Pfukelani kha mafhungo

Pfukelani kha zwi re ngomu

No Vhofhololwa Nga Vhuthu Vhuhulu Ha Mudzimu

No Vhofhololwa Nga Vhuthu Vhuhulu Ha Mudzimu

“Tshivhi a tsho ngo fanela u ni langa, samusi . . . ni tshi vhuyelwa nga vhuthu vhuhulu ha Mudzimu.”—VHAROMA 6:14.

NYIMBO: 2, 61

1, 2. Ndi ngani Vharoma 5:12 i tshi takalelwa nga Ṱhanzi dza Yehova?

EDZANI u humbula ni tshi khou ṱoḓa u ita mutevhe wa ndimana dza Bivhili dzine Ṱhanzi dza Yehova dza dzi ḓivha zwavhuḓi na u anzela u dzi shumisa. Naa Vharoma 5:12 i ḓo vha kha wonoyo mutevhe? Humbulani uri ndi lungana ni tshi shumisa lwonolu Luṅwalo: “Ndi ngazwo tshivhi tsho dzhena shangoni nga muthu muthihi nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.”

2 Yeneyi ndimana yo shumiswa lunzhi kha bugu Bivhili I Funza Mini Zwa Vhukuma? Musi ni tshi guda ndima ya 3, 5, na 6 kha yeneyi bugu na vhana vhaṋu kana vhaṅwe vhathu, kanzhi ni vhala Vharoma 5:12, musi ni tshi khou haseledza nga ha ndivho ya Mudzimu nga ḽifhasi, tshirengululi na vhuimo ha vho faho. Ndi lungana hune na humbula nga ha Vharoma 5:12 musi zwi tshi ḓa kha vhushaka haṋu na Yehova, zwine na zwi ita na zwe na zwi lavhelela tshifhingani tshi ḓaho?

3. Ndi mini zwine ra fanela u zwi humbula nga ha vhuimo hashu?

3 Zwi ṱungufhadzaho ndi uri roṱhe ri vhaitazwivhi. Ri a khakha ḓuvha ḽiṅwe na ḽiṅwe. Naho zwo ralo, ri na vhungoho ha uri Mudzimu u a ḓivha uri ro itwa nga buse nahone o ḓiimisela u ri khathutshela. (Ps. 103:13, 14) Yesu o ri vhudza uri musi ri tshi rabela ri  humbele Mudzimu uri a “ri hangwele zwivhi zwashu.” (Luka 11:2-4) Nga zwenezwo, a ro ngo fanela u dzula ri tshi humbula nga ha vhukhakhi he Mudzimu a ri hangwela hone. Naho zwo ralo, ri nga vhuyelwa nga u humbula nḓila ye a ri hangwela ngayo na ine a nga ri hangwela ngayo.

NḒILA INE MUDZIMU A NGA RI HANGWELA NGAYO

4, 5. (a) Ndi mini zwine zwa ri thusa u pfesesa Vharoma 5:12? (b) “Vhuthu vhuhulu ha Mudzimu” ho ṅwalwaho kha Vharoma 3:24 vhu amba mini?

4 Ri wana mafhungo a ndeme kha maipfi a muapostola Paulo kha Vharoma 5:12, zwihuluhulu kha ndima ya 6. Zwenezwi zwi ḓo ri thusa u pfesesa nḓila ine Yehova a nga ri hangwela ngayo. Ndima ya 3 i ri: “Vhoṱhe vho tshinya . . . , nahone vha tshi itwa vho lugaho nga Mudzimu ndi u tou ṋewa nga vhuthu hawe vhuhulu nge vha vhofhololwa nga tshirengululi tsho lifhiwaho nga Kristo Yesu.” (Vharoma 3:23, 24) Paulo o vha a tshi khou ri mini musi a tshi ri ‘vhuthu vhuhulu ha Mudzimu’? O shumisa ipfi ḽa Lugerika ḽe ḽa ṱalutshedzelwa nga uri “vhuthu vhuhulu ha Mudzimu,” ḽeneḽi ipfi ḽi sumbedza u wana tshifhiwa tshe tsha ṋewa muthu we a si tshi shumele na we a vha a songo tea u tshi wana.

5 Muṅwe mugudi ane a pfi John Parkhurst o amba uri musi Bivhili i tshi amba nga ha vhuthu vhuhulu ha Mudzimu kana Kristo, kanzhi i ambela kha zwe vha zwi ita u itela u tshidza vhathu kha tshivhi na lufu. Nga zwenezwo, Ṱhalutshedzelo ya Shango Ḽiswa ya Maṅwalo a Tshikriste a Lugerika yo ṱalutshedzela ḽeneḽi ipfi nga u ri “vhuthu vhuhulu ha Mudzimu.” Fhedzi Mudzimu o ri itela mini nahone vhuthu vhuhulu hawe vhu ri vhuyedza hani? Nahone zwi kwama hani fulufhelo ḽaṋu na vhushaka haṋu nae? Kha ri vhone.

6. Vhathu vha nga vhuyelwa hani nga vhuthu vhuhulu ha Mudzimu?

6 Tshivhi na lufu zwo “dzhena shangoni nga muthu muthihi” ane a vha Adamu. Nga zwenezwo, “tshivhi tsha muthu onoyo muthihi tsho ita uri lufu lu vhuse sa khosi.” Paulo o dovha a ri, “vhuthu vhuhulu ha Mudzimu” ho ḓa nga “muthu muthihi, Yesu Kristo.” (Vharoma 5:12, 15, 17) Honoho vhuthu vhuhulu ha Mudzimu ho ita uri hu vhe na mvelelo dzavhuḓi kha vhathu vhoṱhe. “U thetshelesa ha muthu muthihi [Yesu] ho ita uri vhanzhi vha pfi vho luga.” Vhukuma, vhuthu vhuhulu ha Mudzimu vhu nga ri isa “vhutshiloni vhu sa fheli nga Yesu Kristo.”—Vharoma 5:19, 21.

7. Ndi ngani ndugiselelo ya Mudzimu ya tshirengululi i tshi sumbedza vhuthu nahone i songo ri fanela?

7 Yehova o vha a sa kombetshedzei uri Murwa wawe a ḓe kha ḽifhasi sa tshirengululi. Zwiṅwe hafhu, vhathu vha songo fhelelaho vho vha vha sa fanelwi nga zwe Mudzimu na Yesu vha zwi ita nga u ri ṋea tshirengululi tshe tsha ita uri zwi konadzee uri ri hangwelwe. Nga zwenezwo, u hangwelwa hashu zwivhi na u vha na tshilavhelelwa tsha u tshila tshoṱhe ndi vhuthu vhuhulu vhu songo ri fanelaho. Ri fanela u dzhiela nṱha vhukuma tshenetshi tshifhiwa tsha vhuthu vhuhulu ha Mudzimu nahone ri tendele tshi tshi kwama vhutshilo hashu ha ḓuvha ḽiṅwe na ḽiṅwe.

U DZHIELA NṰHA VHUTHU VHUHULU HA MUDZIMU

8. Vhaṅwe vhathu vha nga vha na mahumbulele afhio o khakheaho nga ha vhukhakhi vhune vha vhu ita?

8 Samusi ri vhaḓuhulu vha Adamu vha songo fhelelaho, ri a khakha, u ita zwi songo lugaho na u ita tshivhi. Naho zwo ralo, zwi ḓo vha zwo khakhea u shumisa vhuthu vhuhulu ha Mudzimu sa nḓila ya u vhuyafhedza vhukhakhi hashu nga u humbula uri: ‘Naho nda nga ita vhukhakhi—zwithu zwine Mudzimu a zwi dzhia zwi tshivhi—a thongo fanela u vhilaela nga hazwo. Yehova u ḓo nkhangwela.’ Zwi ṱungufhadzaho ndi uri vhaṅwe Vhakriste vho vha vha tshi ḓipfa nga yeneyo nḓila musi vhaṅwe vhaapostola vha tshi kha ḓi  tshila. (Vhalani Yuda 4.) Ri nga kha ḓi sa bula eneo maipfi; fhedzi eneo mahumbulele o khakheaho a nga vha e mihumbuloni yashu nahone a nga thoma u vhonala nga zwine ra zwi ita.

9, 10. Paulo na vhaṅwe vho vhofhololwa hani kha tshivhi na lufu?

9 Paulo o ombedzela uri ri fanela u iledza mavhonele a ngaho: ‘Mudzimu u a pfesesa. U ḓo hangwela vhukhakhi hanga kana zwine nda zwi ita.’ Ndi ngani? Ngauri Paulo o ṅwala uri Vhakriste vho “vhofhololwa kha tshivhi.” (Vhalani Vharoma 6:1, 2.) Ndi ngani hu tshi nga ambiwa uri vho “vhofhololwa kha tshivhi” ngeno vho vha vha tshi kha ḓi tshila kha ḽifhasi?

10 Mudzimu o shumisa tshirengululi kha Paulo na vhaṅwe vha misini yawe. Nga zwenezwo, Yehova o vha hangwela zwivhi zwavho, a vha ḓodza nga muya mukhethwa nahone a vha vhidza vharwa vhawe vha muya. Zwenezwo zwo ita uri vha vhe na fulufhelo ḽa u tshila ṱaḓulu. Arali vho dzula vha tshi fulufhedzea, vha ḓo tshila na u vhusa na Kristo ngei ṱaḓulu. Fhedzi Paulo o vha a tshi amba nga havho musi vha tshi kha ḓi tshila na u shumela Mudzimu vhe kha ḽifhasi sa vho “[vhofhololwaho] kha tshivhi.” Paulo o shumisa tsumbo ya Yesu, we a fa sa muthu nahone a vuselwa ṱaḓulu sa tshivhumbiwa tsha muya tshi sa fi. Lufu lwo vha lu si tsha langa Yesu. Zwo vha zwi tshi fana na Vhakriste vho ḓodzwaho vhe vha ḓi dzhia sa “vho faho siani ḽa tshivhi, fhedzi [vha vha] vha tshilelaho u ita zwine Mudzimu a zwi funa nga Kristo Yesu.” (Vharoma 6:9, 11) Nḓila ye vha vha vha tshi tshila ngayo a yo ngo tsha fana na mathomoni. Vho vha vha si tsha langwa nga nyemulo dza tshivhi. Vho litsha matshilele avho a kale.

11. Vhathu vhane vha vha na fulufhelo ḽa u tshila tshoṱhe Paradisoni vho “vhofhololwa kha tshivhi” nga nḓila-ḓe?

11 Hu pfi mini nga riṋe? Musi ri sa athu u vha Vhakriste, kanzhi ro vha ri tshi ita tshivhi, khamusi ri sa ḓivhi uri zwine ra zwi ita zwo khakhea lungafhani phanḓa ha Mudzimu. Ro vha ri tshi fana na “vhalanda vha zwithu zwi songo kunaho na vhutshinyi.” Zwi re zwone ndi uri ro vha ri “vhalanda vha tshivhi.” (Vharoma 6:19, 20) Zwino ri vho ḓivha ngoho ya Bivhili, ro shandula vhutshilo hashu, ro ḓiṋekedzela kha Mudzimu nahone ra lovhedzwa. U bva tsheetsho, ndi lutamo lwashu u “thetshelesa zwi tshi bva mbiluni” pfunzo ya Mudzimu na zwilinganyo zwawe. Naho ri songo amba eneo maipfi, ro “vhofhololwa kha tshivhi” nahone ro “vha vhalanda vha u luga.” (Vharoma 6:17, 18) Nga zwenezwo, na riṋe hu nga ambiwa uri ro “vhofhololwa kha tshivhi.”

12. Ndi phetho ifhio ine ra fanela u i ita?

12 Zwino humbulani nga ha zwe Paulo a zwi amba musi a tshi ri: “Ni songo tendela tshivhi tshi tshi bvela phanḓa tshi tshi vhusa mivhili yaṋu na u tevhela nyemulo dzayo.” (Vharoma 6:12) Ri nga “tendela tshivhi tshi tshi bvela phanḓa tshi tshi vhusa” mivhili yashu i songo fhelelaho nga u ita zwoṱhe zwine ya ṱoḓa ri tshi zwi ita. Ri nga “tendela” tshivhi tshi tshi vhusa kana ra hana tshi tshi ri vhusa, fhedzi mbudziso ndi ya uri, Ndi zwifhio zwine mbilu dzashu dza zwi ṱoḓa? Ḓivhudziseni uri: ‘Nga zwiṅwe zwifhinga, naa ndi a tendela muvhili wanga u songo fhelelaho kana muhumbulo wanga u tshi ndivhisa kha zwithu zwo khakheaho nahone ndaya henefho? Kana naa ndo vhofhololwa kha tshivhi? Naa ndi khou tshila u tendelana na zwine Mudzimu na Yesu Kristo vha zwi funa?’ Arali ri tshi dzhiela nṱha vhuthu vhuhulu ha Mudzimu he a ri sumbedza nga u ri hangwela, ri ḓo ita zwoṱhe zwine ra nga kona u mu takadza.

NNDWA INE NA NGA I KUNDA

13. Ndi vhuṱanzi vhufhio vhu sumbedzaho uri zwi a konadzea u litsha u ita vhuvhi?

13 Musi vhathu vha Yehova Mudzimu vha sa athu u mu ḓivha, u mu funa na u mu shumela vho litsha ‘mutshelo we vha vha vha tshi anzela u u kaṋa.’ Vhutshilo havho ha kale ho vha  vhu tshi katela “zwithu zwine zwino zwa [vha] shonisa” na zwe zwa vha zwi tshi ḓo ita uri vha fe. (Vharoma 6:21) Zwino vho shanduka. Zwenezwo zwo itea kha vhathu vhanzhi vha ngei Korinta vhe Paulo a ṅwala nga havho. Vhaṅwe vho vha vha tshi gwadamela midzimu ya zwifanyiso, vhadzia-u-ṱonḓola, vhanna vhane vha ita zwa vhudzekani na vhaṅwe vhanna, dzimbava, zwidakwa na zwiṅwe-vho. Naho zwo ralo, vho “ṱanzwiwa” na u “itwa vhakhethwa.” (1 Vhakor. 6:9-11) Zwenezwo zwi fana na zwe vhaṅwe vha zwi ita tshivhidzoni tsha ngei Roma. Paulo o hevhedzwa uri a vha ṅwalele zwi tevhelaho: “Ni songo kumedza miraḓo yaṋu kha vhutshinyi sa zwishumiswa zwi songo lugaho, fhedzi ḓikumedzeni kha Mudzimu sa vho vuswaho vhafuni, ni dovhe ni kumedze miraḓo yaṋu kha Mudzimu sa zwishumiswa zwo lugaho.” (Vharoma 6:13) Paulo o vha e na vhungoho ha uri vha ḓo dzula vho kuna nga lwa muya na u bvelaphanḓa vha tshi vhuyelwa nga vhuthu vhuhulu ha Mudzimu.

14, 15. Ri nga ḓivhudzisa mini nga ha u “thetshelesa zwi tshi bva mbiluni”?

14 Zwi a fana na ṋamusi. Nga zwiṅwe zwifhinga, vhuimo ha vhaṅwe vhahashu vhu nga fana na ha vhathu vha ngei Korinta. Fhedzi na vhone vho shanduka. Vho litsha zwivhi zwe vha vha vha tshi zwi ita tshifhingani tsho fhiraho nahone vha “ṱanzwiwa.” Hu sa londwi vhuimo he na sedzana naho, vhushaka haṋu na Mudzimu vhu hani zwino? Samusi zwino ri na vhuthu vhuhulu ha Mudzimu na uri ri a hangwelwa, naa no ḓiimisela u sa ‘kumedza muvhili waṋu kha tshivhi’? Naa ni nga ‘ḓikumedza kha Mudzimu sa o vuswaho vhafuni’?

15 Nga hu fanaho, na riṋe ri fanela u iledza u ita zwivhi zwihulwane zwi fanaho na zwe zwa itwa nga vhaṅwe vhathu vha ngei Korinta. Zwenezwo ndi ngoho arali ra nga amba uri ro ṱanganedza vhuthu vhuhulu ha Mudzimu nahone a ri tsha ‘langwa nga tshivhi.’ Naho zwo ralo, naa ro ḓiimisela u “thetshelesa zwi tshi bva mbiluni” nga u ita zwoṱhe zwine ra nga kona u iledza zwivhi zwine vhaṅwe vha zwi dzhia zwi si tshithu?—Vharoma 6:14, 17.

16. Ri zwi ḓivha hani uri u vha Mukriste zwi katela zwi fhiraho u litsha u ita zwivhi zwihulwane?

16 Humbulani nga ha muapostola Paulo. Ri nga vha na vhungoho ha uri ho ngo shela mulenzhe kha zwithu zwivhi zwe zwa ambiwa kha 1 Vhakorinta 6:9-11. Naho zwo ralo, o tenda uri o vha a tshi kha ḓi vha na mulandu wa tshivhi. O ṅwala uri: “Nṋe ndi muthu wa ṋama o rengwaho nga tshivhi. Ngauri a thi pfesesi zwine nda zwi ita. Ngauri zwine nda zwi tama, a thi zwi iti; zwine nda zwi vhenga ndi zwone zwine nda zwi ita.” (Vharoma 7:14, 15) Zwenezwi zwi sumbedza uri ho vha hu na zwiṅwe zwithu zwe Paulo a zwi dzhia zwi zwivhi nahone o vha a tshi khou lwisana na zwenezwo zwithu. (Vhalani Vharoma 7:21-23.) U nga ri na riṋe ri nga ita zwenezwo musi ri tshi ita vhuḓidini ha u “thetshelesa zwi tshi bva mbiluni.”

17. Ndi ngani ni tshi ṱoḓa u fulufhedzea?

17 Sa tsumbo, ṱhogomelani mafhungo a u fulufhedzea. U fulufhedzea ndi zwa ndeme kha Vhukriste. (Vhalani Mirero 14:5; Vhaefesa 4:25.) Sathane ndi “khotsi a vhadzia-u-zwifha.” Anania na mufumakadzi wawe vho fa nga nṱhani ha u zwifha. A ri ṱoḓi u fana navho—ri iledza u zwifha. (Yoh. 8:44; Mish. 5:1-11) U fulufhedzea a zwi ambi u sa zwifha fhedzi. U fulufhedzea hashu zwi fanela u sumbedza nḓila ine ra livhuha ngayo vhuthu vhuhulu ha Mudzimu.

18, 19. U fulufhedzea zwi amba mini?

18 U zwifha ndi u sa amba ngoho. Naho zwo ralo, Yehova u ṱoḓa vhathu vhawe vha tshi amba ngoho. O ṱuṱuwedza Vhaisiraele vha kale a ri: “Ivhani vhakhethwa, ngauri Nṋe Yehova Mudzimu waṋu ndi Mukhethwa.” Nahone a ṋea tsumbo ya u vha mukhethwa. Mudzimu o ri: “U songo tswa. U songo zwifha. Ni songo fhurana.” (Lev. 19:2, 11) Zwi ṱungufhadzaho ndi uri muthu ane a amba uri ha zwifhi, fhedzi a tshi ita uri vhaṅwe vha tende zwithu zwi si ngoho, u vha a sa khou fulufhedzea.

Naa ro ḓiimisela u iledza mazwifhi na vhufhura? (Sedzani phara 19)

 19 Sa tsumbo, mutholiwa u vhudza mutholi wawe kana vhashumisani nae uri matshelo ha nga ḓi mushumoni kana u ḓo ṱavhanya a ṱuwa mushumoni ngauri u fanela u ya ha dokotela. Zwi re zwone ndi uri u khou ṱoḓa u ya ha dokotela u itela u lifha mulandu wawe kana u ṱoḓa u ya khemisini u renga mushonga nahone zwenezwo zwithu a zwi nga dzhii tshifhinga tshilapfu. Tshiitisi tshawe tsha u sa ya mushumoni ndi uri a kone u lugiselela lwendo lwawe hu tshee na tshifhinga kana uri a kone u isa muṱa wawe lwanzheni. A nga vha a tshi khou amba ngoho uri u ṱoḓa u ya ha dokotela, fhedzi naa ni nga amba uri u khou fulufhedzea? Kana naa u khou fhura vhaṅwe? Ni nga vha ni tshi ḓivha tsumbo dzi fanaho na dzenedzo dza u fhura vhaṅwe nga khole. Nga zwiṅwe zwifhinga, vhathu vha fhura vhaṅwe uri vha wawe zwine vha zwi ṱoḓa kana u iledza u xelelwa nga zwiṅwe zwithu. Naho muthu a songo zwifha ngaho livhaho, fhedzi hu pfi mini nga vhulivhisi ha Mudzimu vhune ha ri: “U songo zwifha”? Dovhani ni humbule, Vharoma 6:19 i ri: “[Kumedzani] miraḓo yaṋu sa vhalanda vha u luga uri ni ite mishumo mikhethwa.”

20, 21. Vhuthu vhuhulu ha Mudzimu vhu fanela u ri sudzulusela u ita mini?

20 U dzhiela hashu nṱha vhuthu vhuhulu ha Mudzimu zwi fhira u iledza u ṱonḓola, vhudakwa kana zwiṅwe zwivhi zwe vhaṅwe vhathu vha ngei Korinta vha zwi ita. U ṱanganedza vhuthu vhuhulu ha Mudzimu a zwi ambi fhedzi u iledza u ḓifara luvhi nga zwa vhudzekani, fhedzi zwi dovha zwa amba u lwisana na nḓowelo naho i ifhio ya vhuḓimvumvusi vhu songo kunaho. U kumedza miraḓo yashu sa vhalanda vha u luga zwi nga si ri thuse fhedzi kha uri ri si vhe zwidakwa, fhedzi zwi ḓo dovha zwa ri thusa uri ri si nwese lune ra ḓi wana ro no vha pulakani. Zwi nga ṱoḓa vhuḓidini ha uri ri lwisane na zwenezwo zwithu zwivhi; fhedzi ndi nndwa ine ra nga i kunda.

21 Tshipikwa tshashu tshi fanela u vha tsha u iledza zwivhi zwihulwane u katela na zwivhi zwiṱuku. Ndi ngoho uri ri nga si kone u iledza zwivhi zwoṱhe. Fhedzi ri fanela u ita vhuḓidini ha u zwi iledza, samusi na Paulo o ita nga u ralo. O ṱuṱuwedza vhahawe a ri: “Ni songo tendela tshivhi tshi tshi bvela phanḓa tshi tshi vhusa mivhili yaṋu na u tevhela nyemulo dzayo.” (Vharoma 6:12; 7:18-20) Musi ri tshi khou lwisana na mifuda yoṱhe ya tshivhi, ri sumbedza uri ri dzhiela nṱha vhuthu vhuhulu he Mudzimu a vhu sumbedza a tshi shumisa Kristo.

22. Ndi mbuyelo dzifhio dzine dza ḓo wanwa nga vhane vha dzhiela nṱha vhuthu vhuhulu ha Mudzimu?

22 Ro hangwelwa zwivhi zwashu nahone ri ḓo bvelaphanḓa ri tshi hangwelwa nga nṱhani ha vhuthu vhuhulu ha Mudzimu. Ri livhuha vhukuma vhuthu vhuhulu ha Mudzimu. U nga ri ri nga ita vhuḓidini ha u iledza u ita zwithu zwine Mudzimu a ri zwo khakhea naho vhaṅwe vha tshi nga zwi dzhia zwi songo khakhea. Paulo o ombedzela nga ha mbuyelo dzine ra nga dzi wana, a ri: “Zwino no vhofhololwa kha tshivhi na vha vhalanda vha Mudzimu, ni khou kaṋa mutshelo waṋu malugana na vhukhethwa, nahone mafheleloni ni ḓo wana vhutshilo vhu sa fheli.”—Vharoma 6:22.