Pfukelani kha mafhungo

Pfukelani kha zwi re ngomu

 NGUDO 3

Mafhungo-ngoho A Bivhili O Dovha A Dzumbululwa Nga Nḓila-ḓe?

Mafhungo-ngoho A Bivhili O Dovha A Dzumbululwa Nga Nḓila-ḓe?

Vhagudi vha Bivhili nga vho-1870

Khandiso ya u thoma ya Tshiingamo nga 1879

Tshiingamo ṋamusi

Bivhili yo dzula yo amba uri musi Kristo o no fa, hu ḓo bvelela vhafunzi vha mazwifhi vhukati ha Vhakriste vha u thoma nahone vha ḓo tshinya mafhungo-ngoho a Bivhili. (Mishumo 20:29, 30) Zwenezwo ndi zwe zwa itea nga u ya ha tshifhinga. Vho vanganya pfunzo dza Yesu na mihumbulo ya vhuhedeni ya vhurereli, nahone ha thoma Vhukriste ha mazwifhi. (2 Timotheo 4:3, 4) Ri nga vha hani na vhungoho ha uri ṋamusi ri a pfesesa nga ho teaho zwine Bivhili ya funza zwone zwa vhukuma?

Ho swika tshifhinga tsha uri Yehova a dzumbulule ngoho. O amba uri nga ‘tshifhinga tsha vhufhelo, nḓivho i ḓo anda.’ (Daniele 12:4) Nga 1870, tshigwada tshiṱuku tsha vhaṱoḓi vha mafhungo-ngoho tsho ṱhogomela uri vhunzhi ha pfunzothendwa dza kereke dzo vha dzi sa tendelani na Maṅwalo. Nga zwenezwo, vha thoma u ṱoḓisisa u itela uri vha pfesese pfunzo dza u thoma dza Bivhili nahone Yehova a vha thusa u pfesesa maṅwalo.

Vhathu vha fulufhedzeaho vho guda Bivhili nga vhuronwane. Vhenevho Vhagudi vha Bivhili vha nga phanḓa hashu, vho shumisa maitele a u guda Bivhili ane ra kha ḓi a shumisa ṋamusi. Vho vha vha tshi haseledza Bivhili thero nga thero. Musi vha tshi ṱangana na mafhungo a Bivhili ane a konḓa u pfesesea, vho vha vha tshi ṱoḓa dziṅwe ndimana dzine dza a ṱalutshedza. Musi vha tshi swika kha phetho ine ya tshimbidzana na Maṅwalo oṱhe, vho vha vha tshi ṅwala fhasi. Nge vha tendela Bivhili i tshi ḓiṱalutshedza, vho dovha vha dzumbulula ngoho nga dzina ḽa Mudzimu na Muvhuso, ndivho yawe nga ha vhathu na ḽifhasi, vhuimo ha vhafu na fulufhelo ḽa mvuwo. Ṱhoḓisiso yavho yo vha vhofholola kha pfunzo na mikhuvha minzhi ya mazwifhi.—Yohane 8:31, 32.

Nga 1879 Vhagudi vha Bivhili vho zwi ṱhogomela uri tshifhinga tsho swika tsha uri vha phaḓaladze mafhungo-ngoho. Nga wonoyo ṅwaha, vha thoma u gandisa magazini une wa pfi Tshiingamo Tshi Ḓivhadzaho Muvhuso wa Yehova une ra kha ḓi u phaḓaladza na ṋamusi. Zwino ri vhudza vhathu mafhungo-ngoho a Bivhili mashangoni a fhiraho 240 nga nyambo dzi fhiraho 750. Nḓivho ya ngoho a i athu vhuya ya anda u fhira nḓila ine ya vha ngayo zwino!

  • Musi Kristo o no fa, ho itea mini nga mafhungo-ngoho a Bivhili?

  • Ndi mini zwe zwa ita uri ri kone u dovha ra dzumbulula mafhungo-ngoho a Ipfi ḽa Mudzimu?