Pfukelani kha mafhungo

Pfukelani kha zwi re ngomu

U Vuḓa​​—⁠Nḓila Ya Vhuṱali

U Vuḓa​​—⁠Nḓila Ya Vhuṱali

Toñi ane a shuma u ṱhogomela vhalala, musi a tshi swika mushumoni o wana muṅwe mufumakadzi o mu lindela muṋangoni. Onoyo mufumakadzi o sema na u sasaladza Toñi nge a lenga u swika u ṱhogomela mme awe vha mulala. Toñi o vha a songo lenga. Naho zwo ralo, Toñi o humbela pfarelo nga u ḓiṱukufhadza nge vha si pfesesane.

NGA ḓuvha ḽi tevhelaho, onoyo mufumakadzi o dovha a mu sema. Toñi o aravha hani? Toñi o ri: “Yo vha i nyimele i konḓaho vhukuma. O vha a songo tea u ntsema na luthihi.” Naho zwo ralo, Toñi o dovha a humbela pfarelo nahone a vhudza onoyo mufumakadzi uri u a pfesesa vhuimo hawe.

Arali no vha ni Toñi, no vha ni tshi ḓo aravha hani? Naa no vha ni tshi ḓo lingedza u vuḓa? Naa zwo vha zwi tshi ḓo ni konḓela u langa mbiti dzaṋu? A zwi timatimisi uri a zwo ngo leluwa u langa mbiti musi ri kha vhuimo vhu fanaho na he ha bulwa mathomoni. Musi ri nga fhasi ha mutsiko kana ri tshi khou levhelwa, zwi a konḓa u vuḓa.

Naho zwo ralo, Bivhili i ṱuṱuwedza Vhakriste uri vha vuḓe. Vhukuma, Bivhili i fanyisa zwenezwo zwithu na vhuṱali. Yakobo o ri: “Ndi nnyi o ṱalifhaho na ane a ṱalukanya vhukati haṋu? Nga u vha hawe na vhuḓifari havhuḓi, nga a sumbedze mishumo ine ya itwa nga u vuḓa hu bveledzwaho nga vhuṱali.” (Yak. 3:13) U vuḓa zwi sumbedza hani vhuṱali ha  ṱaḓulu? Ndi mini zwine zwa nga ri thusa uri ri ṱahulele yeneyi pfaneleo ya Mudzimu?

U VUḒA ZWI SUMBEDZA VHUṰALI

U vuḓa zwi nga thivhela khuḓano. “Phindulo ya vhuthu i dzikisa mbiti; fhungo ḽi vhaisaho ḽi a sinyuisa.”Mir. 15:1.

U sinyuwa zwi nga ita uri vhuimo vhu konḓe vhukuma ngauri zwi fana na u shela peṱirolo muliloni. (Mir. 26:21) U fhambana na zwenezwo, kanzhi u vuḓa zwi nga ita uri hu vhe na mvelelo dzavhuḓi. Zwi nga dovha zwa dzikisa mbiti dza muthu o sinyuwaho.

Toñi o vhona zwenezwi zwi tshi shuma. Musi onoyo mufumakadzi a tshi vhona nḓila ye Toñi a aravha ngayo, o tsengisa miṱodzi. Onoyo mufumakadzi o amba uri o tsikeledzea nga nṱhani ha thaidzo dzawe dza muthu nga eṱhe na dza muṱani. Toñi o kona u ṱanziela kha onoyo mufumakadzi nahone vha thoma pfunzo ya Bivhili—zwenezwo zwo itea ngauri o vha o dzika nahone o vuḓa.

U vuḓa zwi ita uri ri takale. “Hu takala vho vuḓaho, ngauri vha ḓo vha vhaṋe vha ḽifhasi.”Mat. 5:5.

Ndi ngani u vuḓa zwi tshi ita uri ri takale? U vuḓa zwi ita uri vhathu vhanzhi vhe vha vha vhe na mbiti vha khane sa ṋamana. Vhutshilo havho ho shanduka nahone vha a ḓivha uri vhumatshelo ho vha farela mini. (Vhakol. 3:12) Adolfo, mulavhelesi wa ḽiisela wa ngei Spain, u humbula nga ha vhutshilo hawe ha kale musi a sa athu u ḓivha ngoho.

Adolfo u ri: “Ndo vha ndi si na ndivho vhutshiloni. Kanzhi ndo vha ndi tshi ṱavhanya u sinyuwa lwe zwa ita uri dziṅwe khonani dzanga dzi ofhe nḓila ye nda vha ndi tshi ḓifara ngayo na u vusa hanga dzikhakhathi. Mafheleloni ho vha na masiandoitwa a si avhuḓi. Musi ndi tshi khou lwa, ndo ṱhavhiwa lwa rathi nahone nda nzuruma malofha lwe nda ṱoḓa u fa.”

Naho zwo ralo, zwino Adolfo u gudisa vhaṅwe uri vha vhe vho vuḓaho nga u vha vhetshela tsumbo na nga nḓila ine a amba ngayo. Vhathu vhanzhi vha sendela tsini nae nahone vha takadzwa nga nḓila ine a ḓifara ngayo. Adolfo u amba uri u takadzwa nga tshanduko dze a kona u dzi ita. Nahone u livhuwa vhukuma Yehova nge a mu thusa u ṱahulela u vha na muya wa u vuḓa.

U vuḓa zwi takadza Yehova. “Ṅwana’nga, ṱalifha, U takadze mbilu yanga; ndi kone u hanedza vha u nnyadza.”Mir. 27:11.

Yehova u nyadzwa nga swina ḽawe, Diabolo. Mudzimu u na tshiitisi tsha u sinyuwa nga nṱhani ha lwonolwo lunyadzo, fhedzi Bivhili i ṱalusa Yehova sa “wa u sa fhela mbilu.” (Ek. 34:6) Musi ri tshi lwela u edzisa Mudzimu nga u sa ṱavhanya u fhela mbilu na u vuḓa, ri vha ri tshi khou sumbedza u vha na vhuṱali vhune ha takadza Yehova.—Vhaef. 5:1.

Ḽino shango ḽo ḓala vhathu vho sinyuwaho. Hu na vhathu vhane vha vha “vhazuwi, vhadzia-u-ḓihudza, vhadzia-maṱamba, . . . vhadzia-zwitshele, vha sa koni u ḓifara, vhadzia-khakhathi.” (2 Tim. 3:2, 3) Naho zwo ralo, zwenezwo a zwo ngo fanela u thivhela Mukriste u ṱahulela muya wa u vuḓa. Bivhili i ri humbudza uri ‘vhuṱali vhu bvaho ṱaḓulu vhu na mulalo na u humbulela.’ (Yak. 3:17) Musi ri na mulalo nahone ri tshi humbulela, zwi sumbedza uri ro wana vhuṱali ha Mudzimu. Honoho vhuṱali vhu ḓo ri thusa u vuḓa musi ri tshi levhelwa nahone zwi ḓo ri sendedza tsini na Yehova ane a vha Muthomi wa vhuṱali.