Pfukelani kha mafhungo

Pfukelani kha zwi re ngomu

Naa Ni Vhona Zwi Zwa Ndeme U Ita Mvelaphanḓa Ya Lwa Muya?

Naa Ni Vhona Zwi Zwa Ndeme U Ita Mvelaphanḓa Ya Lwa Muya?

“Bvela phanḓa u tshi ita vhuḓidini ha u vhalela vhaṅwe khagala, u tshi ṱuṱuwedza, u tshi funza.”—1 TIM. 4:13.

NYIMBO: 45, 70

1, 2. (a) Luṅwalo lwa Yesaya 60:22 lu khou ḓadzea hani kha ano maḓuvha a vhufhelo? (b) Ndi ṱhoḓea dzifhio dzine dza vha hone ndanguloni ya Yehova?

“KHA a re muṱuku hu ḓo bva maḓana a ná fumi, muheḓana u ḓo vha lushaka luhulu.” (Yes. 60:22) Enea maipfi a vhuporofita a khou ḓadzea kha ano maḓuvha a vhufhelo. Nga ṅwaha wa tshumelo wa 2015, ho vha hu na vhahuweleli vha Muvhuso vha 8 220 105 vhe vha huwelela ḽifhasini ḽoṱhe. Tshipiḓa tsha u fhedza tsha honoho vhuporofita tshi fanela u kwama Vhakriste vhoṱhe ngauri Khotsi ashu wa ṱaḓulu u ri: “Nṋe Yehova ndi ḓo ṱavhanya u bveledza zwenezwo nga tshifhinga tshazwo.” U fana na vhaṋameli vha re goloini ine ya khou gidima nga luvhilo, na mushumo wa u ita vhafunziwa u khou engedzea nga u ṱavhanya. Ri aravha hani kha u ṱavhanyiswa ha wonoyo mushumo? Naa ri khou ita zwoṱhe zwine ra nga kona sa vhahuweleli vha Muvhuso vha fhiseaho? Vhahashu vhanzhi vha khou shuma sa vhavulanḓila vha tshifhinga tshoṱhe kana vha u thusa. Ri a takalela u vhona vhathu vhanzhi vha tshi ya kha maṅwe mashango u itela u shuma hu re na ṱhoḓea khulwane kana vha tshi shela mulenzhe kha u fhaṱa Holo dza Muvhuso.

2 Nga hu fanaho, hu na ṱhoḓea ya vhashumi vho engedzeaho. Ṅwaha muṅwe na muṅwe hu thomiwa zwivhidzo zwi ṱoḓaho u vha 2 000. Arali kha tshivhidzo tshiṅwe na tshiṅwe tshiswa ha nga vha  na vhahulwane vhaṱanu, vhashumeli vha 10 000 vha fanela u fanelea u vha vhahulwane ṅwaha muṅwe na muṅwe. Zwenezwi zwi amba uri hu ṱoḓea uri vhahashu vhanzhi vha fanelee u itela uri vha vhe vhashumeli. Zwiṅwe hafhu, hu sa londwi uri ri vhahashu vha tshinnani kana vha tshisadzini, ri na “zwinzhi zwine [ra] zwi ita mushumoni wa Murena.”—1 Vhakor. 15:58.

ZWINE U ITA MVELAPHANḒA YA LWA MUYA ZWA AMBA ZWONE

3, 4. U ita mvelaphanḓa ya lwa muya zwi amba mini kha inwi?

3 Vhalani 1 Timotheo 3:1. Ipfi ḽa Lugerika ḽine ḽa ri “ṱoḓa” ḽi amba u ṱoḓa zwi tshi bva mbiluni kana u hovhelela. Musi muapostola Paulo a tshi shumisa ḽeneḽo ipfi, o vha a tshi khou ombedzela uri u ita mvelaphanḓa ya lwa muya zwi ṱoḓa vhuḓidini. Edzani u humbula wahashu a tshi khou humbula nga ha u ṱoḓa u fanelea u vha mushumeli tshifhingani tshi ḓaho. A si mushumeli, fhedzi u ṱhogomela uri u fanela u ṱahulela pfaneleo dza lwa muya. Tsha u thoma, u ita vhuḓidini ha uri a fanelee u vha mushumeli. Nga u ya ha tshifhinga, u fulufhela uri u ḓo fanelea u vha muhulwane. Kha honohu vhuimo hoṱhe, u ita vhuḓidini ha uri a fanelee u hwala vhuḓifhinduleli ho engedzeaho ha tshivhidzo.

4 Nga hu fanaho, vhahashu vhane vha ṱoḓa u shuma sa vhavulanḓila, u vha miraḓo ya Bethele kana u fhaṱa Holo dza Muvhuso vha fanela u ita vhuḓidini ha u swikelela zwenezwo zwipikwa. Kha ri ṱolisise nḓila ine Bivhili ya nga ri ṱuṱuwedza ngayo roṱhe uri ri ite mvelaphanḓa kha vhurabeli ha ngoho.

LWELANI U ITA MVELAPHANḒA KHULWANE YA LWA MUYA

5. Vhaswa vha nga shumisa hani nungo dzavho tshumeloni ya Muvhuso?

5 Vhaswa vha na nungo na mutakalo wavhuḓi u itela u ita zwo engedzeaho tshumeloni ya Yehova. (Vhalani Mirero 20:29.) Vhaṅwe vhaswa vha re tshumeloni ya Bethele vha shuma u gandisa Bivhili na dziṅwe khandiso dza Bivhili. Vhaswa vhanzhi vha shela mulenzhe kha mushumo wa u fhaṱa na u ṱhogomela Holo dza Muvhuso. Musi hu na khombo dza mupo, vhaswa vha shuma na dziṅwe Ṱhanzi dzi re na tshenzhelo u itela u thusa. Nahone vhaswa vhanzhi vha vhavulanḓila vha guda dziṅwe nyambo kana vha ya kha maṅwe mashango u itela u huwelela mafhungo maḓifha.

6-8. (a) Muṅwe muswa o shandula hani mavhonele awe nga ha tshumelo ya Mudzimu, nahone ho vha na mvelelo ifhio? (b) Ri nga ‘thetshela na u vhona vhuthu ha Yehova’ nga nḓila-ḓe?

6 Ri zwi dzhia zwi zwa ndeme u shumela Mudzimu nga mbilu dzashu dzoṱhe. Fhedzi hu pfi mini arali ni tshi ḓipfa nga nḓila ye Aaron a vhuya a ḓipfa ngayo? Naho o alutshela muṱani wa Vhakriste, o ri: “U ya miṱanganoni na tsimuni zwo vha zwi tshi mbora.” O vha a tshi ṱoḓa u shumela Mudzimu o takala, fhedzi o ḓivhudzisa uri ndi ngani a songo takala. O ita mini?

7 Aaron o ḓivhetshela tshipikwa tsha u vhala Bivhili, u lugisela miṱangano na u fhindula miṱanganoni. Zwihuluhulu o thoma u rabela tshifhinga tshoṱhe. Musi a tshi vho funa Yehova nga ho engedzeaho, o thoma u ita mvelaphanḓa ya lwa muya. U bva tsheetsho, Aaron o takalela u vula nḓila, u shuma na vhaṅwe musi hu na khombo dza mupo na u huwelela kha maṅwe mashango. Zwino Aaron u shuma Bethele nahone ndi muhulwane wa tshivhidzo. U dzhia hani buḓo ḽe a ḽi khetha? U ri: “Ndo ‘thetshela na u vhona vhuthu ha Yehova.’ Nga nṱhani ha uri o mphaṱutshedza, ndi a mu livhuha nahone ndi ṱuṱuwedzea u ita zwo engedzeaho tshumeloni yawe, zwenezwi zwi ita uri ndi wane phaṱhutshedzo nnzhi.”

8 Mupsalme o imba a ri: “Vhané vha ṱoḓa Yehova, kha vhone a huna tshavhuḓi tshiné  vha tshi shaya.” (Vhalani Psalme ya 34:8-10.) Vhukuma, Yehova u fhaṱutshedza vhane vha mu shumela nga u fhisea. Ri ‘thetshela na u vhona vhuthu ha Yehova’ musi ri tshi ita zwoṱhe zwine ra nga kona u itela u mu shumela. Nahone musi ri tshi shumela Mudzimu nga mbilu yoṱhe, ri a takala vhukuma.

RI SONGO LAṰELA THAULA

9, 10. Ndi ngani zwi zwa ndeme kha inwi u “Iindela”?

9 Musi ni tshi ṱoḓa u swikelela zwipikwa zwaṋu, sumbedzani u “Iindela.” (Mixa 7:7) Yehova u dzula a tshi tikedza vhashumeli vhawe vha fulufhedzeaho naho nga zwiṅwe zwifhinga a tshi ṱoḓa uri vha lindele u itela u wana ndugelo. O vha o fulufhedzisa Abrahamu uri u ḓo vha na murwa, fhedzi Abrahamu o vha e na lutendo nahone ho ngo fhela mbilu. (Vhaheb. 6:12-15) Naho o lindela miṅwaha minzhi uri Isaka a bebwe, Abrahamu ho ngo laṱela thaula nahone Yehova o mu fhaṱutshedza.—Gen. 15:3, 4; 21:5.

10 A zwo ngo leluwa u lindela. (Mir. 13:12) Arali ri tshi dzula ri tshi humbulesa nga ha vhuimo hashu, ri nga kulea nungo. Nṱhani hazwo, zwi ḓo vha vhuṱali u shumisa tshifhinga tshashu u itela u ṱahulela pfaneleo dzine dza ṱoḓea uri ri fanelee u hwala vhuḓifhinduleli tshivhidzoni. Kha ri ṱhogomele nḓila tharu dza u ita nga u ralo.

11. Ndi pfaneleo dzifhio dza lwa muya dzine ra nga vha nadzo, nahone ndi ngani dzi dza ndeme?

11 Ivhani na pfaneleo dza lwa muya. U vhala Bivhili na u elekanya nga hayo, zwi ḓo ita uri ri ṱalifhe, ri pfesese, ri vhe na mavhonele avhuḓi, ri vhe na nḓivho, ri ṱalukanye na u vha na muhumbulo wo tshaho. Dzenedzo pfaneleo ndi dza ndeme kha vhane vha ranga phanḓa kha vhurabeli ha ngoho. (Mir. 1:1-4;  Tito 1:7-9) Nahone musi ri tshi vhala khandiso dzashu dzo thewaho Bivhilini ri nga pfesesa mavhonele a Mudzimu nga ha zwithu zwinzhi. Tshifhinga tshoṱhe ri shumisa zwine ra zwi guda u itela u dzhia phetho malugana na vhuḓimvumvusi, maambarele na u ḓilugisa, u shumisa tshelede na u tshilisana na vhaṅwe. Musi ri tshi shumisa zwine ra zwi guda Bivhilini, ri nga dzhia phetho dzine dza takadza Yehova.

12. Miraḓo ya tshivhidzo i nga sumbedza hani u fulufhedzea?

12 Shumani nga u fulufhedzea kha mushumo we na ṋewa. Hu sa londwi uri ri vha tshinnani kana vha tshisadzini, ri fanela u ita zwoṱhe zwine ra nga kona u itela u ita mushumo we ra ṋewa wone. Musi vhathu vha Mudzimu vha tshi fhaṱulula thembele, Nehemia o vha a tshi fanela u khetha vhanna vhane vha ḓo hwala vhuḓifhinduleli ho fhamba-fhambanaho. O khetha vhafhio? O khetha vhe vha vha vha tshi ofha Mudzimu na u fulufhedzea. (Neh. 7:2; 13:12, 13) Nga hu fanaho ṋamusi, “zwi lavhelelwaho kha vhalanda ndi uri vha wanwe vha tshi fulufhedzea.” (1 Vhakor. 4:2) Mishumo yavhuḓi i a dzhielwa nṱha.—Vhalani 1 Timotheo 5:25.

13. Ni nga edzisa hani tsumbo ya Yosefa arali vhaṅwe vha ni fara nga nḓila i si yavhuḓi?

13 Ḓitikeni nga Yehova. Ni nga ita mini arali vhaṅwe vha ni fara nga nḓila i si yavhuḓi? Khamusi ni nga vha vhudza nḓila ine na ḓipfa ngayo. Nga zwiṅwe zwifhinga, ni nga ṋaṋisa mafhungo arali na lingedza u ḓiimelela. Vhakomana vha Yosefa a vho ngo mu fara zwavhuḓi, fhedzi ho ngo vha fara nga mbilu. Nga murahu, vhathu vho amba mazwifhi nga ha Yosefa nahone a valelwa dzhele a songo tshinya. Naho zwo ralo, o tendela Yehova a tshi mu livhisa zwifhingani zwi konḓaho. Ho vha na mvelelo dzifhio? Bivhili i ri: ‘Maamba-Yehova o mu dzivhulusa.’ (Ps. 105:19) Musi yeneyo milingo yo no fhela, Yosefa o fanelea u ita mushumo wo khetheaho. (Gen. 41:37-44; 45:4-8) Musi no sedzana na milingo i konḓaho, rabelani uri ni wane vhuṱali, itani na u amba nga vhuthu nahone ni humbele Mudzimu uri a ni ṋee nungo. Yehova u ḓo ni thusa.—Vhalani 1 Petro 5:10.

ITANI MVELAPHANḒA VHUḒINḒANI HA TSIMU

14, 15. (a) Ndi ngani ri tshi fanela u ‘ṱhogomela nḓila ine ra funza ngayo’ musi ri tshi huwelela? (b) Ni nga shandula hani nḓila ine na huwelela ngayo? (Sedzani tshifanyiso tsha u thoma na bogisi “ Naa No Ḓiimisela U Lingedza Nḓila Ntswa?”)

14 Paulo o eletshedza Timotheo a ri: “Bvela phanḓa u tshi ita vhuḓidini ha u vhalela vhaṅwe khagala, u tshi ṱuṱuwedza, u tshi funza. . . . Ḓiṱhogomele, u dovhe u ṱhogomele na nḓila ine wa funza ngayo.” (1 Tim. 4:13, 16) Timotheo o vha e muhuweleli wa Muvhuso a re na tshenzhelo. Naho zwo ralo, vhuḓinḓa hawe ho vha hu tshi ḓo vhuyedza arali a ‘ṱhogomela nḓila ine a funza ngayo.’ Ho ngo dzhiela fhasi uri vhathu vha ḓo thetshelesa mulaedza une a khou u huwelela. U itela uri a bvele phanḓa a tshi swikelela mbilu dzavho, o vha a tshi fanela u funza zwine zwa tshimbidzana na zwine vha zwi shaya. Sa vhahuweleli vha Muvhuso, ri ṱoḓa u ita zwi fanaho.

15 Kanzhi ri wana vhathu vhe si ho mahayani musi ri tshi huwelela nnḓu nga nnḓu. Huṅwe fhethu a ri koni u dzhena miḓini ngauri magethe a vha o valiwa. Arali zwo ralo hune na huwelela hone, zwi nga vha zwavhuḓi u lingedza dziṅwe nḓila dza u huwelela mafhungo maḓifha.

16. Ri nga ṱanziela hani khagala nga nḓila i bvelelaho?

16 U ṱanziela khagala ndi iṅwe ya nḓila dzavhuḓi dza u phaḓaladza mafhungo maḓifha. Ṱhanzi nnzhi dzi khou huwelela nga hu bvelelaho kha wonoyo mushumo. Vha ḓivhetshela tshifhinga tsha u ya u amba na vhathu zwidimelani, vhuimabisi, mimakete, dziphakani na fhethu ha vhomuthumunzhi. Ṱhanzi i nga thoma nyambedzano na muthu nga  u amba nga ha zwine zwa khou itea kha mafhungo, u khoḓa vhana vhawe kana u vhudzisa mbudziso nga ha mushumo wawe. Musi vha tshi khou bvela phanḓa na nyambedzano yavho, muhuweleli a nga shumisa Luṅwalo nahone a lindela u pfa mavhonele awe. Nḓila ine muthu a aravha ngayo, i nga ita uri a ṱoḓe u ḓivha zwo engedzeaho nga ha Bivhili.

17, 18. (a) Ri nga vha hani na tshivhindi musi ri tshi ṱanziela khagala? (b) Ndi ngani ni tshi vhona nḓila ye Davida a renda ngayo Yehova i ya ndeme musi ni vhuḓinḓani?

17 Arali zwi tshi ni konḓela u ṱanziela khagala, ni songo laṱela thaula. Eddie ane a vha muvulanḓila wa ngei Amerika, o vha a tshi ofha u ṱanziela khagala. Nga u ya ha tshifhinga, o vha na tshivhindi. O thuswa nga mini? O ri: “Musi ri tshi ita vhurabeli ha muṱa, nṋe na mufumakadzi wanga ro ita ṱhoḓisiso nga ha zwine vhathu vha zwi hanedza na mavhonele avho. Ro dovha ra humbela nyeletshedzo kha dziṅwe Dziṱhanzi.” Zwino Eddie u vho takalela u ṱanziela khagala.

18 Musi ri tshi huwelela mafhungo maḓifha nga vhutsila na tshivhindi, vhaṅwe vha ḓo vhona mvelaphanḓa yashu ya lwa muya. (Vhalani 1 Timotheo 4:15.) Zwiṅwe hafhu, a zwi timatimisi uri ni ḓo renda Khotsi ashu wa ṱaḓulu u fana na Davida we a imba a ri: “Thi fhidzi u renda Yehova; thendo dzawe a dzi fheli mulomoni wanga. Muya wanga u zuwa Yehova; vhaheḓana nga vha zwi pfe vha takale.” (Ps. 34:1, 2) Ri nga kona u thusa muṅwe muthu uri a vhe mushumeli wa Yehova.

RENDANI MUDZIMU NGA U ITA MVELAPHANḒA YA LWA MUYA

19. Ndi ngani mushumeli wa Yehova a fulufhedzeaho a tshi fanela u takala naho o sedzana na zwiimo zwi konḓaho?

19 Davida o dovha a imba a ri: “Zwivhumbwa zwau zwoṱhe zwi livhuha Iwe Yehova, vhavhuya vhau vha a U renda. Vha amba vhurena ha vhuhosi hau, vha bula maanḓa mahulu au. Vha itela u ḓivhisa vhana vha vhathu maanḓa mahulu au na madzanga mahulu a vhuhosi hau.” (Ps. 145:10-12) Eneo maipfi a sumbedza nḓila ine Ṱhanzi dza Yehova dzi fulufhedzeaho dza ḓipfa ngayo. Fhedzi hu pfi mini arali thaidzo dza mutakalo kana u vha mulala zwi tshi ita uri ni si kone u shuma nga ho engedzeaho vhuḓinḓani? Dzulani ni tshi humbula uri musi ni tshi huwelela kha vhane vha ni ṱhogomela na vhaṅwe, tshumelo yaṋu i hulisa Yehova. Arali no valelwa dzhele nga nṱhani ha lutendo lwaṋu, ni nga vha ni tshi huwelela kha vhaṅwe musi zwiimo zwi tshi ni tendela nahone zwenezwo zwi takadza Yehova. (Mir. 27:11) Yehova u dovha a takala musi ni tshi mu shumela naho miraḓo ya muṱa waṋu i sa mu shumeli. (1 Pet. 3:1-4) Naho no sedzana na zwiimo zwi konḓaho, ni nga renda Yehova, u sendela tsini nae na u ita mvelaphanḓa ya lwa muya.

20, 21. Ni nga vhuyedza hani vhaṅwe, arali ni na vhuḓifhinduleli ho engedzeaho ndanguloni ya Yehova?

20 Yehova u ḓo ni fhaṱutshedza arali na bvela phanḓa ni tshi ita mvelaphanḓa ya lwa muya. Khamusi ni nga ita tshanduko dzi si gathi vhutshiloni haṋu, u itela uri ni kone u shela mulenzhe kha u vhudza vhaṅwe mafhungo maḓifha a Mudzimu. Zwiṅwe hafhu, mvelaphanḓa yaṋu ya lwa muya na u ḓidzima haṋu zwi nga vhuyedza vhatendi nga inwi nga nḓila khulwane. Nga nṱhani ha vhuḓidini vhune na vhu ita tshivhidzoni, vhahaṋu vha ḓo ni funa, u livhuha na u ni tikedza.

21 Roṱhe ri nga ita mvelaphanḓa ya lwa muya hu sa londwi uri ri na miṅwaha minzhi kana miṅwedzi i si gathi ri tshi khou shumela Yehova. Fhedzi Vhakriste vha re na tshenzhelo vha nga thusa hani Vhakriste vhaswa u ita mvelaphanḓa ya lwa muya? Ri ḓo haseledza nga ha eneo mafhungo kha thero i tevhelaho.