Pfukelani kha mafhungo

Pfukelani kha zwi re ngomu

 THERO I RE KHA GWATI | MUSI ANE NA MU FUNA A TSHI FA

U Sedzana Na Vhuṱungu Ha U Felwa

U Sedzana Na Vhuṱungu Ha U Felwa

Hu na nyeletshedzo nnzhi nga ha enea mafhungo. Naho zwo ralo, a si dzoṱhe dzine dza thusa. Sa tsumbo, vhaṅwe vha nga ni eletshedza uri ni songo lila kana u sumbedza nḓila ine na ḓipfa ngayo. Vhaṅwe vha nga ni vhudza uri ni lile nahone ni sumbedze nḓila ine na ḓipfa ngayo. Bivhili i ṋea nyeletshedzo i shumaho ine ya vha tshifhingani.

Kha dziṅwe mvelele munna ha lili. Fhedzi naa muthu u fanela u shona u lila phanḓa ha vhathu? Vhaḓivhi vha ngelelo vha amba uri u tsengisa miṱodzi ndi tshipiḓa tsho ḓoweleaho tsha u lila. Nga u ya ha tshifhinga, u lila zwi nga ni thusa u ḓipfa ni khwine hu sa londwi vhuṱungu ha u felwa vhune na vhu pfa. Naho zwo ralo, u sa sumbedza nḓila ine na ḓipfa ngayo zwi nga ni vhaisa nṱhani ha uri ni vhe khwine. Bivhili a i ambi uri zwo khakhea u lila kana munna ho ngo fanela u lila. Humbulani nga ha tsumbo ya Yesu. Yesu o lila phanḓa ha vhathu musi khonani yawe Lazaro a tshi fa, naho o vha e na maanḓa a u vusa vho faho!—Yohane 11:33-35.

U sinyuwa ndi tshipiḓa tsha u pfa vhuṱungu zwihuluhulu arali muthu o fa ri songo zwi lavhelela. Hu na zwiitisi zwinzhi zwine zwa nga sinyusa o felwaho, musi muthu ane a mu ṱhonifha a tshi amba zwithu zwi vhaisaho na u sa humbulela. Muṅwe munna wa Afurika Tshipembe ane a pfi Mike, o ri: “Khotsi anga vho fa ndi na miṅwaha ya 14. Musi ndi mbulungoni, mufunzi wa kereke ya Anglican o amba uri Mudzimu u ṱoḓa vhathu vho lugaho nahone u a vha dzhia nga u ṱavhanya. * Zwenezwi zwo ntsinyusa ngauri ro vha ri tshi ṱoḓa khotsi ashu. Zwi kha ḓi vhavha na zwino nga murahu ha miṅwaha ya 63.”

Hu pfi mini arali ni tshi ḓivhona mulandu? Zwihuluhulu arali muthu o fa ni songo zwi lavhelela, muthu o felwaho a nga humbula lunzhi-lunzhi uri, ‘Zwo vha zwi sa ḓo itea arali ndo ita tshiḽa na tshiḽa.’ Kana khamusi mufu o fa no lwa nae. Zwenezwi zwi nga ita uri ni ḓivhone mulandu.

Arali ni tshi ḓivhona mulandu na u sinyuwa, ndi zwa ndeme u sa thivhela nḓila ine na ḓipfa ngayo. Nṱhani hazwo, ambani na khonani ine ya ḓo ni thetshelesa na u ni khwaṱhisedza uri nḓila ine na ḓipfa ngayo yo ḓowelea kha vhathu vhanzhi vho felwaho. Bivhili i ri humbudza uri: “Khonani ndi ṱhama ya maḓuvha oṱhe; ndi mukomana we a bebelwa ḓuvha ḽa khombo.”—Mirero 17:17.

Khonani ya tsini ine muthu o felwaho a nga vha nayo ndi Musiki washu Yehova Mudzimu. Rabelani khae zwi tshi bva mbiluni ngauri “u a ni ṱhogomela.” (1 Petro 5:7) Zwiṅwe hafhu, u fulufhedzisa uri vhoṱhe vhane vha ita ngauralo u ḓo ita uri nḓila ine vha ḓipfa ngayo na zwine vha zwi humbula zwi wane “mulalo wa Mudzimu une wa fhira u ṱalukanya hoṱhe.” (Vhafilipi 4:6, 7) Zwiṅwe hafhu, tendelani Mudzimu a tshi ni thusa nga Ipfi ḽawe ḽi khuthadzaho ḽine ḽa vha Bivhili. Ṅwalani mutevhe wa maṅwalo a khuthadzaho. (Sedzani  bogisi.) Ni nga vha ni tshi ṱoḓa u rwela maṅwe ngomani. U humbula nga ha yeneyo nḓila, zwi nga ni thusa vhusiku musi ni noṱhe nahone khofhe dzi sa fari.—Yesaya 57:15.

 Muṅwe munna ane a vha na miṅwaha ya 40, ane ra ḓo mu vhidza Jack, u kha ḓi tou bva u felwa nga mufumakadzi wawe nga nṱhani ha khentsara. Jack o amba uri nga zwiṅwe zwifhinga u ḓipfa e na vhuludu. Fhedzi o thuswa nga thabelo. O ri: “Musi ndi tshi rabela Yehova, a thi vhuyi nda ḓipfa ndi ndoṱhe. Kanzhi ndi a karuwa vhusiku nahone ndi si tsha kona u eḓela. Musi ndo no vhala na u elekanya nga ha zwithu zwi khuthadzaho zwi bvaho Maṅwaloni na u rabela zwi tshi bva mbiluni, ndi pfa ndi khwine nahone ndi na mulalo u itaho uri ndi pfe ndo vhofholowa muhumbuloni na mbiluni nahone zwi ita uri ndi kone u eḓela.”

Muṅwe mufumakadzi ane a kha ḓi vha muṱuku ane a pfi Vanessa o felwa nga mme awe. Na ene o tshenzhela maanḓa a thabelo. O ri: “Kha zwifhinga zwi konḓaho vhukuma, ndo vha ndi tshi vhidza dzina ḽa Mudzimu nahone nda lila. Yehova o thetshelesa thabelo dzanga nahone tshifhinga tshoṱhe o vha a tshi nṋea nungo dze nda vha ndi tshi dzi ṱoḓa.”

Vhaṅwe vhaeletshedzi vha vhathu vho felwaho, vha eletshedza vhane vha si kone u sedzana na vhuṱungu ha u felwa uri vha shele mulenzhe kha u thusa vhaṅwe vhathu kana vha fhedze tshifhinga tshavho vha tshi ita mishumo ya u thusa tshitshavha. U ita zwenezwo zwi nga ni ita uri ni takale nahone ni nga ḓipfa ni khwine kha vhuṱungu vhune na vhu pfa. (Mishumo 20:35) Vhakriste vhanzhi vho felwaho vho wana uri u thusa vhaṅwe zwo vha ita uri vha khuthadzee.—2 Vhakorinta 1:3, 4.

^ phar. 5 Zwenezwi a si zwine Bivhili ya zwi funza. Bivhili i amba nga ha zwithu zwiraru zwine zwa ita uri muthu a fe.—Muhuweleli 9:11; Yohane 8:44; Vharoma 5:12.