Pfukelani kha mafhungo

Pfukelani kha zwi re ngomu

“Zwenezwi Zwithu U Zwi Kumedzele Vhanna Vha Fulufhedzeaho”

“Zwenezwi Zwithu U Zwi Kumedzele Vhanna Vha Fulufhedzeaho”

“Zwenezwi zwithu u zwi kumedzele vhanna vha fulufhedzeaho, uri na vhone vha kone u funza vhaṅwe.”—2 TIM. 2:2.

NYIMBO: 123, 53

1, 2. Vhathu vhanzhi vha dzhia hani mushumo wavho?

KANZHI vhathu vhanzhi vha humbula u nga mushumo une vha u ita ndi wone une wa ita uri vha vhonale vhe vha ndeme kana vhe si vha ndeme. Kha dziṅwe mvelele, musi ni tshi ṱoḓa u ḓivha muṅwe muthu khwine, mbudziso ya u thoma ine na i vhudzisa ndi uri, “Ni shuma sa mini?”

2 Nga zwiṅwe zwifhinga, Bivhili i ṱalusa vhathu nga mushumo we vha vha vha tshi u ita. I ṱalusa Mateo sa “muthelisi”; Simoni sa “musuki wa mikumba”; na Luka sa “ṅanga.” (Mat. 10:3; Mish. 10:6; Vhakol. 4:14) Nga zwiṅwe zwifhinga, Bivhili i amba nga ha mishumo ye vhathu vha i ita tshumeloni ya Yehova. Ri vhala nga ha Khosi Davida, muporofita Elia na muapostola Paulo. Vhenevha vhanna vho vha vha tshi dzhiela nṱha mushumo we vha ṋewa nga Mudzimu. Arali ri na ndugelo, na riṋe ri fanela u dzi dzhiela nṱha.

3. Ndi ngani hu na ṱhoḓea ya uri vhanna vhahulwane vha gudise vhanna vhaṱuku? (Sedzani tshifanyiso tsha u thoma.)

3 Vhunzhi hashu ri funa mushumo une ra u ita nahone ri ṱoḓa u bvela phanḓa ri tshi u ita. Zwi ṱungufhadzaho ndi uri ri a vha vhalala nahone ra si tsha kona u ita mushumo we ra vha ri tshi kona u u ita. (Muh. 1:4) Musalauno, yeneyi tshanduko yo konḓela vhathu vha Yehova. Mushumo wa vhathu vha Yehova u khou engedzea  vhukuma. Samusi hu na mishumo miswa na nḓila ntswa dza u i ita, kanzhi hu shumiswa thekinolodzhi ine ya khou shanduka u itela u ita yeneyo mishumo. Vhaṅwe vhanna vhahulwane vha nga wana zwi tshi konḓa u tshimbidzana na dzenedzo tshanduko. (Luka 5:39) Naho vhaṅwe vha tshi ḓivha thekinolodzhi, fhedzi vhaswa vha nga vha vhe na nungo na maanḓa u fhira vho no aluwaho. (Mir. 20:29) Nga zwenezwo, musi vhanna vhahulwane vha tshi gudisa vhanna vhaṱuku u hwala vhuḓifhinduleli, zwenezwo zwi a shuma nahone zwi sumbedza lufuno.—Vhalani Psalme ya 71:18.

4. Ndi ngani zwi tshi konḓela vhaṅwe vhanna vhahulwane uri vha ṋee vhaṅwe vhuḓifhinduleli havho? (Sedzani bogisi “Zwi Itaho Uri Vhaṅwe Vha Si Ṱoḓe U Ṋea Vhaṅwe Mushumo Wavho.”)

4 Vhane vha vha na vhuḓifhinduleli ho engedzeaho vha nga wana zwi tshi konḓa u ṋea vhanna vhaṱuku vhuḓifhinduleli havho. Vhaṅwe vha ofha u xelelwa nga ndugelo ine vha i takalela. Vhaṅwe vha vhilaedziswa nga uri vha ḓo xelelwa nga maanḓa a u langa nahone vha tenda uri vhaswa vha nga si kone u ita zwithu nga nḓila yavhuḓi. Vhaṅwe vha amba uri a vha na tshifhinga tsha u gudisa vhaṅwe. Kha ḽiṅwe sia, vhaswa vha fanela u sa fhela mbilu musi vha sa ṋewi vhuḓifhinduleli ho engedzeaho.

5. Ndi mbudziso dzifhio dzine ra ḓo dzi haseledza kha ino thero?

5 Kha ri ṱolisise mbudziso mbili dzi tevhelaho. Ya u thoma, vhanna vhahulwane vha nga thusa hani vhanna vhaṱuku u hwala vhuḓifhinduleli ho engedzeaho, nahone ndi ngani zwenezwi zwi zwa ndeme? (2 Timotheo 2:2) Ya vhuvhili, ndi ngani zwi zwa ndeme uri vhanna vhaṱuku vha vhe na mavhonele avhuḓi musi vha tshi khou thusa vhahulwane vhane vha vha na tshenzhelo na u guda khavho? Kha ri vhone nḓila ye Khosi Davida a thusa ngayo murwa wawe u hwala vhuḓifhinduleli ha ndeme.

DAVIDA O GUDISA NA U TIKEDZA SALOMO

6. Khosi Davida o vha a tshi ṱoḓa u ita mini, nahone Yehova o aravha hani?

6 Nga murahu ha miṅwaha minzhi e tshavhi, Davida o vha khosi nahone a dzula nḓuni yavhuḓi. Davida o vha a tshi ṱoḓa u fhaṱela Yehova thembele. Nga zwenezwo, a vhudza muporofita Nathani a ri: “Edzou vhona, nṋe ndo dzula kha nnḓu ya miṱaululo, ngenó  mbulungelo yá mulanga wa Yehova yó pila nga miṅwenda.” Nathani a fhindula a ri: “ltá zwoṱhe zwine mbilu yau ya funa; ngauri Mudzimu u na iwe.” Naho zwo ralo, zwenezwo a si zwe Yehova a vha a tshi khou zwi ṱoḓa. Yehova o vhudza Nathani uri a vhudze Davida uri: “Ane a ḓo fhaṱa nnḓu ine nda ḓo dzula khayo’ a si iwe.” Naho Yehova Mudzimu o khwaṱhisedza Davida uri u ḓo bvela phanḓa a tshi mu fhaṱutshedza, o vha a tshi ṱoḓa uri Salomo murwa wa Davida a fhaṱe thembele. Davida o aravha hani?—1 Koron. 17:1-4, 8, 11, 12; 29:1.

7. Davida o aravha hani musi Yehova a tshi mu ṋea vhulivhisi?

7 Davida o tikedza murwa wawe nahone ho ngo vhilaedziswa nga uri ndi nnyi ane a ḓo khoḓelwa u fhaṱa thembele. Zwi re zwone ndi uri tshenetsho tshifhaṱo tsho ḓivhiwa sa thembele ya Salomo hu si ya Davida. Zwenezwi zwi nga kha ḓi vha zwo kula Davida nungo ngauri ho ngo kona u khunyeledza lutamo lwawe, fhedzi o tikedza wonoyo mushumo nga vhuḓalo. O dzudzanya vhathu vhane vha ḓo shuma na u kuvhanganya tsimbi ya ngweḓi, tsimbi tswuku na musuku u katela na dzithanda. Zwiṅwe hafhu, o ṱuṱuwedza Salomo a ri: “Zwino Ṅwana’nga, Yehova nga a vhe na iwe, U vhe na mashudu, U fhaṱe nnḓu ya Yehova Mudzimu wau, hu vulee ḽeneḽo fhungo ḽe a U amba ngaḽo.”—1 Koron. 22:11, 14-16.

8. Ndi mini zwe zwa vha zwi tshi nga ita uri Davida a phethe nga ḽa uri Salomo ha fanelei, fhedzi o ita mini?

8 Vhalani 1 Koronika 22:5. Davida o vha a tshi nga vha o phetha nga ḽa uri Salomo ha fanelei u ita wonoyo mushumo wa ndeme nga u ralo. Thembele yo vha i “khulu” nahone nga tshenetsho tshifhinga Salomo o vha a “tshee ṅwana, [a] tshee mutete.” Fhedzi Davida o vha a tshi zwi ḓivha uri Yehova u ḓo thusa Salomo u ita wonoyo mushumo. Ngauralo, Davida o livhisa ṱhogomelo kha zwine a nga zwi ita u itela u thusa na u dzudzanya zwishumiswa.

TAKALELANI U GUDISA VHAṄWE

Zwi a takadza u vhona vhanna vhaṱuku vha tshi hwala vhuḓifhinduleli vhuhulwane (Sedzani phara 9)

9. Ndi ngani vhanna vhahulwane vha tshi fanela u takala musi vha tshi ṋea vhaṅwe vhuḓifhinduleli havho? Ṋeani tsumbo.

9 Vhanna vhahulwane a vho ngo fanela u kulea nungo musi zwi tshi ṱoḓea uri vha ṋee vhanna vhaṱuku mushumo wavho. Nṱhani hazwo, zwi a vhuyedza musi hu tshi gudiswa vhaswa u hwala vhuḓifhinduleli. Vhanna vhahulwane vha fanela u takala musi vhanna vhaṱuku vhe vha vha gudisa vha tshi vho fanelea u ita mushumo. Sa tsumbo, kha ri humbule nga khotsi ane a khou gudisa murwa wawe u reila goloi. Musi onoyo ṅwana a tshee muṱuku, u lavhelesa khotsi awe vha tshi khou reila. Musi o no aluwa, khotsi awe vha a mu ṱalutshedza zwine vha khou ita. Nga murahu musi miṅwaha ya onoyo mutukana i tshi vho mu tendela uri a reile, u thoma u reila khotsi awe vha tshi khou mu gudisa. Nga zwiṅwe zwifhinga, vha nga thusana u reila, fhedzi kanzhi hu reila onoyo ṅwana kana ha reila ene fhedzi. Khotsi awe vha a takala musi murwa wavho a tshi vho kona u reila nahone a vha vhoni u nga ndi vhone vhane vha fanela u langa. Nga hu fanaho, vhanna vhahulwane vha a ḓirwa khana musi vha tshi vhona vhanna vhaṱuku vhe  vha vha gudisa vha tshi hwala vhuḓifhinduleli ndanguloni ya Yehova.

10. Mushe o vha a tshi ḓipfa hani nga u huliswa na u vha na maanḓa?

10 Vhanna vhahulwane vha fanela u ṱhogomela uri vha si vhe na vhutshivha. Ṱhogomelani zwe Mushe a zwi ita musi vhaṅwe mishashani ya Isiraele vha tshi thoma u ḓiita vhaporofita. (Vhalani Numeri 11:24-29.) Yoshua muthusi wa Mushe o vha a tshi ṱoḓa u vha thivhela. O vha a tshi humbula u nga vho vha vha tshi ṱoḓa u dzhiela Mushe vhuimo hawe na maanḓa awe. Fhedzi Mushe o ri: “Naa U tshivhela nṋe U tshi ralo? Nṋe ndi ri vhathu havha vha Yehova ngavhe vha tshi porofita vhoṱhe, ngavhe vhoṱhe Yehova a tshi vha ṋea muya wawe.” Mushe o vha a tshi zwi ḓivha uri Yehova ndi ene ane a khou livhisa mushumo. Nṱhani ha u ḓiṱoḓela bvumo, Mushe o sumbedza uri u ṱoḓa tshifhiwa tshine a vha natsho tshi tshi ṋewa vhashumeli vhoṱhe vha Yehova. U fana na Mushe, naa na riṋe ri a takala musi vhaṅwe vha tshi wana ndugelo dze ra vha ri tshi vhona u nga dzo fanela u ṋewa riṋe?

11. Muṅwe wahashu o ri mini nga ha u ṋea vhaṅwe vhuḓifhinduleli?

11 Musalauno, hu na tsumbo nnzhi dza vhahashu vhe vha shuma nga nungo dzoṱhe lwa miṅwaha minzhi nahone vho gudisa vhaṅwe uri vha hwale vhuḓifhinduleli ho engedzeaho. Sa tsumbo, muṅwe wahashu ane a pfi Peter o shuma tshumeloni ya tshifhinga tsho ḓalaho lwa miṅwaha i fhiraho 74 nahone kha yeneyo miṅwaha o shuma ofisini ya davhi ya ngei Yuropa lwa miṅwaha ya 35. U swika zwenezwino, o vha e mulavhelesi wa Muhasho wa Tshumelo. Zwino muthu o hwalaho honoho vhuḓifhinduleli ndi Paul ane a kha ḓi vha muswa nahone o shuma u ita wonoyo mushumo na Peter lwa miṅwaha minzhi. Musi Peter a tshi vhudziswa nḓila ine a ḓipfa ngayo nga ha u ṋea muṅwe mushumo wawe, o ri: “Zwi a ntakadza vhukuma uri hu na vhahashu vhe vha gudiswa u hwala vhuḓifhinduleli ho engedzeaho nahone vha khou shuma nga nungo dzoṱhe u ita wonoyo mushumo.”

DZHIELANI NṰHANI VHANNA VHAHULWANE

12. Ndi mini zwine ra zwi guda kha tsumbo ya Rehabeamu i re Bivhilini?

12 Musi Salomo o no fa, murwa wawe Rehabeamu o vha khosi. Musi Rehabeamu a tshi ṱoḓa nyeletshedzo ya nḓila ine a nga hwala ngayo vhuḓifhinduleli he a ṋewa hone, o thoma a vhudzisa vhanna vhahulwane. Fhedzi o nyadza nyeletshedzo yavho! Nṱhani hazwo, o shumisa nyeletshedzo ya vhanna vhaṱuku vhe a aluwa navho vhe zwino vha vha vhe vhaḓinḓa vhawe. Ho vha na masiandoitwa a si avhuḓi. (2 Koron. 10:6-11, 19) Ri guda mini? Ndi vhuṱali u humbela nyeletshedzo kha vhahulwane vhane vha vha na tshenzhelo. Naho vhanna vhaṱuku vha songo fanela u pfa vha tshi vhofhea u ita zwithu nga nḓila ye zwa vha zwi tshi itwa ngayo kale, a vho ngo fanela u ṱavhanya u humbula uri nyeletshedzo ya vhanna vhahulwane i nga si shume.

13. Vhanna vhaṱuku vha nga shumisana hani na vhanna vhahulwane?

13 Zwino vhaṅwe vhanna vhaṱuku vha nga vha vha tshi vho ita mishumo ye ya vha i tshi itwa nga vhanna vhahulwane. Naho vhenevho vhanna vhaṱuku vha tshi vho ita muṅwe mushumo, ndi vhuṱali uri vha ṱoḓe nyeletshedzo kha vhanna vhahulwane musi vha sa athu u dzhia phetho. Paul we ha ambiwa nga hae, zwino u vho ita mushumo we wa vha u tshi itwa nga Peter ngei Bethele. O ri: “Ndo ḓiṋea tshifhinga nda ya kha Peter uri a nṋee nyeletshedzo nahone ndo ṱuṱuwedza na vhaṅwe muhashoni uri vha ite nga u ralo.”

14. Ri guda mini kha nḓila ye Timotheo na muapostola Paulo vha shumisana ngayo?

14 Naho Timotheo o vha e muṱuku vhukuma kha muapostola Paulo, vho shuma vhoṱhe lwa miṅwaha minzhi. (Vhalani Vhafilipi 2:20-22.) Paulo o ṅwalela Vhakorinta a ri: “Ndi . . . . khou ruma Timotheo ha inwi, samusi e  ṅwana’nga a fulufhedzeaho ane nda mu funa Murenani; nahone u ḓo ni humbudza maitele anga tshumeloni ya Kristo Yesu, samusi ndi tshi funza fhethu hoṱhe zwivhidzoni zwoṱhe.” (1 Vhakor. 4:17) Enea maipfi a si gathi a sumbedza uri Paulo na Timotheo vho vha vhe na vhushaka ha tsini. Paulo o ḓiṋea tshifhinga tsha u gudisa Timotheo “maitele [awe] tshumeloni ya Kristo.” Timotheo o guda kha Paulo nahone Paulo o vha a tshi mu funa, nga zwenezwo, Paulo o vha a tshi fulufhela uri Timotheo u ḓo ṱhogomela ṱhoḓea dza vhahawe vha ngei Korinta. Ndi tsumbo yavhuḓi vhukuma ine vhahulwane vha tshivhidzo ṋamusi vha nga i edzisa musi vha tshi gudisa vhaṅwe uri vha hwale vhuḓifhinduleli tshivhidzoni!

ROṰHE RI NA MUSHUMO WA NDEME

15. Nyeletshedzo ye Paulo a i ṅwalela Vhakriste vha ngei Roma i nga ri thusa hani musi hu na tshanduko dzine dza ri kwama?

15 Ri khou tshila zwifhingani zwi takadzaho vhukuma. Tshipiḓa tsha ndangulo ya Yehova i re kha ḽifhasi tshi khou aluwa vhukuma, fhedzi zwenezwo zwi ita uri hu vhe na tshanduko. Samusi dzenedzo tshanduko dzi tshi kwama muṅwe na muṅwe washu, u nga ri ri nga ḓiṱukufhadza nahone ra livhisa ṱhogomelo kha zwine Yehova a zwi funa, hu si zwine riṋe ra zwi funa. Musi ri tshi ita zwenezwo, ri ḓo vha na vhuthihi. Paulo o ṅwalela Vhakriste vha ngei Roma a ri: “Ndi ni vhudza noṱhe uri ni songo humbula uri ni khwine u fhira zwine na vha zwone; fhedzi ni vhe na muhumbulo wo tshaho, muṅwe na muṅwe a tshi tevhedza lutendo lwe a ṋewa lwone nga Mudzimu. Vhunga kha muvhili muthihi ri na miraḓo minzhi, fhedzi miraḓo yeneyo yoṱhe i sa shumi mishumo i fanaho, naho ri vhanzhi, ri muvhili muthihi nga Kristo.”—Vharoma 12:3-5.

16. Vhanna vhahulwane na vhanna vhaṱuku u katela na vhafumakadzi vhavho, vha nga thusa hani u ita uri ndanguloni ya Yehova hu vhe na mulalo na vhuthihi?

16 Hu sa londwi vhuimo hashu, u nga ri roṱhe ri nga shuma nga ho engedzeaho u itela u tikedza Muvhuso wa Yehova. U nga ri vhanna vhahulwane vha nga gudisa vhanna vhaṱuku zwine vha zwi ita. Zwi ḓo vha zwavhuḓi uri vhanna vhaṱuku vha ṱanganedze vhuḓifhinduleli, vha ḓiṱukufhadze na u dzula vha tshi ṱhonifha vhanna vhahulwane. Nahone u nga ri vhafumakadzi vha nga edzisa Prisila mufumakadzi wa Akwila we a fhelekedza na u tikedza munna wawe nga u fulufhedzea musi zwiimo zwavho zwi tshi shanduka.—Mish. 18:2.

17. Yesu o vha a tshi fulufhela uri vhafunziwa vhawe vha ḓo ita mini, nahone o vha gudisa u ita mini?

17 Yesu o vhea tsumbo yavhuḓi vhukuma ya u gudisa vhaṅwe u hwala vhuḓifhinduleli ho engedzeaho. O vha a tshi zwi ḓivha uri mushumo wawe wa kha ḽifhasi u ḓo swika magumoni nahone vhaṅwe vha ḓo bvela phanḓa vha tshi u ita. Naho vhafunziwa vhawe vho vha vha songo fhelela, o vha a tshi vha fulufhela nahone o vha vhudza uri vha ḓo ita mishumo i fhiraho ye a i ita. (Yoh. 14:12) O vha gudisa zwavhuḓi nahone vho phaḓaladza mafhungo maḓifha fhethu hoṱhe.—Vhakol. 1:23.

18. Ri na tshi lavhelelwa tshifhio tsha tshifhingani tshi ḓaho, nahone ndi mini zwine ra nga zwi ita zwino?

18 Nga murahu ha lufu lwawe, Yesu o vuselwa ṱaḓulu he a ṋewa mushumo wo engedzeaho na maanḓa a fhiraho “mivhuso yoṱhe na vhuvhusi na maanḓa na vhurena.” (Vhaef. 1:19-21) Arali ra fa ri tshi fulufhedzea Haramagedo i sa athu u swika, ri ḓo vuselwa shangoni ḽiswa hune ha ḓo vha hu na mushumo munzhi une ra fanela u ita. Naho zwo ralo, zwino hu na mushumo wa ndeme wa u huwelela mafhungo maḓifha na u ita vhathu vhafunziwa une roṱhe ra nga shela mulenzhe khawo. Hu sa londwi uri ri vhahulwane kana ri vhaṱuku, u nga ri roṱhe ri nga dzula ri na “zwinzhi zwine [ra] zwi ita mushumoni wa Murena.”—1 Vhakor. 15:58.