Pfukelani kha mafhungo

Pfukelani kha zwi re ngomu

Ndi takalela u ṱwa na vhaswa tshivhidzoni

 BIVHILI I SHANDULA VHUTSHILO

Ndo Vha Ndi Tshi Funa U Tamba Baseball Nga Mbilu Yanga Yoṱhe!

Ndo Vha Ndi Tshi Funa U Tamba Baseball Nga Mbilu Yanga Yoṱhe!
  • ṄWAHA WA MABEBO: 1928

  • SHANGO: COSTA RICA

  • ZWE A VHA A TSHI ZWI ITA: O VHA A TSHI FHISETSHELA ZWA MITAMBO NA U GEMBULA

VHUTSHILO HANGA HA TSHIFHINGANI TSHO FHIRAHO

Ndo alutshela ngei Puerto Limón, ḓorobo ya vhuimazwikepe ine ya vha phendelashango ya ngei vhubvaḓuvha ha Costa Rica. Vhabebi vhanga vho vha vhe na vhana vha malo, nṋe ndo vha ndi wa vhusumbe. Khotsi anga vho lovha ndi na miṅwaha ya malo. U bva tsheetsho, mme anga vho ri alusa vhe vhoṱhe.

Baseball yo vha i tshipiḓa tsha vhutshilo hanga. Ndo vha ndi tshi takalela wonoyo mutambo u bva vhuṱukuni. Musi ndi miṅwahani ya vhufumi, ndo vha ndi tshi tamba kha thimu ṱhukhu. Musi ndi kha ḓi tamba kha yeneyo thimu, muṅwe munna o nkhumbela uri ndi ḓe ndi tambele thimu khulwane ya ngei Nicaragua nahone nga tshenetsho tshifhinga ndo vha ndi miṅwahani ya vhu-20. Naho zwo ralo, ndo vha ndi sa ṱoḓi u pfulutshela ngei Nicaragua ngauri ndo vha ndi tshi khou ṱhogomela mme anga vhe vha vha vhe si na mutakalo wavhuḓi. Nga zwenezwo, ndo hana. Nga murahu, muṅwe munna o nkhumbela uri ndi ḓe ndi tambele thimu ya lushaka ya baseball ya ngei Costa Rica nahone kha yeneyo thimu ho vha ho nangiwa vhatambi vhane vha bva kha thimu ṱhukhu. Ndo tenda. Ndo tambela yeneyo thimu u bva nga 1949 u swika nga 1952 nahone nda dovha nda tamba kha mitambo yo fhamba-fhambanaho ngei Cuba, Mexico na Nicaragua. Ndo vha ndi mutambi-makone wa baseball nahone ndo tamba mitambo ya 17 i tshi khou tevhekana ndi sa iti vhukhakhi. Ndo vha ndi tshi takalela nga maanḓa u pfa vhathu vha tshi nkhuza!

Zwi pfisaho vhuṱungu ndi uri ndo vha ndi tshi ḓifara luvhi. Naho ndo vha ndi na musidzana muthihi we nda vha ndi tshi funana nae, ho vha hu na vhaṅwe nga thungo. Ndo vha ndi tshidakwa. Ḽiṅwe ḓuvha ndo vha ndo kambiwa lwe nda ri ndi tshi vuwa nga ḓuvha ḽi tevhelaho, nda vha ndi si tsha humbula uri ndo swikisa hani hayani! Ndo vha ndi tshi tamba madaisi nahone ndi tshi betsha lotto.

Mme anga vho vha muṅwe wa Ṱhanzi dza Yehova musi ndi tshi kha ḓi ḓifara nga yeneyo nḓila. Vho lingedza u ita uri ndi vhe na dzangalelo kha zwine vha zwi tenda, fhedzi mathomoni a zwo ngo konadzea ngauri ndo vha ndo ḓidzhenisa tshoṱhe kha zwa mitambo. Na nḓala ndo vha ndi sa i pfi musi ri tshi khou ita nḓowe-nḓowe mudavhini! Ndo vha ndi tshi humbula nga ha mutambo fhedzi! Ndo vha ndi tshi funa baseball nga mbilu yanga yoṱhe!

 Naho zwo ralo, musi ndi na miṅwaha ya 29, ndo huvhala ndi tshi khou gavha bola. Musi ndi tshi fhola, ndo litsha u tamba. Naho zwo ralo, a thongo litsha wonoyo mutambo ngauri ndo vha mugudisi wa thimu ṱhukhu tsini na hayani.

NḒILA YE BIVHILI YA SHANDULA NGAYO VHUTSHILO HANGA

Nga 1957, ndo tenda u ya buthanoni ḽa Ṱhanzi dza Yehova ḽe ḽa farelwa mudavhini we nda vha ndi tshi tambela khawo baseball. Musi ndo dzula henefho, ndo ṱhogomela uri hu na phambano vhukati ha vhuḓifari ha Dziṱhanzi na vhaṱaleli vha baseball vha songo dzudzanyeaho. Zwe nda zwi vhona buthanoni zwo ntsudzulusela uri ndi thome u guda Bivhili na Dziṱhanzi na u ya miṱanganoni yadzo ya tshivhidzo.

Ndo takadzwa nga zwe nda zwi guda Bivhilini. Sa tsumbo, Yesu o dzula o amba hu tshee nga phanḓa uri maḓuvhani a vhufhelo, vhafunziwa vhawe vha ḓo huwelela mafhungo maḓifha a Muvhuso wa Mudzimu shangoni ḽoṱhe. (Mateo 24:14) Ndo dovha nda guda uri Vhakriste vha ngoho a vha huweleli u itela u wana tshelede. Yesu o ri: “No ṋewa nga mahala, ṋeani nga mahala.”—Mateo 10:8.

Musi ndi tshi khou guda, ndo vhambedza zwine Bivhili ya zwi amba na zwine nda zwi vhona kha Ṱhanzi dza Yehova. Ndo vha ndi tshi takalela vhuḓidini hadzo ha u phaḓaladza mafhungo maḓifha a Muvhuso wa Mudzimu shangoni ḽoṱhe dzi sa neti. Ndo vhona muya wa mafunda we Yesu a laedza Vhakriste uri vha u sumbedze. Nga zwenezwo, musi ndi tshi vhala Marko 10:21 nahone nda vhona khumbelo ya Yesu ine ya ri, ‘Iḓani ni vhe mutevheli wanga,’ na nṋe ndo vha ndi tshi ṱoḓa u vha Ṱhanzi.

Naho zwo ralo, zwo dzhia tshifhinga uri ndi dzhie vhukando. Sa tsumbo, lwa miṅwaha minzhi ndo vha ndi na nomboro ye nda vha ndi tshi anzela u betsha ngayo lotto vhege iṅwe na iṅwe. Naho zwo ralo, ndo guda Bivhilini uri Mudzimu u vhenga vhagwadameli vha “mudzimu wa mashudu” na vhane vha vha na vhupangwa. (Yesaya 65:11, Bivhili Khethwa; Vhakolosa 3:5) Ndo dzhia phetho ya u litsha u gembula. Swondaha ya u thoma musi ndo no litsha u betsha lotto, nomboro ye nda vha ndi tshi anzela u betsha ngayo yo wina! Nga nṱhani ha uri a tho ngo betsha nga yeneyo vhege, vhathu vho ngoḓa na u nkombetshedza uri ndi dovhe ndi betshe, fhedzi a tho ngo tenda. Ndo vha ndo laṱa ṋowa na danda.

Ndo sedzana na muṅwe mulingo we wa linga “vhumuthu vhuswa” hanga nga ḓuvha ḽe nda lovhedzwa ngaḽo buthanoni ḽa Ṱhanzi dza Yehova. (Vhaefesa 4:24) Nga eneo madekwana, ndo humela hodelani ye nda vha ndi tshi dzula khayo nahone nda wana hu na musidzana we nda vha ndi tshi funana nae kale o ima muṋangoni wa kamara yanga. O ri: “Sammy, iḓani. Kha ri ḓitakadze!” Fhedzi ndo ṱavhanya nda ri, “Hai!” Ndo mu humbudza uri ndi vho tshila u tendelana na zwilinganyo zwa Bivhili. (1 Vhakorinta 6:18) O ri: “Ni ri mini?” Nahone a amba uri mavhonele a Bivhili nga ha u ḓifara luvhi a si zwithu zwine zwa dina nahone a nkombetshedza uri ri vhuyelelane. Naho zwo ralo, ndo mbo ḓi dzhena kamarani nda khiṋa muṋango. Ṋamusi ndi kona u amba ndo takala uri, u bva tshee nda vha Ṱhanzi ya Yehova nga 1958, ndo farelela nga u fulufhedzea kha tshanduko dze nda dzi ita vhutshiloni hanga.

NḒILA YE NDA VHUYELWA NGAYO

Ndi pfa u nga ndi nga ṅwala bugu nga ha nḓila ye nda vhuyelwa ngayo nga u shumisa zwe nda zwi guda Bivhilini! Dziṅwe dza dzenedzo mbuyelo ndi uri zwazwino ndi na khonani nnzhi dza vhukuma, vhutshilo vhu re na ndivho na dakalo ḽa vhukuma.

Ndi kha ḓi funa baseball, fhedzi a i tsha vha ya ndeme vhutshiloni hanga. Musi ndi tshi tamba baseball ndo vha ndi na bvumo na tshelede, fhedzi zwenezwo a zwo ngo dzhia tshifhinga tshilapfu. Naho zwo ralo, vhushaka hanga na Mudzimu na vhahashu vhu ḓo dzula vhu hone. Bivhili i ri: “Shango ḽi a fhira na nyemulo dzaḽo, fhedzi ane a ita zwine Mudzimu a zwi funa u ḓo dzula e hone lini na lini.” (1 Yohane 2:17) Zwazwino ndi funa Yehova Mudzimu na vhathu vhawe nga mbilu yanga yoṱhe!