Pfukelani kha mafhungo

Naa Ni Nga Takalela U Ḓivha Ngoho?

Naa Ni Nga Takalela U Ḓivha Ngoho?

NGOHO nga ha mini? Nga ha dziṅwe mbudziso dza ndeme dze vhathu vha dzi vhudzisa. Khamusi no no vhuya na ḓivhudzisa mbudziso dzi tevhelaho:

  • Naa Mudzimu u a ri londa zwa vhukuma?

  • Naa nndwa na tshengelo zwi ḓo vhuya zwa fhela?

  • Hu itea mini kha riṋe musi ri tshi fa?

  • Naa hu na fulufhelo nga vho faho?

  • Ndi nga rabela hani uri Mudzimu a pfe thabelo yanga?

  • Ndi nga wana hani dakalo vhutshiloni?

Ni nga ṱoḓa ngafhi phindulo dza dzenedzi mbudziso? Arali na ya kha dzilaiburari kana mavhengeleni a dzibugu, ni nga kha ḓi wana bugu nnzhi dzine dza vhonala dzi tshi nga dzi na phindulo. Naho zwo ralo, kanzhi dzenedzo bugu dzi a hanedzana. Dziṅwe dzi vhonala dzi tshi nga dzi khou amba ngoho, fhedzi dzi fhelelwa nga tshifhinga nga u ṱavhanya nahone dza vusuluswa kana dza dzhielwa vhudzulo nga dziṅwe.

Naho zwo ralo, hu na iṅwe bugu ine ya vha na phindulo dzi fulufhedzeaho. Yeneyo ndi bugu ine ya vha na mafhungo-ngoho. Yesu Kristo o rabela kha Mudzimu a ri: “Mafhungo au ndi a ngoho.” (Yohane 17:17) Ṋamusi ri a zwi ḓivha uri ḽeneḽo Ipfi ndi Bivhili Khethwa. Kha masiaṱari a tevhelaho, ni ḓo vhona phindulo dza Bivhili dzi pfalaho, dzi fulufhedzeaho dza mbudziso dzi re afho nṱha.

 Naa Mudzimu u a ri Londa Zwa Vhukuma?

ZWI ITAHO URI HU VHUDZISWE YENEYI MBUDZISO: Ri tshila shangoni ḽo ḓalaho tshiṱuhu, ḽi si na khaṱulokwayo. Vhurereli vhunzhi vhu funza uri Mudzimu ndi ene ane a ḓisa tshengelo ine ra sedzana nayo.

ZWINE ZWA FUNZWA NGA BIVHILI:

Mudzimu ha vhuyi a bveledza zwithu zwivhi. Yobo 34:10 i ri: “Mudzimu u kule na zwivhi; Mu-kona-zwoṱhe ha khakhi.” Mudzimu u na ndivho yavhuḓi nga ha vhathu. Ndi ngazwo Yesu o ri funza u rabela: “Khotsi-ashu wa ṱaḓulu! . . . Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:9, 10) Mudzimu u a ri londa nga maanḓa lwe a ḓidina u itela uri a ḓadzise mafulufhedziso awe.—Yohane 3:16.

Sedzani na Genesi 1:26-28; Yakobo 1:13; na 1 Petro 5:6, 7.

Naa nndwa na tshengelo zwi ḓo vhuya zwa fhela?

ZWI ITAHO URI HU VHUDZISWE YENEYI MBUDZISO:

Nndwa i bvela phanḓa i tshi vhulaha vhathu vhanzhi-vhanzhi. Roṱhe ri a pfa vhuṱungu musi ri tshi vhona vhathu vha tshi shengela.

ZWINE ZWA FUNZWA NGA BIVHILI:

Mudzimu u amba hu tshee nga phanḓa nga ha tshifhinga tshine a ḓo ita uri hu vhe na mulalo ḽifhasini ḽoṱhe. Nga fhasi ha Muvhuso wawe, une wa vha hulumeni wa ṱaḓulu, vhathu a vha “tsha ḓo guda u lwa.” Nṱhani hazwo, “dzinthi dzavho vha ḓo dzi ita khwea.” (Yesaya 2:4) Mudzimu u ḓo ita uri hu vhe na khaṱulokwayo nahone u ḓo fhelisa tshengelo yoṱhe. Bivhili i a fulufhedzisa: “[Mudzimu] U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela [u katela na u shayea ha khaṱulokwayo na tshengelo].”—Ndzumbululo 21:3, 4.

Sedzani na Psalme ya 37:10, 11; 46:9; na Mixa 4:1-4.

Hu Itea Mini Kha Riṋe Musi ri tshi Fa?

ZWI ITAHO URI HU VHUDZISWE YENEYI MBUDZISO:

Vhunzhi ha vhurereli ha shango vhu funza u ri hu na tshithu tshine tsha vha nga ngomu ha muthu tshine tsha bvela phanḓa tshi tshi tshila musi muvhili u tshi fa. Vhaṅwe vha tenda uri vhafu vha nga huvhadza vha tshilaho kana uri Mudzimu u ṱarafa vhavhi nga u vha haṱulela tshengeloni i sa fheli muliloni wa hele.

ZWINE ZWA FUNZWA NGA BIVHILI:

Musi vhathu vha tshi fa, a vha tsha vha hone. Muhuweleli 9:5 i ri: “Vho faho a vha na tshine vha tshi ḓivha.” Samusi vhafu vha sa koni u ḓivha, u pfa, kana u tshenzhela naho tshi tshini, vha nga si kone u vhaisa—kana u thusa—vha tshilaho.—Psalme ya 146:3, 4.

Sedzani na Genesi 3:19 na Muhuweleli 9:6, 10.

 Naa Hu Na Fulufhelo Nga vho Faho?

ZWI ITAHO URI HU VHUDZISWE YENEYI MBUDZISO:

Ri ṱoḓa u tshila nahone ri ṱoḓa u ḓiphina nga vhutshilo na vhane ra vha funa. Ndi zwa nzulele uri ri ṱulutshele u dovha ra vhona vhafunwa vhashu vho faho.

ZWINE ZWA FUNZWA NGA BIVHILI:

Vhunzhi ha vhathu vho faho vha ḓo vuswa. Yesu o fulufhedzisa uri ‘vha re zwaloni vha ḓo pfa ipfi ḽawe vha bvelela.’ (Yohane 5:28, 29) U tendelana na ndivho ya u thoma ya Mudzimu, vhane vha ḓo vuswa vha ḓo vha na tshibuli tsha u tshila kha ḽifhasi ḽa paradiso. (Luka 23:43) Honovhu vhumatshelo ho fulufhedziswaho vhu ḓo ita uri vhathu vha thetshelesaho vha vhe na mutakalo wo fhelelaho na vhutshilo vhu sa fheli. Bivhili i ri: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.”—Psalme ya 37:29.

Sedzani na Yobo 14:14, 15; Luka 7:11-17; na Mishumo 24:15.

Ndi Nga Rabela Hani uri Mudzimu a Pfe Thabelo Yanga?

ZWI ITAHO URI HU VHUDZISWE YENEYI MBUDZISO:

Vhathu kha kereke dzoṱhe vha a rabela. Fhedzi vhanzhi vha vhona u nga thabelo dzavho a dzi fhindulwi.

ZWINE ZWA FUNZWA NGA BIVHILI:

Yesu o ri funza uri ri iledze u dovholola maipfi musi ri tshi rabela. O ri: “Ni tshi rabela ni songo sokou amba-amba.” (Mateo 6:7) Arali ri tshi ṱoḓa uri Mudzimu a thetshelese thabelo dzashu, ri tea u rabela nga nḓila ine a i ṱanganedza. Zwenezwo ri ḓo zwi kona arali ra guda zwi funwaho nga Mudzimu nahone ra rabela u tendelana nazwo. Yohane ya U Thoma 5:14 i ri: “Arali ri tshi humbela tshithu tshiné Ene a funa tshi tshi vha hone, [Mudzimu] u a ri pfa.”

Sedzani na Psalme ya 65:2; Yohane 14:6, 14; na 1 Yohane 3:22.

Ndi Nga Wana Hani Dakalo Vhutshiloni?

ZWI ITAHO URI HU VHUDZISWE YENEYI MBUDZISO:

Vhathu vhanzhi vha tenda uri tshelede, bvumo, kana lunako zwi ḓo vha ita uri vha takale. Nga zwenezwo, vha tovhola zwenezwo zwithu—vha wana uri ndi u pandamedza muya.

ZWINE ZWA FUNZWA NGA BIVHILI: Yesu o ṱalula khoṋololo ya dakalo musi a tshi ri: “Mashudu, vhaheḓana muyani, ngauri muvhuso wa ṱaḓulu ndi wa vhenevho.” (Mateo 5:3) Dakalo ḽa ngoho ḽi nga wanala fhedzi arali ra dzhia vhukando ha u ḓadzisa tshishaiwa tshashu tshihulwanesa, tshine tsha vha u ṱoḓa u ḓivha Mudzimu na ndivho ye a ri vhetshela yone. Yeneyo ndi ngoho ine ya wanala Bivhilini. U ḓivha yeneyo ngoho zwi nga ri thusa uri ri pfesese zwine zwa vha zwa ndeme vhukuma na zwi si zwa ndeme. U tendela mafhungo-ngoho a Bivhili a tshi livhisa phetho dzashu na vhukando hashu zwi ita uri ri vhe na ndivho vhutshiloni.—Luka 11:28.

Sedzani na Mirero 3:5, 6, 13-18 na 1 Timotheo 6:9, 10.

 Ro tou haseledzanyana nḓila ine Bivhili ya fhindula ngayo mbudziso dza rathi. Naa ni ṱoḓa u ḓivha zwo engedzeaho? A zwi timatimisi uri ni a zwi ṱoḓa arali ni ‘muheḓana muyani.’ Ni nga kha ḓi ḓivhudzisa dziṅwe mbudziso dzi ngaho: ‘Arali Mudzimu a tshi ri londa, ndi ngani o tendela vhuvhi na tshengelo nnzhi nga u rali kha ḓivhazwakale yoṱhe? Ndi nga khwinisa hani vhutshilo ha muṱa wanga?’ Bivhili i fhindula nga vhuḓalo na nga nḓila i fushaho dzenedzi mbudziso na dziṅwe nnzhi-nnzhi.

Naho zwo ralo, vhanzhi ṋamusi vha a timatima u vhala Bivhili. Vha i dzhia i bugu khulwane ine nga zwiṅwe zwifhinga zwa konḓa u i pfesesa. Naa ni nga takalela u wana phindulo Bivhilini? Ṱhanzi dza Yehova vha nga ni ṋea zwishumiswa zwivhili zwine zwa nga ni thusa.

Tsha u thoma, bugu Bivhili I Funza Mini Zwa Vhukuma? yo itelwa u thusa vhathu vho farakaneaho uri vha ṱolisise phindulo dzi pfalaho dza Bivhili dza mbudziso dza ndeme. Tshishumiswa tsha vhuvhili ndi mbekanyamushumo ya mahala ya pfunzo ya Bivhili ya hayani. Muṅwe wa Ṱhanzi dza Yehova ane a kona u gudisa Bivhili, ane a dzula vhuponi haṋu, a nga ni dalela hayani haṋu kana huṅwe fhethu ho ni teaho na fhedza tshifhinga tshiṱuku vhege iṅwe na iṅwe a tshi khou haseledza na inwi Bivhili nga fhedzi. Vhathu vhanzhi-vhanzhi shangoni ḽoṱhe vho vhuyelwa nga yeneyi mbekanyo. Vhunzhi havho vho phetha nga ḽa uri: “Ndo wana ngoho.”

Lwonolwo ndi lupfumo luhulwane u fhira lwoṱhe lu re hone. Mafhungo-ngoho a Bivhili a ri vhofholola kha u tenda zwi siho, u ḓaḓa, na nyofho yo kalulaho. A ri ṋea fulufhelo, ndivho na dakalo. Yesu o ri: “Ndi hone ni tshi ḓo ḓivha mafhungo-ngoho, huno mafhungo-ngoho a ḓo ni vhofholola.”—Yohane 8:32.