Pfukelani kha mafhungo

Pfukelani kha zwi re ngomu

 NGUDO 6

U Kuvhangana Na Vhakriste Nga Riṋe Zwi Ri Vhuyedza Hani?

U Kuvhangana Na Vhakriste Nga Riṋe Zwi Ri Vhuyedza Hani?

Madagascar

Norway

Lebanoni

Italia

Ri ya miṱanganoni yashu ya Vhukriste misi yoṱhe naho zwi tshi nga ṱoḓa uri ri tshimbile ḓakani ḽo pinzanaho kana u konḓelela mutsho u si wavhuḓi. Hu sa londwi khaedu dza vhutshilo na maneto nga murahu ha mushumo wa ḓuvha, ndi ngani Ṱhanzi dza Yehova vha tshi ita vhuḓidini ho raloho ha u kuvhangana na vhatendi ngavho?

Zwi ita uri ri takale. Musi muapostola Paulo a tshi amba nga ha vhane ra kuvhangana navho tshivhidzoni, o ri: “Kha ri sedzane nga tshashu.” (Vha-Heberu 10:24) Eneo maipfi a amba u “humbula nga vhuronwane,” ndi uri u ḓivhana. Nga zwenezwo, maipfi a onoyo muapostola a ri ṱuṱuwedza uri ri kwamee nga vhaṅwe. Arali ra ḓivha miṅwe miṱa ya Vhakriste, ri ḓo ṱhogomela uri vhaṅwe vhavho vho kunda khaedu dzi fanaho na dzashu na uri vha nga ri thusa uri ri bvelele.

Zwi ita uri ri vhe na vhushaka ho khwaṱhaho. Vhahashu vhane ra kuvhangana navho miṱanganoni yashu, ndi khonani dzashu khulwane, a si vhathu vhe ra sokou vha ḓowela. Nga zwiṅwe zwifhinga, ri ḓiphina navho nga vhuḓimvumvusi vhu homolosaho. Honoho u kuvhangana hu vhuyedza hani? Ri guda u dzhielana nṱha nahone zwenezwo zwi khwaṱhisa mbofho dzashu dza lufuno. Nga zwenezwo, musi vhahashu vha tshi sedzana na thaidzo, ri ṱavhanya ra vha thusa nga ṅwambo wa vhushaka ho khwaṱhaho he ra vhu ṱahulela. (Mirero 17:17) Musi ri tshi kuvhangana na miraḓo yoṱhe ya tshivhidzo tshashu, ri sumbedza uri ri a “vhavhalelana.”—1 Vha-Korinta 12:25, 26.

Ri ni ṱuṱuwedza uri ni khethe khonani dzine dza ita zwi funwaho nga Mudzimu. Khonani dzo raloho ni ḓo dzi wana vhukati ha Ṱhanzi dza Yehova. Nga khumbelo ni songo tendela naho tshi tshini tshi tshi ni thivhela u kuvhangana na riṋe.

  • Ndi ngani zwi tshi ri vhuyedza u kuvhangana roṱhe miṱanganoni?

  • Ni nga takalela lini u ḓa tshivhidzoni tshashu?