Pfukelani kha mafhungo

Pfukelani kha zwi re ngomu

Dzina Ḽa Mudzimu Ndi Nnyi?

Dzina Ḽa Mudzimu Ndi Nnyi?

Musi ni tshi ṱoḓa u ḓivha muthu, tshithu tsha u thoma tshine na nga tshi vhudzisa ndi uri, “Dzina ḽaṋu ndi nnyi?” Arali na nga vhudzisa Mudzimu iyo mbudziso, a nga ri mini?

“Ndi Nṋe Yehova, ndi ḽone dzina ḽanga.”—Yesaya 42:8.

Naa ndi lwa u thoma ni tshi pfa ḽeneḽo dzina? Zwi nga vha zwo ralo, zwi tshi itiswa ngauri vhaṱalutshedzeli vhanzhi vha Bivhili a vha anzeli u ḽi shumisa nahone vhaṅwe a vha ḽi shumisi na luthihi. Nṱhani hazwo, vha shumisa dzina zwaḽo “MURENA.” Naho zwo ralo, dzina ḽa Mudzimu ḽi bvelela lu ṱoḓaho u vha 7 000 kha luambo lwa u thoma lwe Bivhili ya vha yo ṅwalwa ngalwo. Ḽeneḽo dzina ḽi na themba nṋa dza Luheberu dzine nga luambo lwashu dza vha YHWH kana JHVH, nahone u bva kale ḽi vhidzwa “Yehova” nga Luvenḓa.

Dzina ḽa Mudzimu ḽi wanala kha maṅwalo a Luheberu na kha dziṅwe ṱhalutshedzelo nnzhi dza Bivhili

Psalme Dzo Waniwaho Lwanzheni Lwa Muṋo Ḓanani ḽa u thoma  C.E., YA LUHEBERU

Ṱhalutshedzelo ya Tyndale 1530, YA LUISIMANE

Ṱhalutshedzelo ya Reina-Valera 1602, YA LUPANIA

Ṱhalutshedzelo ya Union 1919, YA LUTSHAINA

NDI NGANI DZINA ḼA MUDZIMU ḼI ḼA NDEME?

Ḽeneḽi dzina ndi ḽa ndeme kha Mudzimu. A hu na muthu we a mu ira ḽeneḽo dzina, o tou ḓikhethela. Yehova o ri: “Ndi ḽone dzina ḽanga tsha kale na kale, ndi pfalwi kha mirafho na mirafho.” (Ekisodo 3:15) Bivhilini, dzina ḽa Mudzimu ḽi bvelela lunzhi u fhira madzina zwao, a ngaho Ramaanḓaoṱhe, Khotsi, Murena kana Mudzimu nahone ḽi dovha ḽa bvelela lunzhi u fhira madzina oṱhe a vhathu a ngaho Abrahamu, Mushe, Davida kana Yesu. Zwiṅwe hafhu, Yehova u ṱoḓa dzina ḽawe ḽi tshi ḓivhiwa. Bivhili i ri: “U vha ḓivhise zwauri dzina ḽau ḽi pfi Yehova, Wa-Ṱaḓulu-ṱaḓulu. Mashangoni oṱhe ndi Iwe u woṱhe.”—Psalme ya 83:18.

Ḽeneḽi dzina ndi ḽa ndeme kha Yesu. Kha thabelo ine vhathu vhanzhi vha i vhidza Thabelo Ya Murena, Yesu o gudisa vhatevheli vhawe uri vha tshi rabela vha shumise maipfi: “Dzina ḽau nga ḽi itwe ḽikhethwa.” (Mateo 6:9) Yesu o rabela a ri: “Khotsi hulisa dzina ḽau.” (Yohane 12:28) U hulisa dzina ḽa Mudzimu zwo vha zwi zwa ndeme vhutshiloni ha Yesu, ndi ngazwo musi a tshi khou rabela o ri: “Ndo vha ḓivhadza dzina ḽau nahone ndi ḓo ḓi ḽi ḓivhadza.”—Yohane 17:26.

Ḽeneḽi dzina ndi ḽa ndeme kha vhane vha ḓivha Mudzimu. Vhathu vha Mudzimu tshifhingani tsho fhiraho vho vha vha tshi pfesesa uri u ḓivha dzina ḽa Mudzimu zwi nga ita uri vha tsireledzee na u tshidzwa. “Dzina ḽa Yehova ndi thavha vhukuma; muvhuya u shavhela henefho a khuda.” (Mirero 18:10) “Ane a ḓo rabela dzina ḽa Yehova, u ḓo hanya.” (Yoele 2:32) Bivhili i sumbedza uri dzina ḽa  Mudzimu ḽi ḓo ṱalusa vhashumeli vhawe. “Vhunga lushaka lufhio na lufhio lu tshi tshimbila dzinani ḽa mudzimu walwo, na riṋe nga ri tshimbile dzinani ḽa Yehova Mudzimu washu wa kale na kale na lini na lini.”—Mixa 4:5; Mishumo 15:14.

ZWINE ḼENEḼO DZINA ḼA ZWI DZUMBULULA

Ḽi ṱalusa Mudzimu. Vhaṱoḓisisi vhanzhi vha Bivhili vho wana uri dzina Yehova ḽi amba uri “U Ita Uri Zwi Vhe Hone.” Yehova o ri thusa u pfesesa zwine dzina ḽawe ḽa amba zwone musi a tshi vhudza Mushe uri: “Ndi Ḓo Vha Zwine Nda Nanga U Vha Zwone.” (Ekisodo 3:14, NW) Dzina ḽa Mudzimu ḽi amba zwinzhi u fhira u mu ṱalusa sa Musiki wa zwithu zwoṱhe. Dzina ḽawe ḽi ṱalusa vhukoni hawe ha u ita uri zwi vhe hone, na u ita uri tsiko yawe i ite naho hu tshini tshine tsha ṱoḓea u itela u khunyeledza tshipikwa tshawe. Naho madzina zwao a tshi ṱalusa vhuimo ha Mudzimu, vhuvhusi hawe kana maanḓa ane a vha nao, ndi dzina ḽawe fhedzi, Yehova, ḽine ḽa sumbedza zwoṱhe zwine a vha zwone na zwine a nga vha zwone.

Ḽi sumbedza uri Mudzimu u na dzangalelo kha riṋe. Zwine dzina ḽa Mudzimu ḽa amba zwone zwi sumbedza nḓila ine a funa ngayo tsiko yawe, ine ya katela na riṋe. Naho zwo ralo, Mudzimu a tshi ri ḓivhadza dzina ḽawe zwi sumbedza uri u ṱoḓa uri ri mu ḓivhe. Ho vha ene we a ri vhudza dzina ḽawe ri sa athu ḽi ḓivha. Zwi khagala uri Mudzimu u ṱoḓa ri tshi mu dzhia sa Muthu wa vhukuma ane ra nga sendela tsini nae, hu si sa mudzimu a re kule na a sa pfesesei.—Psalme ya 73:28.

U shumisa dzina ḽa Mudzimu zwi sumbedza uri ri na dzangalelo khae. Sa tsumbo, ni nga humbela muthu ane na ṱoḓa a tshi vha khonani yaṋu uri a ni vhidze nga dzina ḽaṋu. Ni nga ḓipfa hani arali onoyo muthu a dzulela u hana u shumisa dzina ḽaṋu? Nga u ya ha tshifhinga, ni nga ḓivhudzisa arali nga ngoho onoyo muthu a tshi ṱoḓa u vha khonani yaṋu. Zwo tou ralo na kha Mudzimu. Yehova o vhudza vhathu dzina ḽawe, nahone u ri ṱuṱuwedza uri ri ḽi shumise. Musi ri tshi ita ngauralo, ri sumbedza Yehova uri ri ṱoḓa u sendela tsini hawe. Ndi ngazwo a tshi ṱhogomela “vha sa hangwi dzina ḽawe”!—Maleaxi 3:16.

U ḓivha dzina ḽa Mudzimu ndi ḽiga ḽa u thoma na ḽa ndeme ḽine ra ḽi dzhia musi ri tshi ṱoḓa u mu ḓivha. Fhedzi a ro ngo fanela u guma henefho. Ri fanela u ḓivha khwine Muṋe wa ḽeneḽo dzina. Ri fanela u guda uri ndi muthu wa hani.

DZINA ḼA MUDZIMU NDI NNYI? Dzina ḽa Mudzimu ndi Yehova. Ḽeneḽo dzina ḽi ṱalusa Mudzimu sa Muthu ane a kona u khunyeledza zwine a ṱoḓa