Pfukelani kha mafhungo

Pfukelani kha zwi re ngomu

Ni Nga Tshila Tshoṱhe Kha Ḽifhasi

Ni Nga Tshila Tshoṱhe Kha Ḽifhasi

ḼENEḼI NDI FULUFHEDZISO ḼAVHUḒI VHUKUMA! Musiki washu o ri fulufhedzisa uri u ḓo ita uri ri tshile tshoṱhe fhano kha ḽifhasi. Fhedzi vhathu vhanzhi a vha tendi uri zwenezwi zwi nga itea. Vha amba uri, ‘Muṅwe na muṅwe u ḓo fhedzisela o fa. Ndi nḓila ine vhutshilo ha vha ngayo.’ Vhaṅwe vha humbula uri zwi a konadzea u tshila tshoṱhe, fhedzi hu si fhano kha ḽifhasi. Vha amba uri u itela uri muthu a tshile tshoṱhe, u fanela u thoma a fa nahone a ya ṱaḓulu. Ni humbula mini?

Musi ni sa athu u fhindula yeneyi mbudziso, ṱhogomelani nḓila ine Bivhili ya fhindula ngayo mbudziso tharu dzi tevhelaho: Nḓila ye muthu a sikwa ngayo i sumbedza uri muthu o vha a tshi fanela u tshila tshifhinga tshingafhani? Mudzimu o vha e na tshipikwa tshifhio musi a tshi sika ḽifhasi na vhathu? Zwo ḓa hani uri vhathu vha fe?

NḒILA YE VHATHU VHA SIKWA NGAYO

Musi hu tshi vhambedzwa tsiko yoṱhe ya Mudzimu ya kha ḽifhasi, vhathu vho sikwa nga nḓila yo khetheaho. Nga nḓila-ḓe? Bivhili i sumbedza uri Mudzimu o sika vhathu vhane “vha nga” ene nahone o vha sika a tshi “ḓi-fanyisa.” (Genesi 1:26, 27) Zwenezwo zwi amba mini? Zwi amba uri vhathu vho sikwa vhe na pfaneleo dzi fanaho na dza Mudzimu, pfaneleo dzi ngaho lufuno na u sa vha na tshiṱalula.

Zwiṅwe hafhu, vhathu vho sikwa vhe na vhukoni ha u humbula, vha a kona u ḓivha zwo lugaho na zwi songo lugaho nahone vha a ṱoḓa u ḓivha Mudzimu na u vha na vhushaka nae. Ndi ngazwo ri tshi ḓiphina nga u vhona nḓila ye shango ḽa naka ngayo, nḓila i mangadzaho ye zwithu zwa sikwa ngayo u katela na vhutsila, muzika na vhurendi. Zwa ndeme vhukuma, vhathu vha nga kona u vha na vhushaka na Musiki. Dzenedzi pfaneleo dzi ita uri hu vhe na phambano khulwane vhukati ha vhathu na zwiṅwe zwivhumbiwa zwi tshilaho zwi re kha ḽifhasi.

Humbulani zwi tevhelaho: Arali Mudzimu o vha a tshi ṱoḓa uri vhathu vha tshile miṅwaha i si gathi, naa o vha a tshi nga vha ṋea dzenedzi pfaneleo dzi swayeaho na u vha ṋea vhukoni ha u dzi khwinisa? Ngoho ndi ya uri Mudzimu o ri ṋea vhukoni na dzenedzi pfaneleo dzo khetheaho u itela uri ri kone u ḓiphina nga vhutshilo fhano kha ḽifhasi.

TSHIPIKWA TSHEE MUDZIMU A VHA E NATSHO MATHOMONI

Vhaṅwe vha amba uri Mudzimu ho ngo vhuya a sika vhathu uri vha tshile tshoṱhe. Vha amba uri ḽifhasi  ḽo sikwa uri ri dzule khaḽo lwa tshifhinganyana nahone ndi fhethu hune vhathu vha thoma vha tshila hone u itela u vhona arali vha tshi fanelea u ya ṱaḓulu uri vha kone u tshila tshoṱhe na Mudzimu. Fhedzi arali zwenezwo zwi ngoho, naa zwo vha zwi sa ḓo ita uri Mudzimu a vhe ene ane a ita uri hu vhe na zwithu zwivhi zwo ḓalaho kha ḽifhasi? Zwenezwo zwo vha zwi tshi ḓo vha zwi sa tshimbidzani na zwine Mudzimu a vha zwone. Bivhili i amba zwi tevhelaho nga hae: “Á shumá ha khakhi. Dzinḓila dzawe dzoṱhe dzo luga, Mudzimu wa ngoho a sí na mazwifhi, Mululamisi, ha ṱaluli.”—Doiteronomio 32:4.

Bivhili i bvisela khagala tshipikwa tsha Mudzimu nga ha ḽifhasi musi i tshi ri: “Ḽiṱaḓulu ndi ḽiṱaḓulu ḽa Yehova; ḽifhasi ḽone o ḽi ṋea vhana vha vhathu.” (Psalme ya 115:16) Ndi ngoho uri Mudzimu o sika ḽifhasi uri vhathu vha dzule khaḽo lwa tshoṱhe nahone o ḽi ḓadza nga zwithu zwoṱhe zwine ra zwi ṱoḓa u itela uri ri takale na u tshila nga hu sa fheli.—Genesi 2:8, 9.

“Ḽiṱaḓulu ndi ḽiṱaḓulu ḽa Yehova; ḽifhasi ḽone o ḽi ṋea vhana vha vhathu.”​—Psalme ya 115:16

Bivhili i dovha ya bvisela khagala tshipikwa tshine Mudzimu a vha natsho nga ha vhathu. O vhudza vhavhingani vha u thoma uri vha ‘ḓadze shango, vha ḽi kunde, vha vhuse dzoṱhe dziphukha dzi tshatshamaho kha ḽifhasi.’ (Genesi 1:28) Yo vha i ndugelo yavhuḓi khavho ya u ṱhogomela ḽifhasi na u ita uri ḽi vhe paradiso! Ndi ngoho uri Adamu na Eva na vhana vhe vha vha vha tshi ḓo vha navho vho vha vha tshi ḓo tshila tshoṱhe kha ḽifhasi, hu si ṱaḓulu.

NDI NGANI RI TSHI FA?

Ndi ngani ri tshi fa? Bivhili i sumbedza uri tshiṅwe tshivhumbiwa tsha Mudzimu tshe nga murahu tsha ḓivhiwa sa Sathane Diabolo, tsho lingedza u tshinya zwithu zwe Mudzimu a vha o zwi dzudzanya ngei Edeni. Nga nḓila-ḓe?

Sathane o fhura vhabebi vhashu vha u thoma Adamu na Eva uri vha ṱanganele nae kha u shandukela Mudzimu. Musi Sathane a tshi vha vhudza uri Mudzimu u khou vha dzumbela zwithu zwavhuḓi—zwa uri vha kone u ḓivha zwo lugaho na zwo khakheaho—vho khetha u ima na Sathane nahone vha shandukela Mudzimu. Ho vha na mvelelo dzifhio? Nga u ya ha tshifhinga vho fa, samusi Mudzimu o vha o dzula o vha vhudza. A vho ngo tsha kona u tshila tshoṱhe Paradisoni kha ḽifhasi.—Genesi 2:17; 3:1-6; 5:5.

Vhushandukwa ha Adamu na Eva ho kwama vhathu vhoṱhe u swika na ṋamusi. Bivhili i ri: “Tshivhi tsho dzhena shangoni nga muthu muthihi [Adamu] nahone tshivhi tsha ḓisa lufu, lufu lwa ṱanganya vhathu vhoṱhe.” (Vharoma 5:12) Ri a fa nga nṱhani ha uri ro mamela tshivhi na lufu kha vhabebi vhashu vha u thoma, hu si nga nṱhani ha uri Mudzimu o vha o tou zwi dzudzanya.

NI NGA TSHILA TSHOṰHE KHA ḼIFHASI

Vhushandukwa ha ngei Edeni a vhu ngo khakhisa tshipikwa tshee Mudzimu a vha e natsho nga ha vhathu na nga ha ḽifhasi. Lufuno lune Mudzimu a vha nalwo na khaṱulokwayo zwo ita uri a wane nḓila ya uri vhofholola kha tshivhi na lufu zwe ra zwi mamela. Muapostola Paulo o ri: “Malamba a tshivhi ndi lufu, fhedzi tshifhiwa tshine ra ṋewa nga Mudzimu ndi u tshila tshoṱhe nga Kristo Yesu Murena washu.” (Vharoma 6:23) Mudzimu ane a vha na lufuno o ri “kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” (Yohane 3:16) Nga nṱhani ha uri Yesu o ḓiṋekedzela sa tshirengululi, o lifha zwoṱhe zwe Adamu a vha o zwi xedza. *

Fulufhedziso ḽa Mudzimu ḽa uri ḽifhasi ḽi ḓo vha paradiso ḽi ḓo ḓadzea hu si kale. Ni nga vha na honovhu vhumatshelo havhuḓi, arali na thetshelesa nyeletshedzo ya Yesu ine ya ri: “Dzhenani nga khoro tsekene, ngauri nḓila i isaho ndozwoni yo aṱama nahone ndi khulwane, huno ndi vhanzhi vha tshimbilaho khayo; khoro i yaho vhutshiloni ndi tsekene na nḓila i yaho hone ndi ṱhukhu, huno vha i wanaho a si vhanzhi.” (Mateo 7:13, 14) Ndi ngoho uri vhumatshelo haṋu vhu zwanḓani zwaṋu. Ni ḓo ita mini?

^ phar. 17 U itela u wana mafhungo o engedzaho nga ha zwine tshirengululi tsha nga ni itela zwone, sedzani ndima 5 ya bugu Bivhili I Funza Mini Zwa Vhukuma? Yo gandiswaho nga Ṱhanzi dza Yehova nahone i dovha ya wanala kha www.jw.org/ve.