Pfukelani kha mafhungo

Pfukelani kha zwi re ngomu

Huwelelani Mafhungo Maḓifha A Vhuthu Vhuhulu Ha Mudzimu

Huwelelani Mafhungo Maḓifha A Vhuthu Vhuhulu Ha Mudzimu

“U ṱanziela nga vhuḓalo nga ha mafhungo maḓifha a vhuthu vhuhulu ha Mudzimu.”—MISH. 20:24.

NYIMBO: 101, 84

1, 2. Muapostola Paulo o sumbedza hani uri u a dzhiela nṱha vhuthu vhuhulu ha Mudzimu?

MUAPOSTOLA PAULO o ri: “Vhuthu vhuhulu hawe he a ntsumbedza hone ho vha vhu si mahandana.” (Vhalani 1 Vhakorinta 15:9, 10.) Paulo o vha a tshi zwi ḓivha uri vhuthu vhuhulu ha Mudzimu ho ngo vhu shumela nahone a vhu mu faneli, samusi o vha e mutovholi wa Vhakriste.

2 Musi Paulo e tsini na u fa, o ṅwalela Timotheo uri: “Ndi livhuha Kristo Yesu Murena washu, we a nṋea maanḓa na vhuḓinḓa hawe ngauri o vha a tshi ndzhia ndi tshi fulufhedzea.” (1 Tim. 1:12-14) Ndi vhufhio honoho vhuḓinḓa? Paulo o vhudza vhahulwane vha tshivhidzo tsha Efesa a ri: “A thi dzhii vhutshilo hanga vhu ha ndeme kha nṋe, tenda nda fhedza mushumo wanga na vhuḓinḓa he nda vhu ṋewa nga Murena Yesu, u itela u ṱanziela nga vhuḓalo nga ha mafhungo maḓifha a vhuthu vhuhulu ha Mudzimu.”Mish. 20:24.

3. Ndi mushumo ufhio wa ndeme we Paulo a ṋewa wone? (Sedzani tshifanyiso tsha u thoma.)

 3 Ndi afhio “mafhungo maḓifha” e Paulo a huwelela nga hao nahone o ombedzela hani vhuthu vhuhulu ha Yehova? O vhudza Vhakriste vha Efesa a ri: “No zwi pfa zwa vhukuma uri ndo ṱanganedza vhuḓifhinduleli ha u ni thusa uri ni vhuyelwe nga vhuthu vhuhulu ha Mudzimu he nda sumbedzwa hone hu tshi itelwa inwi.” (Vhaef. 3:1, 2) Paulo o vha o vhudzwa uri a huwelele mafhungo maḓifha kha vhathu vhe vha vha vhe si Vhayuda nahone zwo ita uri vha vhe tshipiḓa tsha Muvhuso u vhuswaho nga Kristo. (Vhalani Vhaefesa 3:5-8.) Samusi Paulo o vha a tshi fhisetshela vhuḓinḓa, o vhetshela tsumbo Vhakriste vha musalauno nahone o sumbedza uri vhuthu vhuhulu ha Mudzimu he a sumbedzwa hone ho vha vhu si “mahandana.”

NAA VHUTHU VHUHULU HA MUDZIMU VHU A NI ṰUṰUWEDZA?

4, 5. Ndi ngani ri tshi nga amba uri “mafhungo maḓifha . . . a Muvhuso” a fana na mafhungo maḓifha a “vhuthu vhuhulu ha Mudzimu”?

4 Kha ano maḓuvha a vhufhelo, vhathu vha Mudzimu vho vhudzwa uri vha huwelele “mafhungo maḓifha . . . a Muvhuso . . . ḽifhasini ḽoṱhe uri zwi vhe vhuṱanzi kha tshaka dzoṱhe.” (Mat. 24:14) Mulaedza une ra u huwelela u katela “mafhungo maḓifha a vhuthu vhuhulu ha Mudzimu” ngauri phaṱhutshedzo dzoṱhe dzine ra fulufhela u dzi wana nga fhasi ha Muvhuso ndi nga nṱhani ha vhuthu vhuhulu ha Yehova a tshi shumisa Kristo. (Vhaef. 1:3) Naa ri edzisa Paulo nga u dzhiela nṱha vhuthu vhuhulu ha Yehova nga u shela mulenzhe vhuḓinḓani?—Vhalani Vharoma 1:14-16.

5 Kha thero yo fhiraho, ro guda nḓila ine riṋe sa vhathu vha songo fhelelaho ra vhuyelwa ngayo nga vhuthu vhuhulu ha Yehova nga nḓila nnzhi. Ri na vhuḓifhinduleli ha u gudisa vhathu vhoṱhe nḓila ine Yehova a ri funa ngayo na nḓila ine vha nga vhuyelwa ngayo. Ndi dzifhio dziṅwe nḓila dzine ra nga kona u thusa vhaṅwe ngadzo uri vha dzhiele nṱha vhuthu vhuhulu ha Mudzimu?

HUWELELANI MAFHUNGO MAḒIFHA A TSHIṰHAVHELO TSHA TSHIRENGULULIE

6, 7. Musi ri tshi ṱalutshedza vhaṅwe nga ha tshiṱhavhelo, ri vha ri tshi khou phaḓaladza hani mafhungo maḓifha a vhuthu vhuhulu ha Mudzimu?

6 Kha ḽino shango, vhathu vhanzhi a vha ḓisoli musi vha tshi ita tshivhi, nga zwenezwo, a vha pfesesi uri ndi ngani vhathu vha tshi ṱoḓa tshirengululi. Naho zwo ralo, vhathu vhanzhi vha a kona u vhona uri nḓila ine vha tshila ngayo a i vha takadzi. Vhathu vhanzhi vha kona u pfesesa musi vho no amba na Ṱhanzi dza Yehova uri tshivhi ndi mini, nḓila ine tsha ri kwama ngayo na zwine ra fanela u zwi ita u itela uri ri si tsha vha phuli dza tshivhi. Vhathu vha mbilu dzavhuḓi vha a takala musi vha tshi guda uri Yehova o rumela Murwa wawe kha ḽifhasi uri a ri vhofholole kha tshivhi na lufu, o ita zwenezwo ngauri u a ri funa na nga vhuthu hawe vhuhulu.—1 Yoh. 4:9, 10.

7 Ṱhogomelani zwe zwa ambiwa nga Paulo nga ha Murwa wa Yehova: “A tshi shumisa ene, ro vhofhololwa nga tshirengululi tsha malofha awe, uri ri hangwelwe vhutshinyi hashu, u ya nga vhuthu [ha Yehova] vhuhulu vhu sa vhambedzwi na tshithu.” (Vhaef. 1:7) Tshiṱhavhelo tshi rengululaho tsha Kristo ndi vhuṱanzi vhuhulwane ha uri Mudzimu u a ri funa nahone tshi sumbedza zwine vhuthu hawe vhuhulu ha vha zwone. Zwi a takadza u guda uri arali ri tshi sumbedza lutendo kha tshiṱhavhelo tsha Yesu, zwivhi zwashu zwi ḓo hangwelwa nahone ri  ḓo vha na luvalo lwo kunaho. (Vhaheb. 9:14) Zwenezwi ndi mafhungo maḓifha ane ra takalela u a vhudza vhaṅwe.

THUSANI VHATHU URI VHA VHE NA VHUSHAKA HAVHUḒI NA MUDZIMU

8. Ndi ngani vhathu vha songo fhelelaho vha tshi fanela u pfumedzana na Mudzimu?

8 Ri na vhuḓifhinduleli ha u vhudza vhathu uri vha nga vha na vhushaka havhuḓi na Musiki wavho. Musi vhathu vha sa athu u vha na lutendo kha tshiṱhavhelo tsha Yesu, Mudzimu o vha a tshi vha dzhia sa maswina awe. Muapostola Yohane o ṅwala uri: “Ane a vha na lutendo kha Murwa u ḓo wana vhutshilo vhu sa fheli; ane a si thetshelese Murwa ha nga wani vhutshilo, fhedzi vhuhali ha Mudzimu vhu dzula vhu khae.” (Yoh. 3:36) Zwi takadzaho ndi uri tshirengululi tsha Kristo tsho ita uri zwi konadzee u pfumedzana na Mudzimu. Paulo o ri: “Inwi vhe na vha ni kule nahone ni maswina awe ngauri mihumbulo yaṋu yo vha i kha mishumo mivhi, zwino o ni pfumedzanya nae nga muvhili wa ṋama wa onoyo nga lufu lwawe.”—Vhakol. 1:21, 22.

9, 10. (a) Ndi vhuḓifhinduleli vhufhio he Kristo a vhu ṋea vharathu vhawe vho ḓodzwaho? (b)Vha “dziṅwe nngu” vha thusa hani Vhakriste vho ḓodzwaho?

9 Kristo o ṋea vharathu vhawe vho ḓodzwaho vha re kha ḽifhasi zwine Paulo a zwi vhidza “vhuḓinḓa ha u pfumedzanya.” Musi Paulo a tshi ṱalutshedza zwenezwi o ṅwalela Vhakriste vho ḓodzwaho vha ḓanani ḽa u thoma ḽa miṅwaha a ri: “Zwithu zwoṱhe zwi bva ha Mudzimu, ene we a ri pfumedzanya nae nga Kristo na u ri ṋea vhuḓinḓa ha u pfumedzanya, zwa uri Mudzimu o ḓipfumedzanya na shango a tshi shumisa Kristo, a si vhalele vhutshinyi havho. O ri ṋea mushumo wa u vhudza vhathu uri vha nga pfumedzana na Mudzimu. Nga zwenezwo, ri vhaimeli vha Kristo, zwa nga Mudzimu u humbela a tshi shumisa riṋe. Samusi ri vhaimeli vha Kristo, ri humbela uri: ‘Pfumedzanani na Mudzimu.’”—2 Vhakor. 5:18-20.

10 Vha “dziṅwe nngu” vha zwi dzhia zwi ndugelo u thusa vhahashu vho ḓodzwaho vhuḓinḓani. (Yoh. 10:16) Vhaimeleli vha Kristo vha khou shela mulenzhe kha mushumo wa u huwelela, u gudisa vhathu ngoho na u vha thusa uri vha vhe na vhushaka havhuḓi na Yehova. Tshenetshi ndi tshipiḓa tshihulwane vhukuma tsha u huwelela nga ha mafhungo maḓifha a vhuthu vhuhulu ha Mudzimu.

VHUDZANI VHATHU URI MUDZIMU U PFA DZITHABELO

11, 12. Ndi ngani zwi zwavhuḓi uri vhathu vha gude uri vha nga rabela kha Yehova?

11 Vhathu vhanzhi vha a rabela u itela uri vha ḓipfe vhe khwine, fhedzi a vha tendi uri Mudzimu u pfa thabelo dzavho. Vha fanela u ḓivha uri Yehova ndi “Mupfi wa dzithabelo.” Mupsalme Davida o ṅwala a ri: “Iwe Mupfi wa dzithabelo, vhathu vhoṱhe vha ḓa ha Iwe. Ndo lemelwa nga milandu minzhi; ané a fukedza zwivhi zwashu ndi Iwe.”—Ps. 65:2, 3.

12 Yesu o vhudza vhafunziwa vhawe a ri: “Tshiṅwe na tshiṅwe tshine na humbela nga dzina ḽanga, ndi ḓo tshi ita.” (Yoh. 14:14) Zwi re zwone ndi uri ipfi “tshiṅwe na tshiṅwe” zwi amba zwithu zwine zwa tshimbidzana na zwine Yehova a zwi funa. Yohane o ri: “Fulufhelo ḽine ra vha naḽo khae ndi heḽi, naho tshi tshini tshine ra nga tshi humbela tshi tshimbidzanaho na zwine a zwi funa, u a ri pfa.” (1 Yoh. 5:14) Ndi zwavhuḓi vhukuma u gudisa vhathu u pfesesa uri thabelo a si zwithu zwine zwa ita uri vha sokou ḓipfa vhe khwine, fhedzi ndi  nḓila ya u sendela “tsini ha khuluṋoni ya vhuthu vhuhulu” ha Yehova. (Vhaheb. 4:16) Musi ri tshi gudisa vhathu u rabela nga nḓila yo teaho, kha muthu o teaho na u humbela zwithu zwo teaho, ri nga thusa vhathu u sendela tsini na Yehova nahone vha ḓo khuthadzea musi vho tsikeledzea.—Ps. 4:1; 145:18.

VHUTHU VHUHULU HA YEHOVA SHANGONI ḼISWA

13, 14. (a) Ndi zwithu zwifhio zwavhuḓi zwine vhaḓodzwa vha ḓo vha nazwo tshifhingani tshi ḓaho? (b) Vhaḓodzwa vha ḓo itela mini vhathu?

13 Vhuthu vhuhulu ha Yehova vhu ḓo vha vhu tshi kha ḓi vha hone na shangoni ḽiswa. Mudzimu u ḓo ṋea vha 144 000 vhane vha ḓo vhusa na Kristo ṱaḓulu ndugelo yavhuḓi vhukuma nahone Paulo o ṱalutshedza yeneyo ndugelo musi a tshi ṅwala uri: “Mudzimu o pfumaho khathutshelo, na nga lufuno lwawe luhulwane lwe a ri sumbedza, o ita uri ri tshile khathihi na Kristo, naho ro vha ro fa nga nṱhani ha vhutshinyi hashu—ro tshidzwa nga vhuthu vhuhulu. Zwiṅwe hafhu, o ri vusa khathihi na Kristo Yesu nahone a ri dzudza nae ṱaḓulu, uri kha maitele a zwithu a ḓaho a kone u sumbedza lupfumo lu fhiraho zwoṱhe lwa vhuthu hawe vhuhulu musi a tshi ṋea vha re vhathihi na Kristo Yesu zwithu zwavhuḓi.”—Vhaef. 2:4-7.

14 Zwi a konḓa u humbulela zwithu zwe Yehova a zwi lugiselela Vhakriste vho ḓodzwaho musi vha tshi vhusa na Kristo ṱaḓulu. (Luka 22:28-30; Vhafil. 3:20, 21; 1 Yoh. 3:2) Yehova u ḓo vha “sumbedza lupfumo lu fhiraho zwoṱhe lwa vhuthu hawe vhuhulu.” Vha ḓo vha “Yerusalema Muswa,” muselwa wa Kristo. (Nzumb. 3:12; 17:14; 21:2, 9, 10) Vha ḓo shuma na Yesu kha u “fhodza dzitshaka,” nahone vha ḓo thusa vhathu uri vha vhofhololwe kha tshivhi na lufu na u vha thusa uri vha fhelele.—Vhalani Nzumbululo 22:1, 2, 17.

15, 16. Yehova u ḓo sumbedza hani vhuthu hawe vhuhulu kha vha “dziṅwe nngu” tshifhingani tshi ḓaho?

15 Kha Vhaefesa 2:7, ri guda uri Mudzimu u ḓo sumbedza vhuthu hawe vhuhulu “kha maitele a zwithu a ḓaho.” A zwi timatimisi uri vhathu vhoṱhe kha ḽifhasi vha ḓo tshenzhela “lupfumo lu fhiraho zwoṱhe lwa vhuthu hawe vhuhulu.” (Luka 18:29, 30) Zwiṅwe zwithu zwihulwane zwine Yehova a ḓo sumbedza ngazwo vhuthu hawe vhuhulu kha ḽifhasi ndi u vuswa ha vhathu “mavhiḓani.” (Yobo 14:13-15; Yoh. 5:28, 29) U fana na vhanna na vhafumakadzi vha fulufhedzeaho vhe vha fa musi Yesu a sa athu u fa, u katela na vha “dziṅwe nngu” vhe vha fa vha tshi fulufhedzea kha ano maḓuvha a vhufhelo vha ḓo vuswa nahone vha bvela phanḓa vha tshi shumela Yehova.

16 Vhathu vha dzimilioni vhe vha fa vha sa ḓivhi Mudzimu na vhone vha ḓo vuswa. Vha ḓo ṋewa tshibuli tsha u tenda u vhuswa nga Yehova. Yohane o ṅwala a ri: “Nda vhona vhafu, vhahulwane na vhaṱuku, vho ima phanḓa ha khuluṋoni, mipombo ya vulwa. Fhedzi ha vulwa muṅwe mupombo; ndi mupombo wa vhutshilo. Vhafu vha haṱulwa nga zwo ṅwalwaho kha mipombo u ya nga mishumo yavho. Lwanzhe lwa bvisa vhafu vha re khalwo, na lufu na Vhudzulavhafu zwa bvisa vhafu vha re khazwo, vha haṱulwa nga muthihi nga muthihi u ya nga mishumo yavho.” (Nzumb. 20:12, 13) Vhoṱhe vhe vha vuswa vha ḓo fanela uri vha gude nḓila ya u shumisa maitele a Mudzimu a wanalaho Bivhilini. Zwiṅwe hafhu, vha ḓo fanela u tevhedza ndaela ntswa dzine dza ḓo vha dzo ṅwalwa kha “mipombo” ine ya sumbedza zwine Yehova a zwi ṱoḓa u itela u tshila shangoni ḽiswa. Dzenedzo ndaela  ntswa dzi ḓo vha dzi iṅwe nḓila ya u sumbedza vhuthu vhuhulu ha Yehova.

BVELANI PHANḒA NI TSHI HUWELELA MAFHUNGO MAḒIFHA

17. Ndi mini zwine ra fanela u dzula ri tshi zwi humbula musi ri vhuḓinḓani?

17 Ndi zwa ndeme vhukuma u fhira naho hu lini u huwelela mafhungo maḓifha a Muvhuso ngauri vhufhelo vhu tsini. (Marko 13:10) A zwi timatimisi uri mafhungo maḓifha a ombedzela vhuthu vhuhulu ha Yehova. Ri fanela u dzula ri tshi humbula zwenezwi musi ri vhuḓinḓani. Musi ri tshi huwelela tshipikwa tshashu ndi u hulisa Yehova. Ri nga ita zwenezwi nga u vhudza vhathu uri mafulufhedziso oṱhe ane ra ḓo a wana shangoni ḽiswa a sumbedza vhuthu vhuhulu ha Yehova.

Shumani nga u fhisea sa “vhakoma vhavhuḓi vha vhuthu vhuhulu ha Mudzimu.”—1 Pet. 4:10 (Sedzani dziphara 17-19)

18, 19. Ri sumbedza hani vhuthu vhuhulu ha Yehova?

18 Musi ri tshi huwelela kha vhaṅwe ri nga vha ṱalutshedza uri musi Kristo a tshi vhusa, vhathu vha ḓo vhuyelwa nga vhuḓalo nga tshirengululi nahone vha ḓo fhelela nga zwiṱuku nga zwiṱuku. Bivhili i ri: “Zwivhumbwa zwi ḓo vhofhololwa vhupulini ha u sina nahone zwa ṋewa vhugala ha vhana vha Mudzimu vho vhofholowaho.” (Vharoma 8:21) Zwenezwi zwi konadzea fhedzi nga vhuthu vhuhulu ha Yehova.

19 Ri na ndugelo ya u vhudza vhathu vhoṱhe nga ha mafulufhedziso a wanalaho kha Nzumbululo 21:4, 5 ane a ri: “[Mudzimu] u ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.” Nahone Yehova o dzulaho kha khuluṋoni uri: “Vhonani! Zwoṱhe ndi zwi ita zwiswa.” U dovha a ri: “Ṅwala, ngauri haya maipfi ndi a fulufhedzeaho a dovha a vha a ngoho.” Musi ri tshi huwelela mafhungo maḓifha nga u fhisea, ri sumbedza vhuthu vhuhulu ha Yehova.