Pfukelani kha mafhungo

Pfukelani kha zwi re ngomu

 THERO I GUDWAHO 34

Takalani Naho Hu Na Tshanduko Tshumeloni Yaṋu Ya Tshifhinga Tshoṱhe

Takalani Naho Hu Na Tshanduko Tshumeloni Yaṋu Ya Tshifhinga Tshoṱhe

“Ngauri Mudzimu o luga, ha nga hangwi mushumo waṋu na lufuno lwe na lu sumbedza ni tshi itela dzina ḽawe.”—VHAHEB. 6:10.

LUIMBO 38 U Ḓo Ni Khwaṱhisa

MANWELEDZO *

1-3. Ndi zwifhio zwiṅwe zwithu zwine zwa nga ita uri hu vhe na tshanduko kha vha re tshumeloni ya tshifhinga tshoṱhe?

ROBERT na Mary Jo vho ri: “Nga murahu ha u fhedza miṅwaha ya 21 ri mushumoni washu wa vhurumiwa, vhabebi vhashu vhoṱhe vho mbo ḓi thoma u lwala nahone vho vha vho no aluwa. Ro vha ri tshi takalela u vha ṱhogomela. Fhedzi zwo ri vhaisa vhukuma u ṱuwa fhethu he ra vha ri tshi hu funa.”

2 William na Terrie vho ri: “Ro lila musi ri tshi pfa uri mutakalo washu u nga si tsha ri tendela uri ri vhuyelele mushumoni washu. Ro vha ri tshi zwi funa vhukuma u shumela Yehova kha ḽiṅwe shango, fhedzi zwino zwo vha zwi si tsha ḓo konadzea.”

3 Aleksey o ri: “Ro vha ri tshi zwi ḓivha uri vhatovholi vhashu vha khou ṱoḓa u vala ofisi ya davhi ye ra vha ri tshi shuma khayo. Fhedzi ro vha ro ṱungufhala vhukuma musi vha tshi vala Bethele nahone ra tea u ṱuwa henefho.”

4. Ri ḓo haseledza mbudziso dzifhio kha ino thero?

4 Hu na vhathu vhanzhi vha re tshumeloni ya tshifhinga tshoṱhe, u katela na vhane vha shuma Bethele vhe vha wana mishumo miswa. * Zwi nga konḓela vhenevha vhahashu vha fhulufhedzeaho u litsha mushumo une vha u funa. Vha nga thuswa nga mini u ḓowelana na tshanduko? Ni nga vha thusa hani? Phindulo dza dzenedzo mbudziso dzi nga ri thusa roṱhe uri ri ḓowelane na tshanduko vhutshiloni.

 RI NGA SEDZANA HANI NA TSHANDUKO?

Ndi ngani zwi tshi nga konḓela vha re tshumeloni ya tshifhinga tshoṱhe uri vha ṱutshele mushumo wavho? (Sedzani phara 5) *

5. U shanduka ha mushumo zwi nga ri kwama hani?

5 Hu sa londwi uri ri shuma Bethele kana tsimuni, ri nga funa fhethu na vhathu vha henefho, ndi ngazwo zwi tshi nga ri ṱungufhadza arali zwa itea uri ri ṱuwe. Ri ḓo ṱuvha vhahashu vhe ra vha sia nahone ri nga vhilaela nga havho, zwihuluhulu arali ro ṱutshela mushumo washu nga nṱhani ha u tovholwa. (Mat. 10:23; 2 Vhakor. 11:28, 29) Zwiṅwe hafhu, u wana mushumo muswa zwi nga ṱoḓa uri ri ḓowelane na mvelele ya henefho nahone ri nga ḓipfa nga nḓila i fanaho naho ri tshi khou humela hayani. Robert na Mary Jo vho ri: “Ro vha ri songo tsha ḓowela mvelele yashu na u huwelela nga luambo lwashu lwa ḓamuni. Ro pfa u nga ri vhatsinda shangoni ḽashu.” Vhaṅwe vha sedzana na thaidzo dza masheleni dze vha vha vhe si nadzo. Vha nga dipfa vho tsikeledzea, vha songo tsireledzea nahone vha sa ḓivhi uri vha ite mini. Ndi mini zwine zwa nga thusa?

Ndi zwa ndeme uri ri sendele tsini na Yehova na u mu fhulufhela (Sedzani dziphara 6-7) *

6. Ri nga dzula hani ri tsini na Yehova?

6 Dzulani ni tsini na Yehova. (Yak. 4:8) Ri nga zwi ita hani zwenezwo? Nga u mu fhulufhela ngauri ndi “Mupfi wa dzithabelo.” (Ps. 65:2) Psalme ya 62:8 i ri: “Tevhulani dzimbilu dzaṋu phanḓa hawe.” Yehova a nga ita “zwihulwane zwi fhiraho zwoṱhe zwine ra nga zwi humbela kana u zwi elekanya.” (Vhaef. 3:20) Yehova ha ri ṋei zwine ra zwi humbela fhedzi. A nga ita zwi fhiraho zwe ra zwi lavhelela u itela u tandulula thaidzo dzashu.

7. (a) Ri nga thuswa nga mini uri ri dzule ri tsini na Yehova? (b) U ya nga Vhaheberu 6:10-12, hu ḓo vha na mvelelo ifhio musi ri tshi bvela phanḓa na u shumela Yehova nga u fhulufhedzea?

7 Ni tea u vhala Bivhili ḓuvha ḽiṅwe na ḽiṅwe na u elekanya nga zwine na zwi vhala u itela uri ni dzule ni tsini na Yehova. Muṅwe we a vha e murumiwa o ri: “Bvelani phanḓa ni tshi ita vhurabeli ha muṱa na u lugiselela miṱangano u fana na musi ni kha mushumo we na vha ni tshi u ita.” Nahone ni bvele phanḓa ni tshi ita zwoṱhe zwine na nga kona u itela u huwelela mafhungo maḓifha kha tshivhidzo tshaṋu tshiswa. Yehova ha hangwi vhane vha bvela phanḓa vha tshi mu shumela nga u fhulufhedzea naho vha si tsha kona u ita zwe vha vha vha tshi zwi ita tshifhingani tsho fhiraho.—Vhalani Vhaheberu 6:10-12.

8. Maipfi a re kha 1 Yohane 2:15-17 a nga ni thusa hani u dzula ni tshi livhisa ṱhogomelo kha zwithu zwa ndeme vhutshiloni?

8 Livhisani ṱhogomelo kha zwithu zwa ndeme. Ni songo tenda mbilaelo dza shango ḽa Sathane  dzi tshi ni thivhela u shumela Yehova. (Mat. 13:22) Ni songo thetshelesa khonani, mashaka kana vhathu vha sa shumeli Yehova musi vha tshi lingedza u ni thusa nga u amba uri ni tea u wana tshelede nnzhi u itela u vha na vhutshilo havhuḓi. (Vhalani 1 Yohane 2:15-17.) Fhulufhelani Yehova ane a fhulufhedzisa uri u ḓo ri thusa nga zwine ra zwi ṱoḓa nga “tshifhinga tsho teaho.” U ḓo ri thusa uri ri dzule ri na lutendo lwo khwaṱhaho, ri ḓipfe ro dzika nahone u ḓo ri ṋea zwoṱhe zwine ra zwi ṱoḓa.—Vhaheb. 4:16; 13:5, 6.

9. U ya nga Mirero 22:3, 7, ndi ngani zwi zwa ndeme u iledza u ḓidzhenisa kha zwikolodo zwi sa ṱoḓei nahone ri nga thuswa nga mini uri ri dzhie phetho dza vhuṱali?

9 Ni songo ḓidzhenisa zwikolodoni zwi sa ṱoḓei. (Vhalani Mirero 22:3, 7.) Zwi nga itea uri ni shumise tshelede nnzhi musi ni tshi pfuluwa nahone zwi a leluwa u dzhena zwikolodoni. Nga zwenezwo, ni songo renga nga tshikolodo zwithu zwine na nga kona u tshila ni si nazwo. Zwi nga konḓa uri ri dzhie phetho ya uri ri ḓo koloda vhugai arali ri kha vhuimo vhu konḓaho. Sa tsumbo, arali ri tshi khou ṱhogomela muraḓo wa muṱa une wa khou lwala. Zwi ḓo vha zwavhuḓi uri musi ni kha vhuimo ho raloho, ni humbule uri “thabelo” i nga ni thusa uri ni dzhie phetho dza vhuṱali. Nahone Yehova a nga fhindula thabelo yaṋu nga u ni ṋea mulalo une wa ḓo ‘tsireledza mbilu yaṋu na maanḓa aṋu a muhumbulo’ nahone zwenezwo zwi ḓo ni thusa uri ni dzhie phetho yavhuḓi.—Vhafil. 4:6, 7; 1 Pet. 5:7.

10. Ri nga vha hani na khonani ntswa?

10 Dzulani ni tsini na vhathu vha re na ṱhuṱhuwedzo yavhuḓi kha inwi. Ambani na khonani dzaṋu dza tsini zwihuluhulu dzi re na tshenzhelo dzi fanaho na dzaṋu. Ni vha vhudze nga ha nḓila ine na khou ḓipfa ngayo na nga ha thaidzo dzine na khou sedzana nadzo. U ita zwenezwo zwi nga ni thusa. (Muh. 4:9, 10) Khonani dze na dzi wana musi ni mushumoni waṋu wa kale dzi ḓo dzula dzi khonani dzaṋu. Ni tea u vhumba vhukonani vhuswa na kha mushumo waṋu muswa. Uri ni wane khonani, ni tea u vha ni muthu ane a vha na vhukonani. Ni nga vha hani na khonani ntswa? Vhudzani vhaṅwe nga ha tshenzhelo dzaṋu dzavhuḓi u itela uri vha kone u vhona uri no takala tshumeloni ya Yehova. Naho vhaṅwe tshivhidzoni vha sa pfesesi uri ndi ngani ni tshi funa tshumelo ya tshifhinga tshoṱhe, vhaṅwe vha ḓo vhona tsumbo yaṋu nahone vha vha khonani dzaṋu. Ni songo ambesa nga ha zwe na zwi khunyeledza tshumeloni ya Yehova na nga ha nḓila i si yavhuḓi ine na nga vha ni khou ḓipfa ngayo.

11. Ni nga ita hani uri ni dzule no takala mbinganoni?

11 Arali no ṱutshela mushumo waṋu nga nṱhani ha mutakalo u si wavhuḓi wa mufarisi waṋu, ni songo mu vhona mulandu. Kana arali hu inwi a re na thaidzo dza mutakalo, ni songo ḓivhona mulandu. Ni songo hangwa uri ni “ṋama nthihi” nahone no ana phanḓa ha Yehova uri ni ḓo ṱhogomelana  kha vhuimo hoṱhe. (Mat. 19:5, 6) Arali na ṱutshela mushumo waṋu ngauri no vhifha muvhilini ni songo zwi dzudzanya, ni tea u vhudza ṅwana waṋu uri u wa ndeme u fhira mushumo we na vha ni nawo. Ni mu khwaṱhisedze uri ni mu dzhia sa “tshifhiwa” tshi bvaho kha Mudzimu. (Ps. 127:3-5) Zwiṅwe hafhu, ni mu vhudze nga ha tshenzhelo dzavhuḓi dze na vha nadzo mushumoni waṋu. U ita zwenezwo zwi nga thusa ṅwana waṋu uri a tevhele tsumbo yaṋu ya u shumela Yehova lwa tshifhinga tshoṱhe.

VHAṄWE VHA NGA THUSA HANI?

12. (a) Ri nga thusa hani vha re tshumeloni ya tshifhinga tshoṱhe uri vha bvele phanḓa na mushumo wavho? (b) Ri nga vha thusa hani uri vha ḓowelane na vhuimo?

12 Zwivhidzo zwinzhi na vhahashu vha ita zwoṱhe zwine vha nga kona u itela u thusa vhane vha vha tshumeloni ya tshifhinga tshoṱhe uri vha bvele phanḓa vha tshi shumela Yehova kha mushumo wavho. Vha ita zwenezwo nga u vha ṱuṱuwedza uri vha bvele phanḓa na mushumo wavho, u vha ṋea zwithu zwine vha zwi ṱoḓa, u vha thusa nga masheleni kana u ṱhogomela miraḓo ya miṱa yavho yo salaho hayani. (Vhagal. 6:2) Arali vhane vha vha tshumeloni ya tshifhinga tshoṱhe vha rumelwa tshivhidzoni tshaṋu nge ha vha na tshanduko kha mushumo wavho, ni songo humbula uri vho balelwa u ita mushumo wavho kana uri hu na zwithu zwi si zwavhuḓi zwe vha zwi ita. * Nṱhani hazwo, vha thuseni uri vha ḓowelane na vhuimo. Vha ṱanganedzeni zwavhuḓi nahone ni vha khoḓe nga mushumo we vha u ita, naho vha sa koni u ita zwinzhi nga nṱhani ha mutakalo wavho u si wavhuḓi. Vha ḓivheni khwine. Gudani kha zwine vha zwi ḓivha na tshenzhelo dzavho.

13. Ri nga thusa hani vhe vha wana mushumo muswa?

13 Vhe vha wana mushumo muswa vha nga  ṱoḓa thuso yaṋu u itela u wana vhudzulo, u shumisa zwiendedzi, u wana mushumo na zwiṅwe zwithu zwine vha nga zwi ṱoḓa. Vha nga ṱoḓa u ḓivha nga ha mafhungo a u badela muthelo, muḓagasi na maḓi. Zwiṅwe zwithu zwa ndeme zwine vha zwi ṱoḓa ndi uri ni vha pfesese. Vhone kana mashaka avho vha nga vha vhe na mutakalo u si wavhuḓi. Vha nga vha vha tshi khou pfa vhuṱungu ha u lovhelwa nga muthu ane vha mu funa. * Vha nga vha vha tshi pfa vhuṱungu ngauri vho ṱuvha khonani dze vha vha vhe nadzo kha mushumo wavho wa tshifhingani tsho fhiraho, naho vha sa ambi nga hazwo. Zwi dzhia tshifhinga u sedzana na nḓila ine vha ḓipfa ngayo.

14. Vhahuweleli vha tshivhidzo tshe wahashu a pfulutshela khatsho vho mu thusa hani uri a ḓowelane na vhuimo?

14 Arali na huwelela navho na u vha vhetshela tsumbo yavhuḓi, zwi ḓo vha thusa uri vha ḓowelane na vhuimo. Muṅwe wahashu wa tshifumakadzini we a shuma lwa miṅwaha minzhi kha ḽiṅwe shango, o ri: “Kha mushumo wanga wa kale, ndo vha ndi tshi fara pfunzo dza Bivhili ḓuvha na ḓuvha. Kha mushumo wanga muswa, zwo vha tshi konḓa u vhala luṅwalo kana u sumbedza ṋemuḓi vidio musi ndi tsimuni. Fhedzi vhahuweleli vha henefho vho vha vha tshi nthamba uri ndi ṱuwe navho kha nyendo dza u vhuyelela na kha pfunzo dzavho dza Bivhili. Musi ndi tshi vhona vhenevho vhahashu vhane vha fhisea na u vha na tshivhindi vha tshi fara pfunzo dza Bivhili dzine dza khou bvela phanḓa, zwo nthusa uri ndi vhe na mavhonele avhuḓi nga ha tsimu yeneyo. Ndo guda u thoma nyambedzano tsimuni ntswa. Zwenezwi zwoṱhe zwo ita uri ndi dovhe ndi takale.”

DZULANI NI TSHI ITA ZWOṰHE ZWINE NA NGA KONA!

Wanani nḓila dzine na nga ṱanḓavhudza ngadzo vhuḓinḓa haṋu hune na dzula hone zwino (Sedzani dziphara 15-16) *

15. Ni nga vha hani a bvelelaho kha mushumo waṋu muswa?

15 Ni nga bvelela kha mushumo waṋu muswa. Ni songo vhona u nga a no ngo ita zwavhuḓi kha mushumo waṋu wa kale kana a ni tsha vha wa ndeme. Humbulani nga ha nḓila dzine Yehova a khou ni thusa ngadzo zwino nahone ni bvele phanḓa na u huwelela. Edzisani Vhakriste vha fhulufhedzeaho vha ḓanani ḽa u thoma. Hoṱhe  he vha vha vhe hone vho “bvela phanḓa vha tshi ḓivhadza mafhungo maḓifha a ipfi ḽa Mudzimu.” (Mish. 8:1, 4) Vhuḓidini haṋu ha u bvela phanḓa ni tshi huwelela vhu nga vha na mvelelo dzavhuḓi. Sa tsumbo, vhaṅwe vhavulanḓila vhe vha pandelwa kha ḽiṅwe shango, vho pfulutshela kha shango ḽa nga tsini, na henefho ho vha hu na ṱhoḓea kha luambo lwavho. Hu sa athu fhela miṅwedzi i si gathi, ho vhumbiwa zwigwada zwiswa nga lwonolo luambo.

16. Ndi mini zwine zwa nga ita uri ni takalele mushumo muswa?

16 “U takalela Yehova ndi one maanḓa aṋu.” (Neh. 8:10) Dakalo ḽashu ḽi fanela u thewa kha vhushaka hashu na Yehova, hu si kha mushumo washu naho ri tshi u funa. Nga zwenezwo, dzulani ni tshi tshimbila na Yehova, ni tshi ḓitika nga vhuṱali, vhulivhisi na thikhedzo yawe. Ni songo hangwa uri no vha ni tshi funa mushumo waṋu nga nṱhani ha uri no ita zwoṱhe zwine na nga kona u itela u thusa vhathu vha henefho. Itani zwoṱhe zwine na nga kona nahone ni ḓo vhona Yehova a tshi ni thusa uri ni fune mushumo waṋu muswa.—Muh. 7:10.

17. Ri fanela u humbula mini nga ha mushumo une ra khou ita zwino?

17 A ro ngo fanela u hangwa uri mishumo ine ra vha nayo zwino ndi ya tshifhinganyana, fhedzi u shumela Yehova ndi lwa tshoṱhe. Mishumo yashu i nga shandulwa shangoni ḽiswa. Aleksey we ra amba nga hae mathomoni, u ri tshanduko dzi re hone zwino dzi khou mu lugiselela tshanduko dza tshifhingani tshi ḓaho. O ri: “Ndo vha ndi tshi zwi ḓivha uri Yehova u hone, fhedzi ndi tshi ḓipfa ndi kule nae, ndi tshi zwi ḓivha uri hu ḓo vha na shango ḽiswa, fhedzi ḽi tshi vhonala ḽi kule. Zwino ndi pfa ndi tsini na Yehova nahone ndi a zwi ḓivha uri shango ḽiswa ḽi ḓo vha hone hu si kale.” (Mish. 2:25) Kha ri bvele phanḓa ri tshi tshimbila na Yehova, hu sa londwi mushumo une ra khou ita. A nga si ri laṱe nahone u ḓo ri thusa uri ri mu shumele ro takala, hu sa londwi nḓila ine ra khou mu shumela ngayo.—Yes. 41:13.

LUIMBO 90 Ṱuṱuwedzanani

^ phar. 5 Nga zwiṅwe zwifhinga, vhahashu vha re tshumeloni ya tshifhinga tshoṱhe vha nga ṱutshela mushumo wavho kana vha ṋewa mushumo muswa. Ino thero i ḓo haseledza thaidzo dzine vha ṱangana nadzo na uri vha nga thuswa nga mini uri vha ḓowele mushumo muswa. I dovha ya haseledza zwine vhaṅwe vha nga zwi ita u itela u vha ṱuṱuwedza na u vha tikedza na uri Bivhili i nga ri thusa hani uri ri sedzane na tshanduko.

^ phar. 4 Nga hu fanaho, vhunzhi ha vhahashu vha tshinnani vha re vhaaluwa vho fhirisela vhuḓifhinduleli havho kha vhahashu vha tshinnani vhane vha kha ḓi vha vhaṱuku. Sedzani thero ine ya ri “Yehova U Dzhiela Nṱha U Fulufhedzea Ha—Vhahashu Vha Tshinnani Vhane Vha Vha Vhaaluwa” kha Tshiingamo tsha September 2018 na ine ya ri “Dzulani Ni Na Mulalo Hu Sa Londwi U Shanduka Ha Vhuimo” kha Tshiingamo tsha October 2018.

^ phar. 12 Vhahulwane vha tshivhidzo tshe onoyo muthu a vha e khatsho vha tea u ṱavhanya u ṅwala vhurifhi ha u ḓivhadza u itela uri a bvele phanḓa a tshi shuma sa muvulanḓila, muhulwane kana mushumeli kha tshivhidzo tshawe tshiswa.

^ phar. 13 Sedzani thero dzi re kha Tshiingamo tsha 2016, No. 3 tshine tsha ri “Musi Ane Na Mu Funa A Tshi Fa.”

^ phar. 57 ṰHALUSO YA TSHIFANYISO: Vhavhingani vhane vha khou tea u ṱutshela mushumo wavho wa u vha vharumiwa kha ḽiṅwe shango vha onesana na tshivhidzo tshavho vha tshi khou lila.

^ phar. 59 ṰHALUSO YA TSHIFANYISO: Musi vhe shangoni ḽa havho, vha bvela phanḓa vha tshi rabela uri Yehova a vha thuse u sedzana na thaidzo.

^ phar. 61 ṰHALUSO YA TSHIFANYISO: Yehova o vha thusa uri vha vhuyelele tshumeloni ya tshifhinga tshoṱhe. Vha shumisa luambo lwe vha lu guda musi vhe vharumiwa u itela u huwelela kha vhathu vha bvaho kha maṅwe mashango vhane vha vha tsimuni ya tshivhidzo tshavho tshiswa.