Pfukelani kha mafhungo

Pfukelani kha zwi re ngomu

 NGUDO 5

Ndi Mini Zwine Na Ḓo Zwi Ṱhogomela Miṱanganoni Yashu Ya Vhukriste?

Ndi Mini Zwine Na Ḓo Zwi Ṱhogomela Miṱanganoni Yashu Ya Vhukriste?

Argentina

Sierra Leone

Belgium

Malaysia

Vhathu vhanzhi vho litsha u ya kerekeni nga ṅwambo wa uri a vha wani phindulo dza mbudziso dzavho dza ndeme vhutshiloni kana u khuthadzwa. Nga zwenezwo-ha, ndi ngani ni tshi tea u ya miṱanganoni yo dzudzanywaho nga Ṱhanzi dza Yehova? Ni ḓo wana mini henengei?

Dakalo ḽa u vha vhukati ha vhathu vha re na lufuno na vha ṱhogomelaho. Ḓanani ḽa u thoma ḽa miṅwaha, Vhakriste vho vha vho dzudzanywa nga zwivhidzo nahone vho vha vha tshi fara miṱangano u itela u gwadamela Mudzimu, u guda Maṅwalo na u ṱuṱuwedzana. (Vha-Heberu 10:24, 25) Musi vho kuvhangana, vho ḓipfa vhe vhukati ha khonani dza ngoho—vhahavho vha muya. (2 Vha-Thesalonika 1:3; 3 Yohane 14) Ri tevhela tsumbo yavho nahone ri takala u fana navho.

U vhuyelwa nga u guda nḓila ya u shumisa maitele a Bivhili. U fana na zwifhingani zwa Bivhili, vhanna, vhafumakadzi na vhana vha a kuvhangana vhoṱhe. Vhagudisi vha faneleaho vha shumisa Bivhili u itela u ri thusa u shumisa maitele ayo vhutshiloni hashu ha ḓuvha ḽiṅwe na ḽiṅwe. (Doiteronomio 31:12; Nehemia 8:8) Vhoṱhe vha nga shela mulenzhe kha khaseledzo na vhathetshelesi na kha u imba, zwa ita uri roṱhe ri kone u bula fulufhelo ḽashu ḽa Vhukriste.—Vha-Heberu 10:23.

Phaṱhutshedzo ya u khwaṱhiswa ha lutendo lwaṋu kha Mudzimu. Muapostola Paulo o vhudza tshiṅwe tsha zwivhidzo misini yawe a ri: “Ndo ṱulutshelwa u ni vhona uri . . . ndí vhukati haṋu ndi khuthadzwe-vho nga u tenda hashu roṱhe, haṋu na hangá.” (Vha-Roma 1:11, 12) U vha hone miṱanganoni na vhatendi nga riṋe zwi khwaṱhisa lutendo lwashu na u ḓiimisela u tshila vhutshilo ha Vhukriste.

Zwi nga vha zwavhuḓi uri ni ḓe musi ni tshi rambiwa muṱanganoni washu u tevhelaho wa tshivhidzo nahone ni vhone zwenezwi zwithu zwine ra khou zwi amba. No ṱanganedzwa nga mbilu tshena. Miṱangano yoṱhe ndi mahala—a hu na kose-kose.

  • Miṱangano yashu ya tshivhidzo i tevhela tsumbo ifhio?

  • Ri nga vhuyelwa hani nga u vha hone miṱanganoni ya Vhukriste?