Pfukelani kha mafhungo

Pfukelani kha zwi re ngomu

Dzulani Ni Na Vhushaka Havhuḓi Na Yehova Musi Ni Tsimuni Ya Luṅwe Luambo

Dzulani Ni Na Vhushaka Havhuḓi Na Yehova Musi Ni Tsimuni Ya Luṅwe Luambo

Mbiluni yanga ndi dzula ndó vhulunga zwe wa amba.”—PS. 119:11.

NYIMBO: 142, 92

1-3. (a) Hu sa londwi vhuimo hashu, ndi mini zwine zwa fanela u vha zwa ndeme? (b) Ndi khaedu dzifhio dzine vhathu vhane vha khou guda luambo luswa vha sedzana nadzo, nahone hu takuwa mbudziso dzifhio? (Sedzani tshifanyiso tsha u thoma.)

ṰHANZI DZA YEHOVA nnzhi ṋamusi dzo farakanea kha u ḓadzisa vhuporofita ha u huwelela mafhungo maḓifha “kha tshaka dzoṱhe, mirafho yoṱhe, na ndimi dzoṱhe na vhathu vhoṱhe.” (Nzumb. 14:6) Naa ni muṅwe wa vhane vha khou guda luṅwe luambo? Naa ni khou shuma sa murumiwa kana hune ha vha na ṱhoḓea kha ḽiṅwe shango kana no thoma u ya miṱanganoni ya tshivhidzo tsha luṅwe luambo hune na dzula hone?

2 Sa vhashumeli vha Mudzimu, roṱhe u katela na miṱa yashu, ri fanela u dzula ri na vhushaka havhuḓi na Yehova. (Mat. 5:3) Nga zwiṅwe zwifhinga, ri nga wana zwi tshi konḓa u vha na pfunzo ya muthu nga eṱhe ngauri ri dzula ro farakanea. Fhedzi vhane vha shuma kha tsimu ya luṅwe luambo vha sedzana na dziṅwe khaedu.

3 Vhane vha shuma kha zwivhidzo zwine zwa amba dziṅwe nyambo vha fanela u guda luambo luswa, fhedzi vha fanela u ita vhungoho ha uri vha a ḓikanzwa nga zwiḽiwa zwa muya tshifhinga tshoṱhe. (1 Vhakor. 2:10) Vha nga ita hani zwenezwo arali vha sa koni u pfesesa nga vhuḓalo zwine zwa khou ambiwa tshivhidzoni? Nahone  vhabebi vha Vhakriste vha fanela u ita mini uri Bivhili i kwame mbilu dza vhana vhavho?

ZWITHU ZWINE ZWA VHEA VHUSHAKA HASHU NA YEHOVA KHOMBONI

4. Ndi mini zwine zwa nga vhea vhushaka hashu na Yehova khomboni? Ṋeani tsumbo.

4 Musi ri sa koni u pfesesa zwine Bivhili ya zwi funza nga luṅwe luambo, zwi nga vhea vhushaka hashu na Yehova khomboni. Ḓanani ḽa vhuṱanu ḽa miṅwaha B.C.E., Nehemia o vha a tshi vhilaela musi a tshi pfa uri vhaṅwe vhana kha Vhayuda vhe vha humela Babele vho vha vha sa koni u amba Luheberu. (Vhalani Nehemia 13:23, 24.) Nga nṱhani ha uri vhenevho vhana vho vha vha sa koni u pfesesa nga vhuḓalo Bivhili, vhushaka havho na Mudzimu ho vha vhu khomboni.—Neh. 8:2, 8.

5, 6. Vhaṅwe vhabebi vhane vha khou shuma tsimuni ya dziṅwe nyambo vho ṱhogomela mini, nahone ndi ngani?

5 Vhaṅwe vhabebi vha Vhakriste vhane vha khou shuma tsimuni ya dziṅwe nyambo, vho ṱhogomela uri vhushaka ha vhana vhavho na Yehova vhu khou thenga-thenga. Nga nṱhani ha uri a vho ngo pfesesa nga vhuḓalo zwe zwa vha zwi tshi khou ambiwa miṱanganoni, vhana vhavho a vho ngo kwamea nga zwe zwa vha zwi tshi khou ambiwa Holoni ya Muvhuso. Pedro [1] we a pfulutshela Australia na muṱa wawe vha tshi bva Amerika Tshipembe, o ri: “Musi hu tshi ambiwa nga ha zwithu zwa lwa muya, zwi fanela u kwama mbilu na maḓipfele.”—Luka 24:32.

6 Musi ri tshi vhala nga luṅwe luambo, zwi nga kha ḓi sa ri kwama u fana na nḓila ine zwa nga ri kwama ngayo musi ri tshi zwi vhala nga luambo lwashu lwa ḓamuni. Zwiṅwe hafhu, u sa kona u davhidzana zwavhuḓi nga luṅwe luambo zwi nga netisa nahone zwa kwama vhushaka hashu na Yehova nga nḓila i si yavhuḓi. Nga zwenezwo, musi ri tshi dzula ri na lutamo lwa u shumela Yehova ri tshivhidzoni tsha luṅwe luambo, ri ita zwavhuḓi ri tshi tsireledza vhushaka hashu na Yehova.—Mat. 4:4.

VHO TSIRELEDZA VHUSHAKA HAVHO NA YEHOVA

7. Vhababele vho kombetshedza hani Daniele uri a ṱanganedze mvelele na vhurereli havho?

7 Musi Daniele na khonani dzawe vhe vhuthubwani, vhathu vha Babele vho lingedza u vha kombetshedza uri vha ṱanganedze mvelele na vhurereli havho nga u vha gudisa “luambo lwa Vha-Kaladea.” Zwiṅwe hafhu, mukoma wa vhaḓinḓa o vha rina madzina a Vhababele. (Dan. 1:3-7) Daniele o irwa Bel, ḽine ḽa imela mudzimu muhulwane wa Babele. Khosi Nebukadanetsara o vha a tshi ṱoḓa uri Daniele a tende uri mudzimu wa Babele u na maanḓa u fhira Yehova Mudzimu.—Dan. 4:8.

8. Ndi mini zwe zwa thusa Daniele uri a dzule e na vhushaka havhuḓi na Yehova musi e kha ḽiṅwe shango?

8 Naho Daniele o ṋewa zwiḽiwa zwa khosi zwine zwa ḓifha, “mbiluni yawe o vha o khwaṱhisa a ri ha nga ḓi-shati dzitshikha.” (Dan. 1:8) Ngauri o dzula a tshi guda “maṅwalo” nga luambo lwawe lwa ḓamuni, o dzula e na vhushaka havhuḓi na Yehova musi e kha ḽiṅwe shango. (Dan. 9:2) Naho o fhedza miṅwaha ya 70 e Babele, o vha a tshi kha ḓi ḓivhiwa nga dzina ḽawe ḽa Luheberu.—Dan. 5:13.

9. Ipfi ḽa Mudzimu ḽo kwama hani muṅwali wa Psalme ya 119?

9 Muṅwali wa Psalme ya 119 o khwaṱhiswa nga Ipfi ḽa Mudzimu nahone zwo mu thusa uri a si fane na vhaṅwe. O vha a tshi fanela u konḓelela u holedzwa nga miṅwe miraḓo ya mahosi. (Ps. 119:23, 61) Naho zwo ralo, o tendela Ipfi ḽa Mudzimu ḽi tshi kwama mbilu yawe.—Vhalani Psalme ya 119:11, 46.

DZULANI NI NA VHUSHAKA HAVHUḒI NA YEHOVA

10, 11. (a) Ri fanela u guda Ipfi ḽa Mudzimu ri na tshipikwa tshifhio? (b) Ri nga swikelela hani tshipikwa tshashu? Fanyisani.

10 Naho ri tshi nga vha ro farakanea vhukuma nga vhuḓifhinduleli ha tshivhidzoni na mishumo ya u ḓitshidza, roṱhe ri fanela u ḓiṋea  tshifhinga tsha u vha na ngudo ya muthu nga eṱhe na vhurabeli ha muṱa. (Vhaef. 5:15, 16) Tshipikwa tshashu a tsho ngo fanela u vha tsha u sokou vhala kana u sokou lugiselela uri ri kone u shela mulenzhe miṱanganoni. Ri ṱoḓa u ita vhungoho ha uri Ipfi ḽa Mudzimu ḽi swikelele mbilu dzashu na u khwaṱhisa lutendo lwashu.

11 U itela u swikelela tshenetsho tshipikwa, ri fanela u linganyisela. Musi ri tshi guda, a ro ngo fanela u sokou humbula nga ha ṱhoḓea dza vhaṅwe, fhedzi ri fanela u dovha ra humbula nga ha vhumuya hashu. (Vhafil. 1:9, 10) Ri fanela u ṱhogomela uri musi ri tshi lugiselela vhuḓinḓa, miṱangano kana nyambo, ri nga vha ri tshi humbula nga ha u ṱoḓa u vhuyedza vhaṅwe. Sa tsumbo: Samusi mubiki a tshi thetshela zwiḽiwa musi a sa athu u zwi avha, a nga si kone u tshila nga zwiḽiwa zwe a zwi thetshela fhedzi. Arali a tshi ṱoḓa u vha na mutakalo wavhuḓi, u fanela u ḓibikela zwiḽiwa zwine zwa vha na mutakalo. Nga hu fanaho, arali ri tshi ṱoḓa u dzula ri na vhushaka havhuḓi na Yehova, ri fanela u guda Bivhili tshifhinga tshoṱhe. Yeneyo ngudo i ita uri ri kone u aluwa nga lwa muya.

12, 13. Ndi ngani vhane vha khou shuma kha zwivhidzo zwine zwa amba luṅwe luambo vha tshi wana zwi tshi vhuyedza u guda tshifhinga tshoṱhe nga luambo lwavho lwa ḓamuni?

12 Vhunzhi ha vhane vha shuma hune ha ambiwa luṅwe luambo vha wana zwi tshi vhuyedza u guda Bivhili tshifhinga tshoṱhe nga ‘luambo lwavho lwa ḓamuni.’ (Mish. 2:8) Na vharumiwa vha a ṱhogomela uri u itela uri vha dzule vhe na vhushaka havhuḓi na Yehova musi vhe kha tshivhidzo tsha luṅwe luambo, vha nga si kone u ḓitika fhedzi nga zwine vha zwi pfa vhe miṱanganoni.

13 Alain ane a khou guda Lupersia lwa miṅwaha i ṱoḓaho u vha malo, o ri: “Musi ndi tshi lugiselela miṱangano nga Lupersia, ndi  livhisa ṱhogomelo kha luambo. Samusi ndi tshi ṱoḓa u guda luambo, a thi kwamei nga zwine nda khou zwi vhala. Ndi ngazwo ndi tshi ḓiṋea tshifhinga tsha u guda Bivhili na dziṅwe khandiso nga luambo lwanga lwa ḓamuni.”

SWIKELELANI MBILU DZA VHANA VHAṊU

14. Vhabebi vha fanela u ita vhungoho ha mini, nahone ndi ngani?

14 Vhabebi vha Vhakriste vha fanela u ita vhungoho ha uri Ipfi ḽa Mudzimu ḽi kwama mbilu dza vhana vhavho. Musi vho no fhedza miṅwaha i fhiraho miraru vhe kha tsimu ya luṅwe luambo, Serge na mufumakadzi wawe Muriel vho ṱhogomela uri murwa wavho ane a vha na miṅwaha ya 17 ha tsha takalela uya vhuḓinḓani na miṱanganoni. Muriel o ri: “O vha a tshi takalela u huwelela nga Lufura lune lwa vha luambo lwawe lwa ḓamuni, fhedzi zwino zwi a mu dina uya tsimuni ya luṅwe luambo.” Serge o ri: “Musi ri tshi ṱhogomela uri murwa washu ha tsha ita mvelaphanḓa ya lwa muya, ro dzhia phetho ya u humela tshivhidzoni tshashu tsha kale.”

Itani vhungoho ha uri ngoho i kwama mbilu dza vhana vhaṋu (Sedzani dziphara 14, 15)

15. (a) Ndi mini zwine zwa nga ṱuṱuwedza vhabebi u humela kha zwivhidzo zwine zwa shumisa luambo lune lwa pfeseswa nga vhana vhavho? (b) Doiteronomio 6:5-7 i ṱuṱuwedza hani vhabebi?

15 Ndi mini zwine zwa nga ṱuṱuwedza vhabebi u vhuyelela kha tshivhidzo tshine tsha shumisa luambo lune lwa pfeseswa nga vhana vhavho? Tsha u thoma, vha fanela u ḓivha uri vha na tshifhinga na zwithu zwine zwa nga thusa vhana vhavho u funa Yehova na u vha gudisa luambo luswa nga tshifhinga tshithihi. Tsha vhuvhili, vha nga ṱhogomela uri vhana vhavho a vha tsha takalela uya vhuḓinḓani, miṱanganoni kana u ṱanganela kha tshivhidzo tsha luṅwe luambo. Kha vhuimo ho raloho, vhabebi vha Vhakriste vha nga dzhia phetho ya u humela kha tshivhidzo tsha luambo lune lwa pfeseswa nga vhana vhavho u swikela vhana vhavho vha tshi vha na lutendo lwo khwaṱhaho.—Vhalani Doiteronomio 6:5-7.

16, 17. Vhaṅwe vhabebi vho kona hani u gudisa vhana vhavho nga ha Yehova ngeno vha tshi ṱanganela kha luṅwe luambo?

16 Kha ḽiṅwe sia, vhaṅwe vhabebi vho wana nḓila ya u gudisa vhana vhavho nga ha Yehova nga luambo lwavho lwa ḓamuni, ngeno vha tshi khou bvela phanḓa vha tshi ya tshivhidzoni tshine tsha shumisa luṅwe luambo. Charles, ane a vha na vhana vhararu vha vhasidzana vhane vha vha na miṅwaha ya 9 u swika 13 vha ṱanganela kha tshigwada tshine tsha amba Lulingala. O ri: “Ro dzhia phetho ya u fara ngudo ya Bivhili na vhurabeli ha muṱa nga luambo lwashu lwa ḓamuni lune vhana vha lu pfesesa. Fhedzi ro dovha ra katela na u ita zwiṅwe zwithu na u tamba mitambo nga Lulingala u itela uri vha gude lwonolo luambo ngeno vha tshi khou ḓiphina.”

Itani vhuḓidini ha u guda luambo luswa nahone ni shele mulenzhe miṱanganoni (Sedzani dziphara 16, 17)

17 Kevin, khotsi ane a vha na vhana vhavhili vha vhasidzana vhane vha vha na miṅwaha miṱanu na malo, o ita zwoṱhe zwine a nga kona u gudisa vhana vhawe ngoho ngauri vho vha vha sa pfesesi nga vhuḓalo zwe zwa vha zwi tshi khou ambiwa miṱanganoni. O ri: “Nṋe na mufumakadzi wanga ri fara pfunzo ya Bivhili na vhananyana vhashu nga luambo lwashu lwa ḓamuni. Ro dovha ra ḓivhetshela tshipikwa tsha u ya miṱanganoni luthihi nga ṅwedzi na mabuthanoni hune ha ambiwa Lufura lune lwa vha luambo lwashu lwa ḓamuni.”

18. (a) Vharoma 15:1, 2 i nga ni thusa hani u dzhia phetho yavhuḓi musi ni tshi thusa vhana vhaṋu? (b) Vhaṅwe vhabebi vho ṋea nyeletshedzo ifhio? (Sedzani notsi dza u fhedzisela.)

18 Vhukuma, muṱa muṅwe na muṅwe u fanela u dzhia phetho ya uri ndi zwifhio zwa khwine zwine zwa nga thusa vhana vhavho u vha na vhushaka havhuḓi na Yehova. [2] (Vhagal. 6:5) Muriel we a bulwa mathomoni, o amba uri naho ene na mukalaha wawe vho vha vha tshi ṱoḓa u ṱanganela kha tshivhidzo tshine tsha shumisa luṅwe luambo, vho dzhia phetho ya u ṱuwa u itela uri murwa wavho a vhe na vhushaka havhuḓi na Yehova. (Vhalani  Vharoma 15:1, 2.) Serge u a ḓivha uri o dzhia phetho yavhuḓi. O ri: “U bva tshee ra humela tshivhidzoni tshine tsha shumisa Lufura, murwa washu o ita mvelaphanḓa ya lwa muya nahone a lovhedzwa. Zwino ndi muvulanḓila wa tshifhinga tshoṱhe. U khou humbula na u humela kha tshivhidzo tshe ra vha ri khatsho tshine tsha shumisa luṅwe luambo.”

TENDELANI IPFI ḼA MUDZIMU ḼI TSHI KWAMA MBILU YAṊU

19, 20. Ri nga sumbedza hani uri ri funa Ipfi ḽa Mudzimu?

19 Nga nṱhani ha uri Yehova u funa vhathu vhoṱhe, o ita uri Bivhili i wanale nga nyambo nnzhi u itela uri ‘vhathu vha mifuda yoṱhe vha vhe na nḓivho yo teaho ya ngoho.’ (1 Tim. 2:4) U a ḓivha uri vhushaka hashu nae vhu ḓo khwaṱha arali ri tshi guda Bivhili nga luambo lune ra lu pfesesa.

20 Naho zwo ralo, hu sa londwi vhuimo hashu, ri fanela u ḓiimisela u ita uri vhushaka hashu na Yehova vhu khwaṱhe. Musi ri tshi vhala Bivhili tshifhinga tshoṱhe nga luambo lune ra lu pfesesa, riṋe na vha muṱa washu ri ḓo dzula ri na vhushaka havhuḓi na Yehova nahone ri ḓo sumbedza uri ri dzhiela nṱhani zwine Mudzimu a zwi amba Bivhilini.—Ps. 119:11.

^ [1] (phara 5) Maṅwe madzina o shandulwa.

^ [2] (phara 18) U itela u wana maitele a Bivhili ane a nga thusa muṱa waṋu, sedzani thero ine ya ri “Khaedu Na Mbuyelo Dza U Alusa Vhana Shangoni Ḽi Sili” kha Tshiingamo tsha ḽa 15 October, 2002.