Pfukelani kha mafhungo

Pfukelani kha zwi re ngomu

 ZWE RA ZWI VHULUNGA

“Ḽiṅwe Guvhangano Ḽi Ḓo Vha Hone Lini?”

“Ḽiṅwe Guvhangano Ḽi Ḓo Vha Hone Lini?”

NDI mafheloni a November 1932 ngei Ḓoroboni ya Mexico. Vhege yo fhiraho, ho dzheniswa robotho kha yeneyo ḓorobo ine ya vha na vhadzulapo vha fhiraho milioni nthihi. Fhedzi zwino vhathu vha vho takadzwa nga zwiṅwe-vho. Vhoramafhungo vha yeneyo ḓorobo vho no livhisa ṱhogomelo kha tshiitea tsha ino vhege. Vho vha vho ima vhuimazwidimela vho fara dzikhamera, vho lindela mueni o khetheaho—Joseph F. Rutherford we a vha e muphuresidennde wa Watch Tower Society. Ṱhanzi dza henefho dzo vha dzo lindela u ṱanganedza Wahashu Rutherford we a vha o ḓa buthanoni ḽa maḓuvha mararu.

The Golden Age yo ri: “A zwi timatimisi uri ḽino buthano ḽi ḓo dzhiiwa sa tshiitea tsha ndeme vhukuma kha ḓivhazwakale u itela u phaḓaladza Ngoho ngei riphabuliki ya Mexico.” Fhedzi ndi mini zwe zwa ita uri ḽeneḽi buthano ḽe ḽa vha ḽi na vhathu vha ṱoḓaho u vha 150 fhedzi ḽi vhe ḽi swayeaho vhukuma?

Musi hu sa athu u vha na tshenetsho tshiitea, ngoho yo vha i sa athu u phaḓalala ngei Mexico. U bva nga 1919, ho vha hu tshi farwa maguvhangano maṱuku henefho, fhedzi musi miṅwaha i tshi khou ḓi ṱanḓulukana i tshi ya, tshivhalo tsha zwivhidzo tsho fhungudzea. Zwo vha zwi tshi vhonala u nga vhuimo vhu ḓo vha khwine musi hu tshi vulwa ofisi ya davhi Ḓoroboni ya ngei Mexico nga 1929. Naho zwo ralo, ho vha hu na zwithu zwe zwa vha zwi tshi fanela u lugiswa. Musi hu tshi bva vhulivhisi ha uri vhathu vha fanela u litsha u ṱanganyisa zwa mabindu na mushumo wa u huwelela, muṅwe muvulanḓila we a vha o sinyuwa o litsha u ṱanganela nahone a thoma tshigwada tshawe tsha pfunzo ya Bivhili. Nga tshenetsho tshifhinga, mulavhelesi wa davhi o ḓifara nga nḓila ine ya lwisana na maṅwalo nahone a dzhielwa ndugelo. Ṱhanzi dza ngei Mexico dze dza vha dzi tshi fulufhedzea dzo vha dzi tshi ṱoḓa u ṱuṱuwedzwa nga lwa muya.

Musi Wahashu Rutherford e henefho, o ṱuṱuwedza vhukuma dzenedzo Ṱhanzi, a ṋekedza nyambo mbili dzi kwamaho vhukuma kha ḽeneḽo buthano nahone a ṋekedza na nyambo ṱhanu dzavhuḓi vhukuma radioni. Lwa u tou thoma, zwiṱitshi zwa radio zwa ngei Mexico zwo hasha mafhungo maḓifha fhethu hoṱhe. Nga murahu ha buthano, mulavhelesi muswa wa davhi o vhewaho, o dzudzanya mushumo wa u huwelela, zwino Ṱhanzi dzo vha dzi tshi vho fhisea nahone nga phaṱhutshedzo ya Yehova dzo bvela phanḓa dzi tshi huwelela.

Buthano ḽa 1941 Ḓoroboni ya ngei Mexico

Nga ṅwaha u tevhelaho, ho vha na mabuthano mavhili kha ḽeneḽo shango, ḽiṅwe ḽo farelwa ḓoroboni ya ngei Veracruz nahone ḽiṅwe ḽa vha Ḓoroboni ya ngei Mexico. U ḓifunga mushumoni wa u huwelela zwo ita uri hu thome u vha na mvelelo dzavhuḓi. Nga 1931, ho vha hu na vhahuweleli vha 82. Nga murahu ha miṅwaha ya fumi, tshivhalo tsho engedzea kafumi! Nga Guvhangano ḽa 1941, ho vha na vhathu vha ṱoḓaho u vha 1 000 ngei Ḓoroboni ya Mexico.

“U HUWELELA ZWIṰARAṰANI”

Nga 1943, Ṱhanzi dzo ambara garaṱa dza u ramba vhathu Guvhanganoni ḽine ḽa vha na tshiṱoho tshine tsha ri “Free Nation’s,” ḽe ḽa vha ḽi tshi ḓo farelwa ḓoroboni dza 12 dza ngei Mexico. * Garaṱa mbili dzo vha dzo hakedzwa kha mahaḓa, iṅwe i nga phanḓa iṅwe i nga murahu nahone yeneyo yo vha i nḓila ye ya vha i tshi shumiswa nga Dziṱhanzi u bva nga 1936.

Magazini wa 1944 u tshi khou sumbedza vhathu vho ambara garaṱa dza u ramba Ḓoroboni ya ngei Mexico

 Magazini wa La Nación wo khoḓa uri fulo ḽa u ramba ḽo vha ḽi bvelelaho ngei Ḓoroboni ya Mexico, wo ri: “Nga ḓuvha ḽa u thoma [ḽa guvhangano], [Ṱhanzi] dzo humbelwa uri dzi rambe vhathu vho engedzeaho. Nga ḓuvha ḽi tevhelaho, vhathu vho ḓadza fhethu he guvhangano ḽa vha ḽo farelwa hone.” Zwenezwo zwithu a zwo ngo takadza Kereke ya Katolika nahone zwo ita uri hu vhe na fulo ḽa u lwisana na Dziṱhanzi. Hu sa londwi u hanedzwa, vhahashu vho bvela phanḓa na mushumo wavho nga tshivhindi. Wonoyo magazini wo dovha wa ri, vhathu vhoṱhe vhe vha vha vhe ḓoroboni vho vha vhona, ho vha hu na vhanna na vhafumakadzi nahone vho vha vha tshi vhidzwa vhakunguwedzi vha dzigaraṱa. Thero ye ya vha i kha magazini yo sumbedza tshifanyiso tsha vhahashu vhe vha vha vhe zwiṱaraṱani zwa Ḓoroboni ya ngei Mexico. Nga fhasi ha tshenetsho tshifanyiso ho vha ho ṅwalwa uri: “U huwelela zwiṱaraṱani.”

“MIMBETE YA VHUPHUVHE-PHUVHE NA I DUDELAHO U FHIRA U EḒELA FHASI SEMENNDENI”

Kha yeneyo miṅwaha, Ṱhanzi nnzhi dzo vha dzi tshi fanela u ḓidzima zwiṅwe zwithu u itela uri dzi kone u ya mabuthanoni a si gathi e a vha a tshi farelwa ngei Mexico. Vhathu vhanzhi vho vha vha tshi bva mashangoni a re kule a mahayani nahone ho vha hu kule na bada kana hu kule na hune ha ṋamelwa hone zwidimela. Tshiṅwe tshivhidzo tsho ṅwala uri, “Ho vha hu tshi tou vha na mapala a luṱingo fhedzi henefho.” Nga zwenezwo, vhathu vhe vha vha vha tshi dzula henefho vho vha vha tshi fanela u ṋamela meila kana u tshimbila lwa maḓuvha uri vha kone u ṋamela tshidimela tshe tsha vha tshi tshi ḓo vha isa ḓoroboni ya hune buthano ḽa ḓo farelwa hone.

Ṱhanzi nnzhi dzo vha dzi tshi shaya nahone dzi si na tshelede ya u ya buthanoni. Ṱhanzi dze dza kona u ya buthanoni, dzo vha dzi tshi dzula na Dziṱhanzi dza henefho dze dza sumbedza muya wa u ṱanganedza vhaeni. Vhaṅwe vho eḓela Holoni dza Muvhuso. Kha tshiṅwe tshiitea, vhathu vha ṱoḓaho u vha 90 vha bvaho fhethu hu re kule vho swikela ofisini ya davhi, he vha eḓela kha mimbete ye vha i ita nga mabogisi a 20 a dzibugu. Yearbook yo sumbedza uri vhenevho vhaeni vha livhuwaho vho vhona yeneyo “mimbete i ya vhuphuvhe-phuvhe na i dudelaho u fhira u eḓela fhasi semenndeni.”

A zwi timatimisi uri dzenedzo Ṱhanzi dzi livhuwaho dzo ṱhogomela uri u kuvhangana na Vhakriste vho takalaho guvhanganoni zwo vha zwi zwa ndeme vhukuma u fhira zwe vha ḓidzima zwone. Na ṋamusi, Ṱhanzi dza ngei Mexico dzi ṱoḓaho u vha milioni nthihi dzi sumbedza muya u fanaho wa u livhuha. * Nga 1949, muvhigo wa ofisi ya davhi ḽa ngei Mexico wo amba zwi tevhelaho nga vhahashu: “Vhuleme he vha sedzana naho a vhu vha kuli nungo ngauri guvhangano ḽiṅwe na ḽiṅwe ḽine ra vha naḽo ḽi vha maṅwe a mafhungo ane vha amba nga hao lwa tshifhinga tshilapfu musi vho no vhuya nahone vha dzula vha tshi ḓivhudzisa uri, Ḽiṅwe guvhangano ḽi ḓo vha hone lini?” Zwe wonoyo muvhigo wa zwi amba, zwo tou ralo na ṋamusi.—Zwe ra zwi vhulunga ngei Amerika Kati.

^ phar. 9 Yearbook ya 1944, yo amba uri ḽeneḽo guvhangano “ḽo ita uri Ṱhanzi dza Yehova dzi ḓivhee vhukuma ngei Mexico.”

^ phar. 14 Ngei Mexico, vhathu vha 2 262 646 vho ya Tshihumbudzoni nga 2016.