Pfukelani kha mafhungo

Pfukelani kha zwi re ngomu

Ri Ṱanganedza Vhuthu Vhuhulu Ha Mudzimu

Ri Ṱanganedza Vhuthu Vhuhulu Ha Mudzimu

“Ro bvela phanḓa ri tshi ṱanganedza vhuthu vhuhulu.”—YOHANE 1:16.

NYIMBO: 95, 13

1, 2. (a) Ṱalutshedzani tshifanyiso tsha Yesu nga ha muṋe wa minḓirivhe. (b) Tshifanyiso tshi tshimbidzana hani na pfaneleo ya vhuthu vhuhulu?  

MUṊE wa tsimu ya minḓirivhe o ya makete nga matsheloni-tsheloni u itela u ṱoḓa vhathu vhane vha ḓo shuma tsimuni yawe. Vhanna vhe a vha wana makete vho tendelana nae nga muholo. Muṋe wa tsimu o vha a tshi ṱoḓa vhashumi vhanzhi, nga zwenezwo, a humela makete nga masiari u itela u thola vhanna vho engedzeaho nahone a vha fulufhedzisa u vha holela ḽi tshi kovhela. Musi ḽi tshi kovhela, a kuvhanganya vhanna vhoṱhe u itela u vha holela nahone a vha ṋea vhoṱhe tshelede i linganaho, hu sa londwi uri vho shuma awara nnzhi kana nthihi fhedzi. Vhe vha tholwa u thoma vha tshi pfa nga zwenezwo, vha gungula. Muṋe wa tsimu o fhindula a ri: ‘Naa a ro ngo pfana nga muholo? Naa mulayo a u ntendeli u ita zwine nda funa nga zwi re zwanga? Naa ḽiṱo ḽau ndi ḽivhi nge wa vhona u luga hanga?’—Mat. 20:1-15.

2 Tshifanyiso tsha Yesu tshi ri humbudza nga ha iṅwe pfaneleo ya Yehova ine kanzhi ha ambiwa nga hayo Bivhilini, ine ya  vha “vhuthu [hawe] vhuhulu.” (Vhalani 2 Vhakorinta 6:1.) Vhashumi vhe vha shuma awara nthihi fhedzi vho vha vha songo fanela u holelwa muholo wa ḓuvha ḽoṱhe, fhedzi muṋe wa tsimu o vha sumbedza vhuthu vhuhulu. Muṅwe muḓivhi o amba zwi tevhelaho nga ha “vhuthu vhuhulu”: “Ḽeneḽi ipfi ḽi sumbedza u wana tshifhiwa tshe tsha ṋewa muthu we a si tshi shumele na we a vha a songo tea u tshi wana.”

TSHIFHIWA TSHA YEHOVA

3, 4. Ndi ngani Yehova o sumbedza vhathu vhuthu vhuhulu nahone o zwi ita nga nḓila-ḓe?   

3 Bivhili i amba nga ha “tshifhiwa tsha fhedzi tsha vhuthu vhuhulu [ha] Mudzimu.” (Vhaef. 3:7) Ndi ngani Yehova a tshi ṋea vhathu “tshifhiwa tsha fhedzi” nahone u zwi ita nga nḓila-ḓe? Arali ri tshi tevhela milayo ya Yehova nga ho fhelelaho, ndi hone ri tshi ḓo fanelwa nga vhuthu hawe. Fhedzi ri a kundelwa u ita nga u ralo. Nga zwenezwo, Khosi Salomo o ṅwala a ri: “Ngauri fhano shangoni a hu na muthu muvhuya, ane a ḓi ita zwavhuḓi a si vhuye a tshinya.” (Muh. 7:20) Nga hu fanaho, na muapostola Paulo o ṅwala a ri: “Vhoṱhe vho tshinya nahone vha kundwa u wana vhugala ha Mudzimu” nahone “malamba a tshivhi ndi lufu.” (Vharoma 3:23; 6:23a) Ro tewa nga u fa.

4 Naho zwo ralo, Yehova o sumbedza vhathu vhuthu vhuhulu nga nḓila i mangadzaho vhukuma. O ri ṋea “Murwa wawe mubebwa e eṱhe,” uri a ri fele, zwine zwa vha tshifhiwa tshihulwanesa. (Yoh. 3:16) Paulo o amba nga ha Yesu a ri “zwino o ambadzwa khare ya vhugala na khuliso nge a tambula u swika a tshi fa, uri nga vhuthu vhuhulu ha Mudzimu, a fele vhoṱhe.” (Vhaheb. 2:9) Vhukuma, “tshifhiwa tshine ra ṋewa nga Mudzimu ndi u tshila tshoṱhe nga Kristo Yesu Murena washu.”—Vharoma 6:23b.

5, 6. Hu vha na mvelelo dzifhio musi ri tshi langwa (a) nga tshivhi? (b) nga vhuthu vhuhulu ha Mudzimu?

5 Ndi ngani vhathu vha tshi ita tshivhi nahone vha tshi fa? Bivhili i ṱalutshedza uri: “Tshivhi tsha muthu onoyo muthihi [Adamu] tsho ita uri lufu lu vhuse sa khosi” na kha vhaḓuhulu vhawe. (Vharoma 5:12, 14, 17) Zwi takadzaho ndi uri ri nga kona u khetha u sa langwa nga tshivhi. Musi ri tshi vha na lutendo kha tshiṱhavhelo tshi rengululaho tsha Kristo, ri vhuyelwa nga vhuthu vhuhulu ha Yehova. Nga nḓila-ḓe? Bivhili i ri: “He ha ḓala tshivhi, na vhuthu vhuhulu vhu a ḓala. Nga nḓila-ḓe? Samusi tshivhi tsho vhusa sa khosi khathihi na lufu, zwino nga hu fanaho vhuthu vhuhulu vhu ḓo vhusa sa khosi vhu tshi shumisa u luga hu isaho vhutshiloni vhu sa fheli nga Yesu Kristo.”—Vharoma 5:20, 21.

6 Naho ri vhaitazwivhi, a ro ngo fanela u tendela tshivhi tshi tshi ri langa. Musi ri tshi ita tshivhi, ri ḓo humbela Yehova uri a ri hangwele. Paulo o sevha Vhakriste a ri: “Tshivhi a tsho ngo fanela u ni langa, samusi ni siho fhasi ha mulayo, fhedzi ni tshi vhuyelwa nga vhuthu vhuhulu ha Mudzimu.” (Vharoma 6:14) Nga zwenezwo, ri vha ri tshi khou vhuyelwa nga vhuthu vhuhulu ha Yehova. Hu vha na mvelelo dzifhio? Paulo o ri: “Vhuthu vhuhulu ha Mudzimu . . . vhu ri gudisa uri ri iledze vhuḓifari ha u sa ofha Mudzimu na nyemulo dza shango, uri ri tshile ri na muhumbulo wo tshaho na u luga na u ḓikumedza kha Mudzimu kha ano maitele a zwithu.”—Tito 2:11, 12.

 VHUTHU VHUHULU HO “SUMBEDZWA NGA NḒILA DZO FHAMBA-FHAMBANAHO”

7, 8. Vhuthu vhuhulu ha Yehova “vhune ha sumbedzwa nga nḓila dzo fhamba-fhambanaho” vhu amba mini? (Sedzani tshifanyiso tsha u thoma.)

7 Muapostola Petro o ṅwala uri: “U ya nga he muṅwe na muṅwe a wana tshifhiwa, tshi shumiseni u itela u shumelana sa vhakoma vhavhuḓi vha vhuthu vhuhulu ha Mudzimu, vhune ha sumbedzwa nga nḓila dzo fhamba-fhambanaho.” (1 Pet. 4:10) Zwenezwi zwi amba mini? Zwi amba uri Yehova a nga ri thusa uri ri lwisane na mulingo muṅwe na muṅwe une ra sedzana nawo. (1 Petro 1:6) Mudzimu u ḓo dzula a tshi ri ṋea zwine ra zwi ṱoḓa u itela u kunda mulingo muṅwe na muṅwe.

8 Yehova u sumbedza vhuthu vhuhulu hawe nga nḓila nnzhi. Muapostola Yohane o ṅwala a ri: “Ro bvela phanḓa ri tshi ṱanganedza vhuthu vhuhulu.” (Yoh. 1:16) Nḓila dzo fhamba-fhambanaho dzine Yehova a sumbedza ngadzo vhuthu dzi ḓisa phaṱhutshedzo nnzhi. Dziṅwe dzadzo ndi dzifhio?  

9. Ri vhuyelwa hani nga vhuthu vhuhulu ha Yehova, nahone ri nga sumbedza hani uri ri a livhuha?  

9 Yehova u hangwela zwivhi zwashu. Nga nṱhani ha vhuthu vhuhulu hawe, Yehova u ri hangwela zwivhi zwashu arali ri tshi rembuluwa na u bvela phanḓa ri tshi lwisana na dzema ḽa u ita tshivhi. (Vhalani 1 Yohane 1:8, 9.) Tshilidzi tsha Mudzimu tshi fanela u ri ṱuṱuwedza uri ri mu hulise. Paulo o ṅwalela Vhakriste vho ḓodzwaho a ri: “[Yehova] o ri vhofholola kha maanḓa a swiswi a ri isa muvhusoni wa Murwa wawe ane a mu funa, we ngae a ri vhofholola nga tshirengululi, zwine zwa amba u hangwela zwivhi zwashu.” (Vhakol. 1:13, 14) U hangwelwa hashu zwivhi zwi ita uri ri wane dziṅwe phaṱhutshedzo nnzhi.

10. Ndi phaṱhutshedzo dzifhio dzine ra dzi wana nga nṱhani ha vhuthu vhuhulu ha Mudzimu?

10 U vha na mulalo na Mudzimu. Samusi ri songo fhelela, ro vha ri maswina a Mudzimu u bva tshee ra bebwa. Paulo o ri: “Ro pfumedzanywa na Mudzimu nga lufu lwa Murwa wawe zwiḽa ri tshee maswina awe.” (Vharoma 5:10) Honohu u pfumedzana hu ita uri ri vhe na mulalo na Yehova. Paulo o sumbedza nḓila ine zwenezwi zwa tshimbidzana ngayo na vhuthu vhuhulu ha Yehova musi a tshi amba na vharathu vha Kristo vho ḓodzwaho uri: “Samusi zwino ri tshi vho pfi ro luga nga nṱhani ha lutendo, kha ri dzule ri na mulalo na Mudzimu nga Murena washu Yesu Kristo, nga nṱhani ha u vha na lutendo khae, ho vulea nḓila ya u wana vhuthu vhuhulu, vhune ra khou vhu wana zwino.” (Vharoma 5:1, 2) Zwenezwi ndi phaṱhutshedzo khulwane vhukuma!

Zwine vhuthu vhuhulu ha Mudzimu ha amba zwone: Ndugelo ya u pfa mafhungo maḓifha (Sedzani phara 11)

11. Vhaḓodzwa vha ita hani uri vha “dziṅwe nngu” vha vhe na vhushaka havhuḓi na Yehova?

11 Musi ri tshi vha vhavhuya phanḓa ha Mudzimu. Nga lwa nzulele roṱhe a ri vhavhuya. Fhedzi muporofita Daniele o dzula o amba nga ha tshifhinga tsha vhufhelo a ri: “Vha ṱhalukanyo” vhane vha vha masalela a vhaḓodzwa vha ḓo “isa vhanzhi kha zwivhuya.” (Vhalani Daniele 12:3.) Mushumo wa u funza na wa u huwelela wo ita uri vhathu vha dzimilioni vhane vha vha vha “dziṅwe nngu” vha vhe na vhushaka havhuḓi na Yehova. (Yoh. 10:16) Naho zwo ralo, zwenezwi zwo konadzea nga nṱhani ha vhuthu vhuhulu ha Yehova. Paulo o ri: “Vha tshi itwa vho lugaho nga Mudzimu ndi u tou ṋewa nga vhuthu hawe vhuhulu nge vha vhofhololwa nga tshirengululi tsho lifhiwaho nga Kristo Yesu.”—Vharoma 3:23, 24.

Ndugelo ya u rabela (Sedzani phara 12)

12. Thabelo i tshimbidzana hani na vhuthu vhuhulu ha Mudzimu?

 12 Ri nga sendela tsini na Mudzimu nga thabelo. Vhuthu vhuhulu ha Yehova vhu ita uri ri sendele tsini na Yehova nga thabelo. Zwi re zwone ndi uri Paulo u vhidza khuluṋoni ya Yehova “khuluṋoni ya vhuthu vhuhulu” nahone Yehova u ri ramba uri ri ambe nae ro ‘vhofholowa.’ (Vhaheb. 4:16a) Yehova o ita uri zwenezwo zwi konadzee nga Murwa wawe, “ane ngae ra vha na mbofholowo ya u amba na u ya khae ro vhofholowa ri na vhungoho, nga nṱhani ha lutendo lune ra vha nalwo kha Kristo.” (Vhaef. 3:12) U rabela Yehova ro vhofholowa ndi nḓila yavhuḓi ya u ri sumbedza vhuthu hawe vhuhulu.

U wana thuso nga tshifhinga tsho teaho (Sedzani phara 13)

13. Vhuthu vhuhulu ha Yehova vhu nga ri “thusa nga tshifhinga tsho teaho” nga nḓila-ḓe?

13 U wana thuso nga tshifhinga tsho teaho. Paulo o ri ṱuṱuwedza uri ri ambe na Yehova nga thabelo ro vhofholowa “uri ri khathutshelwe na u wana vhuthu vhuhulu vhune ha ri thusa nga tshifhinga tsho teaho.” (Vhaheb. 4:16b) Tshifhinga tshiṅwe na tshiṅwe musi ro zhakiwa nga milingo, ri nga humbela Yehova nga thabelo uri a ri thuse. U fhindula thabelo dzashu naho a songo fanela u ita nga u ralo, kanzhi a tshi shumisa Vhakriste nga riṋe, “u itela uri ri vhe na tshivhindi nahone ri ri: ‘Yehova ndi muthusi wanga; a thi nga ofhi. Muthu a nga nyita’ni?’”—Vhaheb. 13:6.

14. Ri vhuyelwa hani nga vhuthu vhuhulu ha Yehova?

14 Ri nga khuthadzwa. Ndi phaṱhutshedzo khulwane u khuthadzwa nga Yehova musi ro sedzana na milingo. (Ps. 51:17) Paulo o ṅwalela Vhakriste vha Thesalonika vhe vha vha vha tshi khou tovholwa a ri: “Ngavhe Murena washu Yesu Kristo na Mudzimu Khotsi ashu, we a ri funa na u ri khuthadza nga hu sa fheli na u ri ṋea fulufhelo ḽavhuḓi nga vhuthu vhuhulu hawe, a tshi ni khuthadza na u ni khwaṱhisa.” (2 Vhathes. 2:16, 17) Zwi a khuthadza vhukuma  u ḓivha uri Yehova u a ri funa na u ri ṱhogomela.

15. Ndi fulufhelo ḽifhio ḽine ra vha naḽo nga nṱhani ha vhuthu vhuhulu ha Mudzimu?

15 U lavhelela u tshila nga hu sa fheli. Sa vhaitazwivhi a ri na fulufhelo. (Vhalani Psalme ya 49:7, 8.) Fhedzi Yehova u ri ṋea fulufhelo. Yesu o fulufhedzisa vhatevheli vhawe a ri: “Ndi zwine Khotsi anga a zwi funa, uri muṅwe na muṅwe a vhonaho Murwa nahone a mu tenda a wane vhutshilo vhu sa fheli.” (Yohane 6:40) Vhukuma, fulufhelo ḽa vhutshilo vhu sa fheli ndi tshifhiwa tshine tsha sumbedza vhuthu vhuhulu ha Mudzimu. Paulo o ri: “Vhuthu vhuhulu ha Mudzimu ho vhonala, nahone vhu ita uri vhathu vha mifuda yoṱhe vha tshidzwe.”—Tito 2:11.

RI SONGO VHUYAFHEDZA VHUVHI NGA VHUTHU VHUHULU HA MUDZIMU

16. Vhaṅwe Vhakriste vha tshifhingani tsha kale vho vhuyafhedza hani tshivhi?

16 Ri wana phaṱhutshedzo nga nṱhani ha vhuthu vhuhulu ha Yehova, fhedzi a ro ngo fanela u vhuyafhedza vhuvhi hashu. Vhaṅwe Vhakriste vha tshifhingani tsho fhiraho, vho lingedza u “shandula vhuthu vhuhulwane ha Mudzimu . . . ha vha tshiitisi tsha u ḓifara nga nḓila i shonisaho.” (Yuda 4) Vhenevho Vhakriste vha sa fulufhedzei vho vha vha tshi vhona u nga vha nga ita tshivhi nga khole nahone vha humbela uri Yehova a vha hangwele. Zwiṅwe hafhu, vho lingedza u kunga vhahavho uri vha ite navho tshivhi. Na ṋamusi, muthu ane a ḓifara nga yeneyi nḓila u vha a tshi khou “sema muya wa vhuthu vhuhulu” ha Yehova.—Vhaheb. 10:29.

17. Ndi ifhio nyeletshedzo ye Petro a i ṋea?

17 Ano maḓuvha, Sathane o fhura vhaṅwe Vhakriste uri vha humbule uri vha nga ita tshivhi nga khole nahone Yehova u ḓo vha hangwela. Naho Yehova o ḓiimisela u hangwela vhaitazwivhi vho rembuluwaho, u lavhelela uri ri lwisane na dzema ḽashu ḽa u ita tshivhi. O hevhedza Petro u ṅwala uri: “Ngauralo vhafunwa, samusi no dzula ni na yeneyi nḓivho, ni ṱhogomele uri ni si xedzwe navho nga vhutshinyi ha vhathu vha si na mulayo nahone zwa ita uri ni si ime no khwaṱha. Aiwa, bvelani phanḓa ni tshi aluwa kha vhuthu vhuhulu na nḓivho ya Murena na Mutshidzi washu Yesu Kristo.”—2 Pet. 3:17, 18.

VHUTHU VHUHULU HA MUDZIMU VHU ḒA NA VHUḒIFHINDULELI

18. Ndi vhuḓifhinduleli vhufhio vhune ra vha naho nga nṱhani ha vhuthu vhuhulu ha Yehova?

18 Samusi ri tshi livhuha vhuthu vhuhulu ha Yehova, ri fanela u shumisa tshifhiwa tshashu u hulisa Mudzimu na u thusa vhaṅwe. Nga nḓila-ḓe? Paulo o ri: “Samusi ri na zwifhiwa zwi sa fani u ya nga vhuthu vhuhulu he ra sumbedzwa hone, . . . arali hu vhuḓinḓa, kha ri bvele phanḓa ri tshi ita honovhu vhuḓinḓa; kana ane a gudisa, kha bvele phanḓa a tshi gudisa; kana ane a khuthadza, kha bvele phanḓa a tshi khuthadza; . . . ane a khathutshela, kha zwi ite o takala.” (Vharoma 12:6-8) Vhuthu vhuhulu ha Yehova vhu ita uri ri vhe na vhuḓifhinduleli ha u dzula ro farakanea nga vhuḓinḓa ha Vhukriste, u gudisa vhaṅwe Bivhili, u ṱuṱuwedza Vhakriste nga riṋe na u hangwela vhane vha ri khukhulisa.

19. Ri ḓo haseledza mini kha thero i tevhelaho?

19 Ri fanela u ṱuṱuwedzea u “ṱanziela nga vhuḓalo nga ha mafhungo maḓifha a vhuthu vhuhulu ha Mudzimu,” samusi ro fhaṱutshedzwa ngae. (Mish. 20:24) Ri ḓo haseledza nga ho engedzeaho nga ha honoho vhuḓifhinduleli kha thero i tevhelaho.