Pfukelani kha mafhungo

Pfukelani kha zwi re ngomu

 NGUDO 18

Ri Thusa Hani Vhahashu Vho Tsikeledzeaho?

Ri Thusa Hani Vhahashu Vho Tsikeledzeaho?

Riphabuliki ya Dominica

Dzhapani

Haiti

Musi hu tshi vha na khombo dza mupo, Ṱhanzi dza Yehova vha mbo ḓi ṱavhanya vha ita nzudzanyo u itela u thusa vhahavho vho welwaho nga khombo dzo raloho. Vhuḓidini ho raloho vhu sumbedza uri ri funana zwi tshi bva mbiluni. (Yohane 13:34, 35; 1 Yohane 3:17, 18) Ri thusa nga nḓila-ḓe?

Ri ṋeela nga tshelede. Musi ho wa nḓala khulu ngei Yudea, Vhakriste vha u thoma ngei Antiokia vho rumela vhahavho vha muya tshelede. (Mishumo 11:27-30) Nga hu fanaho, musi ri tshi pfa uri vhahashu kha tshiṅwe tshipiḓa tsha shango vho sedzana na maṱhupho, ri vha rumela miṋeelo ri tshi shumisa zwivhidzo zwashu uri hu thuswe vhane vha shaya vhukuma.—2 Vha-Korinta 8:13-15.

Ri vha ṋea zwithu zwine zwa nga vha thusa. Vhahulwane vha re fhethu he khombo ya itea hone vha ṱoḓa muraḓo muṅwe na muṅwe wa tshivhidzo u itela uri vha vhe na vhungoho ha uri vhoṱhe vho tsireledzea. Komiti ya u phalala i nga dzudzanya uri hu rumelwe zwiḽiwa, maḓi o kunaho a u nwa, zwiambaro, vhudzulo na thuso ya zwa mishonga. Ṱhanzi nnzhi dzi re na vhutsila vhu ṱoḓeaho dzi nga shumisa tshelede yadzo u itela u ya henefho fhethu nahone dza shela mulenzhe kha u phalala kana u lugisa nnḓu dzo tshinyalaho na Holo dza Muvhuso. Vhuthihi vhune ra vha naho sa ndangulo na tshenzhelo ye ra i wana nga u shuma roṱhe zwi ita uri ri kone u dzudzanya zwithu zwa u phalala nga u ṱavhanya nga zwifhinga zwo raloho. Naho ri tshi thusa “vha re vha nnḓu nthihi na riṋe nga lutendo,” ri thusa na vhaṅwe musi zwi tshi konadzea, hu sa londwi vhurereli havho.—Vha-Galata 6:10.

Ri vha khuthadza nga lwa muya na u vha tikedza nga lwa maḓipfele. Vhathu vho welwaho nga khombo vha ṱoḓa khuthadzo nga maṱo matswuku. Nga zwifhinga zwo raloho, ri wana nungo kha Yehova, “Mudzimu wa u kwengweledza hoṱhe.” (2 Vha-Korinta 1:3, 4) Vho fulufhuwaho ri vha vhudza nga ha mafulufhedziso a Bivhili nga dakalo, ra vha fulufhedzisa uri hu si kale Muvhuso wa Mudzimu u ḓo fhelisa khombo dzoṱhe dzine dza bveledza vhuṱungu na tshengelo.—Nzumbululo 21:4.

  • Ndi ngani Ṱhanzi dza Yehova vha tshi kona u thusa nga u ṱavhanya musi hu na khombo?

  • Vho ponyokaho ri vha khuthadza hani nga lwa muya?