Pfukelani kha mafhungo

Pfukelani kha zwi re ngomu

“Muvhuya U Ḓo Takalela Yehova”

“Muvhuya U Ḓo Takalela Yehova”

DIANA u na miṅwaha i fhiraho 80. Munna wawe o vha e na vhulwadze ha muhumbulo [Alzheimer’s] nahone o vha e fhethu hune ha ṱhogomelwa hone vhalala lwa miṅwaha musi a sa athu u fa. O felwa nga vharwa vhawe vhavhili nahone o vha e na khentsara ya ḓamu. Fhedzi o konḓelela zwenezwo zwithu. Musi vhathu vha tshivhidzoni tshawe vha tshi mu vhona Holoni ya Muvhuso kana vhuḓinḓani, vho vha vha tshi ṱhogomela uri u dzula o takala.

John o vha mulavhelesi a dalelaho lwa miṅwaha i fhiraho 43. O vha a tshi funa wonoyo mushumo! Fhedzi o litsha wonoyo mushumo u itela u ṱhogomela shaka ḽawe ḽe ḽa vha ḽi si na mutakalo wavhuḓi nahone zwino u tshivhidzoni tsha henefho. Musi vhathu vhe vha vha vha tshi ḓivha John vha tshi ṱangana nae buthanoni kana guvhanganoni, vha vhona a songo shanduka. U tshee o takala.

Zwi ḓa hani uri Diana na John vha takale? Muthu o tsikeledzeaho a nga takala hani? Muthu we a xelelwa nga ndugelo ye a vha a tshi i dzhiela nṱha a nga takala hani? Bivhili i amba uri: “Muvhuya u ḓo takalela Yehova.” (Ps. 64:10) Ri nga kona u pfesesa ngoho arali ra ḓivha zwine zwa ita uri ri takale na zwine zwa ita uri ri si takale.

DAKALO ḼA TSHIFHINGANYANA

Hu na zwithu zwine zwa ita uri kanzhi muthu a takale. Humbulani nga ha vhafunani vhane vha khou vhingana, u vha mubebi kana u wana ndugelo tshumeloni ya Mudzimu. A zwo ngo khakhea uri ri takadzwe nga zwenezwo zwithu ngauri zwi bva kha Yehova. O thoma mbingano, a ita uri zwi konadzee uri vhathu vha kone u beba nahone u ṋea vhathu ndugelo tshumeloni yawe.​—Gen. 2:18, 22; Ps. 127:3; 1 Tim. 3:1.

Fhedzi zwiṅwe zwithu zwi nga ita uri ri takale lwa tshifhinganyana. Zwi ṱungufhadzaho ndi uri mufarisi a nga litsha u fulufhedzea kana a lovha. (Hesek. 24:18; Hos. 3:1) Vhaṅwe vhana a vha thetshelesi vhabebi vhavho na Mudzimu, khamusi vha ita na u bviswa tshivhidzoni. Vharwa vha Samuele a vho ngo shumela Yehova nga nḓila i ṱanganedzeaho, nahone zwe Davida a zwi ita zwo mu ḓisela maṱungu na vha muṱani wawe. (1 Sam. 8:1-3; 2 Sam. 12:11) Musi zwithu zwo raloho zwi tshi itea, a zwi iti uri ri takale, fhedzi zwi ita uri ri lile na u pfa vhuṱungu.

 Nga hu fanaho, khamusi ndugelo dzine vhathu vha vha nadzo tshumeloni ya Mudzimu dzi nga fhela nga nṱhani ha mutakalo u si wavhuḓi, vhuḓifhinduleli muṱani kana tshanduko dzine dza nga vha hone ndanguloni. Vhunzhi ha vhathu vho sedzanaho na dzenedzo tshanduko vha amba uri vho ṱuvha nḓila ye mushumo wavho wa vha u tshi vha fusha ngayo.

Ri a kona u zwi vhona uri zwenezwo zwithu zwi ita uri ri takale lwa tshifhinganyana. Fhedzi, naa hu na zwiṅwe zwine zwa nga ri ita uri ri takale lwa tshoṱhe, hu sa londwi vhuimo vhune ha nga shanduka ri songo zwi lavhelela? Ee, Samuele, Davida na vhaṅwe vho vha na ḽeneḽo dakalo hu sa londwi milingo ye vha sedzana nayo.

DAKALO ḼA TSHOṰHE

Yesu o vha a tshi ḓivha zwine dakalo ḽa vha zwone. Musi a tshi kha ḓi vha ngei ṱaḓulu na vhuimo vhu havhuḓi, o vha a “tshi [takala] phanḓa [ha Yehova] misi yoṱhe.” (Mir. 8:30) Musi e kha ḽifhasi, nga zwiṅwe zwifhinga, o vha a tshi ṱangana na zwiimo zwi konḓaho. Fhedzi Yesu o vha a tshi takalela u ita zwi funwaho nga Khotsi awe. (Yoh. 4:34) Hu pfi mini nga awara dzawe dza u fhedzisela musi a tshi khou pfa vhuṱungu? Bivhili i ri: “Nga nṱhani ha dakalo ḽe a vha o vhetshelwa ḽone, o konḓelela danda ḽa tshengedzo.” (Vhaheb. 12:2) Ri na zwiitisi zwi pfalaho zwa u ṱolisisa zwithu zwivhili zwe Yesu a amba uri zwi ita uri ri takale zwa vhukuma.

Ḽiṅwe ḓuvha vhafunziwa vha 70 vho humela kha Yesu vha tshi khou bva u huwelela. Vho vha vho takala nga nṱhani ha uri vho ita mishumo i mangadzaho u katela na u pandela madimoni. Yesu a ri khavho: “Ni songo takala ngauri ni khou pandela madimoni, fhedzi takadzwani ngauri madzina aṋu o ṅwalwa ngei ṱaḓulu.” (Luka 10:1-9, 17, 20) Tsha ndeme vhukuma u fhira ndugelo naho i ifhio yo khetheaho, ndi u takalelwa nga Yehova. U ḓo humbula vhashumeli vhawe vha fulufhedzeaho nahone zwenezwo zwi ḓo ita uri vha takale.

Kha tshiṅwe tshiitea, Yesu o vha a tshi khou amba na gogo ḽa vhathu. Muṅwe mufumakadzi wa Muyuda o sumbedza nḓila ine a ḓipfa ngayo nga u amba uri mme a Yesu we a vha a tshi funza nga nḓila i mangadzaho vha fanela u vha vho takala. Fhedzi Yesu o mu khakhulula nga u amba uri:  “Hu takala vhane vha pfa ipfi ḽa Mudzimu nahone vha tevhedza zwine ḽa zwi amba!” (Luka 11:27, 28) U vha mubebi ane a ḓirwa khana nga ṅwana wawe zwi nga vha zwithu zwi takadzaho, fhedzi u thetshelesa Yehova zwi ita uri ri vhe na vhushaka havhuḓi nae nahone zwi ita uri ri takale vhukuma.

Ngoho ndi ya uri u takalelwa nga Yehova zwi ita uri ri takale. Yeneyo ngoho a i shanduki hu sa londwi vhuimo vhu konḓaho vhune ra nga sedzana naho. Fhedzi u konḓelela nga u fulufhedzea zwi ita uri ri takale. (Vharoma 5:3-5) Zwiṅwe hafhu, Yehova u ṋea vhane vha mu fhulufhela muya mukhethwa nahone dakalo ndi tshipiḓa tsha zwiaṋwiwa nga muya. (Vhagal. 5:22) Zwenezwo zwi ri thusa uri ri pfesese uri ndi ngani Psalme ya 64:10 i tshi amba uri: “Muvhuya u ḓo takalela Yehova.”

Ndi mini zwo thusaho John uri a takale?

Zwenezwo zwi ri sumbedza uri ndi ngani Diana na John vhe ha ambiwa nga havho mathomoni vho dzula vho takala hu sa londwi vhuimo vhu konḓaho he vha sedzana naho. Diana o ri: “Ndi khuda nga Yehova, u fana na ṅwana a tshi khuda nga mubebi wawe.” O dovha a ri: “Mudzimu o mphaṱhutshedza nga u nyita uri ndi kone u bvela phanḓa ndi tshi huwelela tshifhinga tshoṱhe ndo takala.” Nga murahu ha musi John a tshi xelelwa nga ndugelo yawe ya u vha mulavhelesi a dalelaho, o bvela phanḓa a tshi huwelela, u ṱalutshedza zwe zwa mu thusa uri a kone u ita nga u ralo: “Musi ndi tshi vheiwa uri ndi gudise Tshikoloni tsha U Gudisa Vhuḓinḓa u bva nga 1998, ndo ita pfunzo ya muthu nga eṱhe u fhira naho hu lini.” O amba uri zwo lelutshela ene na mufumakadzi wawe uri vha kone u ita tshanduko ngauri vho vha vho ḓiimisela u ita zwiṅwe na zwiṅwe zwine Yehova a vha humbela uri vha zwi ite. O dovha a ri: “A ri ḓi soli na luthihi.”

Vhathu vhanzhi vho vhona ngoho ya maipfi ane a wanala kha Psalme ya 64:10. Sa tsumbo, vhaṅwe vhavhingani vho shuma Bethele ya ngei Amerika lwa miṅwaha i fhiraho 30. Fhedzi vho humbelwa uri vha ye u shuma tsimuni sa vhavulanḓila vho khetheaho. Vho ri: “Zwo ḓowelea uri ni lile musi ni tshi xelelwa nga tshithu tshe na vha ni tshi tshi funa, fhedzi ni nga si dzule ni tshi khou lila.” Vho ṱavhanya vha shela mulenzhe kha u huwelela na tshivhidzo. Vho dovha vha ri: “Ro rabelela zwiṅwe zwithu nga ho livhaho. U vhona thabelo dzashu dzi tshi fhindulwa zwo ri ṱuṱuwedza na u ita uri ri takale. Nga murahu ha tshifhinganyana ro swika, vhaṅwe vho thoma u vula nḓila nahone ro fhaṱutshedzwa nga pfunzo mbili dza Bivhili dzine dza khou ita mvelaphanḓa.”

‘U TAKALA’ LWA TSHOṰHE

Ngoho ndi ya uri a zwi leluwi u dzula ro takala. Hu ḓo vha na zwifhinga zwine ra sa ḓo takala. Fhedzi Yehova u ri khwaṱhisedza nga maipfi ane a wanala kha Psalme ya 64:10. Na musi ro kulea nungo, ri nga vha na vhungoho ha uri arali ra dzula ri tshi fulufhedzea hu sa londwi vhuimo vhune ra nga sedzana naho, ri ḓo “takalela Yehova.” Ri nga lavhelela nga maṱo matswuku u ḓadzea ha mafulufhedziso a Yehova a “maṱaḓulu maswa na ḽifhasi ḽiswa.” Ri ḓo vha vhathu vho fhelelaho. Vhathu vha Mudzimu vha ḓo ‘fhululedza na u takalela’ zwine Yehova a ḓo vha itela zwone.​—Yes. 65:17, 18.

Humbulani uri zwenezwo zwi ḓo amba mini. Ri ḓo ḓifhelwa nga u vha na mutakalo wavhuḓi nahone ḓuvha na ḓuvha ri ḓo vha ri na nungo. A ri tsha ḓo humbula nga ha zwithu zwe zwa vha zwi tshi ri vhaisa zwe zwa itea tshifhingani tsho fhiraho. Ri nga vha na vhungoho ha uri “ḽa kale a ḽi tsha ḓo ḓihwa, na mbiluni ya muthu a ḽi tsha ḓo vha hone.” Mvuwo i ḓo ita uri ri ṱangane na vhafunwa vhashu. Vhathu vha dzimilioni vha ḓo ḓipfa u fana na vhabebi vha ṅwananyana we a vha e na miṅwaha ya 12 we a vuswa nga Yesu. Vho “takala vhukuma lwe vha kundwa u langa maḓipfele avho.” (Marko 5:42) Vhathu vhoṱhe vha ḓo vha ‘vhavhuya’ nahone vha ḓo “takalela Yehova.”