Pfukelani kha mafhungo

Pfukelani kha zwi re ngomu

Naa Ndi U Sa Pfesesa Huṱuku?

Naa Ndi U Sa Pfesesa Huṱuku?

Ṅwananyana muṱuku o vhona vhutsi vhu tshi khou bva fekethiri nahone vhu tshi nga makole musi vhu nṱha. Onoyo ṅwananyana o phetha nga ḽa uri fekethiri yo itelwa uri i ite makole. Honoho u sa pfesesa ha onoyo ṅwana hu nga seisa. Naho zwo ralo, huṅwe u sa pfesesa hu nga kwama vhutshilo hashu. Sa tsumbo, u sa tevhela ndaela yo ṅwalwaho kha mushonga zwi nga ita uri hu vhe na masiandoitwa a si avhuḓi.

U sa pfesesa zwo ṅwalwaho Bivhilini zwi nga vha khombo vhukuma. Sa tsumbo, vhaṅwe vhathu a vho ngo pfesesa zwe Yesu a vha a tshi khou zwi funza. (Yohane 6:48-68) Nṱhani ha u guda zwo engedzeaho, vho landula zwoṱhe zwe zwa funzwa nga Yesu. Vho xelelwa vhukuma!

Naa ni a vhala Bivhili u itela u wana vhulivhisi? Zwenezwo zwi a khoḓea. Naho zwo ralo, naa hu nga vha na khombo arali na sa pfesesa zwine na khou zwi vhala? Zwi a itea kha vhathu vhanzhi. Ṱhogomelani tsumbo tharu dzo ḓoweleaho dza u sa pfesesa.

  • Vhaṅwe vhathu a vha pfesesi ndaela i re Bivhilini ine ya ri u “ofha Mudzimu.” Vha vhona u nga ri fanela u vha na nyofho khulwane vhukuma ine ya ita uri ri tshuwe Mudzimu. (Muhuweleli 12:13) Fhedzi Mudzimu ha ṱoḓi vhane vha mu gwadamela vha tshi ḓipfa nga yeneyo nḓila. O ri: “U songo ofha; ngauri a re na iwe ndi Nṋe. U songo tshenuwa; ngauri Mudzimu wau ndi Nṋe. Ndi ḓo U khwaṱhisa, ndi ḓo U farisa.” (Yesaya 41:10) U ofha Mudzimu zwi amba uri ri fanela u mu ṱhonifha vhukuma.

  • Naa ḽifhasi ḽi ḓo fheliswa nga mulilo?

    Vhaṅwe vhathu a vha pfesesi Luṅwalo lune lwa ri: “Zwoṱhe zwi na ḓuvha ḽazwo, . . . u bebwa hu na tshifhinga tshaho, na u fa hu na tshifhinga tshaho.” Vha phetha nga ḽa uri Mudzimu o vhea ḓuvha ḽine muṅwe na muṅwe a ḓo fa ngaḽo. (Muhuweleli 3:1, 2) Naho zwo ralo, lwonolo luṅwalo lu amba nga ha zwine zwa itea vhutshiloni na uri lufu ndi zwithu zwo ḓoweleaho. Bivhili i dovha ya ri funza uri phetho dzine ra dzi dzhia dzi nga kwama vhutshilo hashu. Sa tsumbo, Bivhili i ri: “U ofha Yehova hu [engedza] maḓuvha.” (Mirero 10:27; Psalme ya 90:10; Yesaya 55:3) Nga nḓila-ḓe? Sa tsumbo, musi ri tshi ṱhonifha Bivhili, zwi ḓo ri sudzulusela uri ri iledze u vhea vhutshilo hashu khomboni nga u kambiwa na u ḓifara luvhi.—1 Vhakorinta 6:9, 10.

  • Vhaṅwe a vha pfesesi musi Bivhili i tshi amba uri ḽiṱaḓulu na ḽifhasi zwo “vhulungelwa mulilo” nahone vha phetha nga ḽa uri Mudzimu u ḓo fhelisa ḽifhasi. (2 Petro 3:7) Fhedzi Mudzimu u fulufhedzisa uri a nga si fhelise ḽifhasi. Mudzimu o “fhaṱa ḽifhasi kha miteo yaḽo; a ḽi nga dzinginyei lini na lini.” (Psalme ya 104:5; Yesaya 45:18) U ḓo fhelisa ano maitele a zwithu lwa tshoṱhe zwa tou nga o fheliswa nga mulilo, hu si ḽifhasi. Musi hu tshi ambiwa nga ha ḽiṱaḓulu, hu nga vha hu tshi khou ambiwa nga ha fhethu hune ha vha makoleni kana fhethu hune Mudzimu a dzula hone. Henefho fhethu a hu nga ḓo fheliswa.

NDI NGANI VHATHU VHA SA PFESESI BIVHILI NGA ZWIṄWE ZWIFHINGA?

Samusi no zwi vhona kha dzenedzo tsumbo, kanzhi vhathu a vha pfesesi zwine vha zwi vhala Bivhilini. Fhedzi ndi ngani Mudzimu a tshi tendela zwenezwi zwi tshi itea? Vhaṅwe vha humbula uri: ‘Arali Mudzimu o ṱalifha nahone a tshi ḓivha zwithu zwoṱhe, o vha a tshi ḓo ri ṋea bugu yo ṅwalwaho nga nḓila yavhuḓi ine vhathu vhoṱhe vha ḓo i pfesesa nga hu leluwaho. Ndi ngani a songo ita nga u ralo?’ Ṱhogomelani zwiitisi zwiraru zwine zwa ita uri kanzhi Bivhili i sa pfeseswe.

  1. Bivhili yo itelwa uri i pfeseswe nga vhane vha ḓiṱukufhadza na vho ḓiimiselaho u guda. Yesu o vhudza Khotsi awe a ri: “Ndi a u renda Khotsi, phanḓa ha vhathu vhoṱhe, Iwe Murena wa ḽiṱaḓulu na ḽifhasi, ngauri wo zwi dzumbela vhaṱali na vha ṱhalukanyo nahone wa zwi dzumbululela vhana.” (Luka 10:21) Bivhili yo ṅwalwa nga nḓila ine ya ita uri vhathu vhane vha vha na mavhonele  avhuḓi vha kone u pfesesa mulaedza wayo. Vhathu vhane vha ḓihudza vhane vha ḓivhiwa sa “vhaṱali na vha ṱhalukanyo” a vha pfesesi Bivhili. Fhedzi vhathu vhane vha vhala Bivhili vhe na mavhonele a fanaho na a “vhana,” u ḓiṱukufhadza na u ḓiimisela u guda, vha pfesesa khwine mulaedza wa Bivhili. Mudzimu o ṅwala Bivhili nga nḓila yavhuḓi vhukuma!

  2. Bivhili yo ṅwalelwa vhathu vhane vha ṱoḓa Mudzimu a tshi vha thusa u i pfesesa. Yesu o vhudza vhathu uri vha fanela u ṱoḓa thuso u itela uri vha pfesese nga vhuḓalo zwe a vha a tshi zwi funza. Vho vha vha tshi ḓo wana ngafhi yeneyo thuso? Yesu o ri: “Muthusi ane a vha muya mukhethwa, ane Khotsi a ḓo mu ruma dzinani ḽanga, onoyo u ḓo ni funza zwithu zwoṱhe.” (Yohane 14:26) Nga zwenezwo, Mudzimu u ri ṋea muya mukhethwa une wa vha maanḓa a shumaho u thusa vhathu uri vha pfesese zwine vha zwi vhala Bivhilini. Naho zwo ralo, Mudzimu ha ṋei muya wawe mukhethwa vhathu vha sa ḓitiki ngae uri a vha thuse nahone kanzhi zwenezwo zwi ita uri vha si pfesese Bivhili. Muya mukhethwa u sudzulusela Vhakriste vhane vha vha na nḓivho uri vha thuse vhane vha ṱoḓa u pfesesa.—Mishumo 8:26-35.

  3. Zwiṅwe zwithu zwine zwa vha Bivhilini zwi nga pfeseswa nga vhathu nga tshifhinga tsho teaho. Sa tsumbo, muporofita Daniele o vhudzwa uri a ṅwale mulaedza nga ha vhumatshelo. Muruṅwa o mu vhudza uri: “Daniele, vhulunga haya mafhungo, U putele bugu yao, hu vhuye hu ḓe tshifhinga tsha vhufhelo.” Lwa miṅwaha ya maḓana, vhathu vhanzhi vho vhala bugu ya Daniele fhedzi a vho ngo kona u i pfesesa. Zwi re zwone ndi uri na Daniele ho ngo kona u pfesesa zwiṅwe zwe a zwi ṅwala. O ri: “[Ndo] zwi pfa nda kundwa u zwi ṱalukanya.” Mafheleloni, nga tshifhinga tshee Mudzimu a tshi vhea, vhathu vho kona u pfesesa vhuporofita ha Mudzimu ho ṅwalwaho nga Daniele. Muruṅwa o ri: “Daniele, tshimbila, ngauri ayo mafhungo o dzumbiwa a vhulungwa, ha ḓo vhuya ha ḓa vhufhelo.” Ndi nnyi ane a ḓo pfesesa mulaedza wa Mudzimu? Bivhili i ri: “Vhavhi vhoṱhe a vha nga ṱalukanyi; vhaḽa [vha] ṱhalukanyo vha ḓo ṱalukanya.” (Daniele 12:4, 8-10) Nga zwenezwo, musi tshifhinga tshawe tsho teaho tshi tshi swika, Mudzimu u dzumbulula maṅwe mafhungo a re Bivhilini.

Naa zwenezwo zwithu zwo vhuya zwa ita uri Ṱhanzi dza Yehova dzi si pfesese zwavhuḓi Bivhili? Ee. Fhedzi musi tshifhinga tsha Mudzimu tshi tshi swika tsha uri ri pfesese zwiṅwe zwithu, Ṱhanzi dzo shandula nḓila ye dza vha dzi tshi pfesesa ngayo. Ṱhanzi dzi tenda uri dzi fanela u edzisa vhaapostola vha Kristo vhe nga u ḓiṱukufhadza vha shandula nḓila ye vha vha vha tshi humbula ngayo musi Yesu a tshi vha khakhulula.—Mishumo 1:6, 7.

Zwe ṅwananyana muṱuku we a bulwa mathomoni a zwi amba nga ha hune makole a bva hone zwo itiswa nga nṱhani ha uri o vha a sa pfesesi. Naho zwo ralo, zwine Bivhili ya zwi gudisa ndi zwa ndeme kha inwi. Muṅwe na muṅwe u fanela u lingedza u pfesesa zwine a zwi vhala Bivhilini e eṱhe ngauri mulaedza wayo ndi wa ndeme vhukuma. Ngauralo, ṱoḓani thuso uri ni kone u pfesesa zwine na khou zwi vhala. Ṱoḓani thuso kha vhane vha vhala Bivhili vhe na mavhonele avhuḓi, vhane vha ḓitika nga muya mukhethwa wa Mudzimu u itela u pfesesa Bivhili na vhane vha vha na vhungoho ha uri ri khou tshila maḓuvhani a vhufhelo ane Mudzimu a ṱoḓa ri tshi pfesesa Bivhili u fhira naho hu lini. Ni songo timatima u vhudzisa Ṱhanzi dza Yehova kana u ita ṱhoḓisiso nga vhuronwane kha website ya jw.org. Bivhili i fulufhedzisa uri: “Arali u tshi ṱoḓa u pfesesa . . . , u ḓo ḓivha Mudzimu.”—Mirero 2:3-5, NW.