Pfukelani kha mafhungo

Pfukelani kha zwi re ngomu

 THERO I RE KHA GWATI | VHARUṄWA—NAA NDI VHA VHUKUMA?

Naa Ni Na Muruṅwa Ane A Ni Linda?

Naa Ni Na Muruṅwa Ane A Ni Linda?

Bivhili a i funzi uri muthu muṅwe na muṅwe u na muruṅwa ane a mu linda. Yesu o vhuya a amba uri: “Ni vhone uri ni si nyadze muṅwe wa vhenevha vhana [vhafunziwa vha Kristo], ngauri ndi a ni vhudza uri vharuṅwa vhavho vha re ṱaḓulu vhane vha vha ṱhogomela, vha dzula vha tshi vhona tshifhaṱuwo tsha Khotsi anga a re ṱaḓulu.” (Mateo 18:10) Naho zwo ralo, Yesu o vha a sa khou amba uri muthu muṅwe na muṅwe u na muruṅwa ane a mu linda, fhedzi o vha a tshi khou amba uri vharuṅwa vha na dzangalelo kha muṅwe na muṅwe wa vhafunziwa vhawe. Nga zwenezwo, vhagwadameli vha ngoho a vha ḓidzhenisi khomboni nga khole, vha tshi humbula uri vharuṅwa vha Mudzimu vha ḓo vha tsireledza.

Naa zwenezwi zwi amba uri vharuṅwa a vha thusi vhathu? Na khathihi. (Psalme ya 91:11) Vhaṅwe vha na khwaṱhisedzo ya uri Mudzimu o vha ṋea muruṅwa ane a ḓo vha tsireledza na u vha linda. Kenneth we a bulwa mathomoni a ino thero u ḓipfa nga yeneyo nḓila. Naho ri nga si mu hanedze, a nga vha a tshi khou amba ngoho. Kanzhi Ṱhanzi dza Yehova dzi vhona nḓila ine vharuṅwa vha dzhenelela ngayo musi dzi tshi khou shela mulenzhe kha mushumo wa u huwelela. Naho zwo ralo, nga nṱhani ha uri a ri koni u vhona vharuṅwa, ri nga si kone u ḓivha uri Mudzimu u vha shumisa kha vhuimo vhufhio u itela u thusa vhathu. Naho zwo ralo, ri vha ri songo khakha musi ri tshi livhuha Ramaanḓaoṱhe musi a tshi ri thusa nga nḓila naho i ifhio.—Vhakolosa 3:15; Yakobo 1:17, 18.