Pfukelani kha mafhungo

Pfukelani kha zwi re ngomu

 THERO I RE KHA GWATI | ZWINE NA FANELA U ZWI ḒIVHA NGA HA ḼIṰAḒULU

Mbudziso Nga Ha Vhane Vha Dzula Ṱaḓulu

Mbudziso Nga Ha Vhane Vha Dzula Ṱaḓulu

Naa no no vhuya na ḓivhudzisa nga ha ṱaḓulu na vhane vha dzula hone? Arali zwo ralo, a si inwi ni noṱhe. Lwa miṅwaha minzhi, vhathu vha na mavhonele o fhamba-fhambanaho nga ha enea mafhungo. Vhaṅwe vha tenda uri ṱaḓulu hu dzula vho faho kana vhomakhulukuku wavho vhane vha fanela u huliswa. Vhaṅwe vha amba uri ṱaḓulu ndi fhethu hune ha vha na mulalo nahone hu dzula vharuṅwa na vhathu vho lugaho vhe vha fa. Naho zwo ralo, vhaṅwe vha dzhia ṱaḓulu sa haya ha midzimu minzhi-minzhi.

Vhathu vhanzhi vha amba uri a ri koni u ḓivha nga ha zwithu zwine zwa vha ṱaḓulu ngauri a huna muthu we a vhuya a ya hone. Naho zwo ralo, eneo mahumbulele o khakhea. Yesu Kristo o vha a tshi dzula ṱaḓulu musi a sa athu u ḓa kha ḽifhasi. O vhudza zwenezwo vharangaphanḓa vha vhurereli vha ḓanani ḽa u thoma ḽa miṅwaha a ri: “Ndo ḓa ndi tshi bva ṱaḓulu uri ndi si ite zwine nda zwi funa, fhedzi ndi ite zwi funwaho nga o nthumaho.” Nga zwenezwo, Yesu o vhudza vhaapostola vhawe nga ha zwine a zwi ḓivha musi a tshi ri: “Nḓuni ya Khotsi anga hu na vhudzulo vhunzhi.”—Yohane 6:38; 14:2.

Vhukuma, Khotsi a Yesu ndi Mudzimu ane dzina ḽawe ḽa vha Yehova nahone “nnḓu” ya Yehova i ṱaḓulu. (Psalme ya 83:18) Nga zwenezwo, a huna muthu ane a nga ṱalusa uri ṱaḓulu ndi fhethu-ḓe u fhira Yehova Mudzimu na Yesu Kristo. Vho dzumbulula zwithu zwinzhi nga ha ṱaḓulu nga u sumbedza vhathu vha fulufhedzeaho mabono.

Thero i tevhelaho i haseledza zwiṅwe zwa zwithu zwi re Bivhilini zwine zwa ṱalusa zwithu zwe zwa vhonwa nga vhathu kha bono. Samusi ni tshi khou ṱolisisa nga ha enea mabono, humbulani uri ṱaḓulu a si fhethu hune na nga kona u hu vhona kana u hu kwama. Nga zwenezwo, nṱhani ha u ṱalutshedza zwithu zwine zwa kona u pfeseswa nga vhathu vha muya fhedzi, Mudzimu o sumbedza uri ṱaḓulu ndi fhethu-ḓe nga nḓila ine ra kona u i pfesesa. Mabono a ḓo kona u ni thusa u pfesesa nga ha “vhudzulo vhunzhi” vhune ha vha ṱaḓulu.