uri maswina ashu a nga si sokou ri vhenga fhedzi, fhedzi a ḓo shumisa zwihali zwo fhamba-fhambanaho. Zwenezwo zwihali zwi katela vhufhura, mazwifhi na u tovholwa. (Mat. 5:11) Yehova a nga si thivhele maswina ashu kha u shumisa zwenezwo zwihali u itela u lwa na riṋe. (Vhaef. 6:12; Nzumb. 12:17) Fhedzi a ri tei u ofha. Ndi ngani?

15-16. (a) Ndi ifhio mbuno ya vhuraru ine ra fanela u i humbula, nahone Yesaya 25:4, 5 i tikedza hani yeneyi mbuno? (b) Yesaya 41:11, 12 i ṱalusa hani mvelelo dza vhane vha lwa na riṋe?

15 Ṱhogomelani mbuno ya vhuraru ine ra fanela u i humbula. Yehova o amba uri “mafumo  oṱhe” ane a shumiswa kha riṋe “ha nga koni tshithu.” U fana na nḓila ine luvhondo lwa ri tsireledza ngayo kha mvula khulu, na Yehova u ri tsireledza kha “mbiti dza vhahali.” (Vhalani Yesaya 25:4, 5.) Maswina ashu a nga si kone uri huvhadza lwa tshoṱhe.—Yes. 65:17.

16 Yehova u dovha a khwaṱhisa fulufhelo ḽashu nga uri vhudza zwine zwa ḓo itea kha vhane vha ri “vutshela.” (Vhalani Yesaya 41:11, 12.) Hu sa londwi nḓila ine maswina ashu a lwa ngayo na riṋe kana uri nndwa ndi nngafhani, mvelelo dzi a fana: Maswina oṱhe a vhathu vha Mudzimu a ḓo fheliswa a “lovha.”

U FULUFHELA YEHOVA NGA HO ENGEDZEAHO

Ri nga fulufhela Yehova nga ho fhelelaho nga u vhala nga hae Bivhilini tshifhinga tshoṱhe (Sedzani dziphara 17-18) *

17-18. (a) U vhala Bivhili zwi ita hani uri ni fulufhele Mudzimu nga ho engedzeaho? Ṋeani tsumbo. (b) U elekanya nga ha ndimana ya ṅwaha wa 2019 zwi ri thusa hani?

17 U ḓivha Yehova khwine zwi ita uri ri mu fulufhele nga ho engedzeaho. Nahone nḓila ine ra nga mu ḓivha ngayo zwavhuḓi ndi nga u vhala Bivhili nga vhuronwane na u elekanya nga ha zwe ra zwi vhala. Bivhili i na mafhungo ane a amba nga ha nḓila ye Yehova a tsireledza ngayo vhathu vhawe vha tshifhingani tsho fhiraho. Eneo mafhungo a ri khwaṱhisedza uri u ḓo ri ṱhogomela zwino.

18 Ṱhogomelani tsumbo yavhuḓi ye Yesaya a i shumisa u itela u fanyisa nḓila ine Yehova a ri tsireledza ngayo. O fanyisa Yehova na mulisa nahone vhashumeli vha Mudzimu a vha fanyisa na ngwana. Yesaya o amba zwi tevhelaho nga ha Yehova: “Dzingwana u ḓo dzi takula a dzi kuvhatedza.” (Yes. 40:11) Ri ḓipfa ro tsireledzea na u dzika musi Yehova a tshi ri kuvhatedza. U itela u ri thusa uri ri dzule ro dzika hu sa londwi thaidzo dzine ra sedzana nadzo, mulanda a fulufhedzeaho na wa vhuṱali o khetha Yesaya 41:10 sa ndimana ya ṅwaha wa 2019 ine ya ri, “U songo vhilaela, ngauri ndi Mudzimu wau.” Elekanyani nga ha eneo maipfi ane a khuthadza. A ḓo ni khwaṱhisa musi ni tshi sedzana na thaidzo tshifhingani tshi ḓaho.

LUIMBO 38 U Ḓo Ni Khwaṱhisa

^ phar. 5 Ndimana ya ṅwaha ya 2019 i ri ṋea zwiitisi zwiraru zwa uri ndi ngani ri tshi fanela u dzula ro dzika naho ha nga itea zwithu zwi si zwavhuḓi kha ḽino shango kana kha riṋe. Ino thero i ḓo amba nga ha zwenezwo zwiitisi na uri thusa uri ri sa vhilaele nga ho kalulaho na uri ri fulufhele Yehova nga ho engedzeaho. Elekanyani nga ha ndimana ya ṅwaha. I rweleni ngomani arali zwi tshi konadzea. I ḓo ni thusa musi ni tshi sedzana na thaidzo tshifhingani tshi ḓaho.

^ phar. 3 Fulufhedziso ndi mafhungo ane a vha a ngoho a uri zwiṅwe zwithu zwi ḓo itea zwa vhukuma. Khwaṱhisedzo dzine Yehova a ri ṋea dzone dzi nga ita uri ri si vhilaele nga ho kalulaho nga ha thaidzo dzine ra sedzana nadzo vhutshiloni hashu.

^ phar. 4 Maipfi ane a ri “U songo ofha” a buliwa luraru kha Yesaya 41:10, 13 na 14. Dzenedzo ndimana dzi bula lunzhi ipfi “Ndi” (dzi tshi khou ambela kha Yehova). Ndi ngani Yehova o vhudza Yesaya uri a shumise ipfi “Ndi” lunzhi? U itela u ombedzela mbuno ya ndeme ya uri musi ri tshi fulufhela Yehova a ri vhi na nyofho nga maanḓa.

^ phar. 52 ṰHALUSO YA TSHIFANYISO: Miraḓo ya muṱa i sedzana na thaidzo mushumoni, thaidzo ya zwa mutakalo, vhuḓinḓani na tshikoloni.

^ phar. 54 ṰHALUSO YA TSHIFANYISO: Vhahashu a vha ofhi musi vha tshi ṱhaselwa nga mapholisa vho fara miṱangano yavho tshiphirini.

^ phar. 56 ṰHALUSO YA TSHIFANYISO: U vha na Vhurabeli Ha Muṱa tshifhinga tshoṱhe zwi ri thusa uri ri konḓelele.