Pfukelani kha mafhungo

Pfukelani kha zwi re ngomu

 THERO I RE KHA GWATI

Ndi Ngani Yesu O Shengela Na U Fa?

Ndi Ngani Yesu O Shengela Na U Fa?

“Tshivhi tsho dzhena shangoni nga muthu muthihi [Adamu] nahone tshivhi tsha ḓisa lufu.”—Vharoma 5:12

Ni nga ri mini arali na vhudziswa uri, “Naa ni a ṱoḓa u tshila tshoṱhe?” Khamusi vhathu vhanzhi vha nga amba uri vha a ṱoḓa u tshila tshoṱhe, fhedzi vha vhona zwenezwi zwi muloro. Vha amba uri lufu ndi tshipiḓa tsha vhutshilo, vhathu vha tshilaho vha a fa.

Naho zwo ralo, khamusi na dovha na vhudziswa nga iṅwe nḓila uri, “Naa no lugela u fa?” Vhathu vhanzhi vho vha vha tshi nga ri, hai. Zwenezwi zwi sumbedza mini? Nga lwa nzulele, ri na lutamo lwa u tshila, hu sa londwi milingo na vhuleme vhune ra sedzana naho. Bivhili i sumbedza uri Mudzimu o sika vhathu vhe na lutamo lwa u tshila. Zwi re zwone ndi uri Bivhili i ri ‘o vhea vhutshilo vhu sa fheli mbiluni dzavho.’—Muhuweleli 3:11.

Ngoho ndi ya uri vhathu a vha tshili tshoṱhe. Nga zwenezwo, ndi mini zwe zwa tshinyala? Zwiṅwe hafhu, naa hu na zwe Mudzimu a ita uri a lugise vhuimo? Phindulo dzi re Bivhilini dzi a ṱuṱuwedza nahone dzi sumbedza nga ho livhaho uri ndi ngani Yesu o shengela na u fa.

ZWE ZWA TSHINYALA

Ndima tharu dza u thoma dza bugu ya Bivhili ya Genesi dzi amba uri Mudzimu o vhetshela vhavhingani vha u thoma Adamu na Eva tshilavhelelwa tsha vhutshilo vhu sa fheli nahone a vha vhudza zwine vha fanela u zwi ita u itela u vhu wana. Eneo mafhungo a ri ṱalutshedza nḓila ye vha kundelwa ngayo u thetshelesa Mudzimu na nḓila ye vha xelelwa ngayo nga tshenetsho tshilavhelelwa. Eneo mafhungo o anetshelwa nga nḓila yo leluwaho, fhedzi vhaṅwe vha ṱavhanya u amba uri zwi tou vha ngano. Fhedzi bugu ya Genesi, u fana na bugu dza Evangeli, i sumbedza vhungoho ha ḓivhazwakale. *

Mvelelo dzo vha dzifhio nge Adamu a si thetshelese? Bivhili i fhindula nga heyi nḓila: “Tshivhi tsho dzhena shangoni nga muthu muthihi [Adamu] nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.” (Vharoma 5:12) Adamu o ita tshivhi nga u sa thetshelesa Mudzimu. Nga zwenezwo, o xelelwa nga tshilavhelelwa tsha vhutshilo vhu sa fheli nahone a fhedzisela o fa. Samusi ri vhaḓuhulu vhawe, ro mamela tshivhi. Nga zwenezwo, ri a lwala, u vha vhalala na u fa. Zwenezwi zwi tendelana na zwe zwa wanuluswa nga vhorasaintsi nga ha nḓila ine vhabebi vha pfukisela ngayo zwiṅwe zwithu kha vhana vhavho. Fhedzi naa hu na zwe Mudzimu a zwi ita u itela u lugisa vhuimo?

 ZWE MUDZIMU A ZWI ITA

Ndi ngoho uri Mudzimu o ita ndugiselelo ya u rengulula zwe Adamu a ita uri vhaḓuhulu vhawe vha xelelwe ngazwo, zwine zwa vha tshilavhelelwa tsha vhutshilo vhu sa fheli. Mudzimu o kona hani u ita zwenezwo?

Kha Vharoma 6:23, Bivhili i ri: “Malamba a tshivhi ndi lufu.” Zwenezwi zwi amba uri masiandoitwa a tshivhi ndi lufu. Adamu o ita tshivhi, nga zwenezwo a fa. Zwi fanaho na zwenezwo, ri na tshivhi nahone malamba a tshivhi tshashu ndi lufu. Fhedzi ro bebelwa tshivhini, hu si nga nṱhani ha uri ro khakha. Nga nṱhani ha uri Mudzimu u a ri funa o rumela Yesu Murwa wawe uri a hwale ‘malamba ashu a tshivhi.’ Zwenezwi zwi shuma hani?

Lufu lwa Yesu lwo ri vulela nḓila ya u wana vhutshilo vhu sa fheli na vhu takadzaho

Samusi Adamu munna muthihi o fhelelaho o ḓisa tshivhi na lufu nga nṱhani ha u sa thetshelesa, ho vha hu tshi ṱoḓea munna o fhelelaho we a vha a tshi ḓo thetshelesa u swika a tshi fa u itela u ri vhofholola kha wonoyo muhwalo wa tshivhi. Bivhili i zwi ṱalutshedza nga heyi nḓila: “U sa thetshelesa ha muthu muthihi ho ita uri vhanzhi vha vhe vhaitazwivhi, nga hu fanaho na u thetshelesa ha muthu muthihi ho ita uri vhanzhi vha pfi vho luga.” (Vharoma 5:19) Onoyo “muthu muthihi” ndi Yesu. O ḓa kha ḽifhasi a vha muthu o fhelelaho * nahone a ri fela. Nga zwenezwo, zwi a konadzea uri ri vhe na vhushaka havhuḓi na Mudzimu na u vha na tshilavhelelwa tsha vhutshilo vhu sa fheli.

NDI NGANI YESU O SHENGELA NA U FA

Nga zwenezwo, ndi ngani zwo vha zwo tea uri Yesu a fe u itela u ḓadzisa zwenezwi? Naa Mudzimu Ramaanḓaoṱhe o vha a nga si kone u ita uri vhaḓuhulu vha Adamu vha tendelwe u tshila tshoṱhe? U na ndugelo ya u ita nga u ralo. Fhedzi zwenezwo zwo vha zwi tshi ḓo lwisana na mulayo wawe wa uri mulifho wa tshivhi ndi lufu. Wonoyo wo vha u si mulayo muṱuku we wa vha u tshi nga sokou shandulwa zwi songo tea. Ndi khaṱulokwayo ya ndeme.—Psalme ya 37:28.

Arali Mudzimu a vhe a songo ita zwe a fulufhedzisa, vhathu vho vha tshi nga humbula uri a nga ita zwi fanaho na kha vhuṅwe vhuimo. Sa tsumbo, naa zwo vha zwi tshi ḓo vha hu khaṱulokwayo u khetha vhaṅwe vhaḓuhulu vha Adamu uri vha fanelee u tshila tshoṱhe?  Naa o vha a tshi ḓo fulufhelwa uri u ita zwe a fulufhedzisa? Musi a tshi ita zwe a fulufhedzisa uri ri tshidzwe zwi a ri khwaṱhisedza uri Mudzimu u ḓo dzula a tshi ita zwo lugaho.

Mudzimu o ri vulela nḓila i yaho vhutshilo vhu sa fheli Paradisoni kha ḽifhasi a tshi shumisa tshirengululi tsha lufu lwa Yesu. Ṱhogomelani maipfi o ṅwalwaho kha Yohane 3:16: “Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” Nga zwenezwo, lufu lwa Yesu a lu sokou sumbedza fhedzi khaṱulokwayo ya Mudzimu i sa shanduki, zwihuluhulu lu sumbedza nḓila ine a funa ngayo vhathu.

Naho zwo ralo, ndi ngani Yesu o vha a tshi fanela u shengela na u fa nga nḓila i vhavhaho samusi zwo ṱalutshedzwa kha Evangeli? Nga u konḓelela mulingo muhulwane na u dzula a tshi fulufhedzea, nga khathihi fhedzi Yesu o hanedza mazwifhi a Diabolo a uri vhathu vha nga si dzule vha tshi fulufhedzea kha Mudzimu musi vha tshi lingwa. (Yobo 2:4, 5) Eneo mazwifhi o vha tshi vhonala e ngoho musi Sathane a tshi fhura Adamu o fhelelaho uri a ite tshivhi. Fhedzi Yesu we a vha o fhelela u fana na Adamu, o dzula a tshi fulufhedzea hu sa londwi u shengedzwa hu vhavhaho. (1 Vhakorinta 15:45) O dovha a sumbedza uri na Adamu o vha a tshi nga fulufhedzea kha Mudzimu arali o vha o khetha u ita nga u ralo. Yesu o ri vhetshela tsumbo ine ra fanela u i tevhela nge a konḓelela musi a tshi khou lingwa. (1 Petro 2:21) Mudzimu o lambedza Yesu Murwa wawe nge a thetshelesa nga u mu ṋea vhutshilo ṱaḓulu ha u sa tsha dovha a fa.

NḒILA INE NA NGA VHUYELWA NGAYO

Lufu lwa Yesu lwo itea zwa vhukuma. Nḓila ya u ya vhutshiloni vhu sa fheli yo vulea. Naa ni a ṱoḓa u tshila tshoṱhe? Yesu o sumbedza zwine ra fanela u zwi ita musi a tshi ri: “Uri vha wane vhutshilo vhu sa fheli, vha fanela uri vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.”—Yohane 17:3.

Vhagandisi vha uno magazini vha ni ramba uri ni gude nga ha Yehova, Mudzimu wa ngoho na nga Murwa wawe Yesu Kristo. Ṱhanzi dza Yehova dza hune na dzula hone dzi ḓo takalela u ni thusa. Ni nga dovha na wana mafhungo o engedzeaho kha website yashu ya www.jw.org/ve.

^ phar. 8 See “Sedzani “The Historical Character of Genesis,” kha bugu Insight on the Scriptures, Volumu 1 siaṱari 922, yo gandiswaho nga Ṱhanzi dza Yehova. Ni nga i wana kha www.jw.org. Sedzani kha tshiṱoho PUBLICATIONS > ONLINE LIBRARY.

^ phar. 13 Nḓila ye Mudzimu a fhirisela ngayo vhutshilo ha Murwa wawe a tshi bva ṱaḓulu, zwo ita uri Maria a vhifhe muvhilini nahone muya mukhethwa wa Mudzimu wo tsireledza Yesu uri a si mamele tshivhi kha Maria a songo fhelelaho.—Luka 1:31, 35.