Pfukelani kha mafhungo

Pfukelani kha zwi re ngomu

Ni A Zwi Ḓivha?

Ni A Zwi Ḓivha?

Vhathu vha tshifhingani tsha kale vho vha vha tshi tshimbila hani vho fara mulilo?

MAFHUNGO ane a vha kha Genesi 22:6 a amba uri musi Abrahamu a tshi khou lugiselela u ṋekedza tshidzimu fhethu hune ha vha kule, o “dzhia khuni dza tshidzimu a dzi hwesa murwa wawe Isaka; ene a fara mulilo na lufhanga; vha ḓi tshimbila vhé vhavhili.”

Bivhili a i ṱalutshedzi nḓila ye vhathu vha misini ya kale vha vha vha tshi vhasa ngayo mulilo. Kha mbudziso yo vhudziswaho afho nṱha, muṅwe mugudi wa Bivhili o amba uri mulilo wo vha u tshi ḓo dzima ngauri lwendo lwe Abrahamu na Isaka vha lu fara lwo vha lu lulapfu. Vho vha vha tshi fanela u dzhia zwishumiswa zwoṱhe zwe vha vha vha tshi ḓo zwi ṱoḓa u vhasa ngazwo mulilo.

Naho zwo ralo, vhaṅwe vha amba uri zwo vha zwi songo leluwa u thoma mulilo misini ya kale. Zwo vha zwi tshi lelutshela vhathu u wana maxale kha vhahura vhavho nṱhani ha u thoma mulilo nga vhone vhane. Vhagudi vhanzhi vha tenda uri Abrahamu o vha o fara khali, khamusi bodo yo vhofhwaho nga ngeḓane, ine ya vha na maxale ane a khou fhisa kana malasha o shumiswaho mulovha. (Yes. 30:14) Maxale ane a khou fhisa e a vha a tshi hwalwa nga yeneyo nḓila, o vha a tshi dzheniswa khuni u itela uri mulilo u dovhe u duge musi vhathu vha tshi ṱoḓa u vhasa mulilo musi vhe lwendoni.