Pfukelani kha mafhungo

Pfukelani kha zwi re ngomu

“Muhaṱuli Wa Mashango Oṱhe” U Dzula A Tshi Ita Zwo Teaho

“Muhaṱuli Wa Mashango Oṱhe” U Dzula A Tshi Ita Zwo Teaho

“Ene Tombo-thavhani, á shumá ha khakhi. Dzinḓila dzawe dzoṱhe dzo luga.”—DOIT. 32:4.

NYIMBO: 112, 89

1. Abrahamu o sumbedza hani uri u fulufhela Yehova nga u haṱula nga nḓila yo teaho? (Sedzani tshifanyiso tsha u thoma.)

“MUHAṰULI wa mashango oṱhe naa ha nga iti zwo lugaho?” (Gen. 18:25) Musi Abrahamu a tshi vhudzisa yeneyo mbudziso, o vha a tshi khou sumbedza uri u fulufhela uri Yehova u ḓo haṱula Sodoma na Gomora nga nḓila yo teaho. Abrahamu o vha e na vhungoho ha uri Yehova a nga si vhuye a haṱula nga nḓila i songo teaho nga u “baḓakanya muvhuya na muvhi” musi a tshi fhelisa vhavhi. Abrahamu ho ngo vhuya a timatima Yehova. Nga murahu ha miṅwaha i ṱoḓaho u vha 400, Yehova o amba nga ha ene muṋe a ri: “Ene Tombo-thavhani, á shumá ha khakhi. Dzinḓila dzawe dzoṱhe dzo luga, Mudzimu wa ngoho a sí na mazwifhi, Mululamisi, ha ṱaluli.”—Doit. 31:19; 32:4.

2. Ndi ngani hu tshi nga ambiwa uri Yehova u haṱula nga nḓila yo teaho?

2 Ndi ngani Abrahamu o fulufhela uri Yehova u ḓo dzula a tshi haṱula nga nḓila yo teaho? Ngauri Yehova ndi tsumbo khulwane ya u haṱula nga nḓila yo teaho na u luga. Zwi re zwone ndi uri maipfi a Luheberu ane a ri u ‘haṱula nga nḓila yo teaho’ na u ‘luga’, kanzhi a shumiswa khathihi kha Maṅwalo a Luheberu. Enea  maipfi a amba tshithu tshithihi. Samusi zwilinganyo zwa Yehova zwi tshi dzula zwo luga, u dzula a tshi haṱula nga nḓila yo teaho. Zwiṅwe hafhu, Bivhili i amba uri “zwiné a zwi funa ndi u luga na u sa ṱalula.”—Ps. 33:5.

3. Ṋeani tsumbo ya nḓila ye vhaṅwe vha haṱulwa ngayo nga nḓila i songo teaho.

3 Vhathu vho lugaho vha khuthadzwa nga u ḓivha uri Yehova u dzula a tshi haṱula nga nḓila yo teaho, ngauri shangoni ho ḓala vhathu vhane vha haṱula nga nḓila i si yavhuḓi. Zwenezwo zwi ita uri nga zwiṅwe zwifhinga vhathu vha vhonwe mulandu zwi songo tea. Sa tsumbo, vhaṅwe vho haṱulwa nga nḓila i songo teaho nahone vha valelwa dzhele. Samusi musalauno ho no vha na ndingo dza DNA, dzenedzo ndingo dzo thusa vhaṅwe vhathu uri vha bviswe dzhele nga murahu ha u fhedza miṅwaha minzhi vho valelwa vhe si na mulandu. Honoho u haṱulwa nga nḓila i songo teaho zwi ita uri vhathu vha dinalee na u sinyuwa. Hu na muṅwe mufuda wa u haṱula nga nḓila i songo teaho une wa nga ita uri Vhakriste vha kundelwe u konḓelela.  

TSHIVHIDZONI

4. Lutendo lwa Mukriste lu nga lingwa hani?

4 Vhakriste a vha lavheleli u farwa nga nḓila i si yavhuḓi tshivhidzoni tsha Vhukriste. Naho zwo ralo, lutendo lwashu lu nga lingwa arali ra nga vhona kana u haṱulwa nga nḓila i songo teaho tshivhidzoni. Ni nga ita mini arali ni tshi vhona u nga no farwa nga nḓila i si yavhuḓi tshivhidzoni kana u sa farwa zwavhuḓi nga mutendi nga inwi? Naa ni ḓo tendela zwenezwo zwi tshi ni khukhulisa?

5. Ndi ngani Mukriste a songo fanela u mangala musi a tshi farwa nga nḓila i si yavhuḓi tshivhidzoni?

5 Nga nṱhani ha uri roṱhe a ro ngo fhelela nahone ri a khakha, ri ṱhogomela uri zwi nga konadzea uri ri si farwe nga nḓila yavhuḓi kana ri si fare vhaṅwe nga nḓila yavhuḓi tshivhidzoni. (1 Yoh. 1:8) Naho zwenezwo zwi sa itei tshifhinga tshoṱhe, Vhakriste a vha mangali kana u khukhulisea musi hu tshi haṱulwa nga nḓila i songo teaho. Yehova o ri ṋea nyeletshedzo i shumaho Ipfini ḽawe u itela u ri thusa uri ri dzule ri tshi fulufhedzea, naho mutendi nga riṋe a tshi ri fara nga nḓila i si yavhuḓi.—Ps. 55:12-14.

6, 7. Muṅwe wahashu o farwa hani nga nḓila i si yavhuḓi tshivhidzoni, nahone o thuswa nga mini?

6 Ṱhogomelani zwe zwa itea kha Willi Diehl. Mathomoni a 1931, Wahashu Diehl o shuma nga u fulufhedzea Bethele ya ngei Bern kha ḽa Switzerland. Nga 1946, o ya kilasini ya vhu malo Tshikoloni tsha Gilead ngei New York, U.S.A. Musi o no fhedza tshenetsho tshikolo, o ita mushumo wa ḽiisela ngei Switzerland. Kha nganeavhutshilo yawe, Wahashu Diehl o ri: “Nga May 1949, ndo ḓivhadza ofisi khulwane ya davhi ḽa ngei Bern uri ndi ṱoḓa u vhinga.” Vhe vha vha vha tshi khou ranga phanḓa ngei Bern vho aravha hani? Vho ri: “Ri khou ni dzhiela ndugelo dzoṱhe nga nnḓa ha vhuvulanḓila ha tshifhinga tshoṱhe.” Wahashu Diehl o ri: “Ndo vha ndi si tsha tendelwa u ṋekedza nyambo . . . Vhathu vhanzhi vho vha vha si tsha ri lumelisa nahone vha tshi ri fara sa vhathu vho bviswaho tshivhidzoni.”

7 Wahashu Diehl o ita mini nga honoho vhuimo? O ri: “Naho zwo ralo, ro vha ri tshi zwi ḓivha uri u dzhenela mbingano a zwi lwisani na Maṅwalo, nga zwenezwo, ro rabela Yehova nahone ra fulufhela ene.” Mafheleloni, mavhonele o khakheaho e vhathu vha vha vhe nao nga ha mbingano o khakhululwa nahone Wahashu Diehl o dovha a ṋewa ndugelo. U fulufhedzea hawe  kha Yehova zwo mu vhuyedza. * Ri fanela u ḓivhudzisa uri: ‘Naa ndi ḓo fulufhedzea kha Yehova musi ndi tshi farwa nga nḓila i si yavhuḓi? Naa ndi ḓo lindela Yehova ndi sa fheli mbilu kana naa ndi ḓo ḓitika nga nṋe muṋe?’—Mir. 11:2; vhalani Mixa 7:7.

8. Ndi ngani ni tshi nga vhona u nga no farwa nga nḓila i si yavhuḓi kana muṅwe muthu o farwa nga nḓila i si yavhuḓi?

8 Kha ḽiṅwe sia, zwi nga kha ḓi itea na vhona u nga no farwa nga nḓila i si yavhuḓi kana muṅwe muraḓo wa tshivhidzo o farwa nga nḓila i si yavhuḓi. Nga nṱhani ha uri a ro ngo fhelela, ri nga kha ḓi vhona zwithu nga iṅwe nḓila kana ri nga kha ḓi vha ri si na vhuṱanzi ho fhelelaho nga ha maṅwe mafhungo. Hu sa londwi mavhonele ashu kha honoho vhuimo, u ḓitika nga Yehova nga thabelo na u fulufhedzea zwi ḓo ita uri ri iledze u “ṅalela Yehova.”—Vhalani Mirero 19:3.

9. Ndi tsumbo dzifhio dzine ra ḓo haseledza nga hadzo kha ino thero na kha i tevhelaho?

9 Kha ri haseledze tsumbo tharu dzi re Bivhilini dza vhathu vha Yehova vhe vha haṱulwa nga nḓila i songo teaho. Kha ino thero ri ḓo haseledza nga ha Yosefa muḓuhulu-ḓuhulwana wa Abrahamu na zwe vhakomana vhawe vha mu ita zwone. Kha thero i tevhelaho, ri ḓo ṱolisisa nḓila ye Yehova a shumisana ngayo na Ahaba khosi ya Isiraele u katela na zwe zwa itea kha muapostola Petro ngei Siria kha ḽa Antiokia. Musi ri tshi khou haseledza dzenedzi tsumbo, zwi nga vha zwavhuḓi uri ni ṱhogomele ngudo dzine dza nga ni thusa u dzula no khwaṱha nga lwa muya na u tsireledza vhushaka haṋu na Yehova, zwihuluhulu arali ni tshi humbula u nga no farwa nga nḓila i si yavhuḓi.

YOSEFA—O HAṰULWA NGA NḒILA I SONGO TEAHO

10, 11. (a) Yosefa o farwa hani nga nḓila i si yavhuḓi? (b) Ndi tshibuli tshifhio tshe Yosefa a vha e natsho musi e dzhele?

10 Yosefa mushumeli wa Yehova a fulufhedzeaho, o farwa nga nḓila i si yavhuḓi nga vhathu vhane vha si vhe mashaka awe nahone zwi vhavhaho vhukuma o farwa luvhi na nga vhakomana vhawe. Musi Yosefa e na miṅwaha ya 17, vhakomana vhawe vho mu dzhia nahone vha mu rengisa sa phuli. O iswa Egipita a sa funi. (Gen. 37:23-28; 42:21) Nga murahu ha u fhedza tshifhinga kha ḽeneḽo shango, o pomokwa uri o lingedza u tzhipa nahone a valelwa dzhele a songo sengiswa. (Gen. 39:17-20) Yosefa o farwa sa phuli na u valelwa dzhele lwa miṅwaha i ṱoḓaho u vha 13. Ndi mini zwine ra nga zwi guda kha zwe zwa itea kha Yosefa zwine zwa nga ri thusa arali vhatendi nga riṋe vha nga ri fara nga nḓila i si yavhuḓi?

11 Yosefa o vha e na tshibuli tsha u vhudza muthu we a vha o farwa nae zwe zwa itea khae. Onoyo muthu o vha e ndumi ya khosi. Musi Yosefa na yeneyo ndumi vhe dzhele, ndumi yo lora nahone Yosefa a ṱalutshedza zwe wonoyo muloro wa vha u tshi amba zwone. Yosefa o ṱalutshedza uri yeneyo ndumi i ḓo vhuyedzedzwa vhuimoni hayo pfamoni ya Farao. Musi Yosefa a tshi ṱalutshedza wonoyo muloro, o shumisa tshenetsho tshibuli u ṱalutshedza zwe zwa itea khae. Ri nga guda zwithu zwa ndeme kha zwe Yosefa a zwi amba na zwe a si zwi ambe.—Gen. 40:5-13.

12, 13. (a) Zwe Yosefa a zwi vhudza ndumi, zwi sumbedza hani uri o vha a songo ṱanganedza vhuimo hawe ha u haṱulwa nga nḓila i songo teaho? (b) Ndi mini zwe Yosefa a si zwi vhudze ndumi?

12 Vhalani Genesi 40:14, 15. Bivhilini Yosefa o amba uri o vha o “tswiwa.” Vhukuma, o haṱulwa nga nḓila i songo teaho. Yosefa o dovha a zwi vhea khagala uri o farwa  e si na mulandu. O humbela yeneyo ndumi uri i vhudze Faraho nga ha zwenezwo. Tshipikwa tshawe tsho vha tshi tshifhio? O ri: “U mbvise nḓuni heino.”

13 Naa zwe Yosefa a zwi amba zwi sumbedza uri o vha o ṱanganedza vhuimo hawe? Na khathihi. O vha a tshi zwi ḓivha uri o haṱulwa nga nḓila i songo teaho. O ṱalutshedza yeneyo ndumi nga nḓila i pfalaho nahone khamusi yeneyo ndumi yo vha i tshi nga kona u mu thusa. Naho zwo ralo, ṱhogomelani uri Maṅwalo ha sumbedzi uri Yosefa o vhudza muṅwe muthu u katela na Farao uri o rengiswa nga vhakomana vhawe. Zwi re zwone ndi uri, musi vhakomana vhawe vha tshi ya ngei Egipita na u pfumedzana na Yosefa, Farao o vha ṱanganedza nahone a vha ramba uri vha pfulutshele Egipita na uri vha ḓiphine nga zwithu “zwavhuḓi zwoṱhe.”—Gen. 45:16-20.

U amba zwithu zwi si zwavhuḓi nga ha vhaṅwe zwi nga ṋaṋisa thaidzo (Sedzani phara 14)

14. Ndi mini zwine zwa ḓo ri tsireledza kha tshikwekwe tsha u amba zwithu zwi si zwavhuḓi nga ha vhaṅwe naho ri songo farwa nga nḓila yavhuḓi tshivhidzoni?

14 Musi Mukriste a tshi vhona u nga ho ngo farwa nga nḓila yavhuḓi, u fanela u ṱhogomela uri a si tshimbile a tshi sola nga hazwo. Vhukuma, ri fanela u humbela thuso kha vhahulwane na u vha ḓivhadza arali hu na muraḓo wa tshivhidzo we a ita vhukhakhi vhuhulwane. (Lev. 5:1) Naho zwo ralo, arali hu songo itwa vhukhakhi vhuhulwane, zwi a konadzea u tandulula thaidzo ri songo dzhenisa vhaṅwe vhathu u katela na vhahulwane. (Vhalani Mateo 5:23, 24; 18:15.) Zwi nga vha zwavhuḓi arali ra nga shumisa Bivhili u tandulula vhuleme. Kha vhuṅwe vhuimo, ri nga ṱhogomela uri a ro ngo pfesesa zwavhuḓi mafhungo na uri a ro ngo farwa nga nḓila i si yavhuḓi na luthihi. Ri ḓo takala vhukuma uri a ro ngo ṋaṋisa mafhungo nga u amba zwithu zwi si zwavhuḓi nga ha Vhakriste nga riṋe! Humbulani, hu sa londwi uri ro khakha kana a ri na mulandu, u amba zwithu zwi si zwavhuḓi nga ha vhaṅwe a zwi iti uri zwithu zwi vhe khwine. U fulufhedzea kha Yehova na kha vhahashu zwi ḓo ri tsireledza uri ri si ite vhukhakhi ho raloho. Musi mupsalme a tshi amba nga ha muthu “ané a tshimbila  nga yo lugaho,” o amba uri ha, ‘tshinyi nga lulimi lwawe, ha levheli muṅwe, ha pomoki wa hawe.’—Ps. 15:2, 3; Yak. 3:5.

HUMBULANI VHUSHAKA HAṊU HA NDEME VHUKUMA

15. Yosefa o vha e na vhushaka-ḓe na Yehova?

15 Ri guda zwithu zwa ndeme vhukuma kha vhushaka ha Yosefa na Yehova. Musi a tshee dzhele lwa miṅwaha ya 13, Yosefa o sumbedza uri u vhona zwithu nga nḓila ine Yehova a zwi vhona ngayo. (Gen. 45:5-8) Ho ngo vhuya a pomoka Yehova nga zwe zwa itea khae. Naho a songo farwa zwavhuḓi, ho ngo zwi tendela zwi tshi mu sinyusa. Zwa ndeme vhukuma, ho ngo tendela u sa fhelela ha vhaṅwe na vhukhakhi havho zwi tshi tshinya vhushaka hawe na Yehova. U fulufhedzea ha Yosefa zwo mu ṋea tshibuli tsha u vhona tshanḓa tsha Yehova musi a tshi mu fhaṱutshedza na vha muṱa wawe na u khakhulula khaṱulo ye ya vha i songo itwa nga nḓila yo teaho.

16. Ndi ngani ri tshi fanela u sendela tsini-tsini na Yehova musi ri tshi farwa nga nḓila i si yavhuḓi tshivhidzoni?

16 Nga nḓila i fanaho, ri fanela u dzhiela nṱha vhushaka hashu na Yehova na u vhu tsireledza. A ro ngo fanela u tendela u sa fhelela ha vhahashu zwi tshi ri fhandekanya na Mudzimu ane ra mu funa na u mu gwadamela. (Vharoma 8:38, 39) Nṱhani hazwo, arali mutendi nga riṋe a ri fara nga nḓila i si yavhuḓi, zwi nga vha zwavhuḓi arali ra nga edzisa tsumbo ya Yosefa nahone ra sendela tsini-tsini na Yehova na u ita vhuḓidini ha u vha na mavhonele a fanaho na a Yehova. Musi ro no ita zwoṱhe zwine ra nga kona u tandulula thaidzo ri tshi shumisa Maṅwalo, ri fanela u zwi litshela zwanḓani zwa Yehova nahone ri vhe na vhungoho ha uri u ḓo dzudzanya honoho vhuimo nga tshifhinga tshawe na nga nḓila yawe.

FULUFHELANI “MUHAṰULI WA MASHANGO OṰHE”

17. Ri nga sumbedza hani uri ri fulufhela “Muhaṱuli wa mashango oṱhe”?

17 Samusi ri kha ḓi tshila kha ano maitele mavhi a zwithu, ri fanela u lavhelela uri ri ḓo farwa nga nḓila i si yavhuḓi. Nga zwiṅwe zwifhinga, ni nga farwa nga nḓila i si yavhuḓi kana na vhona muṅwe a tshi haṱulwa nga nḓila ine na vhona i songo tea tshivhidzoni. Ni songo tenda u khukhuliswa. (Ps. 119:165) Sa vhashumeli vha Mudzimu vha fulufhedzeaho, ri dzula ri tshi fulufhedzea khae, u rabela uri a ri thuse na u ḓitika ngae. Zwiṅwe hafhu, nga u ḓiṱukufhadza ri ṱanganedza uri ri nga kha ḓi sa vhona zwiṅwe zwithu nga nḓila yo teaho. Ri ṱhogomela uri nga zwiṅwe zwifhinga ri nga vhona zwiṅwe zwithu nga iṅwe nḓila nga nṱhani ha u sa fhelela. Samusi ro zwi guda kha tsumbo ya Yosefa, ri ṱoḓa u iledza u amba zwithu zwi si zwavhuḓi nga ha vhaṅwe ngauri zwenezwo zwithu zwi nga ṋaṋisa mafhungo. Mafheleloni, nṱhani ha u lugisa thaidzo nga riṋe vhane, u nga ri ri nga ḓiimisela u fulufhedzea kha Yehova na u mu lindela ri sa fheli mbilu uri a lugise mafhungo. Zwenezwo zwithu zwi ḓo ita uri Yehova a ri takalele na u ri fhaṱutshedza, samusi o zwi ita na kha Yosefa. Vhukuma, ri nga vha na vhungoho ha uri Yehova ane a vha “Muhaṱuli wa mashango oṱhe” u ḓo dzula a tshi ita zwo lugaho ngauri “dzinḓila dzawe dzoṱhe dzo luga.”—Gen. 18:25; Doit. 32:4.

18. Ri ḓo ṱolisisa mini kha thero i tevhelaho?

18 Kha thero i tevhelaho ri ḓo ṱolisisa dziṅwe tsumbo mbili dzi re Bivhilini dza vhathu vha Yehova vhe vha farwa nga nḓila i si yavhuḓi. Dzenedzi tsumbo dzi ḓo ombedzela nḓila ine u ḓiṱukufhadza na u ḓiimisela u hangwela zwa tshimbidzana ngayo na nḓila ine Yehova a dzhia ngayo khaṱulo.

^ phar. 7 Sedzani nganeavhutshilo ya Willi Diehl, ine ya vha na tshiṱoho tshine tsha ri “Jehovah Is My God, in Whom I Will Trust” kha Tshiingamo tsha ḽa 1 November 1991.