Pfukelani kha mafhungo

Pfukelani kha zwi re ngomu

Musi Mufarisi Waṋu Wa Mbingano A Sa Fhulufhedzei

Musi Mufarisi Waṋu Wa Mbingano A Sa Fhulufhedzei

“Ndo vhona u nga u fa ndi khwine musi munna wanga a tshi mmbudza uri u khou nṱutshela u itela u vha na mufumakadzi muṱuku. Ndo vhona zwi sa pfali musi ndi tshi humbula zwoṱhe zwe nda ḓidzima zwone ndi tshi itela ene.”​—Maria wa Spain.

“Musi mufumakadzi wanga a tshi nṱutshela, ndo pfa ndo xelelwa vhukuma. Miḽoro yashu, mafhulufhedziso ashu na zwe ra vha ri tshi ṱoḓa u ita zwo mbo ḓi fhelela tshikhalani. Hu na maḓuvha e nda vha ndi tshi humbula u nga a thi tsheena mbilaelo, fhedzi nga murahu nda dovha nda ḓipfa ndo tsikeledzea vhukuma.”​—Bill wa Spain.

MUFARISI a sa fhulufhedzea, zwi a vhaisa vhukuma. Ndi ngoho uri vhaṅwe vhavhingani vha nga kona u farela mufarisi wavho o rembuluwaho na u vusulusa vhukonani havho. * Fhedzi hu sa londwi uri mbingano i nga bvela phanḓa, muthu we a wanulusa uri mufarisi wawe ho ngo fhulufhedzea, u ḓo dzula a tshi pfa vhuṱungu vhuhulu. Onoyo muthu a nga sedzana hani na honoho vhuṱungu?

NDIMANA DZA BIVHILI DZINE DZA NGA THUSA

Hu sa londwi vhuṱungu, vhafarisi vhanzhi vho khakhelwaho vho wana thuso Maṅwaloni. Vho guda uri Mudzimu u a vha pfela vhuṱungu.​—Maleaxi 2:13-16.

“Kha mbilaelo nnzhi dze dza ndzhena, mbilu yanga yo ḓi takadzwa nga phumudzo dzau.”​Psalme ya 94:19.

Bill o ri: “Musi ndi tshi vhala yeneyo ndimana, ndi humbula Yehova a tshi khou mphumudza u fana na nḓila ine khotsi a pfela ngayo vhuṱungu.”

“Muvhuya u mu ita nga zwivhuya.”​Psalme ya 18:25.

Carmen we munna wawe a vha a sa fhulufhedzei lwa miṅwedzi o ri: “Munna wanga o vha a sa fhulufhedzei. Fhedzi ndo vha ndi tshi tenda uri Yehova u ḓo dzula a tshi fhulufhedzea kha nṋe. A nga si nndaṱedze

“Ni songo vhilaela nga tshithu na tshithihi, fhedzi zwoṱhe zwine na zwi ṱoḓa ni humbele Mudzimu nga thabelo . . . nahone mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu.”​Vhafilipi 4:6, 7.

Sasha o ri: “Ndo vhala dzenedzi ndimana lunzhi-lunzhi. Mudzimu o mpha mulalo nge nda dzula ndi tshi rabela.”

Vhoṱhe vho ambiwaho afho nṱha, vho vha vha tshi ṱoḓa u laṱela thaula. Fhedzi vho fhulufhela Yehova Mudzimu nahone vha wana maanḓa Ipfini ḽawe. Bill u zwi vhea nga hei nḓila: “Lutendo lwo nthusa musi ndo sedzana na thaidzo vhutshiloni. Naho ndo ‘tshimbila govhani ḽa dunzi ḽa lufu,’ Mudzimu o vha e na nṋe.”​—Psalme ya 23:4.

^ phar. 4 U itela u ḓivha arali ni tshi tea u hangwela kana hai, sedzani mutevhe wa thero ine ya ri “When a Mate Is Unfaithful” kha Awake! ya ḽa 22 April 1999.