Pfukelani kha mafhungo

Pfukelani kha zwi re ngomu

Ni Nga Dzula Ni Tshi Ḓiṱukufhadza Musi No Sedzana Na Mulingo

Ni Nga Dzula Ni Tshi Ḓiṱukufhadza Musi No Sedzana Na Mulingo

“U tshimbila nga u ḓiṱukufhadza na Mudzimu wau.”—MIXA 6:8NW.

NYIMBO: 48, 95

1-3. Muporofita wa Yuda a songo bulwaho dzina o kundelwa u ita mini, nahone ho vha na mvelelo dzifhio? (Sedzani tshifanyiso tsha u thoma.)

MUSI Khosi Yerobeamu wa Isiraele a tshi kha ḓi vhusa, Yehova o rumela muporofita wawe a bvaho Yuda uri a ye a ḓivhadze yeneyo khosi ya mugunei mulaedza wa khaṱulo. Onoyo muporofita a fulufhedzeaho o swikisa wonoyo mulaedza nahone Yehova Mudzimu o tsireledza mulanda wawe kha mbiti dza Yerobeamu.—1 Dzikh. 13:1-10.

2 Musi onoyo muporofita e nḓilani ya u ya hayani, o ṱangana na mukalaha tsini na Bethele a songo zwi lavhelela. Onoyo mukalaha o zwifha a ri u muporofita wa Yehova. O fhura muporofita wa Yehova uri a songo thetshelesa vhulivhisi ha Yehova ha u sa ‘ḽa vhuswa kana u nwa maḓi Isiraele’ na u sa ‘huma nga nḓila ye a ḓa ngayo.’ Yehova ho ngo takadzwa nga zwenezwo. Nga murahu, onoyo muporofita wa Yehova a tshi vho humela hayani, o ṱangana na ndau nahone ya mu zhondongedza.—1 Dzikh. 13:11-24.

3 Ndi ngani muporofita we a vha a tshi ḓiṱukufhadza o tenda u fhurwa nga onoyo mukalaha? Bivhili a i zwi ambi. Fhedzi a nga vha o hangwa tshoṱhe uri o vha a tshi fanela u “tshimbila nga u ḓiṱukufhadza  na Mudzimu [wawe].” (Vhalani Mixa 6:8, NW. *) Bivhilini, u tshimbila na Yehova zwi amba u mu fulufhela, u tikedza vhuvhusahoṱhe hawe na u tevhela vhulivhisi hawe. Muthu ane a ḓiṱukufhadza u a zwi ḓivha uri a nga kona nahone u fanela u dzula a tshi davhidzana na Khotsi awe ramaanḓaoṱhe. Onoyo muporofita o vha a tshi nga vha o vhudzisa Yehova u itela u ḓivha arali o shandula vhulivhisi hawe, fhedzi Maṅwalo ha ri vhudzi uri o ita nga u ralo. Nga zwiṅwe zwifhinga, na riṋe ri nga vha ri tshi fanela u dzhia phetho dzi konḓaho nahone ri nga vha ri sa ḓivhi uri Yehova u ṱoḓa ri tshi ita mini. U ṱoḓa vhulivhisi ha Yehova nga u ḓiṱukufhadza zwi ri thusa u iledza u ita vhukhakhi vhuhulwane.

4. Ri ḓo guda mini kha ino thero?

4 Kha thero yo fhiraho, ro guda uri ndi ngani u ḓiṱukufhadza zwi kha ḓi vha zwa ndeme kha Vhakriste na zwine zwa katela zwone. Ndi vhuimo vhufhio vhune ha nga ita uri ri si ḓiṱukufhadze? Nahone ri nga ṱahulela hani yeneyi pfaneleo yavhuḓi u itela uri ri dzule ri tshi ḓiṱukufhadza naho ro sedzana na mutsiko? U itela u fhindula dzenedzi mbudziso, ri ḓo ṱolisisa zwithu zwiraru zwo ḓoweleaho zwine zwa nga ita uri ri si tsha ḓiṱukufhadza nahone ri ḓo vhona nḓila ine ra nga dzhia ngayo phetho dza vhuṱali kha vhuimo vhuṅwe na vhuṅwe.—Mir. 11:2NW.

MUSI ZWIIMO ZWASHU ZWI TSHI SHANDUKA

5, 6. Barasilai o sumbedza hani uri u a ḓiṱukufhadza?

5 Musi vhuimo kana tshumelo yashu zwi tshi shanduka, zwi nga ita uri ri si tsha ḓiṱukufhadza. Barasilai we a vha e na miṅwaha ya 80 u fanela u vha o ḓipfa o huliswa vhukuma musi Davida a tshi mu humbela uri a ḓe a dzule pfamoni. Arali o vha o ṱanganedza yeneyo khumbelo, zwo vha zwi tshi ḓo ita uri a bvele phanḓa a tshi ḓiphina nga u vha na vhukonani na khosi Davida. Fhedzi Barasilai o hana. Ndi ngani? Nga nṱhani ha uri o vha o no kalaha, o vhudza Davida uri ha ṱoḓi u vha muhwalo khae. Barasilai o humbela uri muṅwe wa vharwa vhawe Kinehamu a dzhie honoho vhuimo.—2 Sam. 19:32-38.

6 U ḓiṱukufhadza zwo thusa Barasilai uri a dzhie phetho ya vhuṱali. Ho ngo hana khumbelo ya Davida nga nṱhani ha uri o vha a sa ṱoḓi u hwala vhuḓifhinduleli kana ngauri o vha a sa ṱoḓi u tshila vhutshilo ha vhuphuvhe-phuvhe. O ṱhogomela na u ṱanganedza uri vhuimo hawe ho no shanduka na uri hu na zwithu zwine a si kone u zwi ita. O vha a sa ṱoḓi u ḓilemedza nga zwithu zwine a sa ḓo kona u zwi ita. (Vhalani Vhagalata 6:4, 5.) Arali ra livhisa ṱhogomelo kha u vha na vhuimo, bvumo kana u vha muḓivhalea, zwi nga ita uri ri ḓikukumuse, u ṱaṱisana nahone mafheleloni zwi nga ri kula nungo. (Vhagal. 5:26) Naho zwo ralo, u ḓiṱukufhadza zwi thusa roṱhe uri ri ite zwoṱhe zwine ra nga kona u renda Mudzimu na u thusa vhaṅwe.—1 Vhakor. 10:31.

7, 8. U ḓiṱukufhadza zwi nga ri thusa hani u iledza u ḓitika nga riṋe vhane?

7 Zwi nga konḓa u ḓiṱukufhadza arali ra ṋewa vhuḓifhinduleli kana vhuimo ho engedzeaho. Musi Nehemia a tshi pfa uri vhathu vha ngei Yerusalema vha vhuimoni vhu konḓaho, o rabela Yehova zwi tshi bva mbiluni. (Neh. 1:4, 11) Thabelo ya Nehemia yo fhindulwa musi Khosi Arithasasitha a tshi mu vhea uri a vhe mukoma. Naho zwo ralo, hu sa londwi vhuimo hawe ha nṱha, lupfumo na maanḓa, Nehemia ho ngo ḓitika nga vhukoni hawe kana tshenzhelo. O dzula a tshi tshimbila na Mudzimu. O bvela phanḓa a tshi ṱoḓa vhulivhisi ha Yehova Mudzimu nga u vhala Mulayo wawe. (Neh. 8:1, 8, 9) Naho Nehemia o vha e na vhuimo ha nṱha, ho ngo shumisa honoho vhuimo u itela u ḓivhuyedza kana  u fara vhaṅwe nga nḓila i si yavhuḓi.—Neh. 5:14-19.

8 Tsumbo ya Nehemia i sumbedza uri u ḓiṱukufhadza zwi nga ri thusa uri ri si ṱoḓe u ḓitika nga riṋe vhane musi ro ṋewa mushumo muswa kana vhuḓifhinduleli ho engedzeaho. Sa tsumbo, musi muhulwane a tshi ḓitika nga ene muṋe, a nga thoma u ṱhogomela mafhungo a tshivhidzo a songo thoma a amba na Yehova nga thabelo. Vhaṅwe vha nga thoma nga u dzhia phetho nahone nga murahu vha humbela Yehova uri a fhaṱutshedze yeneyo phetho. Naa zwenezwo zwi sumbedza u ḓiṱukufhadza? Muthu ane a ḓiṱukufhadza u ḓo dzula a tshi humbula uri vhuimo hawe ndi vhufhio phanḓa ha Mudzimu na uri mushumo wawe ndi ufhio kha ndugiselelo ya Mudzimu. Vhukoni hashu a si ha ndeme u fhira zwithu zwoṱhe, zwihuluhulu musi ri tshi ita zwithu zwe ra ḓowela u zwi ita kana ri na thaidzo ye ra vhuya ra sedzana nayo, ri fanela u ṱhogomela uri ri si ḓitike nga riṋe vhane. (Vhalani Mirero 3:5, 6.) Sa vhashumeli vha Mudzimu, ri guda u hwala vhuḓifhinduleli vhune ra vha naho muṱani kana tshivhidzoni nṱhani ha u ṱoḓa u ḓiitela dzina kana u vha na vhuimo ha nṱha u fhira vhaṅwe.—1 Tim. 3:15.

U SASALADZWA KANA U KHOḒWA

9, 10. U ḓiṱukufhadza zwi nga ri thusa hani musi ri tshi sasaladzwa?

9 Zwi nga konḓa u langa nḓila ine ra ḓipfa ngayo musi ri tshi khou sasaladzwa. Kanzhi Hanna o vha a tshi lila ngauri muhadzinga wawe Penina o vha a tshi mu goḓa. Hanna o vha a tshi funwa nga munna wawe naho o vha a sa wani vhana. Musi Hanna a tshi khou rabela thembeleni, Tshifhe Muhulu Eli o mu pomoka uri o kambiwa. Zwenezwo zwi nga vha zwo mu sinyusa vhukuma! Hu sa londwi zwenezwo zwoṱhe, u ḓiṱukufhadza ha Hanna zwo ita uri a ḓifare nahone o fhindula Eli nga ṱhonifho. Thabelo yawe i bvaho mbiluni yo ṅwalwaho Bivhilini i sumbedza nḓila ye Hanna a vha e na lutendo ngayo na nḓila ye a vha a tshi funa ngayo Yehova.—1 Sam. 1:5-7, 12-16; 2:1-10.

10 U ḓiṱukufhadza zwi nga dovha zwa ri thusa uri ri ‘dzule ri tshi kunda vhuvhi nga zwivhuya.’ (Vharoma 12:21) Kanzhi zwi a konḓa u tshila kha ano maitele mavhi a Sathane nahone ri fanela u ita zwoṱhe zwine ra nga kona u itela uri zwenezwo zwithu zwi si ri sinyuse. (Ps. 37:1) Ri nga pfa vhuṱungu vhukuma  musi ri tshi vhaiswa nga vhahashu. Muthu ane a ḓiṱukufhadza u ḓo edzisa Yesu. Bivhili i ri: “Musi a tshi semiwa, ho ngo lifhedza . . . , fhedzi o ḓikumedzela kha ane a haṱula nga u luga.” (1 Pet. 2:23) Yesu o vha a tshi zwi ḓivha uri ndifhedzo ndi ya Yehova. (Vharoma 12:19) Vhakriste vha ṱuṱuwedzwa uri vha ḓiṱukufhadze na u sa “lifhedza vhuvhi nga vhuvhi.”—1 Pet. 3:8, 9.

11, 12. (a) U khoḓwa nga ho kalulaho zwi nga ita uri ri si tsha ḓiṱukufhadza nga nḓila-ḓe? (b) Ri nga sumbedza hani uri ri a ḓiṱukufhadza nga nḓila ine ra ambara na u ḓilugisa ngayo?

11 Musi ri tshi khoḓwa nga ho kalulaho, zwi nga ita uri ri si tsha ḓiṱukufhadza. Ṱhogomelani nḓila yavhuḓi ye Esitere a aravha ngayo musi a tshi khoḓwa. Esitere o vha e ṱhase ya musidzana nahone o tondwa nga zwithu zwavhuḓi ṅwaha woṱhe. Ḓuvha ḽiṅwe na ḽiṅwe o vha a tshi ṱwa na vhasidzana vhanzhi vha bvaho Muvhusoni wa Peresia nahone vho vha vha tshi ṱaṱisana u itela uri vha funwe nga khosi. Naho zwo ralo, o dzula a tshi ṱhonifha na u ḓifara. Naho khosi yo mu ṋanga uri a vhe muṱanuni wayo, ho ngo ḓivhona e khwine u fhira vhaṅwe kana u ḓihudza.—Esit. 2:9, 12, 15, 17.

Naa nḓila ine ra ambara na u ḓilugisa ngayo i sumbedza uri ri ṱhonifha Yehova na vhaṅwe kana i sumbedza uri ri a ḓihudza? (Sedzani phara 12)

12 U ḓiṱukufhadza zwi ri thusa uri ri dzule ri tshi ambara, u ḓilugisa na u ḓifara nga nḓila i ṱhonifheaho. Vhathu vha a ri takalela musi ri tshi sumbedza ‘u vuḓa na vhulenda,’ hu si u ḓikukumusa kana u ṱoḓa vha tshi livhisa ṱhogomelo kha riṋe nga nḓila i songo teaho. (Vhalani 1 Petro 3:3, 4; Yer. 9:22, 23) Nḓila ine ra ḓidzhia ngayo, mafheleloni i vhonala nga zwine ra zwi amba na u zwi ita. Sa tsumbo, ri nga lingedza u ita uri vhaṅwe vha vhone u nga ro khethea nga nṱhani ha mushumo une ra u ita, zwine ra zwi ḓivha kana u vha khonani na muthu ane a vha na vhuimo ha nṱha. Kana ri nga ṱalutshedza zwithu nga nḓila ine zwa nga sala zwi tshi vhonala u nga ndi muhumbulo washu kana zwa ita uri hu khoḓiwe riṋe fhedzi ngeno na vhaṅwe vho shela mulenzhe. Yesu o dovha a ri vhetshela tsumbo yavhuḓi kha zwenezwi. Zwithu zwavhuḓi zwe Yesu a zwi amba, kanzhi zwo vha zwi tshi bva kha Maṅwalo a Luheberu. O amba nga yeneyo nḓila u itela uri vhathetshelesi vhawe vha ḓivhe uri o vha a tshi khou amba zwithu zwi bvaho ha Yehova hu si uri vhathu vha humbule uri ndi vhuṱali hawe.—Yoh. 8:28.

MUSI RI TSHI DZHIA PHETHO

13, 14. U ḓiṱukufhadza zwi nga ri thusa hani u dzhia phetho dzavhuḓi?

13 Musi ri tshi fanela u dzhia phetho, zwi nga ita uri ri si ḓiṱukufhadze. Musi muapostola Paulo a tshi kha ḓi dzula ngei Kesarea, muporofita Agabo o mu vhudza uri arali a bvela phanḓa a ya Yerusalema u ḓo fhedzisela o farwa. O vha a tshi nga vhulahwa. Vhahashu vho luvhelela Paulo uri a songo ngo ya ngauri vho vha vha tshi khou ofha zwine zwa ḓo itea. Naho zwo ralo, zwenezwo a zwo ngo kula Paulo nungo, hu si nga nṱhani ha uri o vha a tshi ḓifulufhela kana a sa ofhi. O vha a tshi fulufhela tshoṱhe Yehova nahone o vha a tshi ṱoḓa u fhedza mushumo we a ṋewa wone huṅwe na huṅwe hune Yehova a mu isa hone. Musi vhahashu vha ḓiṱukufhadzaho vha tshi pfa zwenezwo, vho tikedza phetho ya Paulo ya u ya Yerusalema.—Mish. 21:10-14.

14 U ḓiṱukufhadza zwi nga dovha zwa ri thusa u dzhia phetho dzavhuḓi naho ri sa koni u ḓivha nga vhuḓalo kana u langa masiandoitwa ane a nga vha hone. Sa tsumbo, arali ra dzhenela tshumelo ya tshifhinga tsho ḓalaho, hu ḓo itea mini kha riṋe arali ra vha na thaidzo dza mutakalo? Hu pfi mini arali vhabebi vhashu vho no vhaho vhalala vha tshi ṱoḓa thuso yashu? Ri ḓo ḓiṱhogomela hani musi ri tshi vha vhalala? Naho ra rabela lungafhani kana ra ita ṱhoḓisiso, ri nga si wane phindulo dzo fhelelaho dza dzenedzi mbudziso. (Muh. 8:16, 17) U fulufhela hashu Yehova zwi ḓo ri thusa u ṱanganedza uri hu na zwithu zwine ra si kone u zwi ita. Musi ro no ita  ṱhoḓisiso, u amba na vhaṅwe na u rabela u itela u wana vhulivhisi, ri fanela u tshimbila u tendela na vhulivhisi ha muya mukhethwa wa Mudzimu. (Vhalani Muhuweleli 11:4-6.) Zwenezwo zwi ḓo ita uri Yehova a fhaṱutshedze phetho dzashu kana a ri thuse u swikelela zwipikwa zwashu.—Mir. 16:3, 9.

U ṰAHULELA U ḒIṰUKUFHADZA

15. U elekanya nga ha Yehova zwi ḓo ri thusa hani u dzula ri tshi ḓiṱukufhadza?

15 Ri nga ṱahulela hani u ḓiṱukufhadza nga ho engedzeaho, samusi zwi na mbuyelo nnzhi dzavhuḓi? Kha ri ṱolisise nḓila nṋa. Ya u thoma, ri fanela u elekanya nga ha Yehova, u humbula nga ho engedzeaho uri ndi muthu-ḓe nahone ri ḓo ṱhogomela uri ri vhaṱuku lungafhani musi ri tshi ḓivhambedza nae na uri ri ḓivha zwithu zwi si gathi. (Yes. 8:13) Humbulani uri ri khou tshimbila na Mudzimu Ramaanḓaoṱhe, hu si muruṅwa kana muthu. Musi ri tshi ṱhogomela zwenezwo, zwi ḓo ita uri ri “[ḓiṱukufhadze] nga fhasi ha tshanḓa tsha maanḓa tsha Mudzimu.”—1 Pet. 5:6.

16. U elekanya nga ha nḓila ine Yehova a ri funa ngayo zwi ri thusa hani u ḓiṱukufhadza?

16 Ya vhuvhili, u elekanya nga ha nḓila ine Yehova a ri funa ngayo zwi ḓo ri thusa uri ri ḓiṱukufhadze. Muapostola Paulo o vhambedza tshivhidzo na miraḓo ya muvhili nahone Yehova o ita uri miraḓo yoṱhe ya muvhili i “[huliswe] vhukuma.” (1 Vhakor. 12:23, 24) Nga hu fanaho, Yehova u ṱhogomela muṅwe na muṅwe washu hu sa londwi zwine ra si kone u zwi ita. Ha ri vhambedzi na vhaṅwe vhathu kana u ri ṱanutshela musi ro ita vhukhakhi. Nga nṱhani ha uri Yehova u a ri funa, ri ḓipfa ro vhofholowa huṅwe na huṅwe hune a ṱoḓa ri tshi shuma hone.

17. U sedza zwithu zwavhuḓi kha vhaṅwe zwi ḓo ri vhuyedza hani?

17 Ya vhuraru, musi ri tshi edzisa Mudzimu, zwi ḓo ita uri ri sedze zwithu zwavhuḓi kha vhaṅwe nahone ri ḓo dzhiela nṱha tshumelo ya Yehova nga ho engedzeaho. Nṱhani ha u ṱoḓa u vhoniwa kana u dzula ri tshi vhudza vhaṅwe zwine vha fanela u zwi ita, nga u ḓiṱukufhadza ri ḓo ṱoḓa nyeletshedzo kha vhaṅwe na u pfa zwine vha zwi amba. (Mir. 13:10) Ri ḓo takala navho musi vha tshi wana ndugelo. Nahone ri ḓo renda Yehova musi ri tshi vhona nḓila ine a fhaṱutshedza ngayo vhahashu vhoṱhe “shangoni ḽoṱhe.”—1 Pet. 5:9.

18. U gudisa luvalo lwashu zwi nga ri thusa hani uri ri ḓiṱukufhadze nga ho engedzeaho?

18 Ya vhuṋa, ri ḓo ḓiṱukufhadza nga ho engedzeaho musi ri tshi gudisa luvalo lwashu u shumisa maitele a re Bivhilini. Ri ḓo vha na mavhonele avhuḓi musi ri tshi guda u vhona zwithu nga nḓila ine Yehova a zwi vhona ngayo. Nga zwiṱuku nga zwiṱuku, ri ḓo vha na luvalo lwavhuḓi musi ri tshi guda, u rabela na u shumisa zwine ra zwi guda tshifhinga tshoṱhe. (1 Tim. 1:5) Ri guda u vhea vhaṅwe u thoma. Arali ra ita zwenezwo, Yehova u ri fulufhedzisa uri u ḓo ri “gudisa nga ho fhelelaho,” u ri thusa u ṱahulela u ḓiṱukufhadza na u vha na dziṅwe pfaneleo dza Mudzimu.—1 Pet. 5:10.

19. Ndi mini zwine zwa ḓo ri thusa u dzula tshi ḓiṱukufhadza lwa tshoṱhe?

19 U ḓihudza zwo ita uri muporofita a songo bulwaho dzina a bvaho ngei Yuda a xelelwe nga vhutshilo hawe na vhushaka hawe na Mudzimu. Naho zwo ralo, zwi a konadzea uri ri dzule ri tshi ḓiṱukufhadza musi ro sedzana na mulingo. Vhashumeli vha Yehova vha fulufhedzeaho vha tshifhingani tsho fhiraho na vha musalauno vho sumbedza uri zwenezwo zwi a konadzea. Musi ri tshi bvela phanḓa ri tshi tshimbila na Yehova, ri ḓo ḓiṱukufhadza nga ho engedzeaho. (Mir. 8:13) Hu sa londwi vhuimo hashu, u tshimbila na Yehova ndi zwavhuḓi nahone ndi ndugelo i sa vhambedzwi na tshithu. Dzhielani nṱhani yeneyo ndugelo nahone ni bvele phanḓa ni tshi ita zwoṱhe zwine na nga kona u tshimbila na Yehova nga u ḓiṱukufhadza lwa tshoṱhe.

^ phar. 3 Mixa 6:8: “Hee iwe muthu, wo vhudzwa zwi re zwivhuya. Ndi mini zwine Yehova a zwi ṱoḓa kha iwe? U ṱoḓa u tshi vha na khaṱulokwayo, u tshi vha na vhuthu na lufuno na u tshimbila nga u ḓiṱukufhadza na Mudzimu wau.”