Pfukelani kha mafhungo

Pfukelani kha zwi re ngomu

3 I Ri Thusa U Konḓelela Thaidzo

3 I Ri Thusa U Konḓelela Thaidzo

Hu na dziṅwe thaidzo dzine zwino ri nga si kone u dzi iledza kana u dzi tandulula. Sa tsumbo, arali no felwa nga muthu ane na mu funa kana ni na vhulwadze vhu sa fholi, a huna zwine na nga zwi ita nga nnḓa ha u ṱoḓa nḓila ine na nga konḓelela ngayo honoho vhuṱungu. Naa Bivhili i nga ni thusa u konḓelela honoho vhuimo vhu konḓaho?

VHULWADZE VHU SA FHOLI

Rose o ri: “Ndo bebwa ndi na vhulwadze vhune na vhaṅwe muṱani wahashu vha vha naho, vhune ha ita uri ndi dzule ndi tshi khou pfa vhuṱungu. Ndo vha ndi si tsha ḓifheliwa nga vhutshilo.” Tshithu tshihulwane tshe tsha vha tshi tshi mu vhilaedzisa ndi uri nga zwiṅwe zwifhinga, o vha a si tsha kona u livhisa ṱhogomelo kha zwe a vha a tshi khou zwi guda Bivhilini na nḓila ine a gwadamela ngayo Mudzimu. Fhedzi o thuswa nga maipfi a Yesu a re kha Mateo 19:26 a ne a ri: “Zwithu zwoṱhe zwi a konadzea kha Mudzimu.” Rose o ṱhogomela uri hu na nḓila nnzhi dza u guda. Nga nṱhani ha uri vhuṱungu he a vha a tshi vhu pfa ho vha vhu tshi ita uri a si tsha vhala nga zwiṅwe zwifhinga, o thoma u thetshelesa ndima dza Bivhili dzo rekhodiwaho na dziṅwe khandiso dzine dza amba nga ha Bivhili. * O ri: “Arali ho vha hu si na yeneyo ndugiselelo, a thi ḓivhi uri ndo vha ndi tshi ḓo zwi itisa hani uri ndi dzule ndi na vhushaka havhuḓi na Mudzimu.”

Musi Rose a tshi pfa o kulea nungo nga nṱhani ha uri ha tsha kona u ita zwithu zwe a vha a tshi kona u zwi ita, o khuthadzwa nga luṅwalo lwa 2 Vhakorinta 8:12, lune lwa ri: “Tshifhiwa tshine tsha bva mbiluni tshi a ṱanganedzwa vhukuma nga Mudzimu, ngauri Mudzimu u lavhelela uri muthu a ṋee zwine a nga kona, hu si zwine a si zwi kone.” Eneo maipfi o humbudza Rose uri Mudzimu u takadzwa  nga zwine a zwi ita, ngauri u ita zwoṱhe zwine a nga zwi kona hu sa londwi vhuimo hawe.

VHUṰUNGU

Delphine we a bulwa mathomoni o amba uri: “Musi ndi tshi felwa nga ṅwana wanga wa musidzana we a vha e na miṅwaha ya 18, ndo pfa vhuṱungu vhuhulu vhukuma lwe nda vha ndi tshi humbula u nga ndi nga si tsha kona u bvela phanḓa na vhutshilo. Zwithu zwi nga si tsha dovha zwa fana na zwa mathomoni.” Fhedzi o khuthadzwa vhukuma nga maipfi a re kha Psalme ya 94:19, he mupsalme a vhudza Mudzimu uri: “Kha mbilaelo nnzhi dze dza ndzhena, mbilu yanga yo ḓi takadzwa nga phumudzo dzau.” Delphine o ri: “Ndo rabela Yehova uri a nthuse u wana zwithu zwine nda nga zwi ita zwine zwa ḓo nthusa uri ndi ḓipfe ndi khwine.”

O dzula o farakanea nga u ita mushumo wa u ḓifunela. Nga u ya ha tshifhinga, o thoma u ḓivhambedza na khirayoni ya ṅwana ine ya shuma na musi yo vunḓea. Nga hu fanaho, naho a tshi pfa mbilu yawe yo vunḓekana, o guda uri a nga kona u thusa vhaṅwe. O ri: “Nga u ṱavhanya ndo ṱhogomela uri musi ndi tshi shumisa zwine Bivhili ya zwi funza na Maṅwalo u itela u khuthadza vhathu vhane nda guda navho Bivhili, Yehova u vha a tshi khou nkhuthadza.” O ita mutevhe wa vhathu vhe ha ṅwalwa nga havho Bivhilini vhe na vhone vha pfa vhuṱungu vhuhulu vhukuma. O ṱhogomela uri: “Vhenevho vhathu vhoṱhe vho vha vha tshi rabela.” O dovha a guda uri, “ni nga si kone u wana phindulo arali no vala Bivhili.”

U guda Bivhili zwo thusa Delphine uri a livhise ṱhogomelo kha zwithu zwa tshifhingani tshi ḓaho nṱhani ha u livhisa ṱhogomelo kha zwithu zwa tshifhingani tsho fhiraho. O khuthadzwa nga luṅwalo lwa Mishumo 24:15, lune lwa amba nga ha fulufhelo ḽine ḽa ri: “Hu ḓo vha na mvuwo ya vho lugaho na vha songo lugaho.” U zwi ḓivha hani uri Yehova u ḓo vusa ṅwananyana wawe? Delphine o ri: “Ndi vhona ṅwananyana wanga nga maṱo a muhumbulo o no vuswa tshifhingani tshi ḓaho. Ndi na vhungoho ha uri ndi ḓo dovha nda vhona ṅwananyana wanga nga tshifhinga tshe Yehova a tshi vhea. Ndi ḓivhona nga maṱo a muhumbulo ndo dzula ngadeni na ṅwananyana wanga o vuswaho vhafuni na u mu funa u fana na ḓuvha ḽe a bebwa ngaḽo.”

^ phar. 4 Vhunzhi ha zwenezwo zwithu zwo rekhodiwaho, zwi wanala kha website ya jw.org/ve.

Bivhili i nga ni khuthadza naho ni zwifhingani zwi konḓaho