Pfukelani kha mafhungo

Pfukelani kha zwi re ngomu

Naa Ni Dzhia Khaṱulo Nga Nḓila Ine Yehova A I Dzhia Ngayo?

Naa Ni Dzhia Khaṱulo Nga Nḓila Ine Yehova A I Dzhia Ngayo?

“Ndi bula dzina ḽa Yehova . . . , Mudzimu wa ngoho a sí na mazwifhi.”—DOIT. 32:3, 4.

NYIMBO: 110, 2

1, 2. (a) Nabothe na vharwa vhawe vho sedzana na mini? (b) Ndi zwithu zwifhio zwivhili zwine ra ḓo zwi haseledza kha ino thero?

EDZANI u vhona nga maṱo a muhumbulo zwi tevhelaho. Muṅwe munna na vharwa vhawe vho pomokwa uri vho ita mulandu muhulwane vhukuma. Onoyo munna na vharwa vhawe vho vhonwa mulandu nahone vha haṱulelwa lufu. Vha muṱa wavho na khonani dzavho vho pfa vhuṱungu vhukuma musi vha tshi vhona vhathu vha si na mulandu vha tshi vhulahwa. Zwenezwi a si ngano. Zwenezwi zwithu zwo itea kha mushumeli wa Yehova a fulufhedzeaho we a vha a tshi pfi Nabothe, we a tshila musi hu tshi kha ḓi vhusa Ahaba Khosi ya Isiraele.—1 Dzikh. 21:11-13; 2 Dzikh. 9:26.

2 Kha ino thero, ri ḓo haseledza nga ha zwe zwa itea kha Nabothe, u katela na vhukhakhi he ha itwa nga vhahulwane vha tshivhidzo tsha Vhukriste tsha ḓanani ḽa u thoma ḽa miṅwaha. Kha dzenedzi tsumbo dzi re Bivhilini, ri ḓo guda uri u ḓiṱukufhadza ndi zwa ndeme arali ri tshi ṱoḓa u edzisa nḓila ine Yehova a dzhia ngayo khaṱulo. Ri ḓo dovha ra guda uri arali ri tshi ṱoḓa u edzisa Yehova, ri fanela u ḓiimisela u hangwela arali tshivhidzoni ha haṱulwa nga nḓila i songo teaho.

 U HAṰULWA NGA NḒILA I SONGO TEAHO

3, 4. Nabothe o vha e munna wa hani, nahone ndi ngani o hana u rengisela Khosi Ahaba tsimu yawe?

3 Nabothe o vha a tshi fulufhedzea kha Yehova nga tshifhinga tshee Vhaisiraele vhanzhi vha vha vha tshi tevhela tsumbo i si yavhuḓi ya Khosi Ahaba na mufumakadzi wawe muvhi Isebele. Vho vha vha tshi gwadamela Baali nahone vha sa ṱhonifhi Yehova kana Milayo yawe. Kha ḽiṅwe sia, Nabothe o vha a tshi dzhiela nṱha vhukuma vhushaka hawe na Yehova u fhira vhutshilo hawe.

4 Vhalani 1 Dzikhosi 21:1-3. Musi Ahaba a tshi ṱoḓa u renga tsimu ya Nabothe kana uri vha ṋeane tsimu, Nabothe o hana. Ndi ngani o hana? O mu ṱalutshedza a ri: “Yehova nga a nthivhele u ita izwo, nda rengisa ifa ḽa vho-khotsi-anga.” Nabothe o hana u rengisa tsimu ngauri zwo vha zwi tshi lwisana na Mulayo wa Yehova wa uri Vhaisiraele a vho ngo fanela u rengisa ifa ḽavho. (Lev. 25:23; Num. 36:7) Vhukuma, Nabothe o vha a tshi thetshelesa Yehova.

5. Isebele o shela hani mulenzhe kha u vhulahwa ha Nabothe?

5 Zwi ṱungufhadzaho ndi uri u hana ha Nabothe zwo ita uri Khosi Ahaba na mufumakadzi wawe vha ite zwithu zwivhi vhukuma. U itela uri Isebele a wanele munna wawe tsimu, o dzudzanya uri Nabothe a pomokwe mazwifhi nahone zwenezwo zwo ita uri Nabothe na vharwa vhawe vha vhulahwe. Yehova o ita mini nga yeneyi khaṱulo i si yavhuḓi?

MUDZIMU U HAṰULA NGA NḒILA YO TEAHO

6, 7. Yehova o sumbedza hani uri u haṱula nga nḓila yo teaho, nahone zwenezwo zwo khuthadza hani muṱa na khonani dza Nabothe?

6 Yehova o ruma Elia uri a ye u amba na Ahaba. Elia o vhudza Ahaba uri ndi muvhulahi nahone u a tswa. Yehova o dzhia hani enea mafhungo? Ahaba, mufumakadzi wawe na vharwa vhawe, vho vha vha tshi ḓo vhulahwa u fana na Nabothe na vharwa vhawe.—1 Dzikh. 21:17-25.

7 Naho muṱa na khonani dza Nabothe vho pfa vhuṱungu nga nṱhani ha zwe zwa itwa nga Ahaba, a zwi timatimisi uri vho pfa vho khuthadzea nga u ḓivha uri Yehova u ḓo dzhia vhukando kha zwe zwa itea. Naho zwo ralo, zwe zwa itea nga murahu, zwo vha zwi tshi ḓo linga u ḓiṱukufhadza havho na u fulufhedzea havho kha Yehova.

8. Ahaba o ita mini musi a tshi pfa mulaedza wa Yehova, nahone ho vha na mvelelo dzifhio?

8 Musi Ahaba a tshi pfa zwine Yehova a ḓo mu ita zwone, o “kherukanya nguvho dzawe, a ambara madzanganda kha muvhili wawe, a ḓi-dzima zwiḽiwa; a lala na eneo madzanganda, a ṱwa a tshi ḽa mbilu.” Ahaba o ḓiṱukufhadza! Ho vha na mvelelo dzifhio? Yehova o vhudza Elia uri: “Zwino khombo a thi tsha ḓo dzi ḓisa misi ino á tshee hone, ngauri o ḓivhuyedza phanḓa hanga. Khombo dzi ḓo ḓela lushaka lwawe, misi hu tshi ḓo vhusa murwa wawe.” (1 Dzikh. 21:27-29; 2 Dzikh. 10:10, 11, 17) Samusi Yehova e “muṱolisisi wa dzimbilu,” o khathutshela Ahaba.—Mir. 17:3NW.

U ḒIṰUKUFHADZA ZWI A TSIRELEDZA

9. Ndi ngani u ḓiṱukufhadza zwo vha zwi tshi ḓo tsireledza muṱa na khonani dza Nabothe?

9 Yeneyi phetho yo kwama hani vhathu vhe vha vha vha tshi ḓivha zwithu zwivhi zwe zwa itwa nga Ahaba? Zwenezwi zwi nga vha zwo kwama lutendo lwa muṱa na khonani dza Nabothe. Arali zwo ralo, u ḓiṱukufhadza zwo vha zwi tshi ḓo vha tsireledza, u vha ṱuṱuwedza uri vha bvele phanḓa vha tshi gwadamela Yehova nga u fulufhedzea nahone vho vha vha tshi ḓo vha na vhungoho ha uri Mudzimu u haṱula nga nḓila yo teaho. (Vhalani Doiteronomio 32:3, 4.) Nabothe, vharwa vhawe u katela na vha muṱa wawe, vha ḓo takalela khaṱulo yo teaho musi Yehova a tshi vusa vhathu vho lugaho.  (Yobo 14:14, 15; Yoh. 5:28, 29) Zwiṅwe hafhu, muthu ane a ḓiṱukufhadza u dzula a tshi humbula uri Mudzimu wa ngoho u ḓo haṱula “mishumo, na yo dzumbwaho, yavhuḓi na mivhi, u ḓo i isa tsengoni.” (Muh. 12:14) Vhukuma, musi Yehova a tshi haṱula, u ṱhogomela na zwithu zwine ra si zwi ḓivhe. Nga zwenezwo, u ḓiṱukufhadza zwi ri tsireledza uri ri si xelelwe nga vhushaka hashu na Yehova.

10, 11. (a) Ndi vhuimo vhufhio vhune ha nga linga vhushaka hashu na Yehova? (b) U ḓiṱukufhadza zwi nga ri tsireledza hani?

10 Ni nga ita mini arali vhahulwane vha nga dzhia phetho ine na si i pfesese kana ine na si tendelane nayo? Sa tsumbo, ni nga ita mini arali inwi kana muṅwe muthu ane na mu funa a xelelwa nga ndugelo tshumeloni? Ni nga ita mini arali mufarisi waṋu wa mbingano, ṅwana waṋu kana khonani ya tsini ya bviswa tshivhidzoni, fhedzi ni sa tendelani na yeneyo phetho? Ni nga ita mini arali na wana uri ho khathutshelwa muthu o khakhaho? Vhuimo ho raloho vhu nga kwama vhushaka hashu na Yehova na nḓila ine ra dzhia ngayo ndugiselelo ya ndangulo yawe. U ḓiṱukufhadza zwi nga ni tsireledza hani arali no sedzana na vhuimo ho raloho? Ṱhogomelani zwithu zwivhili zwi tevhelaho.

Ni nga ita mini arali vhahulwane vha nga dzhia phetho ine na si tendelane nayo? (Sedzani dziphara 10, 11)

 11 Tsha u thoma, u ḓiṱukufhadza zwi ḓo ri sudzulusela uri ri tende uri a ri ḓivhi mafhungo oṱhe nga vhuḓalo. Hu sa londwi uri ri ḓivha zwidodombedzwa zwingafhani nga ha mafhungo, ndi Yehova fhedzi ane a ḓivha zwi re mbiluni. (1 Sam. 16:7) U ḓivha zwenezwo zwi ḓo ri ṱuṱuwedzela uri ri ḓiṱukufhadze, u ṱhogomela uri a ri ḓivhi mafhungo nga vhuḓalo na u ḓivha uri ri fanela u shandula nḓila ine ra humbula ngayo. Tsha vhuvhili, u ḓiṱukufhadza zwi ḓo ri thusa uri ri thetshelese na u sa fhela mbilu samusi ro lindela uri Yehova a haṱule nga nḓila yo teaho. Bivhili i ri: “Vha ofhaho Mudzimu vha vhona zwivhuya . . . , ngenó muvhi a sa vhoni zwivhuya; maḓuvha awe ha nga lapfi.” (Muh. 8:12, 13) Vhukuma, arali ri tshi dzula ri tshi ḓiṱukufhadza ri ḓo vhuyelwa.—Vhalani 1 Petro 5:5.

U SEDZANA NA MUHOYO

12. Ri ḓo haseledza mini zwino, nahone ndi ngani?

12 Vhakriste vha ḓanani ḽa u thoma ḽa miṅwaha vha ngei Siria kha ḽa Antiokia, vho sedzana na vhuimo he ha ita uri zwi vha konḓele u ḓiṱukufhadza na u hangwela zwi tshi bva mbiluni. Kha ri ṱolisise enea mafhungo na u vhona nḓila ine zwa nga ri thusa ngayo u ṱolisisa mavhonele ashu nga ha u hangwela na u pfesesa nḓila ine u hangwela zwa tshimbidzana ngayo na mavhonele a Yehova nga ha khaṱulo.

13, 14. Ndi ndugelo dzifhio dze muapostola Petro a vha e nadzo, nahone o sumbedza hani u vha na tshivhindi?

13 Muapostola Petro o vha e muhulwane wa tshivhidzo tsha Vhukriste a ḓivheaho vhukuma. O vha e khonani ya Yesu ya tsini nahone o vha o ṋewa vhuḓifhinduleli ha ndeme vhukuma. (Mat. 16:19) Sa tsumbo, nga 36 C.E., Petro o vha na ndugelo ya u huwelela mafhungo maḓifha kha Koronelio na vha muṱa wawe. Zwenezwo zwithu zwo vha zwi tshi swayea vhukuma ngauri Koronelio o vha e muṅwe wa Vhannḓa a songo fumbaho. Musi Koronelio na vha muṱa wawe vha tshi wana muya mukhethwa, Petro o ri: “Naa hu na ane a nga hana musi vhenevha vhathu vhe vha ṱanganedza muya mukhethwa u fana na riṋe vha tshi lovhedzwa?”—Mish. 10:47.

14 Nga 49 C.E., vhaapostola na vhahulwane vha tshivhidzo tsha Yerusalema, vho ṱangana u itela u haseledza arali Vhannḓa vhane zwino vha vha Vhakriste vha tshi fanela u fumbiswa. Kha wonoyu muṱangano, Petro o amba nga tshivhindi a tshi khou humbudza vhahawe uri miṅwahani minzhi yo fhiraho, Vhannḓa vha songo fumbaho vho ṱanganedza muya mukhethwa. Tshenzhelo ya Petro yo thusa tshigwada tshi langaho tsha ḓanani ḽa u thoma ḽa miṅwaha u dzhia phetho. (Mish. 15:6-11, 13, 14, 28, 29) Vhayuda na Vhakriste vha Vhannḓa, vho takala vhukuma musi vha tshi pfa Petro a tshi amba eneo mafhungo nga tshivhindi. Zwi nga vha zwo vha zwo lelutshela vhenevho Vhakriste u fulufhela onoyo munna o vhibvaho nga lwa muya!—Vhaheb. 13:7.

15. Petro o ita vhukhakhi vhufhio musi e ngei Siria kha ḽa Antiokia? (Sedzani tshifanyiso tsha u thoma.)

15 Nga murahu ha muṱangano nga 49 C.E., Petro o dalela Siria kha ḽa Antiokia. Musi e henefho, o ita vhukonani na Vhakriste vha Vhannḓa. A zwi timatimisi uri vhenevho Vhakriste vho vhuyelwa vhukuma nga nḓivho na tshenzhelo ya Petro. Edzani u vhona nga maṱo a muhumbulo nḓila ye vha pfa ngayo vhuṱungu musi Petro a tshi litsha u ḽa navho. Miṅwe miraḓo ya tshivhidzo tsha Vhayuda u katela na Baranaba, vho tevhela tsumbo i si yavhuḓi ya Petro. Ndi mini zwe zwa ṱuṱuwedza onoyo muhulwane wa Mukriste u dzhia yeneyo phetho i si yavhuḓi—phetho ye ya vha i tshi nga fhandekanya tshivhidzo? Zwa ndeme vhukuma, ndi mini  zwine ra nga zwi guda kha vhukhakhi ha Petro zwine zwa ḓo ri thusa arali muhulwane a amba kana u ita zwithu zwine zwa ri pfisa vhuṱungu?

16. Petro o khakhululwa hani, nahone hu takuwa mbudziso dzifhio?

16 Vhalani Vhagalata 2:11-14. Petro o vha a tshi ofha vhathu. (Mir. 29:25) Hu sa londwi uri Petro o vha a tshi ḓivha nḓila ine Yehova a dzhia ngayo eneo mafhungo, Petro o vha a tshi ofha nḓila ine Vhayuda vho fumbaho vha tshivhidzo tsha Yerusalema vha ḓo mu dzhia ngayo. Muapostola Paulo, we a vha e hone kha wonoyo muṱangano ngei Yerusalema nga 49 C.E., o amba na Petro vhe ngei Antiokia nga ha enea mafhungo nahone a mu vhudza uri u na muhoyo. (Mish. 15:12; Vhagal. 2:13) Vhakriste vha Vhannḓa vho ḓipfa hani nga ha vhukhakhi he ha itwa nga Petro? Naa vho tenda u khukhuliswa? Naa Petro o vha a tshi ḓo xelelwa nga ndugelo nga nṱhani ha vhukhakhi hawe?

NI HANGWELE

17. Petro o vhuyelwa hani nga u hangwelwa nga Yehova?

17 Nga u ḓiṱukufhadza, Petro o tenda u khakhululwa nga Paulo. Maṅwalo ha ri vhudzi arali Petro o xelelwa nga ndugelo dzawe. Zwi re zwone ndi uri, nga murahu o hevhedzwa uri a ṅwale marifhi mavhili e a vha tshipiḓa tsha Bivhili. Ṱhogomelani uri kha vhurifhi hawe ha vhuvhili, Petro o vhidza Paulo uri ndi, “wahashu a funwaho.” (2 Pet. 3:15) Naho zwe Petro a zwi ita zwo pfisa vhuṱungu miraḓo ya tshivhidzo tsha Vhannḓa, Yesu ane a vha ṱhoho ya tshivhidzo o bvela phanḓa a tshi mu shumisa. (Vhaef. 1:22) Miraḓo ya tshivhidzo yo vha na tshibuli tsha u edzisa Yesu na Khotsi awe nga u sumbedza u hangwela. Ri fulufhela uri a huna muthu o tendaho u khukhuliswa nga vhukhakhi ha muthu a songo fhelelaho.

18. Ndi kha vhuimo vhufhio hune ra fanela u dzhia zwithu nga nḓila ine Yehova a zwi dzhia ngayo?

18 Samusi vhahulwane vha ḓanani ḽa u thoma ḽa miṅwaha ḽo fhiraho vho vha vha songo fhelela, na vhahulwane vha tshivhidzo vha Vhakriste vha musalauno a vho ngo fhelela “ngauri roṱhe ri a khakha lunzhi.” (Yak. 3:2) Zwenezwi zwo leluwa u zwi amba, fhedzi ri nga ita mini arali ra pfiswa vhuṱungu nga nṱhani ha u sa fhelela ha wahashu? Kha honoho vhuimo, naa ri ḓo dzhia zwithu nga nḓila ine Yehova a zwi dzhia ngayo? Sa tsumbo, ni nga ita mini arali muhulwane a nga amba zwithu zwi sumbedzaho u vha na luvhengelambiluni? Naa ni ḓo khukhulisea arali muhulwane a amba zwithu zwine zwa ni vhaisa? Nṱhani ha u ṱavhanya u amba uri onoyo wahashu ha fanelei u vha muhulwane, naa ni ḓo lindela Yesu ane a vha ṱhoho ya tshivhidzo a tshi dzhia vhukando? Nṱhani ha u livhisa ṱhogomelo kha vhukhakhi hawe, naa ni ḓo ṱhogomela miṅwaha ye onoyo wahashu a i fhedza a tshi khou shumela Mudzimu nga u fulufhedzea? Arali wahashu we a ni pfisa vhuṱungu a bvela phanḓa a tshi shuma sa muhulwane kana a wana dziṅwe ndugelo dzo engedzeaho, naa ni ḓo takala nae? U ḓiimisela haṋu u hangwela zwi nga sumbedza uri ni dzhia zwithu nga nḓila ine Yehova a zwi dzhia ngayo.—Vhalani Mateo 6:14, 15.

19. Ri fanela u ḓiimisela u ita mini?

19 Vhane vha funa khaṱulo yo teaho, vho lavhelela nga maṱo matswuku ḓuvha ḽine Yehova a ḓo fhelisa tshoṱhe khaṱulo i songo teaho ye ya vhangwa nga Sathane na maitele awe mavhi. (Yes. 65:17) U swika zwenezwo zwi tshi itea, u nga ri roṱhe ri nga ḓiimisela u dzhia zwithu nga nḓila ine Yehova a zwi dzhia ngayo nga u ḓiṱukufhadza na u ṱhogomela uri ri nga vha ri si na mafhungo oṱhe nga vhuḓalo nahone ri fanela u hangwela vhane vha ri khakhela.